Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  Ogos 2015

Belematika Pengerindu Jehovah ti Meruan

Belematika Pengerindu Jehovah ti Meruan

“Aku deka belematika semua pengawa Nuan ti besai.”—MAS. 77:12.

LAGU: 18, 61

1, 2. (a) Nama kebuah nuan pechaya Jehovah rinduka nembiak Iya? (b) Mensia digaga begunaka nama?

NAMA KEBUAH nuan pechaya Jehovah rinduka nembiak Iya? Sebedau nuan nyaut tanya tu, peratika chunto tu: Beberapa taun ti udah, bala menyadi Kristian kitai meransang seiku menyadi Kristian indu ke benama Taylene. Sida enda ngasuh iya ngarapka utai lebih ari ke patut ba diri empu. Ku iya: “Enti Jehovah enda rinduka aku, Iya tentu enda suah meri jaku lalau ngagai aku.” Brigitte, ke ngemesaika dua iku anak kediri aja pengudah laki iya mati, madahka: “Ngemesaika anak ba dunya ti dipegai Sitan nya siti ari penanggul ti pemadu besai, kelebih agi enti ngemesaika anak kediri aja. Tang aku pechayaka pengerindu Jehovah, laban Iya udah ngiring aku maya aku balat tusah ati, lalu Iya enda kala nejuka aku natka penanggul lebih ari ti ulih ditatka aku.” (1 Kor. 10:13) Sandra bisi penyakit raya ke enda ulih digeraika. Lebuh ba siti gempuru besai tiga hari, seiku menyadi Kristian ke indu ngayanka penyinu ngagai Sandra. “Taja pan kami enda entu ngelala iya,” ku laki Sandra, “penyinu iya meri pengelantang ba ati kami. Pengerindu ke diayanka bala menyadi Kristian ngasuh aku nemu Jehovah balat rinduka kami.”

 2 Jehovah ngaga mensia enggau pengingin deka rinduka sereta patut dikerinduka. Taja pia kitai mudah lemi semengat ketegal penyakit, penanggul ba duit tauka nadai bulih asil ti manah ba pengawa nginjil. Enti kitai ngasaika Jehovah enda agi rinduka kitai, kitai patut ingat kitai berega ba Iya, lalu Iya semampai enggau kitai. Iya mega ngiring sereta nulung kitai. Iya seruran deka ingatka kitai enti kitai tetap ati ngagai Iya.—Isa. 41:13; 49:15.

3. Nama ulih ngasuh kitai pechaya pengerindu Jehovah ke kitai nya meruan?

3 Bala Saksi ke dipadahka tadi pechaya Petara bisi enggau sida maya sida bisi penusah. Kitai mega pechaya Petara enggau kitai. (Mas. 118:6, 7) Ba pelajar tu, kitai deka berandauka empat iti pemeri ari Jehovah ke ngayanka pengerindu Iya ke kitai. Pemeri tu (1) utai ti digaga Iya, (2) Bup Kudus, (3) sampi, sereta (4) tebus. Belematika utai manah ke udah digaga Jehovah ulih nulung kitai bendar agi beterima kasih ke pengerindu Iya ti meruan.—Bacha Masmur 77:11, 12.

BELEMATIKA UTAI TI DIGAGA JEHOVAH

4. Nama dipelajarka kitai ari utai ti digaga Jehovah?

4 Lebuh kitai meda utai ti digaga Jehovah, kitai nemu Iya balat rinduka kitai. (Rom. 1:20) Chunto, Jehovah ngaga dunya ukai semina endur kitai diau aja. Iya udah meri kitai semua utai ti diguna kena idup enggau lantang. Jehovah udah meri mayuh macham pemakai ke diempa kitai. Tu amat ngagaka ati kitai! (P-jar. 9:7) Seiku menyadi Kristian indu ke benama Catherine rindu ati meda utai ti digaga Jehovah, kelebih agi maya musin bungai ba menua Kanada. Ku iya: “Endang amat ngalitka ati meda semua utai pulai baru baka selama—bungai nyumbuk baru ari tanah, lalu burung pulai ari endur sida ke mindah, nyengkaum burung mit ke dikumbai hummingbird pulai baru ngagai endur pemakai iya ke ba luar jenila dapur aku. Jehovah endang rinduka kitai laban Iya meri mayuh utai ti ngerinduka ati.” Apai kitai rinduka utai ti digaga Iya, lalu Iya mega deka kitai rindu ati enggau utai ti digaga Iya.—SKR. 14:16, 17.

