Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

Seratus Taun Di Baruh Perintah Petara!

Seratus Taun Di Baruh Perintah Petara!

‘Awakka Petara ti pun pemaik . . . nyikap kita enggau semua utai ti badas, ngambika kita ulih ngereja peneka Iya.’—HEB 13:20, 21.

LAGU: 136, 14

1. Nama nunjukka pengawa nginjil pasal Perintah Petara beguna bendar ba Jesus?

JESUS rindu berandau pasal Perintah Petara. Lebuh Jesus ba dunya, iya suah agi berandau pasal Perintah Petara ari berandauka utai bukai. Iya nyebut pasal Perintah Petara lebih ari 100 kali maya iya nginjil. Perintah Petara beguna bendar ba Jesus.—Bacha Matthew 12:34.

2. Ni penyampau orang ke bisi ninga pesan ke dipadah ba Matthew 28:19, 20, lalu nama kebuah kitai ngumbai baka nya?

2 Enda lama pengudah Jesus diangkatka idup baru, iya betemu enggau lebih 500 iku murid iya. (1 Kor. 15:6) Nya meh maya Jesus engka meri pesan ngasuh nginjil “ngagai semua bansa.” Pengawa tu enda senang. * (Peda nota kaki.) Iya madah ngagai sida pengawa nginjil deka terus dipejalaika ba timpuh ti panjai,  nyentuk ngagai “pengujung dunya.” Lebuh nuan nusui berita manah kemaya hari tu, nuan nulung ngamatka utai ti dipadah Jesus.—Mat. 28:19, 20.

3. Nama tiga iti utai ke udah nulung kitai nginjil?

3 Pengudah Jesus meri pesan ngasuh nginjil, iya madahka: ‘Aku deka seruran enggau kita.’ (Mat. 28:20) Nya alai, Jesus besemaya ngagai bala murid iya, iya deka ngiring pengawa nginjil sereta nulung sida nginjil ke serata dunya. Jehovah mega enggau kitai. Iya udah meri kitai “semua utai ti badas” kena nulung kitai nginjil. (Heb. 13:20, 21) Ba artikel tu, kitai deka berandauka tiga iti utai badas nya: (1) perengka ke udah diberi ngagai kitai, (2) chara ke udah dikena kitai, sereta (3) latih ke udah diberi ngagai kitai. Keterubah, aram kitai berandauka sekeda perengka ke udah dikena kitai kenyau ari 100 taun ti udah.

PERENGKA KE NULUNG NEMBIAK PETARA NGINJIL

4. Baka ni mayuh macham perengka udah nulung kitai ba pengawa nginjil?

4 Jesus nyempamaka pesan pasal Perintah Petara enggau leka benih ke ditaburka ngagai mayuh bengkah tanah. (Mat. 13:18, 19) Kena nyediaka tanah, penabur benih ngena mayuh macham perengka. Pia mega, Raja kitai, Jesus, udah meri kitai perengka ke ulih dikena kitai nulung orang nerima pesan kitai. Sekeda perengka ulih dikena enda lama, tang bisi mega ke bukai agi dikena nyentukka diatu. Taja pia, semua perengka tu udah nulung ngemansangka agi pengelandik kitai nginjil.

5. Baka ni gaya kad saksi, lalu baka ni iya dikena?

5 Kena taun 1933, bala penginjil berengkah ngena kad saksi. Perengka tu nulung mayuh penginjil berengkah nginjil. Kad nya mit, lalu ngembuan pesan pandak ari Bup Kudus. Kekadang, kad saksi ti baru ke ngembuan pesan ke baru bisi dikeluarka. Menyadi Kristian lelaki Erlenmeyer beumur sepuluh taun lebuh iya belabuh ngena kad saksi. Iya nerangka: “Jaku pemuka iya munyi tu, ‘Ulih nuan macha kad tu?’ Pengudah orang ke bempu rumah macha kad nya, kami meri iya litaricha, lalu mupuk.”

