Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  Disember 2015

Jehovah, Petara ke Bejaku enggau Mensia

Jehovah, Petara ke Bejaku enggau Mensia

“Aku mendingka Nuan lebuh Nuan bejaku.”—JOP 42:4.

LAGU: 113, 114

1-3. (a) Nama kebuah runding enggau jaku Petara tinggi agi ari enggi mensia? (b) Nama deka dipelajarka kitai ba artikel tu?

JEHOVAH ngaga bala melikat, lalu udah nya ngaga mensia, laban Iya deka bekunsika pengidup enggau pengelantang. (Mas. 36:9; 1 Tim. 1:11) Utai ti keterubah digaga Jehovah dikumbai rasul John “Jaku.” (Jhn. 1:1; Pem. 3:14) Jehovah bejaku enggau utai ti keterubah digaga Iya, Jesus. Iya madahka runding enggau asai Iya ngagai Jesus. (Jhn. 1:14, 17; Kol. 1:15) Rasul Paul madahka, bala melikat mega bejaku lalu sida bisi jaku kediri empu, jaku ke lain ari jaku mensia.—1 Kor. 13:1.

2 Jehovah nemu semua utai ke bekaul enggau bebiliun iku melikat sereta mensia ke digaga Iya. Iya ulih mendingka sampi bejuta iku orang serentak, lalu Iya meretika sampi sida enda ngira nama bansa jaku ke dikena sida. Lebuh Jehovah mendingka semua sampi nya, Iya mega bejaku enggau bala melikat sereta ngiring sida. Ngambika ulih ngereja semua tu, runding enggau jaku Jehovah patut tinggi agi ari runding enggau jaku ke dikena mensia. (Bacha Isaiah 55:8, 9.) Nya alai, lebuh Iya bejaku enggau mensia, Iya ngena jaku ke senang ngambika kitai ulih meretika pesan Iya.

3 Ba artikel tu, kitai deka belajarka baka ni Jehovah bejaku enggau mensia ngena chara ti senang. Kitai mega deka meda baka ni Iya ngubah chara Iya bejaku nitihka gaya siti-siti pekara.

 PETARA BEJAKU ENGGAU MENSIA

4. (a) Nama bansa jaku ke dikena Jehovah bejaku enggau Moses, Samuel, enggau David? (b) Nama penerang ke bisi ba Bup Kudus?

4 Lebuh Jehovah bejaku enggau mensia ti keterubah, Adam, ba Kebun Eden, Iya engka ngena jaku Hebrew kelia. Udah nya, Jehovah mega bejaku enggau mensia bukai baka Moses, Samuel, enggau David. Taja pan sida nulis leka jaku sida empu dalam jaku Hebrew sereta ngena gaya nulis sida empu, tang ke bendar sida nulis runding Petara. Sida nulis jaku ke datai ari Petara Empu sereta nulis pasal kaul entara Petara enggau nembiak Iya. Ngambika chunto, pengarap enggau pengerindu sida ngagai Petara sereta penyalah enggau pengawa sida ke enda tetap ati mega bisi dituliska ba Bup Kudus. Semua penerang tu ditulis ke penguntung kitai.—Rom. 15:4.

5. Kati Petara semina bejaku enggau mensia ngena jaku Hebrew? Terangka.

5 Jehovah enda seruran bejaku enggau mensia ngena jaku Hebrew. Lebuh orang Israel pansut ari menua Babilon, sekeda ari sida ngena jaku Aramaik ba pengidup ninting hari. Engka ketegal tu Daniel, Jeremiah, enggau Esra nulis sebegian ari Bup Kudus ngena jaku Aramaik. *

6. Nama kebuah Bup Kudus jaku Hebrew disalin ngagai jaku Gerika?

6 Udah nya, Aleksander ti Tebilang ngalahka mayuh perintah bukai, lalu mayuh menua di baruh perintah iya ngena jaku Gerika ke dikumbai Koine. Mayuh orang Judah berengkah ngena Jaku Gerika. Nyau kelama, Bup Kudus jaku Hebrew disalin ngagai jaku Gerika. Salin tu dikumbai Septuagint. Tu salin Bup Kudus ti keterubah sereta siti ari salin ti pemadu beguna. Pakar Bup Kudus pechaya Septuagint udah disalin 72 iku penyalin. * (Peda nota kaki.) Sekeda ari sida nyalin Bup Kudus jaku Hebrew ari leka jaku ngagai leka jaku, bisi nya enda. Tang, mayuh orang Judah enggau orang Kristian ke ngena jaku Gerika pechaya Septuagint nya Jaku Petara.