5. Baka ni Jehovah ngayanka pengerindu Iya ari chara mensia digaga?

5 Jehovah ngaga kitai ngambika bisi pengelandik ngereja pengawa ti beguna, lalu lantang ati meda asil iya. (P-jar. 2:24) Iya meri mensia pengawa ngemenuhka dunya, ngintu dunya, sereta nyaga ikan, burung enggau utai idup ke bukai ba dunya tu. (P-kal. 1:26-28) Lalu Iya mega ngaga kitai enggau pemanah ti ngerinduka ati ngambika kitai ulih neladan Iya!—Eps. 5:1.

JAKU PETARA NYA BEREGA

6. Nama kebuah kitai patut belematika Bup Kudus?

6 Jehovah meri kitai Bup Kudus laban Iya balat rinduka kitai. Bup Kudus madahka kitai utai ti patut ditemu kitai pasal Iya, sereta baka ni asai ati Iya pasal mensia. Chunto, Bup Kudus madahka kitai baka ni asai ati Jehovah pasal orang Israel ke suah enda ngasika Iya. Masmur 78:38 madahka: ‘Petara kasihka nembiak Iya. Iya ngampun dosa sida lalu enda ngerusak sida. Iya suah nagang Diri ringat lalu nagang Diri ngeransi.’ Belematika ayat tu ulih nulung nuan meda ni pemesai pengerindu sereta pengibuh Jehovah ke nuan. Kitai ulih pechaya Jehovah balat ibuhka kitai.—Bacha 1 Peter 5:6, 7.

7. Nama kebuah Bup Kudus nya utai ti berega ba kitai?

7 Bup Kudus nya utai ti amat berega ba kitai. Nama kebuah? Laban Jehovah bejaku  enggau kitai ngena Bup Kudus. Enti apai indai enggau anak suah bejaku enggau pangan diri, sida ulih ngeringka pengerindu sereta arap agi ke pangan diri. Jehovah nya Apai kitai ti bepengerindu. Taja pan kitai enda kala meda Iya tauka ninga nyawa Iya, Iya bejaku enggau kitai ngena Bup Kudus. Kitai patut terus ningaka Iya! (Isa. 30:20, 21) Lebuh kitai macha Bup Kudus, kitai ngelala sereta arapka Jehovah, ke ngiring sereta nyaga kitai.—Bacha Masmur 19:7-11; Jaku Dalam 1:33.

Taja pan Jehu meri jaku lalau ngagai Jehosapat, tang Jehovah meda “pemadas” ke bisi ba raja nya (Peda genteran 8, 9)

8, 9. Nama utai ti dikedekaka Jehovah temu kitai? Beri siti chunto ari Bup Kudus.

8 Jehovah deka kitai nemu Iya rinduka kitai, lalu Iya meda pemanah ke bisi ba kitai. Iya ukai meda pengurang kitai. (2 Ban. 16:9) Aram kitai beratika baka ni Jehovah meda pemanah ke bisi ba Raja Jehosapat ari menua Judah. Jehosapat ngaga pemutus ke enda manah, laban iya enggau Raja Ahap ari menua Israel beperang ngelaban soldadu orang Siria ba Ramot-giliat. Taja pan 400 iku nabi pelesu madahka Ahap ke jai deka menang ba perang nya, tang nabi ke amat ari Jehovah iya nya Mikaiah madahka dua iku raja nya deka alah, enti sida beperang. Lalu utai nya endang amat nyadi. Ahap mati ba perang, lalu Jehosapat nyau deka kena bunuh. Pengudah perang nya, Jehovah ngena Jehu meri jaku lalau ngagai Jehosapat ketegal  penyalah iya. Taja pia, Jehu mega madahka iya: “Nuan bisi pemadas ba nuan empu.”—2 Ban. 18:4, 5, 18-22, 33, 34; 19:1-3.