6. Baka ni kad saksi ulih nulung?

6 Kad saksi udah nulung bala penginjil. Chunto, sekeda penginjil nya pemalu. Taja pan sida bisi ati deka nginjil, sida enda nemu nama utai ke patut disebut. Penginjil ke bukai kelalu berani. Sida madahka semua utai ke ditemu sida ngagai orang ke bempu rumah dalam beberapa minit aja. Tang, kekadang utai nya disebut sida enggau enda bejimat. Kad saksi udah nulung semua penginjil ngenataika pesan enggau terang sereta senang dimereti.

7. Nama sekeda penanggul maya ngena kad saksi?

7 Tang, ngena kad saksi mega bisi penanggul. Menyadi Kristian indu Grace Estep madahka: “Kekadang orang nanya kami, ‘Nama reti nya? Ulih nuan nerangka iya?’” Bisi mega orang ke bempu rumah enda ulih macha pesan ba kad nya. Sekeda semina ngambi kad nya, lalu nutup pintu. Sekeda orang enggai ninga pesan kitai, nya alai sida nyarikka kad nya. Taja pan bisi penanggul, kad saksi udah nulung bala penginjil nginjil ngagai orang ke diau semak sida, lalu ngasuh sida dikelala orang nyadi penginjil Perintah Petara.

8. Baka ni peti rikut dikena? (Peda gambar ba pun artikel.)

8 Perengka bukai ke dikena pengudah taun 1930 iya nya peti rikut. Sekeda Saksi ngumbai iya Aron laban peti nya bejaku ngarika sida. (Bacha Pemansut 4:14-16.) Enti  orang ke bempu rumah setuju deka ninga, penginjil deka mainka siti cheramah pandak ari Bup Kudus, lalu ninggalka sekeda litaricha. Kekadang, diri bilik sampal begelumu ningaka siti cheramah! Ba taun 1934, Watch Tower Society berengkah ngaga peti rikut ke dikena nginjil. Nyau kelama, bala menyadi Kristian ngerikut 92 iti cheramah.

9. Ni pemujur nginjil ngena peti rikut?

9 Lebuh Hillary Goslin ninga siti ari cheramah nya, iya nginjau peti rikut nya seminggu dikena bekunsika pesan Bup Kudus enggau orang ke diau semak iya. Ketegal tu, sekeda orang nerima pemendar, lalu dibaptisa. Nyau kelama, dua iku anak indu Goslin enggau Sekula Gilead, lalu nyadi pengerintis seberai tasik. Baka kad saksi, peti rikut udah nulung mayuh penginjil berengkah nginjil. Enda lama udah nya, Raja kitai, Jesus, ngena Sekula Kereja Teokratik ngajar rayat iya nyadi pengajar ti mujur.

NGIGA ORANG NGENA SEMUA CHARA

10, 11. Baka ni surat kabar enggau radio udah dikena nginjil, lalu nama kebuah chara nya ulih mujur?

10 Di baruh iring Raja kitai, nembiak Petara udah nginjil ngagai mayuh orang ngena bemacham chara. Chara tu kelebih agi beguna maya kitai bisi mimit aja pekereja. (Bacha Matthew 9:37.) Chunto, suba surat kabar dikena ngerembaika berita manah. Ninting minggu menyadi kitai Russell nganjung siti cheramah Bup Kudus ngagai ejensi berita. Udah nya, sida ngirumka cheramah iya ngagai surat kabar ba menua Kanada, Eropah, sereta Amerika Serikat. Maya taun 1913, cheramah menyadi kitai Russell udah dikeluarka kira-kira 2,000 ejensi surat kabar, lalu dibacha kira-kira 15,000,000 iku orang!

11 Radio mega amat mujur dikena nginjil. Kena 16 April 1922, menyadi kitai Rutherford ngenataika siti cheramah ngena radio, lalu kira-kira 50,000 iku orang ninga. Enda lama udah nya, kitai berengkah ngena stesen radio kitai empu ke dikumbai WBBR, lalu program ti keterubah ditaburka kena 24 Februari 1924. Watch Tower kena 1 Disember 1924, madahka: “Ke diatu, kami pechaya radio nya chara ti pemadu murah sereta mujur kena ngerembaika berita manah.” Baka surat kabar, radio mega udah nulung kitai ngenataika berita manah ngagai mayuh orang ba endur ke mimit penginjil.

