Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

Kati Nuan Rinduka Orang Bukai Baka Nuan ke Rinduka Diri Empu?

Kati Nuan Rinduka Orang Bukai Baka Nuan ke Rinduka Diri Empu?

“Rinduka orang bukai baka nuan ke rinduka diri empu.” —MAT. 22:39, NW.

LAGU: 73, 36

1, 2. Baka ni ayat Bup Kudus nunjukka pengerindu nya beguna bendar?

PENGERINDU nya kualiti Petara Jehovah ti pemadu nyulut. (1 Jhn. 4:16) Jesus Kristus nya utai ti keterubah digaga Jehovah. Jesus begulai enggau Apai iya di serega bebiliun taun, lalu nemu Petara Jehovah nya bepengerindu. (Kol. 1:15) Jesus udah ngayanka pengerindu ti sama sepemanjai pengidup iya, sekalika di serega tauka ba dunya. Nya alai kitai tau arap, Jehovah enggau Jesus deka seruran merintah enggau pengerindu.

2 Lebuh orang nanya Jesus ni bagi pesan ti pemadu besai, ku Jesus nyaut: “‘Rinduka Jehovah Petara nuan enggau pengabis ati nuan, enggau pengabis semengat nuan, enggau pengabis runding nuan.’ Tu pesan ti keterubah sereta pemadu besai. Lalu pesan ti kedua nya sebaka enggau nya: ‘Rinduka orang bukai baka nuan ke rinduka diri empu.’”—Mat. 22:37-39, NW.

3. Sapa “orang bukai” nya?

 3 Endang beguna ngayanka pengerindu dalam semua kaul kitai. Jesus madahka, kitai enda tau enda rinduka Jehovah sereta orang bukai. Tang sapa “orang bukai” nya? Enti kitai udah kawin, orang bukai ke pemadu rapat enggau kitai iya nya laki tauka bini kitai. Tu nyengkaum bala menyadi Kristian ba gempuru sereta orang ke ditemu kitai maya nginjil. Ba artikel tu, kitai deka belajar baka ni kitai ulih ngayanka pengerindu ngagai orang bukai.

RINDUKA KALING PENGIDUP NUAN

4. Baka ni pengawa jadi melaki-bini agi ulih mujur taja pan mensia enda sempurna?

4 Jehovah ngaga Adam enggau Hawa, lalu ngasuh seduai iya idup begulai. Nya meh pengawa jadi melaki-bini ti keterubah. Petara dekaka seduai iya idup lantang sereta beranak-betelesak ngemenuhka dunya tu. (P-kal. 1:27, 28) Tang, pengudah seduai iya enda ngasika Jehovah, ruang bilik seduai iya rusak, lalu dosa enggau pemati ngelekai ngagai semua mensia. (Rom. 5:12) Taja pia, pengawa jadi melaki-bini agi ulih mujur kemaya hari tu. Ba Bup Kudus, Jehovah, ke ngepunka adat melaki-bini, udah meri jaku lalau ti pemadu manah ngagai laki sereta bini.—Bacha 2 Timoti 3:16, 17.

5. Nama kebuah pengerindu entara laki bini beguna?

5 Bup Kudus nunjukka pengerindu enggau penelap nya beguna kena bulih kaul ti ngelantangka ati. Tu endang amat entara laki bini. Ku rasul Paul nerangka reti pengerindu ti bendar: “Pengerindu nya liat ati, nelap, enda kepapas, enda temegah tauka sumbung, tauka jai jaku enggau orang. Pengerindu enda berundingka diri empu, enda jampat ringat tauka bedendam. Pengerindu enda gaga ati ke penyalah, tang gaga ati ke utai ti bendar. Pengerindu natka semua utai, arapka semua utai, ngadang semua utai, tan dalam semua utai. Pengerindu enda nemu abis.” (1 Kor. 13:4-8) Lebuh kitai berundingka jaku Paul, lalu nitihka jaku nya, kitai tau bulih pengelantang enggau kaling pengidup kitai.

