Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  Oktober 2015

“Tambahka Pengarap Kami”

“Tambahka Pengarap Kami”

“Tulung aku ngambika pengarap aku besai agi!”—MRK. 9:24

LAGU: 81, 135

1. Nama kebuah pengarap nya beguna? (Peda gambar ba pun artikel.)

KALA nuan nanya diri empu, ‘Kati Jehovah deka nyelamatka aku maya penusah ti besai?’ Rasul Paul madahka, siti kualiti ke amat beguna ngambika kitai ulih selamat iya nya pengarap. Ku iya: ‘Nadai orang ulih ngerinduka ati Petara enti iya enda arapka Petara.’ (Heb. 11:6) Tu munyi ke senang, tang iya ke bendar “ukai semua orang arap.” (2 Tes. 3:2) Dua iti ayat nya nulung kitai nemu nama kebuah negapka pengarap nya beguna.

2, 3. (a) Nama kebuah pengarap kitai beguna? (b) Nama deka dikerandauka kitai diatu?

2 Rasul Peter bejaku pasal “pengamat” pengarap. (Bacha 1 Peter 1:7.) Penusah ti besai nyau majak semak, lalu kitai deka nyadi “orang ke arap, lalu diselamatka.” (Heb. 10:39) Nya alai, kitai patut bebendar negapka pengarap kitai. Kitai deka nyadi orang ke diberekatka lebuh Jesus Kristus, Raja kitai, datai. Baka seiku lelaki ke minta Jesus nambahka pengarap iya, kitai mega ulih nyebut: “Tulung aku ngambika pengarap aku besai agi!” (Mrk. 9:24) Tauka baka bala rasul, kitai mega ulih nyebut: “Tambahka pengarap kami.”—Luk. 17:5.

3 Ba artikel tu, kitai deka berandauka batang pekara tu: baka ni kitai ulih nambahka pengarap kitai, baka ni kitai ulih ngayanka penegap pengarap kitai, lalu nama kebuah kitai ulih pechaya Jehovah deka nyaut sampi kitai, enti kitai minta ditambahka pengarap.

 PETARA SENANG ATI ENTI KITAI NAMBAHKA PENGARAP KITAI

4. Teladan sapa ke ulih meransang kitai negapka pengarap?

4 Ketegal pengarap nya beguna bendar, Jehovah udah meri kitai mayuh chunto pasal pengarap ba Bup Kudus. Utai tu “endang ditulis kena ngajar kitai.” (Rom. 15:4) Teladan Abraham, Sarah, Isak, Jakop, Moses, Rahap, Gideon, Barak, enggau mayuh agi sida ke bukai, ulih meransang kitai negapka pengarap kitai. (Heb. 11:32-35) Kelimpah ari sida tu, kemaya hari tu kitai mega bisi chunto bala menyadi Kristian ke bisi pengarap ti besai. * (Peda nota kaki.)

5. Baka ni Elijah ngayanka iya bisi pengarap ti tegap ba Jehovah, lalu nama patut ditanya kitai empu?

5 Siti teladan ari Bup Kudus iya nya nabi Elijah. Seraya nuan belematika teladan iya, peratika lima iti utai ti nyadi ba iya ke ngayanka iya bisi pengarap ti tegap ba Jehovah. (1) Lebuh Elijah madah ngagai Raja Ahap pasal Jehovah ke deka ngenataika kemarau, iya enggau enda kakang ati madahka: ‘Dalam nama Jehovah Petara ti idup, ke disembah orang Israel sereta dipetuaika aku, aku madahka ngagai nuan, menua Israel nadai ambun tauka ujan dalam dua tauka tiga taun ti deka datai tu, nyentuk ngagai maya aku ngasuh hari ujan.’ (1 Raj. 17:1) (2) Elijah pechaya Jehovah deka meri iya enggau sida ke bukai utai ti diguna sida sepemanjai kemarau nya. (1 Raj. 17:4, 5, 13, 14) (3) Elijah mega pechaya Jehovah ulih ngidupka baru anak lelaki seiku indu balu. (1 Raj. 17:21) (4) Iya pechaya api ari Jehovah deka nganguska pemeri iya ba Bukit Karmel. (1 Raj. 18:24, 37) (5) Indah sebedau ujan nurun, Elijah enggau enda kakang ati madah ngagai Ahap: “Alai nuan makai. Aku bisi ninga munyi auh ujan datai.” (1 Raj. 18:41) Nya alai pengudah beratika utai ke nyadi ba Elijah, kitai ulih nanya diri empu, ‘Kati pengarap aku tegap baka pengarap Elijah?’