7. Nama bansa jaku ke dikena Jesus ngajar bala murid iya?

7 Lebuh Jesus ada ba dunya, iya engka ngena jaku Hebrew. (Jhn. 19:20; 20:16; SKR. 26:14) Iya mega engka ngena sekeda jaku Aramaik ke suah dikena maya nya. Tang, iya mega nemu jaku Hebrew kelia ke dikena Moses enggau bala nabi, laban utai ke ditulis sida nya bisi dibacha ba balai gempuru ninting minggu. (Luk. 4:17-19; 24:44, 45; SKR. 15:21) Taja pan jaku Gerika enggau jaku Latin bisi dikena maya jeman Jesus, tang Bup Kudus nadai nyebut sekalika Jesus mega ngena bansa jaku nya tauka enda.

8, 9. Nama kebuah mayuh orang Kristian ngena jaku Gerika, lalu nama ulih dipelajarka kitai pasal Jehovah?

8 Bala murid Jesus ti keterubah ngena jaku Hebrew. Tang pengudah Jesus mati, bala murid iya ngena bansa jaku bukai. (Bacha Kereja Rasul 6:1.) Seraya berita manah dikerembaika, mayuh orang Kristian ngena jaku Gerika, ari ke ngena jaku Hebrew. Ketegal jaku Gerika nya jaku ke suah dikena, nya alai bup Matthew, Mark, Luke, enggau John ditulis dalam jaku Gerika. * (Peda nota kaki.) Surat ari rasul Paul  sereta bup mit bukai ke bisi ba Bup Kudus mega ditulis dalam jaku Gerika.

9 Lebuh penyalin Bup Kudus jaku Gerika ngambi ayat ari Bup Kudus jaku Hebrew, sida suah ngena salin Septuagint. Kekadang, ayat ke udah disalin enda entu sebaka enggau ayat ke bisi ba Bup Kudus jaku Hebrew ke asal. Nya alai, penyilap endang bisi nyadi ba pengawa nyalin Bup Kudus kemaya hari tu. Ari tu kitai nemu, Jehovah enda ngumbai siti-siti bansa jaku tauka adat manah agi ari iya ke bukai.—Bacha Kereja Rasul 10:34.

10. Nama dipelajarka kitai ari chara Jehovah bejaku enggau mensia?

10 Kitai nemu Jehovah bejaku enggau mensia nitihka gaya siti-siti pekara. Iya enda ngarapka kitai bejaku ngena sebengkah bansa jaku aja kena ngelala Iya tauka nemu tuju Iya. (Bacha Sekariah 8:23; Pemandang 7:9, 10.) Kitai mega nemu Jehovah udah ngiring bala ke nulis Bup Kudus, tang Iya ngawakka sida nulis runding Iya ngena leka jaku sida empu.

PETARA NYAGA PESAN IYA

11. Nama kebuah Jehovah enda tusah bejaku enggau mensia taja pan sida ngena mayuh bengkah bansa jaku?

11 Mensia ngena mayuh macham bansa jaku, tang tu ukai utai ti tusah ba Jehovah. Baka ni kitai nemu? Bup Kudus semina bisi sekeda leka jaku asal ke dikena Jesus. (Matt. 27:46; Mrk. 5:41; 7:34; 14:36) Tang Jehovah nentuka pesan ke dibai Jesus ditulis sereta disalin ngagai jaku Gerika, lalu nyau kelama udah nya disalin ngagai bansa jaku bukai. Pia mega, pesan ari Petara ulih dijaga laban Jaku Iya udah suah disalin orang Judah enggau orang Kristian. Udah nya, Jaku Petara disalin ngagai mayuh agi bansa jaku bukai. Kira-kira 400 taun pengudah Jesus ada, John Chrysostom madahka utai ke diajar Jesus udah disalin ngagai jaku Siria, Ejip, India, Persia, Etopia sereta ngagai mayuh agi bansa jaku bukai.

