Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  September 2015

“Bediri Tegap Dalam Pengarap”

“Bediri Tegap Dalam Pengarap”

“Bediri tegap dalam pengarap, . . . sereta kering.”—1 KOR. 16:13.

LAGU: 60, 64

1. (a) Nama nyadi ngagai Peter lebuh ribut benung nyadi ba Danau Galili? (Peda gambar ba pun artikel.) (b) Nama kebuah Peter berengkah tengelam?

BISI sekali lebuh malam hari, rasul Peter enggau sekeda murid merinsa ngena perau ke seberai Danau Galili lebuh ribut benung nyadi. Enda mukai-mukai sida tepedaka Jesus bejalai ba atas ai. Peter ngangauka Jesus, lalu nanya sekalika iya ulih bejalai ba atas ai mansang ngagai Jesus. Lebuh Jesus ngasuh iya mansang, Peter angkat ari perau lalu berengkah bejalai mansang ngagai Jesus. Tang enda lama udah nya, Peter berengkah tengelam. Nama kebuah? Laban iya meda pemalat ribut enggau gelumbang, lalu iya takut. Peter nyerauh minta tulung, lalu Jesus tekala nya nyapai iya lalu bejaku: “Mit amat meh pengarap nuan! Nama kebuah nuan kakang?”—Mat. 14:24-32.

2. Nama deka dikerandauka kitai diatu?

2 Aram kitai berandauka tiga pekara pasal pengarap ke ulih dipelajarka kitai ari utai ke udah nyadi ba Peter: (1) baka ni Peter keterubah iya arapka Jehovah ulih nulung iya, (2) nama kebuah Peter berengkah lenyau pengarap, lalu (3) nama nulung Peter negapka pengarap iya baru. Beratika pekara tu ulih nulung kitai  nemu baka ni kitai ulih “bediri tegap dalam pengarap.”—1 Kor. 16:13.

ARAPKA PETARA DEKA NULUNG KITAI

3. Nama kebuah Peter angkat ari perau, lalu baka ni kitai udah ngereja utai ti sama?

3 Peter ngembuan pengarap ti tegap. Baka ni kitai nemu? Lebuh Jesus ngangauka iya, Peter angkat ari perau lalu bejalai ba atas ai. Iya arapka kuasa Petara ulih ngasuh iya ngereja utai ke sama baka Jesus. Pia mega, lebuh Jesus ngasuh kitai nitihka iya, kitai nyerahka diri ngagai Jehovah lalu dibaptisa. Nama kebuah? Laban kitai ngembuan pengarap ba Jehovah enggau Jesus sereta arapka seduai iya deka nulung kitai.—Jhn. 14:1; bacha 1 Peter 2:21.

4, 5. Nama kebuah pengarap nya utai ti berega?

4 Pengarap nya utai ti berega. Pengarap Peter ulih ngasuh iya bejalai ba atas ai. Tu utai ke enda ulih dikereja mensia. Pengarap mega ulih nulung kitai ngereja utai ke engka enda ulih dikereja. (Mat. 21:21, 22) Sekeda ari kitai udah mayuh berubah ba runding enggau ulah nyentukka orang ke ngelala kitai suba pan nemu kitai udah mayuh berubah. Kitai ngaga ubah tu laban kitai rinduka Jehovah, lalu Iya udah nulung kitai berubah. (Bacha Kolosi 3:5-10.) Pengarap meransang kitai nyerahka diri ngagai Jehovah, lalu kitai nyadi kawan Iya, utai ke enda ulih dikereja kitai enti Iya enda nulung kitai.—Eps. 2:8.

5 Pengarap ngasuh kitai bediri tegap. Chunto, pengarap nulung kitai ngelaban serang ari Sitan, munsuh kitai ke kering. (Eps. 6:16) Pia mega, laban kitai arapka Jehovah, kitai enda patut kelalu irau lebuh bisi penanggul. Jehovah udah besemaya deka meri utai ti diguna kitai, enti kitai bisi pengarap ba Iya sereta ngenuluka Perintah Iya. (Mat. 6:30-34) Kelimpah ari nya, ketegal pengarap kitai, Jehovah deka meri kitai utai ti amat manah iya nya pengidup belama iya.—Jhn. 3:16.

KITAI ULIH LENYAU PENGARAP ENTI ENDA MENGKANG BERATI

6, 7. (a) Ribut enggau gelumbang ke ngenakutka Peter ulih disamaka enggau utai nama? (b) Nama kebuah kitai nemu kitai ulih lenyau pengarap?