Bup Kudus madah ngagai kitai baka ni pengawa jadi melaki-bini ulih mujur (Peda genteran 6,7)

6, 7. (a) Nama dipadah Bup Kudus pasal orang ke nyadi tuai? (b) Baka ni laki ke nyadi orang Kristian patut ngintu bini iya?

6 Jehovah udah mutuska sapa ke patut nyadi tuai bilik. Paul nerangka: ‘Aku deka ngasuh kita nemu, Kristus nyadi kepala semua lelaki, lalu laki nyadi kepala bini, lalu Petara nyadi kepala Kristus.’ (1 Kor. 11:3) Tang, Jehovah dekaka laki nyadi tuai bilik ti bepengerindu. Laki enda patut berundingka diri empu tauka jai. Jehovah Empu nya Tuai ti manah sereta enda berundingka diri empu. Tu ngasuh Jesus bebasaka kuasa merintah ari Petara ti bisi pengerindu. Ku iya: ‘Aku rinduka Apai.’ (Jhn. 14:31) Jesus tentu nadai ngasaika pengerindu nya enti Jehovah jai enggau iya.

7 Taja pan laki nya tuai atas bini, tang Bup Kudus ngasuh iya bebasaka bini. (1 Pet. 3:7) Baka ni laki ulih ngereja nya? Iya ulih beratika utai ti diguna bini sereta bebasaka utai ti dikedekaka bini. Bup Kudus madahka: ‘Kita ke laki, rinduka bini kita, baka Kristus ke rinduka eklisia, lalu nyerahka diri empu ke eklisia.’ (Eps. 5:25) Amat, indah Jesus sanggup nyerahka nyawa diri ketegal bala murid iya. Lebuh laki nyadi tuai bilik ti bepengerindu baka Jesus, bini deka senang agi rinduka sereta bebasaka iya, lalu nitihka pemutus ti digaga iya.—Bacha Titus 2:3-5.

RINDUKA BALA MENYADI KRISTIAN NUAN

8. Baka ni asai ati kitai pasal bala menyadi Kristian?

8 Kemaya hari tu, bejuta iku orang nyembah Jehovah di serata dunya. Sida iya bala menyadi Kristian kitai. Baka ni asai ati kitai  pasal sida? Ku Bup Kudus: “Kereja pengawa ti badas ngagai semua orang, kelebih agi ngagai orang ke sama pengarap enggau kita.” (Gal. 6:10; bacha Rome 12:10.) Rasul Peter nulis, kitai “ngasika pemendar” enti kitai “amat rinduka orang ke saum pengarap enggau [kitai].” Peter mega madah ngagai bala menyadi Kristian: “Iya ke lebih agi, seruran rinduka pangan diri.”—1 Pet. 1:22; 4:8.

9, 10. Nama kebuah nembiak Petara beserakup?

9 Gerempung kitai enda sebaka enggau gerempung bukai. Nama kebuah? Laban kitai bisi pengerindu ti dalam sereta amat rinduka bala menyadi Kristian kitai. Kelebih agi, ketegal kitai rinduka Jehovah sereta ngasika ukum Iya, Iya nyukung kitai ngena kuasa Iya ti pemadu besai, iya nya roh kudus. Roh kudus Petara nulung kitai beserakup enggau bala menyadi Kristian di serata dunya.—Bacha 1 John 4:20, 21.

10 Paul nekanka kebuah orang Kristian begunaka pengerindu, lebuh iya nulis: “Rasukka penyiru, penelap, ati ti baruh, ati ti nemu nunduk ngagai pangan diri, enggau ati ti liat. Sabar enggau pangan diri, lalu ampun pangan diri enti kita bisi enda nyamai ati ngagai pangan diri. Baka Tuhan ke udah ngampun kita, baka nya mega kita ngampun pangan diri. Lebih ari semua, rasukka pengerindu kena ngempung semua utai nyadi siti.” (Kol. 3:12-14) Kitai beterima kasih laban pengerindu, ti “ngempung semua utai nyadi siti,” bisi ba kitai enda ngira ari ni penatai kitai.