9 Beberapa taun sebedau nya, Jehosapat ngasuh bala pemesai, orang Lewi, enggau bala imam ngagai semua nengeri ba menua Judah ngambika ngajar orang Adat Jehovah. Sida mujur amat nyentukka orang ari bansa bukai mega nemu pasal Jehovah. (2 Ban. 17:3-10) Taja pan Jehosapat ngaga pemutus ti enda manah udah nya, Jehovah agi ingatka pemanah ke udah digaga iya. Chunto tu ngelantangka ati kitai laban kekadang kitai ngereja penyalah. Taja pia, enti kitai enggau naka ulih nyembah Jehovah, Iya deka terus rinduka kitai sereta ingatka pemanah ke udah digaga kitai.

BETERIMA KASIH KE PELUANG BESAMPI

10, 11. (a) Nama kebuah sampi nya pemeri ti berega ari Jehovah? (b) Baka ni Petara engka nyaut sampi kitai? (Peda gambar ba pun pelajar.)

10 Apai ti bepengerindu meri awak ningaka anak iya enti sida deka bejaku enggau iya. Iya deka nemu baka ni asai ati sida, laban iya balat ibuhka sida. Apai kitai, Jehovah, ke bepengerindu pan sama baka nya. Iya ningaka kitai lebuh kitai besampi ngagai Iya. Bejaku enggau Apai kitai nya peluang ti berega!

11 Kitai ulih besampi ngagai Jehovah ba sebarang maya. Iya Kawan kitai, lalu Iya seruran besedia ningaka sampi kitai. Taylene ke dipadah ba pun tadi, madahka, “Nuan ulih nyebut semua utai ngagai Iya.” Lebuh kitai madahka Jehovah pasal runding kitai, Iya engka nyaut sampi kitai ngena ayat Bup Kudus, artikel ba litaricha kitai, tauka peransang ari bala menyadi Kristian. Jehovah ningaka peminta kitai ke ari ati, lalu Iya nemu pasal kitai lebih agi ari orang bukai. Saut Iya ngagai sampi kitai ngayanka pengerindu Iya ti meruan ke kitai.

12. Nama kebuah kitai patut belajarka sampi ke bisi ba Bup Kudus? Beri siti chunto.

12 Kitai ulih belajarka mayuh utai ari sampi ke bisi ba Bup Kudus. Kekadang, endang beguna belajarka sekeda ari sampi tu maya belajarka Bup Kudus ba diri sebilik. Kualiti sampi kitai deka manah agi, enti kitai belematika sampi nembiak Petara ke ari ati kelia menya. Chunto, belajarka sampi Jonah ke disebut enggau baruh ati lebuh iya dalam perut ikan besai. (Jon. 1:17–2:10) Beratika sampi Solomon ke ari ati ngagai Jehovah lebuh Rumah Sembiang diserahka. (1 Raj. 8:22-53) Lalu belematika chunto sampi Jesus. (Mat. 6:9-13) Kelebih agi, seruran ‘bantaika semua peminta kita ngagai Petara.’ Enggau tu, ‘pemaik Petara, ti ngelui peragam mensia, deka nyaga ati enggau runding kita.’ Ulah kitai ke beterima kasih ke pengerindu Jehovah ti meruan deka majak nambah.—Plp. 4:6, 7.

NGAYANKA DIRI BETERIMA KASIH KE TEBUS

13. Nama peluang ke diulih kitai ari tebus?

13 Jehovah udah meri kitai tebus ngambika “kitai tau idup.” (1 Jhn. 4:9) Nyebut pasal pengerindu Petara ti besai tu, rasul Paul nulis: ‘Kristus mati ke orang ke jai. Iya ti bendar, jarang orang deka mati ngarika orang ke lurus. Nyangka orang berani mati ngarika orang ke manah. Tang Petara udah ngayanka pengerindu Iya ke kitai, iya nya lebuh kitai agi nyadi orang ke bedosa, Kristus mati ngarika kitai!’ (Rom. 5:6-8) Tebus nya chunto pengerindu Petara ti pemadu besai, lalu tebus nya meri mensia peluang bulih kaul ti rapat enggau Iya.