6 Seraya Peter bejalai ba atas ai, iya berengkah takut. Nama kebuah? Ketegal ribut enggau gelumbang. Tu ulih disamaka enggau mayuh penguji sereta pengingin ke ditapi orang Kristian kemaya hari tu. Taja pan penusah tu balat nuntung, kitai ulih tegap ba pengarap ketegal tulung ari Jehovah. Tang, kingatka nama utai nyadi ba Peter. Iya ukai tengelam ketegal ribut tauka dipangkaka gelumbang. Tang, Bup Kudus madahka: “Lebuh iya meda pemalat ribut, iya takut.” (Mat. 14:30) Peter ngetu beratika Jesus, lalu meda pemalat ribut. Udah nya, pengarap iya berengkah lemi. Pia mega, enti kitai mengkang beratika penusah kitai, kitai ulih berengkah kakang ati pasal Jehovah ke deka nulung kitai.

7 Kitai nemu, kitai ulih lenyau pengarap. Nama kebuah? Laban Bup Kudus madahka lenyau pengarap nya “dosa ti balat lekat ba kitai.” (Heb. 12:1) Baka Peter, enti kitai mengkang beratika utai ti salah, pengarap kitai mega tau jampat lemi. Nya alai, baka ni kitai ulih nemu pengarap kitai nyau lemi? Tanya ke deka dikerandauka kitai ulih nulung kitai meresa diri empu.

8. Baka ni semaya Jehovah engka enda entu nyata ba kitai ari ke udah?

8 Kati semaya Petara agi nyata ba aku baka ke suba? Chunto, Petara besemaya deka ngemunaska dunya Sitan. Taja pia, kati kitai dilimpangka enggau mayuh macham pemerindang ba dunya Sitan tu? Enti pia, kitai engka berengkah kakang ati pasal pengujung ke nyau semak. (Hab. 2:3) Pikirka pasal siti da agi chunto. Jehovah nyediaka tebus, lalu besemaya deka ngampunka penyalah kitai. Tang, enti kitai mengkang berundingka penyalah lama kitai, kitai engka berengkah  kakang ati pasal Jehovah ke udah ngampunka kitai. (SKR. 3:19) Ketegal tu, kitai ulih lenyau pengaga ati ngereja pengawa ke Jehovah sereta enggai agi nginjil ngagai orang bukai.

9. Nama ulih nyadi enti kitai berundingka peneka diri empu?

9 Kati aku agi enggau naka ulih ngereja peneka Jehovah? Enti kitai bebendar gawa ke Jehovah, tu nulung kitai mengkang beratika peluang kitai ke jemah ila. Taja pia, kati enti kitai berengkah berundingka peneka diri empu? Ngambika chunto, kitai engka nerima kereja ke begaji besai. Tang tu ngurangka pengawa kitai ke Jehovah. Ketegal tu kitai ulih lemi pengarap, sereta nyadi “ngelusu,” iya nya enda enggau naka ulih gawa ke Jehovah.—Heb. 6:10-12.

10. Baka ni kitai ngayanka pengarap ba Jehovah lebuh kitai ngampunka orang bukai?

10 Kati aku tusah deka ngampunka orang? Maya orang ngemediska ati kitai, kati kitai jampat ringat tauka enggai bejaku enggau sida? Enti pia, kitai engka kelalu berundingka ati diri empu aja. Kitai ngayanka diri arapka Jehovah enti kitai ngampunka orang bukai. Nama kebuah? Enti orang bukai bedosa ngelaban kitai, sida baka ke berutang ba kitai. Enti kitai bedosa ngelaban Jehovah, kitai baka ke berutang ba Iya. (Luk. 11:4) Nya alai, kitai arapka Jehovah lebuh kitai ngampunka orang bukai. Kitai arapka Jehovah merekatka pengawa kitai, lalu berekat ari Iya berega agi ari ke malas penyalah orang nya. Bala murid Jesus nemu, sida begunaka pengarap kena ngampunka orang bukai. Lebuh Jesus ngasuh bala murid iya ngampunka orang bukai, indah orang ke suah bedosa ngelaban sida, sida minta Jesus: “Tambahka pengarap kami.”—Luk. 17:1-5.

