Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  November 2015

 TOPIK RANDAU

Nama Penemu Petara Pasal Perang?

Nama Penemu Petara Pasal Perang?

Baka ni nuan nyaut tanya nya? Mayuh orang ngumbai Petara ngemendarka perang, laban Iya ngasuh sekeda penyembah Iya enggau beperang kelia menya. Lalu utai tu bisi ditulis ba Bup Kudus. Taja pia, sekeda orang nemu Anak Petara, Jesus, ngajar bala murid iya ngambika rindu ke munsuh sida. (Matthew 5:43, 44) Nya kebuah sida ngumbai penemu Petara pasal perang udah berubah, lalu Iya enda ngemendarka perang kemaya hari tu.

Nama penemu nuan? Kati Petara bisi ngemendarka perang? Enti bisi, sapa disukung Iya ba laya kemaya hari tu? Nemu saut ngagai tanya tu ulih ngubah penemu nuan pasal perang. Chunto, enti nuan nemu Petara ukai semina ngemendarka perang, tang mega nyukung orang ke disukung nuan, tentu nuan puas ati sereta arap bendar piak ke disukung nuan deka menang. Tang, baka ni asai ati nuan lebuh nuan nemu Petara nyukung orang ke ngelaban nuan? Nuan tentu deka berunding baru, sapa ke patut disukung.

Tang bisi utai berat bukai ke patut diperundingka. Nemu runding Petara pasal perang, ulih ngubah runding nuan pasal Petara. Enti nuan nya entara bejuta iku orang ke kala merinsa ketegal perang, nuan patut nemu saut ngagai tanya tu, Kati Petara ke ngepunka perang sereta ngasuh mensia balat merinsa ketegal perang? Tauka kati Iya semina meda aja sereta enda ibuhka orang ke kena perinsa?

Nuan engka enda nyangka saut ari Bup Kudus enda sama enggau semua penemu nya. Iya ke amat, ari kelia menya nyentuk ke diatu, penemu Petara pasal perang mengkang enda berubah. Aram kitai beratika nama dipadah Bup Kudus, pasal penemu Petara bekaul enggau perang maya kelia menya enggau maya kurun keterubah, lebuh Jesus ba dunya tu. Tu deka nulung kitai nemu nama penemu Petara pasal perang kemaya hari tu, sereta nulung kitai nemu sekalika perang deka terus nyadi nyentuk ke jemah ila.