11. Baka ni deka ngelala gerempung Petara?

11 Pengerindu ti bendar sereta penyerakup ke bisi ba nembiak Jehovah nunjukka sida iya orang ke megai pengarap ti bendar. Ku Jesus: ‘Enti kita rinduka pangan diri, nya baru semua orang deka nemu kita murid aku.’ (Jhn. 13:34, 35) Lalu rasul John nulis: ‘Baka tu ku jalai kita ngelala sapa ke anak Petara, enggau sapa ke anak Sitan: barang sapa  enda diau lurus, ukai anak Petara. Orang ke enda rinduka menyadi diri, ukai anak Petara. Laban tu pesan ti udah didinga kita kenyau ari pun: rinduka pangan diri.’ (1 Jhn. 3:10, 11) Pengerindu enggau penyerakup nunjukka Saksi-Saksi Jehovah nya murid Kristus ti bendar, orang ke dikena Petara nusui berita manah pasal Perintah Petara ke serata dunya.—Mat. 24:14.

NGUMPUL “MAYUH AMAT ORANG”

12, 13. Nama digaga “mayuh amat orang” kemaya hari tu, lalu nama deka diasaika sida enda lama da agi?

12 Mayuh ari nembiak Jehovah kemaya hari tu datai ari “mayuh amat orang” ke datai ari mayuh bengkah menua, lalu sida nunjukka diri nyukung Perintah Petara. Sida “bala orang ke udah pansut ari penusah ti besai. Sida udah masu baju panjai sida, lalu ngaga baju nya burak ngena darah Anak Domba” enggau ngayanka pengarap ba tebus Jesus. “Mayuh amat orang” tu rinduka Jehovah enggau Anak Iya, lalu sida nyembah Jehovah “siang malam.”—Pem. 7:9, 14, 15.

13 Enda lama da agi Petara deka ngemunaska dunya ti jai tu maya “penusah ti besai.” (Mat. 24:21; bacha Jeremiah 25:32, 33.) Tang, Jehovah deka nyaga sereta ngiring bala nembiak Iya ngagai dunya baru laban Iya rinduka sida. Baka ke disemaya Iya kira-kira 2,000 taun ti udah, “Iya deka ngendas semua ai mata ari mata sida, lalu pemati nadai agi, nadai agi ngulit, nadai agi nyabak, nadai agi pedis, laban utai ti lama nyau nadai agi.” Kati nuan nganti maya deka idup ba Paradais, maya penyai, pemerinsa sereta pemati nadai agi?—Pem. 21:4.

14. Ni penyampau “mayuh amat orang”?

14 Lebuh hari ti penudi berengkah ba taun 1914, nembiak Petara semina bisi beberapa ribu iku aja. Pengerindu ke orang bukai sereta tulung ari roh kudus Petara meransang raban mit menyadi Kristian ke diiri roh kudus tu nusui berita manah pasal Perintah Petara taja pan bisi penanggul. Nama asil iya? Kemaya hari tu, mayuh amat orang ke bisi peluang idup belama iya ba dunya udah digumpul. Bisi kira-kira 8,000,000 iku bala Saksi ba lebih ari 115,400 iti gempuru di serata dunya, lalu penyampau tu majak nambah. Chunto, lebih ari 275,500 iku bala Saksi ke baru udah dibaptisa ba taun nginjil 2014. Tu nunjukka kira-kira 5,300 iku dibaptisa ninting minggu.

15. Baka ni orang kemaya hari tu ninga berita manah?

15 Endang ngerinduka ati meda mayuh orang udah ninga berita manah pasal Perintah Petara. Kemaya hari tu, litaricha kitai udah bisi ba lebih ari 700 bengkah bansa jaku. Menara Jaga nya majalah ti pemadu mayuh disadung ba serata dunya. Lebih ari 52,000,000 iti majalah nya dichelak ninting bulan, lalu majalah nya udah dikeluarka ngena 247 bengkah bansa jaku. Lalu bup Nama Utai ti Bendar Diajar Bup Kudus? ke dikena belajarka Bup Kudus udah disalin ngagai lebih ari 250 bengkah bansa jaku. Ke diatu, lebih ari 200,000,000 iti bup nya udah dichelak.

