Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  Ogos 2015

Anti Aja!

Anti Aja!

“Utai nya baka ke lubah nyadi, tang anti aja utai nya.”—HAB. 2:3.

LAGU: 128, 45

1, 2. Nama ulah ke patut dikembuan nembiak Jehovah?

NEMBIAK Jehovah udah nganti enggau sabar endur semaya Iya deka dikeamatka. Chunto, Jeremiah nganti maya orang Babilon deka ngerusakka menua Judah, lalu tu nyadi ba taun 607 S.M. (Jer. 25:8-11) Isaiah madahka Jehovah deka mai orang Judah ke udah dibuai pulai baru ngagai menua Judah, lalu ku iya: ‘Beberekat meh orang ke manggaika pengarap sida ba Jehovah.’ (Isa. 30:18) Mikah mega nganti endur semaya Jehovah deka dikeamatka, lalu madahka: ‘Aku deka nganti Petara enggau penuh pengarap.’ (Mik. 7:7) Taja pan lama nganti, nembiak Petara pechaya Messiah tauka Kristus ke disemaya, deka datai.—Luk. 3:15; 1 Pet. 1:10-12. * (Peda nota kaki.)

2 Kemaya hari tu, kitai mega nganti semaya pasal Perintah Jehovah deka dikeamatka. Jesus, Raja ba Perintah nya, enda lama da agi deka nyelamatka nembiak Petara ari dunya ti penuh penyai tu. Iya deka ngemunaska orang ke jai sereta muai semua pemerinsa. (1 Jhn. 5:19) Nya alai, kitai patut nganti Hari Jehovah ke deka datai ba sebarang maya, lalu enggau naka ulih besedia.

3. Enti kitai udah lama nganti maya pengujung nya datai, nama utai engka berengkah diperundingka kitai?

 3 Kitai mega nganti maya peneka Petara deka nyadi ba dunya. (Mat. 6:10) Tang, enti kitai udah lama nganti maya pengujung nya datai, kitai engka berengkah berunding, ‘Nama kebuah kitai majak ngumbai pengujung nya nyau semak?’

NAMA KEBUAH KITAI MAJAK NGUMBAI PENGUJUNG NYA NYAU SEMAK?

4. Nama kebuah kitai patut “bejaga”?

4 Jesus ngasuh bala murid iya “bejaga” sereta “bejaga berari.” Nya kebuah kitai majak ngumbai pengujung nya nyau semak. (Mat. 24:42; Luk. 21:34-36) Pia mega, gerempung Jehovah terus nangkan kitai “nganti sereta minta Hari Petara datai” sereta beberatka semaya Jehovah pasal dunya baru.—Bacha 2 Peter 3:11-13.

5. Nama agi kebuah bukai kitai patut nganti Hari Jehovah?

5 Enti bala murid Jesus ba kurun keterubah patut nganti Hari Jehovah, kelebih agi kitai kemaya hari tu. Nama kebuah? Laban tanda ke diberi Jesus nunjukka iya udah nyadi Raja ba Perintah Petara kenyau ari 1914, lalu kitai benung idup ba hari ti penudi tauka ba “pengujung dunya.” Chunto, baka ke dipadah Jesus, gaya dunya majak jai, lalu berita manah pasal Perintah Petara benung dikerembaika di serata dunya. (Mat. 24:3, 7-14) Jesus nadai madahka ni pengelama hari ti penudi tu. Nya alai, kitai patut besedia nganti pengujung ke deka datai ba sebarang maya.

6. Nama kebuah kitai nemu gaya dunya deka majak jai seraya kitai semak enggau pengujung dunya?

6 Kati “pengujung dunya” nunjukka pasal jemah ila, maya dunya ke deka nyadi majak jai ari ke diatu? Bup Kudus madahka, orang deka majak jai “ba hari ti penudi.” (2 Tim. 3:1, 13; Mat. 24:21; Pem. 12:12) Nya alai, taja pan gaya dunya diatu balat jai, kitai nemu utai tu deka majak jai.

7. Ba Matthew 24:37-39, nama dipelajarka kitai pasal gaya dunya maya hari ti penudi?

7 Sekeda orang ngumbai sebedau “penusah ti besai,” perang deka nyadi ba semua menua, lalu mayuh orang deka sakit tauka balat lapar. (Pem. 7:14) Tang enti tu nyadi, semua orang deka nemu semua utai ke dipadah Bup Kudus nya benung dikeamatka. Indah orang ke enda beminat pasal Bup Kudus ulih beratika utai tu. Kingatka, Jesus madahka ba hari ti penudi, mayuh orang “nadai nemu utai.” Sida deka majak enggau pengidup sida ninting hari, lalu deka tekenyit lebuh Hari Jehovah datai. (Bacha Matthew 24:37-39.) Nya alai, kitai enda patut ngumbai gaya dunya deka majak balat jai sebedau “penusah ti besai” nyentukka orang nemu pengujung nya nyau semak.—Luk. 17:20; 2 Pet. 3:3, 4.