NAMA ULIH DIGAGA KITAI KENA NAMBAHKA PENGARAP?

6. Nama utai ti patut dipinta ari Jehovah kena nambahka pengarap kitai?

6 Ketegal kitai enda ulih nambahka pengarap kediri empu, kitai patut minta roh kudus ari Petara. Nama kebuah? Laban pengarap nya siti ari buah roh kudus. Kitai bepenemu-dalam enti kitai nitihka jaku lalau Jesus ke ngasuh besampi minta mayuh agi roh kudus. Jesus besemaya Jehovah deka ‘meri roh kudus ngagai orang ke minta ari Iya!’—Luk. 11:13.

7. Terangka baka ni kitai ulih ngetanka pengarap ti tegap.

7 Enti kitai udah bisi pengarap ti tegap ba Petara, kitai enda tau enda ngetanka iya. Kitai ulih mandingka pengarap enggau api. Lebuh kitai ngidupka api, daun api balat mau. Taja pia, enti kitai enda nambahka kayu ngagai api nya, iya deka padam lalu nyadi abu. Tang, enti kitai terus nambahka kayu ngagai api nya, iya deka semampai mau. Sama mega enggau pengarap kitai. Enti kitai terus macha sereta belajarka Jaku Petara ninting hari, pengerindu kitai ke Bup Kudus enggau Jehovah deka nambah. Asil iya, kitai ulih ngetanka sereta negapka pengarap kitai.

8. Nama deka nulung kitai nambahka sereta ngetanka pengarap kitai?

8 Kitai enda patut semina puas ati enggau utai ti dipelajar kitai sebedau dibaptisa. (Heb. 6:1, 2) Kitai ulih nambahka sereta ngetanka pengarap kitai enti belajarka se maya Petara ari Bup Kudus ke udah dikeamatka. Kitai mega ulih nentuka penegap pengarap kitai ngena Jaku Petara.—Bacha James 1:25; 2:24, 26.

9, 10. Baka ni pengarap kitai ulih ditegapka (a) kawan ti manah? (b) gempuru? (c) pengawa nginjil?

9 Rasul Paul madahka, orang Kristian “sama diperansang ulih pengarap pangan diri.” (Rom. 1:12) Nama reti nya? Lebuh kitai ngena awak begulai enggau bala menyadi Kristian, kitai ulih negapka pengarap pangan diri. Tu endang amat, lebuh kitai begulai enggau sida ke udah “diuji” ba pengarap. (Jas. 1:3) Bala kawan ti jai ngerusak pengarap kitai, tang bala kawan ti manah nambahka pengarap. (1 Kor. 15:33) Nya kebuah kitai dilalau datai ke gempuru enggau tetap. Dia, kitai ulih terus “meransang pangan diri.” (Bacha Hebrew 10:24, 25.) Nambahka nya, jaku lalau ke diterima kitai ba gempuru ulih negapka pengarap kitai. Bup Kudus madahka, “pengarap datai ari ke ningaka pesan.” (Rom. 10:17) Nya alai, tanya diri empu, ‘Kati aku datai gempuru Kristian enggau tetap?’

10 Kitai mega negapka pengarap kitai lebuh kitai nginjil sereta ngajar orang bukai berita manah ari Bup Kudus. Baka orang Kristian keterubah, kitai belajar arapka Jehovah sereta berani bekunsi berita manah ba sebarang maya.—SKR. 4:17-20; 13:46.

