Ohi ku Ubáyíbu

 Ehee, ɛjɛɛji ɔwɛ ō gba ɛ̄gbā i wɛ ekponu nóó. Ubáyíbu kɛla lɛyikwu ɔwɛ ō gba ɛ̄gbā alɛwa nōó he Ɔwɔico ɔtu ŋ. Ɔwɛ ō gba ɛ̄gbā nōó he Ɔwɔico ɔtu ŋ ma lɛ aya ɛpa.

Aya 1: Ō gba aɔwɛ ɛkɛmgbɛ ɛ̄gbā

 Ubáyíbu da alɔ ku ɛ̄gbā ō gba ku ɛkɛmgbɛ “í tīile dúúmā ŋ́.” (Ujɛrɛmíya 10:​3-5) Ujehofa a da éwo ku ācɛ Isrɛlu ku ikee a kahinii: “Aá gáā lɛ aɔ́wɔ ɔhá gwū um tá ŋ́.” (Oōyɛbɛ̄ɛcɛ 20:​3, 23; 23:24) Eko nɛ ācɛ Isrɛlu gbɔɔ ō gba aɔwɔ ɔhá ɛ̄gbā a, “[Ujehofa] Óndú ā kwú cɔ̄nū mla uwá nɛ̄hi.”​—Áluka 25:3; Ulīfayi 20:2; Ācohɛ́pɔ̄ 2:​13, 14.

 Icɛ, Ɔwɔico gē cɔnu mla ācɛ nōo gē gba “aɔ́wɔ” ɛ̄gbā a duu. (1 Ācɛ Ukɔ́rīnti 8:​5, 6; Ācɛ Ugalésīya 4:8) Ɔwɔico da ācɛ nōo dɔka ō gba ɔ ɛ̄gbā a kéē hii piyatɔha mla ācɛ nōo gē gba ɛ̄gbā ɛkɛmgbɛ a ŋ. Ó da uwa kahinii: “Aá le bɛ̄cɛ ŋmá ipú ācɛ nēé cɛ̄ɛ̄lā Ɔwɔicō ŋ́ mā ká aá le fō í bá ɛgɛyɛ́yí.” (2 Ācɛ Ukɔ́rīnti 6:​14-​17) Ɔdaŋ ka ɛjɛɛji ɔwɛ ō gba ɛ̄gbā wɛ ekponu, nɛ ɛjɛɛji uwa gē gba Ɔwɔico ɔwɛ okpaakpa a, ɔdiya nɛ Ɔwɔico je ɛdɔ ku íne ɛgɛnyā a?

Aya 2: Ō gba Ɔwɔico ɔkwɛyi ɛ̄gbā ɔwɛ nōó he ɔ ɔtu ŋ

 Ekoohi, ācɛ Isrɛlu gē bi ucolo ku ɛ̄gbā ō gba ku ɛkɛmgbɛ le gba Ɔwɔico ɛ̄gbā, amáŋ Ujehofa i miyɛ ɛ̄gbā ō gba ku uwa nyā ŋ. Ó kē lɛ a, ohigbu ka é lɛ ɛ̄gbā ō gba ku ɔkwɛyi piyatɔha mla ɛ̄gbā ō gba ku ɛkɛmgbɛ. (Oōyɛbɛ̄ɛcɛ 32:8; Oblatūkíne 12:​2-4) Ujisɔsi lɛ aotrɛyi ku ɛ̄gbā ō gba eko ku nu a ŋmo ɛpɔbi ohigbu ɔwɛ néē gē gba Ɔwɔico ɛ̄gbā a; é gē mafu lɛ ācɛ ku aa gē gba Ɔwɔico ɛ̄gbā, naana kpɔ a, é “lɛ eyī gwū ɛlā ocɛgbá kú íne ā, bɛ̄ɛka ɛpɔ̄ okpaakpa mɛ́mla eyīnyinyi mɛ́mla ɔkwɔ̄ɔ̄kwɛ̄yi ā tá.”​— Umátiyu 23:23.

 Icɛ duu, ɔwɛ ō gba ɛ̄gbā nōo gē nwu ɛlā ɔkwɛyi a foofunu gē gba Ɔwɔico ɔwɛ okpaakpa a. Ɛlā ɔkwɛyi nyā kē yɔ ipu Ubáyíbu. (Ujɔ́ni 4:​24; 17:17; 2 Utímōti 3:​16, 17) Ɔwɛ ō gba ɛ̄gbā nōo gē nwu aɛlā nōó yɔ ipu Ubáyíbu ŋ ma, gē ya ku ācɛ kéē kwu ŋma ɛgiyi Ɔwɔico. Aɛlā ō nwu alɛwa nɛ ācɛ gbɛla kóō ŋma ipu Ubáyíbu a ba yɔ a—aɔdee bɛɛka u Ɔwɔico ɛta ipu éyi, odo i gē kwū ŋ, mla ipu ɔlá—ɛjɛɛji ɛlā ō nwu nyā wa ŋma ɛ̄gbā ō gba ku ɛkɛmgbɛ. Ɛ̄gbā ō gba duuma nōo ge nwu aɛlā ɛkɛmgbɛ ɛgɛnyā ‘i tiile duuma ŋ,’ ohigbu kéē lɛ ɛlā nɛ Ɔwɔico tine a piyabɔ mla ɔdā nɛ alɛɛcɛ gē nwu a.​— Umáki 7:​7, 8.

 Ɔwɔico i dɔka ɔwɛ ō gba ɛ̄gbā nōo leyi ɛpa ŋ. (Utáyítɔ̄si 1:​16) Ɔwɛ ō gba ɛ̄gbā ɔkwɛyi gē ta ācɛ abɔ tubla Ɔwɔico. Ɔwɛ ō gba ɛ̄gbā ɔkwɛyi klla gē ta ācɛ abɔ ya ōmiya olɔhi ipu oyeeyi ku uwa ɛ̄cī doodu, ó wɛ ō yɔ i yɛce ucolo mla ɛlā nɛ ācɛ gē nwu a icici ŋ. Ocabɔ mafu, Ubáyíbu kahinii: “Ɔ̄cɛ dúúmā gbɛlá ka anúɔ ī gbā Ɔwɔicō ɛ̄gbā íbí īī? Ɔ̄cɛ ɔ́ɔmā kóō lɛ ɛlā nōo gē ka ā kwútū, ámáŋ ó ī yá iyīnū bɛ̄ɛka olíla ā, cɛ́ɛ́ ɛ̄gbā nɛ̄ ó gē gbā Ɔwɔicō ā kwú pīya áncā. Ɔdā nɛ̄ Ɔwɔicō ádā je kóō wɛ ɛ̄gbā-ōgbā olɔhi dúúdú nōó lɛ ɛnyá ŋ́ mā yɔ̄ á, ká aá tá anyōkwū mɛ́mla ayōkwū abɔ̄ ipú ōwē nɛ̄ é bá yɔ̄ ī má ā. Ɔ̄cɛ ā géē lɛ iyínu tū ŋmá ɔdōbɔ̄bí kú ipú ɛcɛ nyā ā.” (Ujɛ́mīsi 1:​26, 27) Ubáyíbu ku King James Version bi ɛlā nōo wɛ “ɛ̄gbā ō gba oyeŋee” le kɛla lɛyikwu ɔwɛ ō gba ɛ̄gbā ɔkwɛyi nōó leyi ɛpa ŋ.