8. Nama utai ti ditemu kitai ari tanda ke dipadah Jesus?

8 Tanda ke diberi Jesus nulung bala murid iya nemu timpuh maya endur sida benung diau. Bala murid Jesus udah nemu pasal utai tu. (Mat. 24:27, 42) Kenyau ari taun 1914, tanda-tanda ke dipadah Jesus belabuh nyadi. Kitai nemu kitai benung diau ba hari ti penudi, “pengujung dunya.” Jehovah udah netapka maya Iya deka ngerusakka dunya Sitan ke jai tu.

9. Nama kebuah kitai majak ngumbai pengujung nya nyau semak?

9 Nya alai, nama kebuah kitai majak ngumbai pengujung nya nyau semak? Laban kitai ngasika Jesus Kristus. Pia mega, kitai nemu tanda ke dipadah Jesus pasal hari ti penudi benung nyadi. Kitai pechaya pengujung nya nyau semak, ukai kete gal kitai arapka semua utai ti didinga kitai, tang ketegal kitai pechaya utai ti dipadah ba Bup Kudus benung nyadi. Kitai patut tetap bejaga sereta besedia nganti pengujung datai.

NI PENGELAMA KITAI PATUT NGANTI?

10, 11. (a) Nama kebuah Jesus ngasuh bala murid iya “bejaga”? (b) Nama diasuh Jesus gaga bala murid iya enti pengujung nya enda datai enggau jampat baka ke dikumbai sida? (Peda gambar ba pun pelajar.)

10 Mayuh ari kitai udah lama nyembah Jehovah enggau tetap ati, sereta enda sabar nganti hari Iya datai. Enda ngira ni pengelama kitai udah nganti, kitai patut pechaya hari nya nyau semak. Kitai patut besedia maya Jesus datai ngerusakka dunya Sitan. Kingatka utai ti diasuh Jesus gaga bala murid iya: ‘Bejaga, besedia, laban kita enda nemu kemaya hari nya deka datai. Iya baka orang siku ke bejalai ngagai menua bukai. Iya ninggalka rumah lalu ngasuh orang gaji iya ngemataka utai iya, siku-siku bela diberi iya pengawa, lalu ngasuh orang ke nyaga mua pintu iya bejaga. Nya alai, bejaga kita, laban kita enda nemu kemaya tuan rumah nya deka datai, nemuka lebuh lemai hari, tauka ba urung tengah malam, tauka sebedau dini hari, tauka ba urung rerak tawas, enggai ke iya tetemuka kita tinduk lebuh iya ngenyit datai. Nya alai aku madah ngagai semua kita: Bejaga.’—Mrk. 13:33-37.

11 Lebuh bala murid Jesus nemu iya udah berengkah merintah ba taun 1914, sida nemu pengujung deka datai ba sebarang maya. Nya alai, sida besedia ke utai tu enggau ngereja mayuh agi ba pengawa nginjil. Jesus madahka iya engka laun datai, “sebedau dini hari, tauka ba urung rerak tawas.” Enti utai tu nyadi, nama patut digaga bala murid iya? Ku Jesus: “Bejaga.” Nya alai, taja pan kitai ngasaika diri udah lama nganti, tu ukai reti iya pengujung nya agi jauh tauka enda datai ba maya kitai agi idup.

12. Nama dipinta Habakuk ari Jehovah, lalu baka ni Jehovah nyaut iya?

12 Nabi Habakuk enggau sabar nganti lebuh iya madahka pengerusak Jerusalem. Bala nabi ke bukai sebedau iya mega udah betaun-taun madahka pesan nya. Habakuk ulih meda penyai enggau pengawa ke enda lurus majak nyadi ari ke udah. Iya minta tulung ari Jehovah: ‘O Jehovah, ni pengelama aku enda tau enda ngangau minta tulung?’ Taja pan Jehovah nadai madahka kemaya pengujung nya deka datai, tang Iya besemaya ngagai Habakuk: “Iya enda masau jam.” Jehovah mega madahka Habakuk, “anti aja.”—Bacha Habakuk 1:1-4; 2:3.

13. Nama engka diperundingka Habakuk, lalu nama kebuah nya ulih ngenusahka iya?

 13 Uji gambarka, enti Habakuk nyau lelak nganti pengujung nya, lalu nyebut: ‘Aku udah betaun-taun nganti pengerusak Jerusalem. Pengujung nya tentu agi lama. Aku enda ibuh terus madahka pesan nya. Orang bukai ulih ngereja pengawa nya.’ Nama deka nyadi enti Habakuk berunding baka nya? Iya engka enda diterima Jehovah. Lalu enti iya enda besedia lebuh pengujung nya datai, iya engka enda ulih idup.