11. Nama kebuah Kalep enggau Josua bisi pengarap ti tegap, lalu baka ni kitai ulih neladan seduai iya?

11 Pengarap kitai ba Jehovah nambah lebuh kitai meda baka ni Iya nulung kitai enggau baka ni Iya nyaut sampi kitai. Nya meh utai ke nyadi ba Kalep enggau Josua. Seduai iya ngayanka pengarap ba Jehovah lebuh seduai iya matau Menua ti Udah Disemaya. Nyau kelama, pengarap seduai iya nyadi tegap agi tiap kali seduai iya meda baka ni Jehovah nulung seduai iya. Josua enggau enda kakang ati madahka orang Israel: “Genap semaya ti udah digaga Iya [Jehovah], udah dikamatka Iya magang. Nadai siti semaya nya ti enda dikamatka Iya.” Udah nya iya madah: ‘Nya alai, kemesaika Jehovah lalu betuaika Iya ngena ati ti betul sereta tetap.’ Ku iya agi: ‘Aku enggau semua kami sebilik deka betuaika Jehovah.’  (Jos. 23:14; 24:14, 15) Lebuh kitai arapka Jehovah sereta meda baka ni Iya nulung kitai, pengarap kitai deka tegap agi.—Mas. 34:8.

BAKA NI KITAI ULIH NGAYANKA PENGARAP DIRI

12. Baka ni kitai ngayanka diri bisi pengarap ti tegap?

12 Baka ni kitai ngayanka diri bisi pengarap ti tegap? James madahka: “Aku deka mandangka ngagai nuan pengarap aku ngena pengawa ti dikereja aku.” (Jas. 2:18) Pengawa kitai ngayanka kitai bisi pengarap ti tegap. Aram kitai meda.

Sida ke nginjil enggau naka ulih ngayanka penegap pengarap sida (Peda genteran 13)

13. Baka ni kitai ngayanka pengarap lebuh kitai nginjil?

13 Nginjil nya chara ti pemadu manah kena ngayanka pengarap kitai. Nama kebuah? Laban lebuh kitai nginjil kitai ngayanka diri pechaya pengujung nya nyau semak, lalu “iya enda masau jam.” (Hab. 2:3) Kena nemu sekalika pengarap kitai tegap tauka enda, kitai ulih nanya diri empu: ‘Kati aku beberatka pengawa nginjil? Kati aku enggau naka ulih madah ngagai orang bukai pasal Petara? Kati aku ngiga chara kena nambahka agi pengawa aku ke Jehovah?’ (2 Kor. 13:5) Aram meh kitai ngayanka penegap pengarap kitai enggau “ngaku ngena mulut” kitai, “lalu diselamatka” iya nya ngena chara nginjil.—Bacha Rome 10:10.

14, 15. (a) Baka ni kitai ulih ngayanka pengarap ba pengidup kitai ninting hari? (b) Padahka siti pengalaman ke ngayanka pengarap ti tegap.

14 Kitai mega ngayanka pengarap ba Jehovah lebuh kitai betan ngelaban penanggul ba pengidup di dunya tu. Lebuh kitai sakit, lemi semengat, balat tusah ati, seranta, tauka bisi penanggul ke bukai, kitai enda tau enda arapka Jehovah enggau Jesus deka “nulung kitai lebuh kitai begunaka iya.” (Heb. 4:16) Kitai ngayanka pengarap ba Jehovah maya kitai minta tulung ari Iya. Jesus madahka, kitai ulih minta Jehovah meri kitai “sehari tu pemakai umbas dipakai” kitai. (Luk. 11:3) Cherita ba Bup Kudus nunjukka Jehovah ulih meri kitai sebarang utai ti diguna kitai. Chunto, lebuh kemarau balat nyadi ba Israel, Jehovah meri Elijah pemakai enggau ai. Bup Kudus  madahka, “iya ngirup ari sungai nya, lalu burung kak mai roti enggau dagin tiap pagi enggau tiap lemai ngagai iya.” (1 Raj. 17:3-6) Kitai mega tau arap Jehovah ulih meri kitai utai ti diguna kitai.

