OKLƆCƐ ƆMƐ 3
Yuklɔ Mla Ɔka Ō Da
Umátiyu 16:13-16
ƆDĀ NƐ A CIKA Ō YA: Da ɔka nōo géē ya ku ɛlā nɛ a yɔ i ka a kóō lɔɔnyɛ ō po, ku ɔtu ku ācɛ nōo yɔ i jahɔ gā uwɔ a kóō kwu ɛlā ku uwɔ, kóō ta uwa abɔ gbo juju ta ɛlā a, kóō klla ya ku aɛlā ō cɛgbá a kóō bɛcɛ peee.
ƐGƐ NƐ A GÉĒ YA Ɔ A:
-
Ya ku ɛlā ku uwɔ kóō ŋmo unwu kóō klla ya ku ɔtu ku ācɛ nōo yɔ i jahɔ gā uwɔ a kóō kwu ɛlā nɛ a yɔ i ka a. Da ācɛ nōo yɔ i jahɔ gā uwɔ a ɔka nōo géē ya kéē gbɛla lɛyikwu ɔdā nɛ a yɔ i ka a, amāŋ, nōo géē ya ku ohi ku ɔka a kóō ŋmo uwa unwu ō jé.
-
Ya kéē gbo juju ta ɛlā ku uwɔ. Ta ācɛ nōo yɔ i jahɔ gā uwɔ a abɔ kéē yɛce ɔwɛ ɛgɛ nɛ a yɔ i je ɛlā a ta eyī peee a, oŋma lɛ ō da uwa ɔka ɛyɛɛyɛyi nōo géē ya kéē jé ohi okpaakpa ku ɔka a.
-
Lɛ aɛlā nōo cɛgbá a bi wɛɛcɛ peee. Ɔdaŋ ku a gáā gbɔɔ ɛlā ō ka lɛyikwu ɛlā okpɔcii éyi, da ācɛ nɛ a yɔ i kɛla lɛ uwa a ɔka nōo géē ya ku ɛlā okpɔcii ɔɔma kóō ŋmo uwa unwu ō po. Eko duuma nɛ a lɛ ɛlā ō cɛgbá nɛhi éyi ka mɛ, amāŋ, nɛ a yɔ i dɔka ō lɛ ɛlā ō ka ku uwɔ ŋmɛyi, da uwa ɔka nōo géē ta uwa ɛlá kwu ɔdā néē nwu a.
