Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 TOPIK RANDAU | NUAN ULIH MERETIKA BUP KUDUS

Bup ke Ulih Dimeretika

Bup ke Ulih Dimeretika

Bup Kudus udah lama bisi. Ni pengelama iya? Bup Kudus berengkah ditulis ba Timur Tengah kira-kira 3,500 taun kelia. Tu serebak enggau maya perintah Raja Shang megai menua China, tauka maya kira-kira sepuluh kurun sebedau pengarap Buddha berengkah ba menua India.—Peda kutak “ Penerang Pasal Bup Kudus.”

Bup Kudus ngembuan saut ti ngemuaska ati ngagai tanya ti pemadu beguna ba pengidup

Ngambika siti-siti bup ulih nulung sereta ngiring orang, bup nya patut ulih dimeretika sereta ulih dikena orang. Bup Kudus enda baka bup bukai. Iya ngembuan saut ti ngemuaska ati ngagai tanya ti pemadu beguna ba pengidup.

Ngambika chunto, kala nuan berunding, ‘Nama tuju pengidup?’ Beribu taun tanya tu udah ngasuh orang bingung, indah nyentuk ke diatu. Tang, saut nya ulih ditemu ba dua iti bab keterubah bup Pemungkal, dalam Bup Kudus. Dua iti bab tu nyebut pasal “pun iya kelia”—bebiliun taun kelia menya—lebuh dunya raya kitai, nyengkaum galaksi, bintang, enggau bumi, berengkah digaga. (Pemungkal 1:1) Udah nya, iya nerangka renggat tiap iti utai ke digaga; baka ni dunya ulih nyadi alai endur diau, baka ni mayuh macham utai idup berengkah bisi, lalu baka ni mensia tau bisi ba dunya—nyengkaum kebuah Petara ngaga semua utai tu.

UTAI TI DITULIS ULIH DIMERETIKA

Bup Kudus meri jaku lalau ke ulih dikena kitai mutarka penanggul ninting hari. Jaku lalau nya senang dimeretika. Tu ulih dipeda ari dua iti kebuah tu.

Kesatu, jaku ke dikena ba Bup Kudus terang, nyentuk, sereta narit ati. Ari ke ngena mayuh leka jaku ke dalam reti tauka nyelai, Bup Kudus ngena leka jaku ke nyentuk, lalu bekaul enggau runding sereta asai ati kitai. Penemu ke dalam ba Bup Kudus dikenataika ngena leka jaku ke selalu dikena kitai ninting hari.

Chunto, Jesus ngena mayuh jaku sempama ti senang ke bekaul enggau pengidup orang ninting hari, ngambika utai ti diajar iya ulih masuk ba ati orang. Mayuh ari jaku sempama tu ulih dipeda ba ajar ke suah dikumbai orang Ajar ba Atas Bukit. Tu bisi ditulis ba bab 5 ngagai 7 bup Matthew, dalam Bup Kudus. Bisi seiku orang madahka, Ajar ba Atas Bukit nya “ajar ke ulih dikena.” Iya beratika, tuju ajar nya “ukai dikena ngisi runding kitai enggau penemu aja, tang dikena ngiring sereta ngatur pengawa kitai.” Nuan  ulih macha bab nya dalam kandang 15 ngagai 20 minit, lalu nuan deka alit ati laban nemu jaku Jesus nya senang amat dimeretika sereta bekuasa.

Siti agi kebuah ke ngasuh Bup Kudus senang dimeretika, iya nya isi bup nya empu. Tu ukai bup ensera tauka cherita kelulu. Tang, nitih ku The World Book Encyclopedia, kemayuh agi utai ba Bup Kudus nyebut “pasal orang ke bepangkat enggau orang biasa” sereta pasal “pengeliat ati, pengadang, pengelabuh enggau pemujur” sida. Kitai senang ngasaika utai ti dipadah ba Bup Kudus laban iya bekaul enggau orang sereta utai ke amat nyadi. Kitai mega senang meretika pesan ti beguna ari Bup Kudus.—Rome 15:4.

ULIH DIBACHA SEMUA ORANG

Ngambika nuan ulih meretika siti-siti bup, bup nya patut dalam bansa jaku ke ditemu nuan. Kemaya hari tu, Bup Kudus udah bisi dalam bansa jaku ke ulih ditemu nuan empu, enda ngira nama bansa nuan tauka dini alai nuan diau. Peratika kebuah Bup Kudus ulih dibacha semua orang.

Pengawa nyalin. Bup Kudus ke asal ditulis ngena bansa jaku Hebrew, Aramaik enggau Gerika. Tang, enda mayuh orang ulih macha bansa jaku tu. Nya alai, mayuh pengawa udah digaga bala penyalin ngambika Bup Kudus ulih dibacha ngena bansa jaku bukai. Kitai patut beterima kasih ngagai sida, laban diatu semua tauka sebegian Bup Kudus, udah disalin ngagai kira-kira 2,700 bengkah bansa jaku. Reti nya, lebih 90 peratus ari mensia ulih macha abis kurang pan sebegian ari Bup Kudus dalam bansa jaku sida empu.

Pengawa nyadung. Bup Kudus ke asal ditulis ba utai ke enda tan lama, baka ba kulit jelu tauka papairus. Nya alai, kena ngetanka pesan Bup Kudus, pesan nya patut ditulis enggau bejimat, laban suah ditulis ngena jari. Rega Bup Kudus ke ditulis ngena jari mar, nya alai enda mayuh orang ulih meli iya. Tang, pengudah mesin chelak Gutenberg digaga kira-kira 550 taun ti udah, penyampau Bup Kudus ke disadung jampat nambah. Nitihka siti pansik, lebih ari lima biliun iti Bup Kudus, enda ngira semua tauka sebegian, udah disadung.

Nadai bup pengarap bukai ke ulih ngelaban Bup Kudus ba pekara tu. Endang amat, Bup Kudus nya bup ke ulih dimeretika. Taja pia, enda senang deka meretika iya. Tang, bantu bisi disediaka. Dini nuan ulih tetemuka iya? Lalu baka ni nuan tau bulih penguntung? Saut iya bisi ba artikel pengudah tu.