12. Baka ni Bup Kudus udah disakal?

12 Sepemanjai sejarah, mayuh orang udah nyakal Bup Kudus sereta nyakal orang ke nyalin enggau nyadung bup nya. Kira-kira 300 taun pengudah Jesus ada, Pemerintah Rome ke benama Diocletian ngasuh semua Bup Kudus dipunaska. Kira-kira 1,200 taun udah nya, William Tyndale berengkah nyalin Bup Kudus ngagai jaku English. Iya madahka, enti Petara ngasuh iya idup lama, iya deka nentuka indah anak mit ke betanam ulih nemu agi pasal Bup Kudus ari paderi. Ketegal diperinsa, Tyndale ngerarika diri ari menua England ngambika ulih nyalin sereta nyelak Bup Kudus iya. Taja pan tuai pengarap gerija nunu semua Bup Kudus ke ulih ditemu sida, salin ke digaga Tyndale  udah disadung ngagai mayuh orang. Pengunjung iya, Tyndale mati disintak lalu ditunu ba tiang. Tang salin ke digaga iya ulih selamat, lalu dikena nyalin Bup Kudus ke dikumbai King James Version.Bacha 2 Timoti 2:9.

13. Nama ulih ditemu kitai ari belajarka manuskrip Bup Kudus ke lama?

13 Endang amat, ari sekeda Bup Kudus ke lama, semina bisi mimit aja utai ke salah tauka bebida. Taja pia, pakar Bup Kudus bejimat belajarka beribu iti manuskrip, begian ari manuskrip, sereta salin Bup Kudus ke lama. Pengudah mandingka semua nya, sida semina tetemuka mimit aja ayat ke enda entu sebaka, lalu tu penyilap ke mit aja. Tang, pesan Bup Kudus enda berubah. Pansik ke baka tu ngasuh pelajar Bup Kudus arap bendar Bup Kudus ke dikembuan sida kemaya hari tu datai ari Jaku Petara.—Isa. 40:8.

14. Nama ulih ditemu kitai pasal Bup Kudus kemaya hari tu?

14 Taja pan Bup Kudus balat disakal, tang iya udah disalin ngagai lebih 2,800 bengkah bansa jaku. Penyampau tu mayuh agi ari bup bukai ke bisi kemaya hari tu. Taja pan mayuh orang nadai ngembuan pengarap ba Petara, tang Jaku Iya mengkang nyadi bup ti pemadu mayuh disadung. Bisi sekeda salin dalam Bup Kudus enda senang dibacha tauka enda entu betul. Tang, nyau ka semua Bup Kudus ngembuan pesan pasal peluang enggau pengidup meruan belama iya.

BEGUNAKA SALIN BUP KUDUS TI BARU

15. (a) Baka ni litaricha Bup Kudus kitai udah berubah kenyau ari taun 1919? (b) Nama kebuah litaricha kitai ditulis dalam jaku English?

15 Kena taun 1919, seraban mit pelajar Bup Kudus udah dipilih nyadi “ulun ke tetap ati sereta bepenemu-dalam.” Maya nya, ulun ke tetap ati kesuah agi bejaku enggau nembiak Petara ngena jaku English. (Mat. 24:45) Tang kemaya hari tu, litaricha Bup Kudus udah disediaka dalam lebih 700 bengkah bansa jaku. Baka jaku Gerika kelia, jaku English suah dikena kemaya hari tu ba pengawa dagang enggau ba sekula sereta dikena ba mayuh menua. Nya alai, litaricha kitai ditulis dalam jaku English, lalu udah nya disalin ngagai bansa jaku bukai.

16, 17. (a) Nama diguna nembiak Petara? (b) Baka ni pekara tu dikereja? (c) Nama dikedekaka menyadi kitai Knorr?

