Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  September 2015

 TOPIK RANDAU

Sapa Saksi-Saksi Jehovah?

Sapa Saksi-Saksi Jehovah?

“Aku udah betaun ngelala Mike. Iya seiku ari Saksi-Saksi Jehovah. Tang pengarap iya suah ngasuh aku bingung. Sapa Jehovah? Nama kebuah bala Saksi enda ngintu hari besai? Kati Mike enggau pengarap tesat?”—Becky, California, U.S.A.

“Lebuh dua iku melaki-bini ke diau semak rumah aku berengkah belajarka Bup Kudus enggau Saksi-Saksi Jehovah, aku berunding: ‘Saksi-Saksi Jehovah, nama reti nya? Nyelai endar nama pengarap nya!’”—Zenon, Ontario, Kanada.

“Aku enggau bini aku ngumbai Saksi-Saksi Jehovah ngambi ulih ari asai ati kami ti besalah, laban kami nadai enggau orang ngagai gerija. Lalu kami ngumbai enti utai ti digiga kami nadai ba gerija-gerija besai, tentu utai ti digiga kami nadai ba pengarap ke nyelai baka Saksi-Saksi Jehovah.”—Kent, Washington, U.S.A.

“Aku amat enda nemu sapa sida enggau nama utai ti dipechaya sida.”—Cecilie, Esbjerg, Denmark.

Nuan engka kala meda sida nginjil ari rumah ke rumah tauka ba endur orang mayuh, nyadung litaricha Bup Kudus, sereta ngajar orang Bup Kudus enggau pechuma. Nuan engka udah nerima majalah tu ari seiku ari sida. Tang, nuan engka agi berunding, sapa Saksi-Saksi Jehovah nya. Runding nuan engka sama enggau seiku ari sida ke ba atas nya.

Enti nuan bisi utai ti ditanya sereta dikirauka pasal Saksi-Saksi Jehovah, dini nuan tau bulih saut iya? Baka ni nuan ulih nemu nama utai ti dipechaya Saksi-Saksi Jehovah, baka ni pengawa nginjil enggau endur alai sida nyembah Petara dipelanja, sereta nama kebuah sida nginjil ke rumah nuan enggau ba endur orang mayuh?

“Aku macha mayuh cherita pasal Saksi-Saksi Jehovah ba Internet,” ku Cecilie, ke dipadah ba atas tadi. “Aku ninga cherita ngapa sereta cherita ti enda betul. Ketegal tu, aku bisi runding ti enda manah pasal Saksi-Saksi Jehovah.” Tang udah nya, iya empu bejaku enggau Saksi-Saksi Jehovah, lalu bulih saut ti ngemuaska ati ngagai tanya iya.

Kati nuan deka bulih saut ti betul ngagai tanya nuan pasal Saksi-Saksi Jehovah? Kami meransang nuan ngulihka saut iya ari endur ti pemadu ulih dikearapka—Saksi-Saksi Jehovah empu, ke ngeluarka majalah tu. (Jaku Dalam 14:15) Kami arapka artikel ke pengudah tu deka nulung nuan ngelala sapa kami, nama utai ti dipechayaka kami enggau pengawa ke dikereja kami.