Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  November 2015

Latih Meh Anak Nuan Nyembah Jehovah—Begian 1

Latih Meh Anak Nuan Nyembah Jehovah—Begian 1

“Asuh nabi nya . . . madahka ngagai kami utai ti patut dikereja kami lebuh anak mit nya ada ila.”—P-ULU. 13:8.

LAGU: 88, 120

1. Nama digaga Manoah lebuh iya ninga iya deka nyadi apai?

MANOAH enggau bini iya ngumbai diri sigi nadai anak. Bisi sekali, melikat Jehovah madah ngagai bini Manoah, iya deka ngadaka seiku anak lelaki. Tu berita manah ti enda disadang! Lebuh iya madahka berita manah nya ngagai Manoah, Manoah balat gagit. Tang, Manoah mega berunding enggau dalam pasal utai ti dikedekaka Jehovah ari iya lebuh nyadi apai. Baka ni iya enggau bini iya, ulih ngelatih anak seduai iya rinduka Jehovah sereta nyembah Iya laban mayuh orang ba Israel ngereja penyai? Manoah minta Jehovah ngasuh melikat nya pulai baru. Ku iya: “Asuh nabi nya pulai kitu baru ngagai kami, ngambika iya madahka ngagai kami utai ti patut dikereja kami lebuh anak mit nya ada ila.”—P-ulu. 13:1-8.

2. Nama patut diajar nuan ngagai bala anak nuan, lalu baka ni nuan ulih ngereja nya? (Peda mega kutak “ Pelajar Bup Kudus Nuan ti Pemadu Berega.”)

2 Apai indai tentu nemu baka ni asai ati Manoah. Nuan mega bisi tanggungjawap kena nulung bala anak nuan ngelala sereta rinduka Jehovah. * (J-lam. 1:8) Lebuh belajarka Bup Kudus ba diri sebilik, nuan ulih nulung sida terus belajar pasal Jehovah enggau Bup Kudus.  Endang amat, nuan ukai semina belajarka Bup Kudus enggau bala anak nuan ninting minggu. (Bacha Ulang Adat 6:6-9.) Nama utai bukai ke ulih nulung nuan ngelatih sida rinduka Jehovah sereta nyembah Iya? Ba artikel tu, kitai deka berandauka teladan Jesus. Taja pan iya enda kala nyadi apai, nuan ulih belajar ari chara iya ngajar sereta ngelatih bala murid iya. Jesus rinduka sida sereta baruh ati. Lalu iya nemu berunding, iya nemu baka ni asai ati sida sereta nemu baka ni nulung sida. Diatu, aram kitai meda baka ni kitai ulih neladan Jesus.

RINDUKA BALA ANAK NUAN

3. Baka ni bala murid Jesus nemu iya rinduka sida?

3 Jesus suah madah ngagai bala rasul iya, iya rinduka sida. (Bacha John 15:9.) Iya mega ngena mayuh awak begulai enggau sida. (Mrk. 6:31, 32; Jhn. 2:2; 21:12, 13) Jesus ukai semina pengajar sida, tang iya mega nyadi kawan sida. Nya alai sida pechaya, Jesus rinduka sida. Nama ulih dipelajarka nuan ari Jesus?

4. Baka ni nuan ulih ngayan ngagai bala anak nuan, nuan rinduka sida? (Peda gambar ba pun artikel.)

4 Padah ngagai bala anak nuan, nuan rinduka sida, sereta awakka sida nemu sida berega ba nuan. (J-lam. 4:3; Tit. 2:4) Samuel, ke diau ba menua Australia, madahka: “Lebuh aku agi mit, apai aku selalu macha bup My Book of Bible Stories ke aku tiap malam. Iya nyaut utai ke ditanya aku, merap aku, lalu nyium aku sebedau tinduk. Aku tekenyit lebuh aku nemu, apai aku ukai dibesaika ba ruang bilik ke bisi merap tauka nyium diri sebilik! Tang, iya enggau naka ulih madahka diri sayauka aku. Asil iya, aku bisi kaul ti rapat enggau iya, lalu ngasaika diri dikerindu sereta likun.” Tulung meh bala anak nuan ngasaika utai ti sama enggau suah nyebut “Aku sayauka nuan” ngagai sida. Berap sereta sium meh sida. Beri meh awak berandau enggau sida, makai enggau sida, sereta bemain enggau sida.