Mayuh bala penginjil Perintah Petara rindu nginjil ba endur orang mayuh sereta madah ngagai orang bukai pasal laman web kitai (Peda genteran 12, 13)

12. (a) Ni bansa nginjil ba endur orang mayuh ke pemadu dikerinduka nuan? (b) Nama ulih nulung kitai ngelaban ati ti takut maya nginjil ba endur orang mayuh?

12 Nginjil ba endur orang mayuh mega chara ti mujur dikena nginjil kemaya hari tu. Mayuh pengawa udah digaga ngambika ulih nginjil ba endur nganti bas, stesen kerita api sereta endur parking, pia mega ba taman sereta ba makit. Kati nuan takut nginjil ba endur orang mayuh? Enti pia, besampi meh minta tulung, lalu beratika utai ke dipadah menyadi kitai Manera, seiku tuai ti ngabas: “Kitai ngumbai tiap iti chara baru ke dikena kitai nginjil nya chara kitai gawa ke Jehovah, chara dikena kitai nunjukka penaluk ngagai Iya, chara dikena nemu penetap ati kitai, lalu kitai keran nunjukka diri deka gawa ke Iya ngena sebarang chara ke diasuh Iya.” Lebuh kitai ngelaban ati ti takut sereta ngena chara baru maya nginjil, kitai negapka pengarap kitai ba Jehovah, lalu nyadi penginjil ti landik agi.—Bacha 2 Korint 12:9, 10.

13. Nama kebuah laman web kitai nya chara ke mujur dikena nginjil, lalu padahka pengalaman nuan lebuh ngena iya?

13 Mayuh bala penginjil rindu madah ngagai orang bukai pasal laman web kitai, jw.org. Ba laman web nya, sida ulih macha  sereta download litaricha Bup Kudus ke bisi ba lebih ari 700 bengkah bansa jaku. Ninting hari, lebih 1.6 juta iku orang ngelawa laman web kitai. Suba, radio ulih dikena ngenataika berita manah ngagai orang ba endur ke tusah digagai. Kemaya hari tu, laman web kitai mega ngereja utai ti sama.

NGELATIH PENGINJIL BERITA MANAH

14. Nama latih ke diguna bala penginjil, lalu nama sekula ke udah nulung sida nyadi pengajar ti mujur?

14 Perengka enggau chara ke udah dikerandauka kitai amat mujur. Taja pia, bala penginjil nya suba patut dilatih. Chunto, kekadang orang ke bempu rumah enda setuju enggau utai ke didinga iya ari peti rikut. Bisi mega orang ke bempu rumah bisi minat, lalu deka nemu mayuh agi. Bala penginjil patut nemu chara mutarka orang ke nyakal tu enggau bejimat sereta chara nyadi pengajar ti landik agi. Endang amat, ketegal tulung ari roh kudus Petara, menyadi kitai Knorr nemu endang sigi beguna bala penginjil belajarka chara bejaku maya nginjil. Nya alai, berengkah ari taun 1943, gempuru berengkah ngatur Sekula Kereja Teokratik. Sekula tu udah nulung semua penginjil nyadi pengajar ti mujur.

15. (a) Nama diasaika sekeda menyadi Kristian kitai lebuh sida meri cheramah ba Sekula Kereja Teokratik? (b) Baka ni semaya Jehovah ke dipadah ba Masmur 32:8 amat nyadi ba nuan?