11. Nama engka ngasuh kitai enggai nitihka jaku lalau?

11 Kati aku pedis ati maya diberi jaku lalau? Peratika utai ti ulih dipelajarka ari jaku lalau, ukai beratika utai ke salah ba jaku lalau nya tauka pengurang ke bisi ba orang ke meri jaku lalau nya. (J-lam. 19:20) Anang muai peluang belajar berunding baka Jehovah!

12. Nama kebuah nya salah enti kitai suah mutap pasal orang ke ngiring kitai?

12 Kati aku mutap pasal orang ke ngiring ba gempuru? Lebuh orang Israel beratika berita ke enda manah ari sepuluh iku pematau, sida mutap pasal Moses seduai Aron. Udah nya, Jehovah nanya Moses: “Ni pengelama sida mengkang enggai arapka Aku?” (P-pau. 14:2-4, 11) Amat, Jehovah nemu orang Israel enda arapka Iya laban sida mutap ngelaban Moses seduai Aron, orang ke udah dipilih Iya. Pia mega, enti kitai suah mutap pasal orang ke dikena Jehovah ngiring kitai kemaya hari tu, tu engka nunjukka pengarap kitai ba Jehovah nyau lemi.

13. Nama kebuah kitai enda patut enda nyamai ati enti ngasaika pengarap kitai nyau lemi?

13 Pengudah berandauka tanya tu, anang enda nyamai ati enti nuan ngasaika pengarap nuan nyau lemi. Kingatka, indah rasul Peter berengkah takut sereta kakang ati. Kekadang, Jesus ngelalau semua rasul iya laban sida ‘mit pengarap.’ (Mat. 16:8) Taja pia, kitai ulih belajarka utai ti beguna ari utai ke udah nyadi ba Peter. Peratika nama digaga iya pengudah iya berengkah kakang ati, lalu belabuh tengelam.

MENGKANG BERATIKA JESUS KENA NEGAPKA PENGARAP KITAI

14, 15. (a) Nama digaga Peter lebuh iya berengkah tengelam? (b) Baka ni kitai ulih “merening” ngagai Jesus?

14 Nama digaga Peter lebuh iya berengkah tengelam? Peter landik nyemerai, nya alai iya ulih nyemerai pulai baru ngagai perau enti iya deka. (Jhn. 21:7) Tang, nama kebuah iya enda ngereja nya? Laban iya enda bepanggai ba diri empu. Iya beratika Jesus baru, lalu  nerima tulung ari Jesus. Enti kitai ngasaika pengarap kitai nyau lemi, kitai patut neladan Peter. Baka ni?

15 Baka Peter ke beratika Jesus baru ngambika bulih tulung, kitai mega patut “merening” ngagai Jesus. (Bacha Hebrew 12:2, 3.) Tang, kitai enda ulih meda iya baka Peter. Nya alai, baka ni kitai ulih “merening” ngagai Jesus? Kitai ulih belajar pasal pengawa iya sereta utai ke udah diajar iya, lalu neladan iya enggau naka ulih. Enggau tu, kitai deka bulih tulung ke diguna kena negapka pengarap kitai. Aram kitai berandauka sekeda chara kitai ulih neladan Jesus.

Enti kitai beratika teladan Jesus sereta neladan iya enggau naka ulih, kitai ulih tegap ba pengarap (Peda genteran 15)

16. Baka ni Bup Kudus ulih nulung negapka pengarap kitai?

16 Negapka pengarap nuan ba Bup Kudus. Jesus arap bendar Bup Kudus nya Jaku Petara, sereta meri kitai jaku lalau ke pemadu manah. (Jhn. 17:17) Ngambika ulih neladan Jesus, kitai enda tau enda macha Bup Kudus ninting hari, belajarka iya, sereta belematika utai ke ulih dipelajar. Kitai mega enda tau enda ngiga saut ke tanya ti dikemisi kitai. Chunto, kati nuan amat pechaya kitai diau ba hari ti penudi? Nuan ulih negapka pengarap nuan pasal pengujung nya nyau semak, enti nuan belajarka utai ti dipadahka Bup Kudus ke nunjukka kitai benung diau ba hari ti penudi. Kati nuan deka negapka pengarap nuan pasal semaya Petara ke jemah ila? Enti deka, nuan ulih belajarka jaku Petara ba Bup Kudus ke udah dikeamatka. Kati nuan amat pechaya Bup Kudus nya agi ulih dikena kemaya hari tu? Nuan ulih macha pasal bala menyadi Kristian ke udah ngubah pengidup sida ngambika manah agi ketegal bantu ari Bup Kudus. * (Peda nota kaki.)—1 Tes. 2:13.

