Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  November 2015

Jehovah Nya Petara Pengerindu

Jehovah Nya Petara Pengerindu

‘Petara endang pengerindu.’ —1 JHN. 4:8, 16.

LAGU: 18, 91

1. Nama kualiti Petara ti pemadu nyulut, lalu baka ni asai ati nuan pasal Iya pengudah nemu tu?

BUP KUDUS madah ngagai kitai, ‘Petara endang pengerindu.’ (1 Jhn. 4:8) Nama reti nya? Pengerindu nya ukai semina siti ari kualiti manah ke dikemisi Jehovah. Tu kualiti Iya ti pemadu nyulut. Iya ukai semina bisi pengerindu. Iya endang pengerindu. Semua utai ke digaga Iya datai ari pengerindu. Kitai beterima kasih ngagai Jehovah, laban Iya udah ngaga dunya raya sereta semua utai idup, ketegal pengerindu.

2. Pengerindu Petara ngasuh kitai arap bendar ke utai nama? (Peda gambar ba pun artikel.)

2 Jehovah rinduka sereta ibuhka utai ti ditempa Iya. Pengerindu Iya ke kitai ngasuh kitai arap bendar tuju Iya ke mensia deka dikeamatka ngena chara ti pemadu manah. Tu deka mai pengelantang ti bendar ngagai orang ke ngasika Iya. Chunto, ketegal pengerindu, Jehovah “udah ngeletak siti hari alai Iya deka ngakim semua dunya ngena pengelurus, ulih orang siku ke udah dipilih Iya,” iya nya Jesus Kristus. (SKR. 17:31) Kitai pechaya pengawa ngakim tu deka nyadi. Ba orang ke ngasi, tu reti iya pengidup ti meruan belama iya ke jemah ila.

 NAMA ULIH DIPEDA ARI SEJARAH

3. Baka ni gaya pengidup mensia enti Petara enda rinduka sida?

3 Baka ni gaya pengidup mensia jemah ila enti pengerindu nya ukai kualiti Petara ti pemadu nyulut? Mensia deka terus merintah pangan diri sereta di baruh kuasa Sitan, ke nadai pengerindu. (2 Kor. 4:4; 1 Jhn. 5:19; bacha Pemandang 12:9, 12.) Pengidup ke jemah ila tentu balat ngenakutka enti Jehovah enda rinduka kitai!

4. Nama kebuah Jehovah ngelakka pengawa ngelaban kuasa merintah ari Iya?

4 Lebuh Sitan ngelaban kuasa merintah ari Petara, iya mega mai apai indai kitai ti keterubah ngelaban Petara. Iya nanya sekalika Petara bisi hak nyadi Pemerintah ti Pemadu Tinggi tauka enda. Sitan ngumbai chara iya merintah manah agi ari enggi Petara. (P-kal. 3:1-5) Jehovah meri Sitan awak enda lama kena nunjukka jaku iya amat tauka enda. Ari utai ke nyadi, nunjukka enggau terang mensia tauka Sitan enda ulih nyadi pemerintah ti manah.

5. Sejarah mensia enggau terang nunjukka nama?

5 Kemaya hari tu, dunya majak jai. Lebih 100 juta iku orang udah mati ba perang kenyau ari 100 taun ti udah. Ku Bup Kudus madah pasal “hari ti penudi”: “Orang ke jai, enggau orang ke pura-pura ngapa, deka majak jai se-jai.” (2 Tim. 3:1, 13) Bup Kudus mega madahka: ‘Jehovah, aku nemu, nadai siku kami bisi kuasa ngatur pengidup diri. Nadai siku kami bisi kuasa atas seput diri empu.’ (Jer. 10:23) Sejarah enggau terang nunjukka jaku tu amat. Jehovah enda nempa mensia ngambika bisi pengelandik tauka bisi hak merintah diri empu. Sida begunaka iring ari Iya.

6. Nama kebuah Petara ngelakka penyai?

6 Enggau ngelakka penyai terus nyadi ba siti timpuh, Jehovah mega nunjukka semina Iya ulih merintah enggau mujur. Jemah ila, Petara deka muai semua orang ke jai. Udah nya, barang sapa ke ngelaban chara Petara merintah, Iya deka mutarka pekara nya tekala nya. Sejarah mensia nunjukka orang ke ngelaban Petara patut dipunaska enggau jampat. Penyai enda dikemendarka nyadi baru.

BAKA NI PETARA NGAYANKA PENGERINDU IYA

7, 8. Baka ni Jehovah udah ngayanka pengerindu Iya?

7 Jehovah udah ngayanka pengerindu Iya ti besai ngena mayuh chara. Pikirka pemesai enggau pemanah dunya raya kitai. Iya bisi bebiliun iti galaksi, lalu tiap iti galaksi bisi bebiliun iti bintang enggau planet. Ba galaksi kitai ke dikumbai Bima Sakti, bisi siti bintang ke dikumbai mata panas. Enti nadai mata panas, nadai utai ulih idup ba bumi. Semua utai tu nunjukka Jehovah nya Penempa kitai, lalu utai ke ditempa nya nunjukka kualiti Iya baka kuasa, penemu-dalam sereta pengerindu. Amat, ‘kenyau ari penumbuh dunya, kuasa Petara ti meruan belama iya enggau kualiti Iya ti enda ulih dipeda, udah ditemu sereta dipeda mensia ari utai ti digaga Iya.’—Rom. 1:20.