5, 6. (a) Ketegal Jesus rinduka bala rasul iya, nama digaga iya? (b) Baka ni nuan patut disiplin bala anak nuan?

5 Ku Jesus: ‘Aku nganu sereta disiplin semua orang ke dikerinduka aku.’ * (Peda nota kaki.) (Pem. 3:19) Chunto, bala murid Jesus suah bekelikuh enggau pangan diri pasal sapa ke pemadu besai. Jesus enda nejuka penanggul tu. Tang iya terus ngelalau sida enggau sabar. Iya selalu nelap, sereta ngemetulka sida ba maya enggau endur ti ngena.—Mrk. 9:33-37.

6 Ketegal nuan sayauka bala anak nuan, nuan nemu nuan enda tau enda disiplin sida. Kekadang semina madahka nama kebuah siti-siti utai nya betul tauka salah udah chukup. Tang, baka ni enti sida agi enggai ngasi? (J-lam. 22:15) Belajar ari Jesus. Sabar meh, lalu terus disiplin sida enggau ngiring, ngelatih, sereta ngemetulka sida. Pilih meh maya enggau endur ti ngena, lalu disiplin sida enggau chara ti nelap. Seiku menyadi Kristian indu ari menua Afrika Selatan ke benama Elaine agi ingatka chara apai indai iya disiplin iya. Sida selalu madahka utai ti dikedekaka sida ari iya. Enti sida madahka iya deka diukum ketegal enda ngasi, sida amat ngereja nya. Tang ku iya: “Sida enda kala disiplin aku lebuh sida pedis ati tauka enda madahka kebuah aku diberi disiplin.” Ari tu iya nemu, apai indai iya sayauka iya.

BARUH ATI

7, 8. (a) Nama dipelajarka bala murid Jesus ari sampi iya? (b) Baka ni sampi nuan ulih ngajar bala anak nuan bepanggai ba Petara?

7 Lebuh Jesus deka ditangkap sereta  dibunuh, iya besampi ngagai Apai iya: ‘Abba, Apai, ba Nuan semua utai ulih magang. Ambi mangkuk tu ari aku, tang ukai nitihka peneka aku, tang nitihka peneka Nuan.’ * (Peda nota kaki.) (Mrk. 14:36) Uji gambarka baka ni asai ati bala murid Jesus lebuh sida ninga, tauka udah nya nemu pasal sampi iya. Sida nemu taja pan iya sempurna, iya agi minta tulung ari Apai iya. Nya alai sida nemu, sida mega patut baruh ati sereta bepanggai ba Jehovah.

8 Bala anak nuan ulih belajar mayuh utai ari sampi nuan. Endang amat, nuan besampi ukai semina ketegal deka ngajar bala anak nuan. Tang lebuh sida ninga nuan besampi, sida ulih belajar bepanggai ba Jehovah. Lebuh besampi, nuan ukai semina minta Jehovah nulung bala anak nuan, tang minta Iya nulung nuan mega. Ana, ke diau ba menua Brasil madahka: “Lebuh bisi penanggul, baka maya aki ini aku sakit, apai indai aku minta Jehovah meri sida pengering kena napi penanggul nya sereta minta penemu-dalam kena ngaga pemutus ti manah. Indah lebuh kena penanggul ti balat, sida nyerahka penanggul sida ngagai Jehovah. Asil iya, aku belajar bepanggai ba Jehovah.” Lebuh bala anak nuan ninga nuan minta Jehovah meri nuan pemerani kena nginjil ngagai orang ke berimbai diau tauka minta cuti ari tauke ngambika ulih datai ke gempuru besai, sida nemu nuan bepanggai ba tulung ari Jehovah, lalu sida belajar ngereja utai ti sama.

