Ohi ku Ubáyíbu

 Ii, ohigbu ka Ɔwɔico dɔka ku alɔ gba ɔ ɛ̄gbā tɔha. Ubáyíbu kahinii: “Ālɔ̄ gbɛlá ɔwɛ nɛ̄ alɔ í tá aɔ́mpa alɔ ɔtū kwu ɔtū, cɛ́ɛ́ ká ālɔ̄ yíihɔtū tá ācɛ ɔhá mɛ́mla o yá kéē yúklɔ́ olɔhi, ālɔ̄ híī habɔ̄ ucē kóō tū iyī alɔ bá tɔ̄há ā tá ŋ́.”​—Ācɛ Uhíbru 10:24, 25.

 Ujisɔsi mafu ka ayikpo ku nu géē wɛ ipu ɔwɛ ō gba ɛ̄gbā nɛ ōmiya ku nu gē nyɔ mɛɛlɛ a, eko nɛ ó da uwa kahinii: “Ɔ́dāŋ́ ka aá gē yíihɔtū tá iyī aá, cɛ́ɛ́ ācɛ géē jé ka aá wɛ ayíkpó kú um.” (Ujɔ́ni 13:35) O ya ɛɛ ka ayikpo ku nu kéē mafu ihɔtu nyā, é cɛgbá opiyatɔha mla iyi uwa. É géē wɛ ipu ujɔ nōo gē jila tɔha eko doodu, o ya ɛɛ kéē gba Ɔwɔico ɛ̄gbā. (1 Ācɛ Ukɔ́rīnti 16:19) Ɛjɛɛji uwa géē piyatɔha ō wɛ ayinɛ ekponu ipu oduudu ɛcɛ.​—1 Upíta 2:​17.

Ō wɛ ipu ɔwɛ ō gba ɛ̄gbā foofunu i jɛ ŋ

 Ubáyíbu mafu lɛ alɔ ku alɔ cika ō jila tɔha ō gba Ɔwɔico ɛ̄gbā a. Amáŋ Ubáyíbu i nwu ku ɔcɛ géē ya ɔdā nōo he Ɔwɔico ɔtu foofunu ŋma lɛ ō wɛ ipu ɔwɛ ō gba ɛ̄gbā anca ŋ. O ya ɛɛ ku ɔtu kóō he Ɔwɔico, ɔwɛ ō gba ɛgbā ku ɔcɛ cika ō lɛ abɔ kwu oyeeyi ku ɛ̄cī doodu ku nu. Ocabɔ mafu, Ubáyíbu kahinii: “Ɔdā nɛ̄ Ɔwɔicō ádā je kóō wɛ ɛ̄gbā-ōgbā olɔhi dúúdú nōó lɛ ɛnyá ŋ́ mā yɔ̄ á, ká aá tá anyōkwū mɛ́mla ayōkwū abɔ̄ ipú ōwē nɛ̄ é bá yɔ̄ ī má ā. Ɔ̄cɛ ā géē lɛ iyínu tū ŋmá ɔdōbɔ̄bí kú ipú ɛcɛ nyā ā.”​—Ujɛ́mīsi 1:​27.