8 Jehovah ngaga dunya ngambika ulih endur utai idup. Semua utai ba dunya meri penguntung ngagai jelu enggau mensia. Petara ngaga siti kebun ti manah alai mensia diau, lalu meri sida runding enggau tubuh ti sempurna kena idup belama iya. (Bacha Pemandang 4:11.) Kelimpah ari nya, “Iya meri pemakai ngagai semua utai ti idup, laban pengerindu Iya meruan belama iya.”—Mas. 136:25.

9. Taja pan Jehovah nya Petara pengerindu, nama utai ti dipegedika Iya?

9 Jehovah nya Petara pengerindu, nya alai Iya begedika utai ti jai. Chunto, ku Masmur 5:4-6 madah pasal Jehovah: ‘Nuan ukai Petara ti rinduka penyai . . . Nuan begedika  semua orang ke ngereja penyai.’ Iya mega “begedika orang ke mangah, ke nipu orang.”

PENGUJUNG PENYAI NYAU SEMAK

10, 11. (a) Nama deka nyadi ngagai orang ti jai? (b) Baka ni Jehovah deka merekatka mensia ke ngasi?

10 Ba maya ti ngena, Jehovah deka muai penyai ari dunya raya, laban Iya nya Petara pengerindu lalu Iya begedika utai ti jai. Jaku Petara madahka: ‘Orang ke jai deka diburu; tang orang ke nganti Jehovah, deka bempu menua tu. Enda lama da agi orang ke jai deka abis; taja pen kita bebendar begigaka sida, tang kita nadai tetemuka sida.’ Munsuh Jehovah “deka lesap baka asap.”—Mas. 37:9, 10, 20.

11 Jaku Petara mega madahka: “Orang ke lurus deka bempu menua tu lalu diau ditu belama iya.” (Mas. 37:29) Mensia ke tetap ati deka “diau lantang ngena pengaya sida.” (Mas. 37:11) Nama kebuah? Laban Petara kitai ti bepengerindu seruran ngereja utai ti pemadu manah ke nembiak Iya ke tetap ati. Bup Kudus madahka: “Iya deka ngendas semua ai mata ari mata sida, lalu pemati nadai agi, nadai agi ngulit, nadai agi nyabak, nadai agi pedis, laban utai ti lama nyau nadai agi.” (Pem. 21:4) Naka meh pemanah pengidup mensia ke ngasi maya jemah ila ketegal nerima pengerindu Petara!

12. Sapa “orang ke nadai penyalah”?

12 Bup Kudus madah ngagai kitai: “Peratika orang ke nadai penyalah. Peratika orang ke lurus, laban orang ke diau bebaik enggau orang bukai, deka bisi peturun. Tang orang ke ngereja penyalah, deka dirusak magang, lalu peturun sida deka diburu.” (Mas. 37:37, 38) “Orang ke nadai penyalah” ngelala Jehovah enggau Anak Iya sereta ngereja peneka Jehovah. (Bacha John 17:3.) Sida arap bendar ‘dunya enggau pengingin iya deka lenyau, tang orang ke ngereja peneka Petara deka idup belama iya.’ (1 Jhn. 2:17) Ketegal pengujung dunya nyau semak, ‘anti meh Jehovah, lalu titihka jalai Iya’ enggau jampat.—Mas. 37:34.

PENGERINDU PETARA TI PEMADU BESAI

13. Nama pengerindu Petara ti pemadu besai?

13 Taja pan kitai enda sempurna, kitai ulih ngasika Petara. Kitai mega ulih bisi kaul ti rapat enggau Jehovah ketegal tebus Jesus. Tebus nya nunjukka pengerindu Petara ti pemadu besai. Jehovah nyediaka tebus ngambika mensia ke ngasi bisi peluang dilepaska ari dosa enggau pemati. (Bacha Rome 5:12; 6:23.) Jesus udah lama tetap ati ngagai Petara ba serega, nya alai Jehovah arap bendar Anak Iya deka mengkang tetap ati ba dunya. Jehovah nya Apai ti bepengerindu, nya alai Iya balat merinsa lebuh Iya meda orang balat merinsaka Anak Iya. Tang, Jesus enggau tetap ati nyukung hak Petara merintah, lalu nunjukka mensia ti sempurna ulih mengkang taluk ngagai Petara, taja pan napi penguji ti pemadu besai.

Ketegal pengerindu, Petara ngirumka Anak Iya (Peda genteran 13)

14, 15. Nama tuju pemati Jesus ke mensia?