9. (a) Baka ni Jesus ngajar bala murid iya baruh ati sereta enda ngira diri? (b) Enti nuan baruh ati sereta enda ngira diri, nama deka dipelajarka bala anak nuan?

9 Jesus ngasuh bala murid iya baruh ati sereta enda ngira diri, lalu iya mega netapka teladan. (Bacha Luke 22:27.) Bala murid iya meda, iya ngelengkaka mayuh utai ngambika ulih nyembah Jehovah sereta nulung orang bukai, lalu sida belajar ngereja utai ti sama. Nuan mega ulih ngajar bala  anak nuan ari teladan nuan. Debbie, ke bisi dua iku anak, madahka: “Aku enda kala chemburu enggau awak ke dikena laki aku begulai enggau orang bukai, ketegal nyadi tuai gempuru. Aku nemu tiap kali kami sebilik begunaka iya, iya ulih meri utai ke diguna kami.” (1 Tim. 3:4, 5) Baka ni teladan Debbie enggau laki iya, Pranas, nulung sida sebilik? Pranas madahka, bala anak iya seruran deka nulung ba gempuru besai. Sida gaga ati, bulih kawan ti manah, sereta rindu begulai enggau bala menyadi Kristian. Semua sida sebilik diatu semina gawa ke Jehovah aja. Enti nuan baruh ati sereta enda ngira diri, nuan ngajar bala anak nuan rindu nulung orang bukai.

NEMU BERUNDING

10. Baka ni Jesus ngena runding iya lebuh sekeda orang ba Galili datai ngiga iya?

10 Jesus ngembuan runding ti sempurna. Iya ukai semina beratika utai ti digaga orang, tang beratika kebuah sida ngereja nya. Iya ulih macha ati sida. Chunto, bisi sekali sekeda orang ba Galili datai ngiga iya. (Jhn. 6:22-24) Iya nemu, kebuah sida datai ukai ketegal sida deka mendingka utai ti diajarka iya, tang ketegal sida dekaka pemakai. (Jhn. 2:25) Jesus nemu utai ke diasaika sida. Udah nya, iya enggau sabar ngemetulka sida, lalu nerangka ngagai sida utai ke patut diubah sida.—Bacha John 6:25-27.

Nulung bala anak nuan ngambika rindu nginjil (Peda genteran 11)

11. (a) Baka ni nuan ulih nemu asai ati bala anak nuan pasal pengawa nginjil? (b) Baka ni nuan ulih nulung bala anak nuan ngambika rindu nginjil?

11 Taja pan nuan enda ulih macha ati, tang nuan ulih berunding. Chunto, nuan ulih nemu baka ni asai ati anak nuan pasal pengawa nginjil. Nuan ulih nanya diri empu, ‘Kati bala anak semina deka enggau nginjil ketegal kami sebilik ulih makai tauka ngirup ba luar pengudah nginjil?’ Enti nuan ngasaika bala anak nuan enda entu rindu nginjil, uji gaga utai ke ngasuh sida rindu agi nginjil. Beri sida pengawa mit ke ulih digaga ngambika sida ngasaika diri beguna.

12. (a) Jesus nangkan bala murid iya pasal utai nama? (b) Nama kebuah bala murid Jesus begunaka jaku tangkan ari iya?

12 Nama agi chara bukai nunjukka Jesus ngena runding iya? Iya nemu, siti penyalah ulih ngujungka penyalah ti bukai tauka dosa ti besai, lalu iya nangkan bala murid iya pasal utai tu. Chunto, bala murid nemu ulah seks ti kamah nya salah. Tang, Jesus nangkan sida pasal utai ke ulih ngujungka orang ngereja ulah ti kamah. Ku iya: “Barang sapa merening ngagai indu enggau ati ti kamah, udah butang enggau indu nya dalam ati iya. Enti mata kanan nuan mai nuan bedosa, keruk lalu buai iya!” (Mat. 5:27-29) Bala murid Jesus diau entara orang Rome ke rindu meda lakun ke ngayanka ulah seks ti kamah enggau jaku ti kamah. Nya alai, Jesus enggau pengerindu nangkan bala murid iya ngambika nyeliahka sebarang utai ke ngasuh sida tusah deka ngereja utai ti betul.

