Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  Oktober 2015

 TOPIK RANDAU | KATI BISI PENGUNTUNG ENTI BESAMPI?

Sampi—Nama Penguntung Besampi?

Sampi—Nama Penguntung Besampi?

Sebedau nuan ngaga siti-siti pengawa ke tusah dikereja, selalu iya nuan engka berunding, ‘Nama penguntung iya?’ Kati kitai berundingka diri empu enti kitai betanya munyi tu pasal sampi? Enda. Selalu iya, kitai deka nemu sekalika iya ulih meri penguntung.

Ba artikel sebedau tu, kitai nemu sampi nya ukai semina pengawa ke digaga orang ke bisi pengarap tauka chara berubat ke dikena ngelantangka runding. Petara ti bendar amat ningaka sampi. Enti kitai besampi ngena chara sereta tuju ti betul, Iya deka ninga. Endang amat, Petara ngasuh kitai datai semak ngagai Iya. (James 4:8) Nya alai, nama ulih diandalka kitai enti kitai seruran besampi? Aram kitai meda sekeda penguntung iya.

Lantang ba runding.

Lebuh nuan bisi penanggul enggau penguji ba pengidup, kati nuan balat irau ati? Bup Kudus meransang kitai “seruran besampi” maya nya, lalu “bantaika semua peminta [kitai] ngagai Petara.” (1 Tesalonika 5:17; Pilipi 4:6) Bup Kudus madahka, enti kitai besampi ngagai Petara, ‘pemaik Petara, ti ngelui peragam mensia, deka nyaga ati enggau runding [kitai].’ (Pilipi 4:7) Kitai bulih pengelantang enti kitai nyerahka pengirau ati ngagai Apai ti di serega. Ba Masmur 55:22, Iya meransang kitai: ‘Serahka penusah nuan ngagai Jehovah, lalu Iya deka nyaga nuan.’

‘Serahka penusah nuan ngagai Jehovah, lalu Iya deka nyaga nuan.’—Masmur 55:22

Mayuh orang ba dunya ngasaika pengelantang tu. Hee Ran, ari menua Korea Selatan madahka: “Taja pan aku bisi penanggul ti besai, pengudah  aku besampi, aku berasai lantang lalu bulih pengering kena betan.” Cecilia, ari menua Filipina madahka: “Aku balat irau pasal dua iku anak indu aku. Pia mega, enggau indai aku ke enda ulih ngelala aku diatu laban udah tuai sereta sakit. Tang ketegal besampi, aku ulih terus enggau pengidup ninting hari sereta kurang agi irau. Aku nemu Jehovah deka nulung aku nyaga sida.”

Pengelantang enggau pengering maya napi penguji.

Kati nuan balat tusah ati, tauka napi penusah berat ke bukai? Besampi ngagai ‘Petara ti pun semua pengelantang’ ulih meri pengelantang ti besai. Bup Kudus madahka, Iya “merindang [kitai] lebuh [kitai] dituntung semua macham penusah.” (2 Korint 1:3, 4) Chunto, bisi sekali lebuh Jesus balat tusah ati, iya “besugang lalu besampi.” Nama nyadi udah nya? “Siku melikat  ari serega pegari di mua iya, lalu ngeringka iya.” (Luke 22:41, 43) Seiku lelaki ke tetap ati, Nehemiah merinsa ketegal orang jai ke nagang iya ari ngereja pengawa Petara. Iya besampi: “Aku lalu besampi, ‘Petara Jehovah, asuh aku kering!’” Utai ke nyadi tu nunjukka Petara amat nulung iya, ngambika enda takut sereta mujur ba pengawa iya. (Nehemiah 6:9-16) Reginald, ari menua Ghana, madahka pengalaman iya pasal sampi: “Lebuh aku besampi, kelebih agi maya aku balat tusah, aku madahka penusah aku ngagai orang ke ulih nulung aku, lalu ngasuh aku enda irau agi.” Amat, Petara ulih ngelantangka kitai lebuh kitai besampi ngagai Iya.

Penemu-dalam ari Petara.

Sekeda pemutus ke digaga kitai ulih ngachau kitai enggau orang ke dikesayauka kitai belama iya. Baka ni kitai ulih ngaga pemutus ti manah? Ku Bup Kudus: ‘Enti kita nadai penemu-dalam [kelebih agi dikena mutarka penguji], pinta ngagai Petara ke meri enggau gerah mudah sereta enda mansik penyalah, lalu utai nya deka diberi ngagai kita.’ (James 1:5) Enti kitai besampi minta penemu-dalam, Petara ulih ngena roh kudus Iya ngiring kitai ngaga pemutus ti manah. Endang amat, kitai ulih minta roh kudus laban Jesus madahka ‘Apai kita ti di serega tentu lebih agi nemu meri roh kudus ngagai orang ke minta ari Iya!’—Luke 11:13.

“Aku seruran besampi ngagai Jehovah minta iring kena ngaga pemutus ti betul.”—Kwabena, Ghana

Indah Jesus ngasaika diri patut minta tulung ari Apai iya lebuh ngaga pemutus ti berat. Bup Kudus madahka kitai, lebuh Jesus deka milih 12 iku lelaki nyadi rasul iya, ‘iya besampi semalam-malam nya ngagai Petara.’—Luke 6:12.

Baka Jesus, mayuh orang kemaya hari tu udah dikeringka, lebuh sida meda chara Petara nyaut sampi sida ke minta tulung kena ngaga pemutus ti manah. Regina, ari menua Filipina, madahka mayuh macham penusah ke ditapi iya. Pengudah laki iya mati, iya nupi sida sebilik, nadai kereja, sereta tusah deka ngemesaika dua iku anak iya. Nama nulung iya ngaga pemutus ti manah? Ku iya, “Aku bepanggai ba tulung ari Jehovah ngena sampi.” Kwabena, ari menua Ghana madahka kebuah iya minta tulung ari Petara, “Aku lenyau kereja ke begaji besai ba pengawa nirika rumah.” Lebuh iya berundingka utai ke patut dipilih, ku iya, “Aku seruran besampi ngagai Jehovah minta iring kena ngaga pemutus ti betul.” Ku iya agi, “Aku arap bendar Jehovah ke nulung aku milih kereja ke ngasuh aku ulih nyaga utai ti diguna ba rohani enggau utai ti diguna ninting hari.” Nuan mega ulih ngasaika iring ari Jehovah enti besampi pasal pekara ke bekaul enggau Iya.

Kitai udah berandauka sekeda penguntung ke diulih ari besampi. (Chunto bukai, peda kutak “ Penguntung Besampi.”) Tang ngambika bulih penguntung tu, keterubah iya nuan patut ngelala Petara sereta nemu peneka Iya. Enti nuan deka ngereja tu, kami meransang nuan belajarka Bup Kudus enggau Saksi-Saksi Jehovah. * Tu chara keterubah nuan ulih semak agi ngagai Petara ke “nyaut sampi.”—Masmur 65:2.

^ per. 14 Ke penerang mayuh agi, giga Saksi-Saksi Jehovah ke bisi ba endur nuan diau tauka lawa laman web kami, www.jw.org.