16. Nama kebuah gerempung Jehovah majak besai?

16 Gerempung kitai majak besai laban kitai bisi pengarap ba Petara, lalu nerima Bup Kudus nya Jaku ke datai ari Iya. (1 Tes. 2:13) Kitai terus ngasaika berekat ari Jehovah taja pan dilaban sereta dipegedika Sitan.—2 Kor. 4:4.

SERURAN RINDUKA ORANG BUKAI

17, 18. Jehovah dekaka kitai bisi asai ati ke baka ni ngagai orang ke enda nyembah Iya?

17 Chara orang nerima berita manah enda sama. Sekeda orang deka ninga, sekeda nya enggai. Jehovah dekaka kitai bisi asai ati ke baka ni ngagai orang ke enda nyembah Iya?  Enda ngira orang deka nerima berita manah kitai tauka enggai, kitai nitihka jaku lalau ke bisi ba Bup Kudus. Bup Kudus madahka: “Awakka jaku kita seruran badas sereta ngenyamaika ati orang, ngambika kita nemu jalai kita patut nyaut semua orang.” (Kol. 4:6) Tiap kali kitai ngetanka pengarap kitai, kitai deka ngereja nya “enggau ati ti nelap sereta nangi,” laban kitai rinduka orang bukai.—1 Pet. 3:15, 16.

18 Indah lebuh orang nganu tauka nulak berita manah ari kitai, kitai ngayanka pengerindu ngagai sida sereta neladan Jesus. Lebuh Jesus ‘dikeduan, iya enda malas. Lebuh iya diperinsa, iya enda ngemba orang.’ Tang, Jesus arapka Jehovah. (1 Pet. 2:23) Nya alai, kitai patut seruran ngayanka pemaruh ati sereta nitihka jaku lalau: “Anang malas penyai ngena penyai, tauka jaku kelese ngena jaku kelese, tang balas jaku kelese ngena jaku berekat.”—1 Pet. 3:8, 9.

19. Nama patut digaga kitai ngagai munsuh kitai?

19 Baruh ati nulung kitai ngasika prinsip beguna ke udah diberi Jesus. Iya nerangka: ‘Kita udah ninga pasal jaku ti udah disebut, “Rinduka orang bukai, lalu begedika munsuh kita.” Tang aku madah ngagai kita: rinduka munsuh kita, lalu besampika orang ke merinsaka kita, ngambika kita nyadi anak Apai kita ti di serega, laban Iya ngasuh mata panas manchar ngagai orang ke jai enggau ngagai orang ke manah, lalu ngasuh hari ujan ke orang ke lurus enggau ke orang ke jai.’ (Mat. 5:43-45, NW) Kitai ke nembiak Jehovah enda tau enda rinduka munsuh kitai enda ngira nama digaga sida ngagai kitai.

20. Baka ni kitai nemu serata dunya deka penuh enggau pengerindu ngagai Jehovah sereta orang bukai? (Peda gambar ba pun artikel.)

20 Kitai enda tau enda seruran ngayanka diri rinduka Jehovah enggau orang bukai. Taja pan orang ngelaban kitai sereta enggai nerima berita manah ari kitai, kitai patut nulung sida maya sida begunaka tulung. Rasul Paul nulis: “Anang berutang ba orang, kelimpah ari berutang pengerindu ba pangan diri, laban orang ke rinduka pangan diri, udah ngamatka Adat. Pesan ti nyebut, ‘Anang butang; anang munuh orang; anang ngenchuri; anang inginka utai orang,’ enggau semua pesan bukai, tau disimpul ngena jaku tu, ‘Rinduka pangan diri [orang bukai] baka nuan ke rinduka diri empu.’ Pengerindu enda ngemediska orang. Nya alai pengerindu ngamatka Adat.” (Rom. 13:8-10) Ba dunya Sitan ke bepechah-belah, kasar sereta jai tu, nembiak Petara ngayanka pengerindu ti bendar ngagai orang bukai. (1 Jhn. 5:19) Pengudah Jehovah ngemunaska Sitan, bala antu iya sereta dunya ke jai tu, serata dunya deka penuh enggau pengerindu. Endang berekat ti manah lebuh semua orang ba dunya rinduka Jehovah sereta rinduka pangan diri!