Kitai ngayanka pengarap lebuh kitai betan ngelaban penanggul ba pengidup di dunya tu (Peda genteran 14)

15 Kitai pechaya maya kitai nitihka prinsip Bup Kudus, kitai ulih nyediaka utai ti diguna ba diri sebilik. Rebecca, seiku menyadi Kristian indu ba Asia, nerangka baka ni iya enggau sida sebilik nitihka prinsip ba Matthew 6:33 enggau Jaku Dalam 10:4. Rebecca madahka, laki iya ngasaika kereja iya ulih ngerusak kaul sida enggau Jehovah. Nya alai, laki iya badu kereja. Tang seduai iya bisi empat iku anak ke patut dipelanja, nya kebuah sida berengkah ngaga pemakai ke ulih dijual. Ketegal sida bebendar gawa, sida bulih chukup duit kena melanja sida sebilik. Ku iya: “Kami ngasaika Jehovah enda kala ninggalka kami. Kami enda kala enda makai.” Kala nuan ngasaika pengalaman ti sama ke ulih negapka pengarap nuan?

16. Nama deka nyadi enti kitai arapka Petara?

16 Enti kitai nitihka iring ari Jehovah, kitai enda patut kakang ati Iya deka nulung kitai. Paul ngambi jaku Habakuk lebuh iya madahka: “Orang ke lurus deka idup ngena pengarap.” (Gal. 3:11; Hab. 2:4) Nya kebuah kitai patut bisi pengarap ti tegap ba Iya ke amat ulih nulung kitai. Paul ngingatka kitai, Petara nya “Iya ke ulih ngereja utai lebih ari ti dipinta tauka diperagam kitai, ulih kuasa ti bekereja dalam kitai.” (Eps. 3:20) Nembiak Jehovah enggau naka ulih ngereja peneka Petara, tang sida mega nemu sida bisi tatak ngereja siti-siti pengawa. Kitai gaga ati laban Petara bisi enggau kitai, lalu Iya merekatka semua utai ke digaga kitai.

SAMPI MINTA NAMBAHKA PENGARAP DISAUT

17. (a) Baka ni Jesus nyaut tanya bala rasul? (b) Nama kebuah kitai ulih ngarapka Jehovah deka nyaut sampi minta nambahka pengarap?

17 Ari utai ti udah dikerandauka, kitai engka ngasaika utai ti diasaika bala rasul lebuh sida minta Jesus: “Tambahka pengarap kami.” (Luk. 17:5) Jesus nyaut bala rasul iya ngena chara ti lain agi ari ke udah maya Pentikos taun 33. Maya nya sida nerima roh kudus, lalu ulih bulih penemu ti dalam agi pasal tuju Petara. Tu negapka pengarap sida. Nama asil iya? Sida berengkah enggau kimpin nginjil ti pemadu besai lebuh maya nya. (Kol. 1:23) Ulih kitai ngarapka sampi minta nambahka pengarap disaut? Jehovah besemaya kitai ulih arap, enti “kitai minta sebarang utai nitihka peneka Iya.”—1 Jhn. 5:14.

18. Baka ni Jehovah merekatka sida ke nambahka pengarap diri?

18 Lebuh kitai bisi pengarap ti pengabis ati ba Jehovah, Iya deka senang ati enggau kitai. Iya deka nyaut sampi kitai ke minta nambahka pengarap, pengarap kitai deka tegap agi, lalu kitai ulih “tama ngagai Perintah Iya.”—2 Tes. 1:3, 5.

^ per. 4 Teladan ke bukai, peda cherita pasal pengidup Lillian Gobitas Klose (Awake!, 22 Julai 1993), Feliks Borys (Awake!, 22 Februari 1994), sereta Josephine Elias (Awake!, September 2009).