Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 TOPIK RANDAU | NAMA PENEMU PETARA PASAL PERANG?

Penemu Petara Pasal Perang Maya Kurun Keterubah

Penemu Petara Pasal Perang Maya Kurun Keterubah

Sida balat diperinsa. Sama baka peturun sida menya, orang Judah ba kurun keterubah tentu suah besampi ngagai Petara minta dilepaska ari pemerinsa, ketegal ditekan Perintah Rome. Udah nya, sida ninga pasal Jesus. Kati iya amat Messiah ke disemaya? Nya alai, mayuh sida ‘ngarapka iya deka ngelepaska Israel’ ari diperinsa orang Rome. (Luke 24:21) Tang utai tu enda nyadi. Ba taun 70 M., soldadu Rome datai lalu ngerusakka Jerusalem enggau Rumah Sembiang.

Nama kebuah Petara enda beperang ngarika orang Judah, baka ke udah digaga Iya kelia menya? Tauka nama kebuah Iya enda ngemendarka sida beperang kena ngelepaska diri ari diperinsa? Kati penemu Petara pasal perang udah berubah? Enda. Tang, bisi utai ke berubah enggau ngenyit ba orang Judah. Sida udah nulak Anak Petara, Jesus, nyadi Messiah. (Kereja Rasul 2:36) Nya alai, semua orang Judah lenyau kaul ti istimewa enggau Petara.—Matthew 23:37, 38.

Bansa Judah enggau Menua ti Udah Disemaya enda agi dijaga Petara, orang Judah mega enda ulih agi ngumbai Petara deka ngemendarka tauka nyukung sida beperang. Baka ke udah dipadah Jesus, berekat ari Petara udah diambi ari bansa Israel, lalu diberi ngagai bansa baru ke dikumbai ‘orang Israel ke nembiak Petara.’ (Galatia 6:16; Matthew 21:43) Gerempung orang Kristian ke diiri ngena roh kudus nunjukka sida Israel ke nembiak Petara. Nya alai, ba kurun keterubah sida dikumbai: “Diatu kita nembiak Iya.”—1 Peter 2:9, 10.

Ketegal orang Kristian kurun keterubah udah nyadi ‘nembiak Petara,’ kati Petara beperang ngarika sida kena ngelepaska sida ari diperinsa orang Rome? Tauka kati Iya ngemendarka sida beperang ngelaban orang ke merinsaka sida? Enda. Nama kebuah enda? Lebuh bekaul enggau perang ti ditetapka Petara, Iya Empu netapka kemaya perang nya deka nyadi, baka ke udah dipadah ba artikel sebedau tu. Petara enda beperang ngarika orang Kristian kurun keterubah, tauka ngemendarka sida enggau beperang. Enggau tu kitai nemu, kurun keterubah nya ukai maya Petara beperang ngelaban penyai enggau pengawa nekan.

Nya alai, baka nembiak Petara kelia menya, orang Kristian kurun keterubah patut nganti maya Petara ngujungka penyai enggau pengawa nekan. Sebedau jam nya datai, sida enda dikemendarka Petara beperang ngelaban munsuh sida. Jesus Kristus nyebut utai tu enggau terang ba ajar iya. Chunto, iya enda ngasuh murid iya enggau beperang, tang iya ngasuh sida: “Rinduka munsuh kita, lalu besampika orang ke merinsaka kita.” (Matthew 5:44) Lebuh Jesus madah pasal maya soldadu Rome ke deka nyerang Jerusalem ba kurun keterubah, Jesus ngasuh bala murid iya ngerarika diri, ukai ngetanka diri sereta ngelaban. Tu meh digaga sida.—Luke 21:20, 21.

Kelimpah ari nya, rasul Paul nulis: “Menyadi, anang malas, . . . laban endang udah ditulis, ‘Aku ke malas, Aku deka mayar, ku Tuhan bejaku.’” (Rome 12:19) Paul nyebut jaku ke udah dipadah Petara beratus taun sebedau nya, iya ke bisi ditulis ba Adat Lewi 19:18 enggau Ulang Adat 32:35. Baka ke udah dipadahka ba artikel sebedau tu, siti ari chara Petara malas munsuh nembiak Iya maya kelia menya, iya nya enggau nulung nembiak Iya beperang ngelaban munsuh sida. Nya alai  jaku Paul nunjukka, penemu Petara pasal perang mengkang enda berubah. Ba kurun keterubah, Petara agi ngemendarka perang kena nulung nembiak Iya sereta kena ngujungka mayuh macham penyai enggau pengawa nekan. Taja pia, baka kelia menya, Petara Empu netapka kemaya perang nya deka nyadi sereta sapa ke patut enggau beperang.

Endang amat, Petara enda ngemendarka orang Kristian kurun keterubah beperang. Tang baka ni enggau kemaya hari tu? Kati Petara bisi ngemendarka siti-siti raban mensia kemaya hari tu enggau beperang? Kati diatu maya alai Petara enggau beperang tauka ngarika nembiak Iya beperang? Baka ni penemu Petara pasal perang kemaya hari tu? Artikel ti penudi ba topik tu deka nyaut tanya nya.