Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  Disember 2015

 TOPIK RANDAU | NUAN ULIH MERETIKA BUP KUDUS

Ngiga Tulung Kena Meretika Bup Kudus

Ngiga Tulung Kena Meretika Bup Kudus

Uji gambarka maya nuan keterubah iya bejalai ngagai menua bukai. Nuan enda teleba enggau orang, adat, pemakai, sereta utai bukai ke bisi ba menua nya. Tu engka ngasuh nuan tusah.

Nuan engka ngasaika utai ti sama maya nuan keterubah iya macha Bup Kudus. Maya nya, nuan baka ke ngagai siti menua kelia menya, ke enda ditemu nuan. Ba dia, nuan betemu enggau orang ke dikumbai bansa Pilistin, meda adat ke enda kala dipeda baka “nyarikka gari diri,” tauka belajar pasal pemakai ke dikumbai mana. (Pemansut 16:31; Josua 13:2; 2 Samuel 3:31) Semua tu ulih ngasuh nuan charut runding. Baka kitai ke bejalai ngagai menua bukai, kitai tentu gaga ati enti bisi orang ulih nerangka utai ngagai kitai.

TULUNG KE BISI KELIA MENYA

Kenyau ari jaku Petara berengkah ditulis maya kurun ke-16 S.M., tulung bisi diberi ngagai orang ke deka meretika jaku Petara. Ngambika chunto, Moses, ti keterubah nyadi tuai pengiring bansa Israel, “belabuh nerangka” utai ti udah ditulis.—Ulang Adat 1:5.

Pengajar ke landik pasal Jaku Petara agi bisi kira-kira sepuluh kurun udah nya. Kena 455 S.M., seraban besai orang Judah, nyengkaum anak mit, begempuru magang ba padang di Jerusalem. Pengajar Bup Kudus ukai semina macha ‘Bup Adat Petara’ enggau inggar, tang mega “nerangka iya ngambika orang mayuh meretika iya.”—Nehemiah 8:1-8.

Lima kurun udah nya, Jesus Kristus mega enggau pengawa ngajar ti sama. Iya ke amat, orang suah ngumbai iya pengajar. (John 13:13) Iya ngajar dalam raban ti besai, tauka seiku-seiku. Bisi sekali, iya bejaku ngagai orang mayuh, meri Ajar ba Atas Bukit ti tebilang, lalu ‘orang mayuh alit ati ke ajar iya.’ (Matthew 5:1, 2; 7:28) Ba musin bungai kena taun 33 M., Jesus bejaku ngagai dua iku ari bala murid iya lebuh sida bejalai ngagai sebuah genturung pendiau semak Jerusalem, dia iya “nerangka Bup Kudus” ngagai seduai iya.—Luke 24:13-15, 27, 32.

Bala murid Jesus mega pengajar Jaku Petara. Bisi sekali, seiku pemesai ari menua Etiopia benung macha sekeda ayat dalam Bup Kudus. Seiku murid ke benama Philip mansang ngagai iya, lalu nanya: “Kati nuan meretika utai ti dibacha nuan?” Ku orang Etiopia nya nyaut: “Baka ni ku aku ulih mereti, enti orang nadai nerangka utai nya ngagai aku?” Udah nya, Philip nerangka reti ayat nya ngagai iya.—Kereja Rasul 8:27-35.

TULUNG KE BISI KEMAYA HARI TU

Baka pengajar Bup Kudus kelia menya, Saksi-Saksi Jehovah kemaya hari tu mega bisi enggau pengawa ngajar Bup Kudus ba 239 iti menua di serata dunya. (Matthew 28:19, 20) Ninting minggu, sida nulung lebih semilan juta iku orang meretika Bup Kudus. Mayuh ari sida ke belajar tu ukai orang ke megai pengarap Kristian. Pengawa belajar tu pechuma, lalu ulih digaga ba rumah tauka ba endur bukai ke senang endur belajar. Sekeda ari sida rindu belajar ngena talipaun, video, komputer tauka perengka elektronik ke bukai.

Giga meh seiku ari Saksi-Saksi Jehovah kena nemu baka ni nuan tau bulih penguntung ari pengawa belajarka Bup Kudus. Enggau tu, nuan deka nemu Bup Kudus nya ukai bup ke enda ulih dimeretika. Iya agi “beguna kena ngajar, kena ngerara, kena ngaduka utai ti salah, enggau kena matihka orang diau lurus,” ngambika nuan “chukup disikap ngereja genap macham pengawa ti badas.”—2 Timoti 3:16, 17.