Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 BERATIKA DUNYA

Berita Ari Benua Asia

Berita Ari Benua Asia

Asia nya benua ke pemadu mayuh orang. Menua China enggau India aja bisi lebih ari satu pertiga penyampau orang ke diau ba dunya. Nama penanggul ke ditapi orang Asia ba penemu enggau chara nyaga pengelikun rayat?

PENEMU ULIH NYAGA PENGELIKUN ANAK MIT

Anak mit senang kena tipu enti apai indai enda ngajar sida pasal penemu seks kenyau ari mit, nitih ku orang bansa Cina ke landik ba undang-undang. Bala luyar ari menua China mutarka kira-kira 8,000 iti kes ke bekaul enggau anak mit ke nyadi mansa seks dalam kandang empat taun ti udah. Anak mit “senang ditipu sereta nyadi taget,” ku seiku profesor undang-undang ba Universiti Beijing Normal. “Penemu ulih nyaga ari nyadi mansa seks.”

NAMA DIPADAH BUP KUDUS: Apai indai ke bepenemu ngajar anak sida chara nyaga pengelikun diri “ari orang ke numbuhka pengachau ngena utai ti disebut sida.”—Jaku Dalam 2:1, 10-12.

PEMATI PENGUDAH RIBUT TAUFAN

Nitihka siti pansik, penyampau anak mit indu ke mati ba Filipina pengudah ribut taufan iya nya 15 kali lipat ari penyampau orang ke mati lebuh ribut nya nyadi. Tu engka ketegal nadai kereja pengudah ribut nya, ungkus kena ngadu pengudah ribut nya, sereta chara meri pemakai enggau chara ngintu pengerai anak mit indu enda dikemeratka.

NAMA DIPADAH BUP KUDUS: “Magi pemakai kita enggau orang ke lapar; ngelaluka orang ke seranta, ke nadai endur alai diau ke dalam rumah kita; meri gari ngagai orang ke nadai gari.”—Isaiah 58:7.

ORANG TUAI BA KOREA SELATAN KE MUNUH DIRI

Ba taun 2011, lebih ari satu perempat sida ke munuh diri ba Korea Selatan nya orang ke beumur 65 taun tauka lebih. Sekeda pansik ngumbai tu nyadi ketegal chara nyaga orang tuai enggau gaya ekonomi ke udah berubah. Kira-kira 50 peratus orang tuai ke diau ba Korea Selatan idup seranta. Kurang ari setengah rayat ba Korea Selatan diatu ngumbai bala anak patut nyaga apai indai sida ke udah tuai.

NAMA DIPADAH BUP KUDUS: “Bebasaka apai enggau indai nuan.”—Epesus 6:2.