17. Nama kebuah Jesus ulih natka penguji ti besai, lalu baka ni nuan ulih neladan iya?

17 Mengkang beratika berekat ke udah disemayaka Jehovah. Jesus mengkang beratika berekat ke deka diterima iya, lalu tu nulung iya natka penguji ti besai. (Heb. 12:2)  Iya enda kala dilimpangka utai ke bisi ba dunya. (Mat. 4:8-10) Baka ni kitai ulih neladan Jesus? Belematika pemanah semaya ke udah disebut Jehovah. Gambarka nuan ba dunya baru. Tulis tauka lukis utai ke deka digaga nuan ba Paradais. Tauka gaga lis nama orang ke deka enggau nuan berandau maya sida diangkatka idup baru. Nuan mega tau nulis utai ke deka dikerandauka enggau sida. Baka Jesus, nuan ulih ngumbai semaya Petara tu ditujuka ngagai nuan, ukai semina ditujuka ngagai orang mayuh.

18. Baka ni sampi ulih nulung negapka pengarap nuan?

18 Besampi minta pengarap tegap agi. Jesus ngajar bala murid iya minta roh kudus ari Jehovah. (Luk. 11:9, 13) Seraya nuan minta roh kudus, besampi meh minta pengarap tegap agi. Tu siti ari buah roh kudus. Nuan ulih nyemetak agi ba sampi nuan. Chunto, enti nuan ngasaika diri tusah ngampunka orang bukai, minta Jehovah negapka pengarap nuan sereta nulung nuan deka ngampunka orang bukai.

19. Baka ni kitai ulih milih kawan ke manah?

19 Milih kawan ke tegap ba pengarap. Jesus bejimat milih kawan rapat iya. Kawan iya ke pemadu rapat iya nya bala rasul. Sida tetap ati, taluk sereta ngasika iya. (Bacha John 15:14, 15.) Teladan meh Jesus, sereta pilih meh kawan nuan enggau bejimat. Sida patut orang ke tegap ba pengarap, ke ngasika Jesus. Kawan ke bendar enda bula ke pangan diri, indah lebuh maya sida patut meri tauka nerima jaku lalau.—J-lam. 27:9.

20. Nama deka nyadi lebuh kitai nulung orang bukai negapka pengarap sida?

20 Nulung orang bukai negapka pengarap sida. Jesus nulung negapka pengarap bala murid iya ngena jaku enggau pengawa iya. (Mrk. 11:20-24) Kitai patut neladan Jesus. Enggau tu, kitai deka negapka pengarap diri sereta pengarap orang bukai. (J-lam. 11:25) Baka ni nuan ulih nulung orang ba kandang endur nuan diau? Lebuh nuan ngajar orang bukai Bup Kudus, kemeratka utai ti nunjukka Petara sigi bisi, Iya ibuhka kitai, sereta Bup Kudus nya Jaku Petara. Baka ni nuan ulih nulung bala menyadi Kristian negapka pengarap sida? Enti nuan nemu bisi menyadi Kristian mutap pasal bala menyadi Kristian lelaki ke ngiring, anang beguai nyeliahka diri ari iya. Enggau bejimat nulung iya negapka pengarap iya baru. (Jud. 22, 23) Enti nuan agi besekula, lalu cikgu nuan ngajar pasal evolusi, anang takut tang ngetanka pengarap nuan pasal utai ti ditempa. Nuan engka enda nyangka cikgu enggau orang ke sekelas ulih nerima utai ke dipadah nuan.

21. Nama udah disemaya Jehovah ngagai tiap iku kitai?

21 Jehovah enggau Jesus nulung Peter mutarka ati iya ke kakang sereta takut. Udah nya, Peter nyadi teladan ti manah ba pengarap ke orang bukai. Pia mega, Jehovah nulung tiap iku kitai ngambika bediri tegap ba pengarap. (Bacha 1 Peter 5:9, 10.) Kitai engka bebendar negapka pengarap, tang Jehovah deka merekatka kitai enti kitai enggau naka ulih ngereja nya.

^ per. 16 Ngambika chunto, peda begian “The Bible Changes Lives” ba edisi Watchtower ke bala mayuh.