Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  Ogos 2015

 PENEMU BUP KUDUS

Pengawa Butang

Pengawa Butang

Taja pan pengawa ke tetap ati ngagai kaling pengidup dipuji di serata dunya, tang pengawa butang majak ngerusak mayuh ruang bilik.

Nama reti pengawa butang?

PENEMU ORANG

Sekeda adat ngemendarka pengawa beleman, kelebih agi ngagai orang ke lelaki. Lalu sekeda orang ngumbai adat melaki-bini ukai utai ti tetap.

NAMA DIPADAH BUP KUDUS

Ba Bup Kudus, pengawa butang dikumbai pengawa seks ke dikereja orang ke udah kawin, enda ngira laki tauka bini enggau orang bukai ke ukai kaling pengidup sida. (Jop 24:15; Jaku Dalam 30:20) Pengawa butang nya utai ti dipegedika Petara. Maya jeman Israel kelia, orang ke butang diukum bunuh. (Adat Lewi 18:20, 22, 29) Jesus ngajar bala murid iya ngambika nyeliah pengawa butang.—Matthew 5:27, 28; Luke 18:18-20.

NAMA KEBUAH

Orang ke butang bulaka semaya ke udah digaga sida enggau kaling pengidup lebuh sida kawin. Tu mega ‘bedosa ngelaban Petara.’ (Pemungkal 39:7-9) Pengawa butang mega ulih nyeraraka anak ari apai indai. Kelimpah ari nya, Bup Kudus madahka ‘Petara deka ngakim . . . orang ke butang.’—Hebrew 13:4.

“Awakka adat melaki-bini dibasa semua orang, lalu awakka laki enggau bini meruan tetap ati ngagai pangan diri.” Hebrew 13:4.

 Kati pengawa butang mutuska kaul entara laki bini?

NAMA DIPADAH BUP KUDUS

Bup Kudus ngemendarka orang ke udah kawin mutuska kaul iya enggau kaling pengidup ke ngereja pengawa butang. (Matthew 19:9) Pengudah pengawa butang nyadi, kaling pengidup ke enda salah bisi hak ngaga pemutus sekalika deka terus begulai enggau kaling ke enda tetap ati tauka minta sarak. Tu pemutus kediri empu.—Galatia 6:5.

Kelimpah ari nya, ba mata Petara laki bini patut begulai sepemanjai pengidup sida. (1 Korint 7:39) Petara begedika orang sarak enti nadai kebuah ti berat. Chunto iya, enti sarak semina ketegal enda puas ati enggau kaling pengidup sida. Nya alai, pemutus pasal sarak enda ulih digaga sengapa.—Malaki 2:16; Matthew 19:3-6.

“Aku madah ngagai kita, genap iku orang ke muai bini, kelimpah ari bini iya butang, deka ngujungka bini iya butang.”Matthew 5:32.

Kati pengawa butang nya dosa ti enda ulih diampunka?

NAMA DIPADAH BUP KUDUS

Enda. Bup Kudus madah, Petara ngampunka orang ke nesal ati sereta badu agi ngereja dosa sida—nyengkaum orang ke ngereja pengawa butang. (Kereja Rasul 3:19; Galatia 5:19-21) Iya ke amat, Bup Kudus bisi madah pasal lelaki enggau indu ke badu agi ngereja pengawa butang, lalu nyadi kawan Petara.—1 Korint 6:9-11.

Penyinu Petara ulih dipeda ba Raja David ke nyadi raja Israel menya. David beleman enggau bini seiku ari pemesai bala soldadu iya. (2 Samuel 11:2-4) Bup Kudus enggau terang madahka Petara “enda rinduka utai ti udah dikereja David.” (2 Samuel 11:27) Pengudah nerima disiplin, David nesal ati, lalu Petara ngampunka iya. Taja pia, David ngasaika pemedis enggau pemerinsa ari ulah iya. (2 Samuel 12:13, 14) Udah nya, Raja Solomon ke bepenemu-dalam madahka “lelaki ke butang endang sigi enda nemu berunding.”—Jaku Dalam 6:32.

NAMA ULIH DIGAGA NUAN

Enti nuan bisi ngereja pengawa butang, nuan patut minta ampun ari Petara enggau kaling pengidup nuan. (Masmur 51:1-5) Begedika pengawa butang, baka Petara. (Masmur 97:10) Bebendar nyeliahka pornografi, angan-angan seks, betundi enggau orang bukai, tauka sebarang utai ti ulih ngujungka nuan bisi pengingin deka butang enggau orang ke ukai kaling pengidup nuan.—Matthew 5:27, 28; James 1:14, 15.

Enti kaling pengidup nuan butang, nuan tau arap Petara nemu asai ati nuan. (Malaki 2:13, 14) Minta Iya meri nuan pengelantang sereta iring, lalu “Iya deka nyaga nuan.” (Masmur 55:22) Enti nuan mutus deka ngampunka kaling pengidup nuan sereta terus idup begulai enggau iya, seduai patut bebendar neguhka kaul entara pangan diri.—Epesus 4:32.

‘Jehovah ngampun nuan,’ ku nabi Natan madahka David ke udah nesal ati pengudah iya ngereja pengawa butang.2 Samuel 12:13.