13, 14. Baka ni nuan ulih nulung bala anak nyeliahka pemerindang ke bisi ulah ti kamah?

13 Apai indai, nuan ulih ngena runding nuan nyaga bala anak nuan nyeliahka utai ti enda ngerinduka ati Jehovah. Tang sayau  amat, kemaya hari tu pornografi enggau utai bukai ke bekaul enggau ulah ti kamah ulih ngachau anak mit. Endang amat, nuan patut madah ngagai bala anak nuan, meda utai ke bekaul enggau ulah ti kamah nya salah. Tang bisi utai bukai ke ulih digaga nuan kena nyaga sida. Tanya diri empu: ‘Kati bala anak aku nemu kebuah pornografi nya ulih ngerusak? Nama ulih ngasuh sida deka meda pornografi? Kati aku ngasuh sida senang bejaku enggau aku pasal sebarang utai, ngambika sida deka minta tulung ari aku, indah lebuh sida bisi pengingin deka meda pornografi?’ Taja pan bala anak agi mit, nuan mega ulih madah ngagai sida: “Enti nuan kala meda utai ba Internet ke ngasuh nuan deka nemu pasal seks, lalu nuan bisi ati deka meda iya, nuan ulih berandau enggau aku pasal utai nya. Anang takut tauka malu minta tulung ari aku. Aku deka nulung nuan.”

14 Lebuh nuan milih pemerindang, pikirka mega baka ni nuan ulih nyadi teladan ti manah ke bala anak nuan. Pranas, ke udah disebut ba pun tadi, madahka: “Nuan ulih nyebut mayuh macham utai pasal siti-siti pekara, tang bala anak nuan deka beratika utai ti digaga nuan, lalu neladan nuan.” Enti nuan selalu bejimat milih musik, bup, sereta cherita wayang ke manah, nuan ulih nulung bala anak nuan ngereja utai ti sama.—Rom. 2:21-24.

JEHOVAH DEKA NULUNG NUAN

15, 16. (a) Nama kebuah nuan ulih pechaya Jehovah deka nulung nuan ngelatih bala anak nuan? (b) Nama deka dikerandauka kitai ba artikel pengudah tu?

15 Nama nyadi lebuh Manoah minta Jehovah nulung iya nyadi apai ti manah? ‘Petara lalu ngereja utai ti dipinta Manoah.’ (P-ulu. 13:9) Apai indai, Jehovah mega deka ningaka sampi nuan. Iya deka nulung nuan ngelatih bala anak nuan. Lalu Iya deka nulung nuan ngayanka pengerindu, pemaruh ati sereta nemu berunding.

16 Baka Jehovah ke deka nulung nuan ngelatih bala anak nuan lebuh sida agi mit, Iya mega ulih nulung nuan ngelatih sida lebuh sida beumur bebelas taun. Ba artikel pengudah tu, kitai deka berandauka baka ni teladan Jesus ba pengerindu, baruh ati sereta nemu berunding ulih nulung nuan ngelatih anak nuan ke beumur bebelas taun nyembah Jehovah.

^ per. 2 Artikel tu berandauka baka ni apai indai ulih ngajar anak sida ke beumur 12 taun ke baruh nyembah Jehovah.

^ per. 5 Bup Kudus ngajar, disiplin reti iya ngiring, ngelatih, ngemetul sereta kekadang ngukum. Apai indai patut meri disiplin ngena chara ti nelap, lalu anang disiplin anak lebuh sida benung pedis ati.

^ per. 7 Maya jeman Jesus, bala anak ngangauka apai sida Abba. Jaku tu nunjukka bisi pengerindu enggau basa.—The International Standard Bible Encyclopedia.