15 Mayuh bala menyadi Kristian enda teleba bejaku ba mua orang mayuh. Menyadi kitai Ramu agi ingatka cheramah iya ti keterubah maya taun 1944. Cheramah iya pasal seiku orang ba Bup Kudus ke benama Doek. Ku iya: “Pala patung aku beguyat, jari aku gegetak, lalu ngeli aku begerit.” Ku iya agi: “Nya pengalaman keterubah aku bejaku ba pentas, tang aku neruska iya.” Taja pan enda senang, bala anak mit mega meri cheramah  ba sekula nya. Menyadi kitai Manera agi ingat lebuh seiku anak mit lelaki meri cheramah iya ti keterubah: “Iya kelalu takut nyentukka maya iya ngepunka cheramah, iya berengkah nyabak. Tang iya keran deka neruska nya, taja pan iya nyabak sepemanjai cheramah nya.” Nuan engka enda meri komen tauka nadai ngambi begian ba gempuru, ketegal nuan malu tauka ngumbai diri enda ulih ngereja nya. Enti pia, minta Jehovah nulung nuan ngelaban ati ti takut. Iya deka nulung nuan baka Iya ke udah nulung pelajar Sekula Kereja Teokratik suba.—Bacha Masmur 32:8.

16. Nama tuju Sekula Gilead?

16 Gerempung Jehovah mega nyediaka latih ngena Sekula Gilead. Siti ari tuju sekula tu iya nya nulung pelajar ngeringka pengingin sida nginjil. Sekula Gilead berengkah ba taun 1943, lalu kenyau ari taun nya, 8,500 iku pelajar udah dilatih sereta diasuh ngagai 170 iti menua. Kenyau ari taun 2011, orang ke dikangau ngagai sekula tu iya nya pengerintis istimewa, tuai ti ngabas, bala menyadi ba Betel, tauka pengerintis seberai tasik ke bedau enggau Sekula Gilead.

17. Ni pemujur latih ke diulih ari Sekula Gilead?

17 Kati Sekula Gilead tu mujur? Au. Peratika utai ke nyadi ba Jipun. Kena Ogos 1949, kurang ari sepuluh iku penginjil ba menua nya. Tang ba ujung taun nya, 13 iku pengerintis seberai tasik nginjil begulai enggau penginjil ba menua nya. Diatu, kira-kira 216,000 iku penginjil ba Jipun, lalu nyau ka setengah ari sida nyadi pengerintis!

18. Nama agi sekula bukai ke dikemisi kitai?

18 Kitai agi bisi sekula ke bukai, baka Sekula Bup Kudus ke Menyadi ti Dipilih, Sekula Pengerintis, Sekula ke Penginjil Perintah Petara, Sekula ke Tuai ti Ngabas enggau Bini Sida sereta Sekula ke Bala Komiti Pampang Opis enggau Bini Sida. Sekula tu udah mujur ngelatih bala menyadi Kristian sereta udah ngeringka pengarap sida. Tu enggau terang nunjukka Jesus terus ngelatih murid iya.

19. Nama dipadah menyadi kitai Russell pasal pengawa nginjil, lalu baka ni tu dikeamatka?

19 Perintah Petara udah merintah lebih ari 100 taun. Sekumbang timpuh nya, Raja kitai, Jesus Kristus, udah ngiring pengawa nginjil. Ba taun 1916 suba, menyadi kitai Russell arap bendar pengawa nusui berita manah deka dikerembaika di serata dunya. Ku iya: “Pengawa tu deka jampat mansang, lalu deka terus mansang, laban ‘injil pasal Perintah Petara’ deka dipejalaika di serata dunya.” (Faith on the March, ari A. H. Macmillan, lambar 69) Pengawa tu benung dikeamatka diatu! Kitai beterima kasih ngagai Jehovah, Petara pemaik, laban Iya meri kitai semua utai ke diguna kitai kena ngereja peneka Iya!

^ per. 2 Mayuh ari sida nya nyadi orang Kristian. Nama kebuah kitai ngumbai baka nya? Laban rasul Paul madahka: “Mayuh sida nya agi idup diatu, taja pen sekeda udah mati.” Nya alai, Paul enggau orang Kristian ke bukai nemu mayuh orang bisi ninga Jesus meri pesan ngasuh nginjil.