14 Taja pan napi penguji ti pemadu besai, Jesus mengkang taluk sereta nyukung hak Jehovah merintah. Kitai patut beterima kasih ngagai Jesus ke mayar rega tebus nya ngena nyawa iya, laban tebus nya meri mensia peluang idup belama iya ba dunya baru Petara! Rasul Paul nerangka pengerindu ti diayanka Jehovah enggau Jesus ngena tebus. Ku iya madahka: ‘Lebuh kitai agi lemi, ba maya ti patut, Kristus mati ke orang ke jai. Iya ti bendar, jarang orang deka mati ngarika orang ke lurus. Nyangka orang berani mati ngarika orang ke manah. Tang Petara udah ngayanka pengerindu Iya ke kitai, iya nya lebuh kitai agi nyadi orang ke bedosa, Kristus mati ngarika kitai!’ (Rom. 5:6-8) Rasul John nulis: ‘Baka tu ku jalai pengerindu Petara udah dipandangka ngagai kitai: Iya udah ngirumka Anak Tunggal Iya ngagai dunya,  ngambika kitai tau idup ulih Iya. Tu meh pengerindu, ukai reti nya kitai udah rinduka Petara, tang Iya udah rinduka kitai, lalu udah ngirumka Anak Iya nyadika [pemeri] kena muai dosa kitai.’—1 Jhn. 4:9, 10.

15 Jesus madahka, ‘Petara balat rinduka dunya, nya alai Iya meri Anak Tunggal Iya, ngambika genap iku orang ke arapka iya enda mati tang bulih pengidup ti meruan belama iya.’ (Jhn. 3:16) Taja pan tu ngasuh Jehovah balat merinsa, Iya meri Anak Iya nyadika tebus. Tu nunjukka Iya balat rinduka mensia. Lalu pengerindu tu deka meruan belama iya. Paul nulis: ‘Aku nemu, nadai utai, nemuka pemati, tauka pengidup, tauka melikat, tauka bala pemerintah, tauka utai ti diatu, tauka utai ti jemah ila, tauka kuasa, tauka dunya ti di atas enggau dunya ti di baruh, tauka semua utai bukai ti udah digaga Petara, ulih nyeraraka kitai ari pengerindu Petara dalam Jesus Kristus Tuan kitai.’—Rom. 8:38, 39.

PERINTAH PETARA BENUNG MERINTAH DIATU

16. Nama reti Perintah Messiah, lalu sapa udah dipilih Jehovah nyadi Pemerintah?

16 Perintah Petara tauka Perintah Messiah mega nunjukka pengerindu Jehovah ke mensia, laban Jehovah udah milih seiku Pemerintah ke rinduka mensia sereta dikemendarka merintah, iya nya Jesus Kristus. (J-lam. 8:31) Nambahka nya, Petara udah milih 144,000 iku mensia ngambika merintah enggau Kristus ba serega. Lebuh sida diangkatka idup baru, sida mai pengalaman sida ke kala nyadi mensia. (Pem. 14:1) Lebuh Jesus agi ba dunya, Perintah Petara nyadi ke batang ajar iya, lalu iya ngajar bala murid iya besampi: “Apai kami ti di serega: Kudus meh nama Nuan. Datai meh Perintah Nuan. Nyadi meh peneka Nuan di dunya enggau di serega.” (Mat. 6:9, 10) Kitai nganti maya sampi tu dikeamatka, lebuh Perintah Petara mai mayuh berekat ke mensia!

17. Bandingka chara Jesus merintah enggau chara mensia merintah.

17 Bisi bida ti besai entara chara Jesus merintah enggau chara mensia merintah. Chara mensia merintah ngasuh perang nyadi, lalu tu udah munuh bejuta iku orang. Tang Pemerintah kitai, Jesus, amat rinduka kitai, lalu neladan kualiti manah Jehovah, kelebih agi pengerindu. (Pem. 7:10, 16, 17) Ku Jesus: ‘Datai ngagai aku semua kita ke lelak ngema utai ti berat, lalu aku deka ngasuh kita belelak. Ambi lalu san tangkun aku, lalu belajar ari aku, laban aku nelap sereta baruh ati, lalu belelakka semengat kita. Laban tangkun aku mudah, lalu ma aku lempung.’ (Mat. 11:28-30) Naka meh pemanah semaya tu!

18. (a) Nama udah nyadi kenyau ari taun 1914? (b) Nama deka dikerandauka kitai ba artikel pengudah tu?

18 Bup Kudus nunjukka Perintah Petara berengkah merintah ba serega kena taun 1914. Kenyau ari nya, pengawa ngumpul sekeda da agi orang ke deka merintah enggau Jesus ba serega sereta ngumpul “mayuh amat orang” ke deka selamat maya pengujung dunya berengkah dipejalaika. “Mayuh amat orang” tu deka tama ngagai dunya baru Petara. (Pem. 7:9, 13, 14) Ni penyampau “mayuh amat orang” kemaya hari tu? Nama dikedekaka Petara ari sida? Artikel pengudah tu deka nyaut tanya nya.