14, 15. Nama reti tebus ngagai (a) orang Kristian ke diiri ngena roh kudus? (b) orang ke bisi peluang idup ba dunya?

14 Seraban mit orang Kristian ngasaika pengerindu Jehovah ti meruan enggau  chara ti istimewa. (Jhn. 1:12, 13; 3:5-7) Petara udah ngiri sida tu ngena roh kudus, lalu ketegal tu, diatu sida nyadi anak Iya. (Rom. 8:15, 16) Sekeda ari sida agi ba dunya, tang nama kebuah Paul ngumbai sida duduk “enggau Iya di serega dalam Jesus Kristus”? (Eps. 2:6) Laban Jehovah udah meri sida peluang idup belama iya di serega.—Eps. 1:13, 14; Kol. 1:5.

15 Semua orang ke enda diiri ngena roh kudus ulih nyadi kawan Petara enti sida ngayanka pengarap ba tebus. Sida mega bisi peluang nyadi anak angkat Petara, lalu idup belama iya ba dunya paradais. Tebus tu ngayanka pengerindu Jehovah ngagai semua mensia. (Jhn. 3:16) Enti kitai nyembah Petara enggau tetap ati, Iya deka meri kitai pengidup ti pemadu manah ba dunya baru. Naka meh pengaga ati laban ulih nemu utai tu! Nya alai, aram meh kitai ngayanka diri beterima kasih ke tebus, ke ngayanka pengerindu Petara ti pemadu meruan ngagai kitai.

NGAYANKA PENGERINDU DIRI NGAGAI JEHOVAH

16. Nama deka digaga kitai pengudah belematika pengerindu Petara?

16 Chara Jehovah ngayanka pengerindu ngagai kitai enda ulih diitung. Raja David belagu: ‘O Petara, naka meh pemayuh runding Nuan datai ke aku nyau enda teperagamka sida. Enti aku ngitung sida, sida mayuh agi ari igi pasir.’ (Mas. 139:17, 18) Belematika pemayuh chara Jehovah rinduka kitai deka meransang kitai rinduka Iya, lalu enggau naka ulih meri utai ti pemadu manah ngagai Iya.

17, 18. Nama sekeda chara kitai ulih ngayanka pengerindu ngagai Petara?

17 Kitai ulih ngayanka pengerindu kitai ngagai Jehovah ngena mayuh macham chara. Chunto, kitai ulih enggau ransing madahka berita manah pasal Perintah Petara ngagai orang bukai. (Mat. 24:14; 28:19, 20) Kitai mega ulih ngayanka pengerindu ngagai Jehovah enti kitai tetap ati ngelaban penguji ke ngachau pengarap kitai. (Bacha Masmur 84:11; James 1:2-5.) Taja pan penguji kitai besai, kitai pechaya Jehovah ulih meda pemerinsa kitai lalu deka nulung kitai, laban kitai berega ba Iya.—Mas. 56:8.

18 Pengerindu kitai ngagai Jehovah meransang kitai belematika semua utai manah ke udah digaga Iya. Kitai ngayanka diri rinduka Jehovah enggau Jaku Iya enti kitai nyadi pelajar Bup Kudus ti manah. Kitai seruran besampi ngagai Jehovah laban kitai rinduka Iya sereta deka neguhka kaul kitai enggau Iya. Lalu, lebuh kitai belematika tebus ti berega ke diberi Iya, pengerindu kitai ngagai Iya majak dalam. (1 Jhn. 2:1, 2) Tu sekeda ari mayuh chara kitai ngayanka diri beterima kasih ngagai Jehovah ketegal pengerindu Iya ti meruan ngagai kitai.