14. Nama kebuah kitai beterima kasih ngagai Jehovah ketegal Iya udah nangkan kitai terus nganti penatai pengujung nya?

14 Uji gambarka nuan ba dunya baru. Semua utai ke dipadah ba Bup Kudus pasal hari ti penudi nyadi baka ke udah dipadah Jehovah. Tentu nuan deka arap agi ke Jehovah, lalu nuan deka pechaya agi Iya deka ngamatka semua utai ti udah disemaya Iya. (Bacha Josua 23:14.) Nuan tentu beterima kasih ngagai Jehovah laban Iya udah netapka pengujung ba maya ti ngena, sereta nangkan nembiak Iya ngambika terus nganti penatai pengujung nya.—SKR. 1:7; 1 Pet. 4:7.

TERUS NGINJIL SERAYA KITAI NGANTI

Kati nuan ngerembaika berita manah enggau ransing? (Peda genteran 15)

15, 16. Nama kebuah kitai patut enggau naka ulih nginjil sebedau pengujung datai?

15 Gerempung Jehovah deka terus nulung kitai beberatka sembah ngagai Jehovah ba pengidup. Tu nulung kitai tetap kisuk nyembah Jehovah sereta nemu enggau terang pesan kitai patut dipadahka enggau jampat. Kitai pechaya tanda ke dipadah Jesus benung dikeamatka diatu, lalu pengujung nya nyau semak amat. Nya alai kitai ngenuluka Jehovah ba pengidup kitai, lalu terus ngerembaika berita manah pasal Perintah Petara.—Mat. 6:33; Mrk. 13:10.

16 Enti kitai ngerembaika berita manah ngagai orang bukai, kitai nulung nyelamatka sida ari pengerusak dunya Sitan ke deka nyadi enda lama da agi. Siti ari penusah ke pemadu besai nyadi ba tasik kena taun 1945 maya kapal Wilhelm Gustloff tengelam. Beribu iku orang mati. Seiku menyadi Kristian ke indu enggau laki iya udah diselamatka ari kapal nya. Iya agi ingat, indah  lebuh kapal nya benung tengelam, seiku indu majak nyebut: “Beg gari aku! Beg gari aku! Perengka mas aku! Perengka mas aku agi dalam bilik di baruh din. Abis lengis barang aku!” Tang, bala penumpang ke bukai nemu utai ti pemadu beguna, lalu sida bebendar nyelamatka orang bukai. Kemaya hari tu, pengidup kitai nadai pengelikun. Kitai mega deka baka bala penumpang ke enda berundingka diri empu, enti kitai beberatka pengawa nginjil. Kitai deka enggau naka ulih nulung orang selamat ari pengujung dunya tu.

Gaga pemutus enggau manah, lalu tetap beberatka pengawa nginjil ke patut dipejalaika enggau jampat (Peda genteran 17)

17. Nama kebuah kitai patut pechaya pengujung deka datai ba sebarang maya?

17 Kitai ulih meda enggau terang utai ti dipadah ba Bup Kudus benung dikeamatka, lalu pengujung dunya ke jai tu nyau majak semak. Kitai nganti “sepuluh iti tanduk” enggau “jelu” ngelaban pengarap pelesu, iya nya Babilon ti besai. (Pem. 17:16) Kitai enda patut ngumbai agi lama endur utai tu deka nyadi. Kingatka Petara deka “ngasuh sida raja nya seati” nyerang pengarap pelesu, lalu tu deka nyadi enggau jampat sereta ba sebarang maya! (Pem. 17:17) Pengujung dunya Sitan ke jai tu nyau semak. Nya alai, kitai patut ngasika tangkan Jesus: “Bejaga kita, ngambika kita enda gian ngirup, lalu mabuk, lalu selalu irauka pengidup, enggai ke kita enda ngadang lebuh Hari nya ngenyit datai, baka panjuk ti nyintak.” (Luk. 21:34, 35; Pem. 16:15) Aram kitai tetap bejaga sereta mengkang kisuk ba pengawa ke Jehovah, lalu pechaya Iya nyelamatka ‘orang ke manggaika pengadang sida ba Iya.’—Isa. 64:4.

18. Nama tanya ke deka disaut pengudah pelajar tu?

18 Seraya kitai nganti pengujung dunya ke jai tu, kitai patut mendingka jaku ajar ari Jude: ‘Menyadi, enda tau enda negapka pengarap kita ti pemadu kudus, lalu besampi nitihka iring roh kudus; meruan dalam pengerindu Petara; nganti pengasih Jesus Kristus Tuan kitai ti deka mai kitai ngagai pengidup ti meruan belama iya.’ (Jud. 20, 21) Tang, baka ni kitai ulih nunjukka kitai nganti dunya baru Petara ke deka datai enda lama da agi? Kitai deka berandauka utai tu pengudah pelajar tu.

^ per. 1 Kena nemu sekeda utai ke dipadah Bup Kudus pasal Messiah sereta baka ni utai nya dikeamatka, peda lambar 200 ba bup Nama Utai ti Bendar Diajar Bup Kudus?