16 Semua litaricha kitai ngembuan ajar ari Bup Kudus. Keterubah iya, nembiak Petara ngena Bup Kudus King James Version, ke tembu disalin ba taun 1611. Taja pia, jaku ke dikena dalam Bup Kudus nya udah lama sereta tusah dimeretika. Nama Petara semina dikena beberapa kali aja, taja pan manuskrip ke lama ngena nama nya beribu kali. Bup Kudus nya bisi salah salin, lalu bisi ayat bukai ke nadai ba manuskrip asal udah  ditambah ke dalam Bup Kudus nya. Salin Bup Kudus jaku English ke bukai mega bisi penanggul ti sama.

17 Endang amat, nembiak Petara begunaka salin Bup Kudus ke betul sereta senang dimeretika. Nya alai, Komiti Bup Kudus Salin Dunya Baru ditumbuhka, lalu bala menyadi kitai ari komiti tu ngeluarka sebegian ari Bup Kudus kenyau ari taun 1950 ngagai taun 1960. Volume keterubah ari enam iti volume dikeluarka ba gempuru besai kena 2 Ogos 1950. Ba gempuru besai nya, menyadi kitai Knorr madahka nembiak Petara begunaka siti salin Bup Kudus baru ke betul sereta senang dimeretika, lalu ulih nulung sida belajarka pemendar enggau terang agi. Sida begunaka salin ke senang dibacha sereta dimeretika, baka ke asal ti ditulis bala murid Kristus. Menyadi kitai Knorr dekaka New World Translation nulung bejuta iku orang ngelala Jehovah.

18. Nama kebuah pengawa nyalin Bup Kudus ulih dipejalaika?

18 Ba taun 1963, utai ti dikedekaka menyadi Kristian Knorr amat nyadi. New World Translation of the Christian Greek Scriptures udah bisi dalam jaku Belanda, Perancis, Jerman, Itali, Portugis, enggau Sepanyol. Ba taun 1989, Raban ti Megai Saksi-Saksi Jehovah udah numbuhka siti opis baru ba indu opis kena nulung bala penyalin Bup Kudus. Udah nya ba taun 2005, pengawa nyalin Bup Kudus ngagai bansa jaku ke udah dikena nyalin The Watchtower udah dikemendarka. Asil iya, diatu New World Translation udah disalin penuh tauka sebegian, dalam lebih ari 130 bengkah bansa jaku.

19. Nama utai ke bisi nyadi ba taun 2013, lalu nama deka dipelajarka kitai ba artikel pengudah tu?

19 Jaku English udah berubah kenyau ari edisi keterubah New World Translation dikeluarka. Nya alai, leka jaku English patut diaduka agi. Ba ujung minggu kena 5 enggau 6 Oktober 2013, bisi 1,413,676 iku orang ari 31 buah menua datai ngagai aum ninting taun ke-129. Seiku ari Raban ti Megai madahka New World Translation dalam jaku English ke diaduka baru udah dikeluarka. Bala ke datai balat gaga ati, lalu mayuh ari sida nyabak lebuh sida nerima salin Bup Kudus ke baru nya. Lebuh pencheramah macha ayat ke bisi ba Bup Kudus nya, semua orang ke datai ulih meda edisi ke diaduka baru nya senang agi dibacha sereta dimeretika. Ba artikel pengudah tu, kitai deka belajar mayuh agi pasal Bup Kudus nya sereta baka ni iya benung disalin ngagai bansa jaku bukai.

^ per. 5 Nota kaki: Esra 4:8–6:18, 7:12-26; Jeremiah 10:11 enggau Daniel 2:4b–7:28 ke asal ditulis ngena jaku Aramaik.

^ per. 6 Septuagint reti iya “Tujuh Puluh.” Pengawa nyalin berengkah kira-kira 300 taun sebedau Kristus ada, lalu tembu 150 taun udah nya. Salin nya agi beguna nyentuk ke diatu laban iya nulung pakar Bup Kudus meretika leka jaku tauka ayat Hebrew ke tusah.

^ per. 8 Sekeda orang ngumbai Matthew nulis bup iya dalam jaku Hebrew, tang udah nya engka Matthew empu ke nyalin bup nya ngagai jaku Gerika.