Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  Julai 2015

Mengkang Taluk Ngagai Perintah Petara

Mengkang Taluk Ngagai Perintah Petara

“Sida ukai enggi dunya.”—JHN. 17:16.

LAGU: 63, 129

1, 2. (a) Nama kaul entara taluk ngagai Jehovah sereta enda enggau laya ke bisi ba dunya? (Peda gambar ba pun pelajar.) (b) Mayuh orang taluk ngagai nama, tang nama penyadi iya?

NEMBIAK Jehovah neutral, lalu enda enggau pekara ti ulih mechah-belah orang, baka menua, bansa, tauka chara pengidup. Nama kebuah? Laban kitai rinduka Jehovah. Pengerindu nya ngasuh kitai taluk sereta ngasika Iya. (1 Jhn. 5:3) Enda ngira dini alai kitai diau tauka ari ni penatai kitai, kitai nitihka ukum Petara. Penaluk ngagai Jehovah enggau Perintah Iya berat agi ari utai bukai. (Mat. 6:33) Nya kebuah kitai ulih ngumbai kitai “ukai enggi dunya.”—Bacha John 17:11, 15, 16; Isa. 2:4.

2 Mayuh orang ba dunya kemaya hari tu taluk ngagai menua, bansa, chara pengidup tauka tim sukan sida. Tang sayau amat, tu udah ngasuh mayuh orang bepekit sereta begedika pangan diri, tauka kekadang bebunuhka orang ke enda bepiak enggau sida. Taja pan kitai enda enggau laya tu, tang tu ulih ngachau kitai enggau diri sebilik, tauka ngasuh kitai merinsa ketegal pengawa ke enda lurus. Kitai engka deka ngarika siti-siti parti politik enti perintah berat sepiak, laban Jehovah udah ngaga kitai  ngembuan pengelandik kena nemu utai ti lurus tauka enda. (P-kal. 1:27; U-dat. 32:4) Baka ni asai ati nuan enti utai ke enda lurus nyadi? Ulih nuan mengkang neutral tauka enda?

3, 4. (a) Nama kebuah kitai enda ngarika siti-siti perintah maya bisi penyarut? (b) Nama deka dikerandauka kitai ba pelajar tu?

3 Mayuh orang deka ngarika siti-siti perintah maya bisi penyarut laban perintah madahka nya utai ke patut digaga rayat. Tang kitai nitihka Jesus. Nya alai, kitai enda enggau politik tauka beperang. (Mat. 26:52) Orang Kristian ti bendar enda ngumbai siti-siti begian dunya Sitan manah agi ari iya ke bukai. (2 Kor. 2:11) Kitai enda enggau laya ba dunya tu.—Bacha John 15:18, 19.

4 Ketegal kitai enda sempurna, sekeda ari kitai engka agi ngembuan ati ke enda manah pasal orang bukai ke enda sebaka enggau kitai. (Jer. 17:9; Eps. 4:22-24) Ba pelajar tu, kitai deka berandauka ajar ke ulih nulung kitai ngelaban sereta mutarka asai ati ke ulih mechah-belah orang. Kitai mega deka berandauka baka ni kitai ulih taluk ngagai Perintah Petara enggau ngelatih diri berunding baka Jehovah seduai Jesus.

NAMA KEBUAH KITAI ENDA NYUKUNG UTAI BA DUNYA TU

5, 6. Lebuh Jesus ba dunya, baka ni iya meda orang ari siti-siti bansa, lalu nama kebuah?

5 Lebuh nuan ngasaika diri tusah deka mengkang neutral, tanya diri empu, ‘Nama deka digaga Jesus?’ Lebuh Jesus ba dunya, orang ari menua Judea, Galili enggau Samaria belaya sereta enda sepenemu enggau pangan diri. Peratika sekeda chunto. Orang Judah enggau orang Samaria enda bejaku enggau pangan diri. (Jhn. 4:9) Orang Parisi enggau orang Saduki enda sepenemu ba mayuh pekara. (SKR. 23:6-9) Orang Judah ke belajarka Adat Moses ngumbai diri manah agi ari orang ke enda belajarka Adat Moses. (Jhn. 7:49) Lalu mayuh orang begedika sida pengumpul chukai enggau orang Rome. (Mat. 9:11) Tang Jesus enda enggau laya tu. Taja pan iya selalu ngetanka pemendar pasal Jehovah sereta nemu bansa Israel nya nembiak ti dipilih Petara, tang iya enda kala ngajar bala murid iya, sida manah agi ari orang bukai. (Jhn. 4:22) Jesus ngajar sida rinduka semua orang.—Luk. 10:27.

6 Nama kebuah Jesus enda ngumbai siti-siti bansa manah agi ari bansa bukai? Laban tu bekaul enggau asai ati iya enggau Apai iya ngagai orang. Jehovah ngaga mensia ngambika sida ulih ngemenuhka dunya tu enggau bemacham bansa. (P-kal. 1:27, 28) Nya alai, Jehovah seduai Jesus enda ngumbai siti-siti bansa, menua, tauka bansa jaku manah agi ari iya ke bukai. (SKR. 10:34, 35; Pem. 7:9, 13, 14) Kitai patut nitihka teladan manah seduai iya.—Mat. 5:43-48.

7, 8. (a) Sapa disukung kitai, lalu nama kebuah? (b) Nama patut dikingatka kitai pasal mutarka penusah mensia?

7 Nama kebuah kitai enda nyukung pemerintah tauka perintah mensia? Laban kitai nyukung Jehovah. Iya Pemerintah kitai. Ba Kebun Eden, Sitan madahka Jehovah ukai pemerintah mensia ti pemadu manah. Sitan deka mensia pechaya chara iya ngereja pengawa manah agi ari enggi Petara. Jehovah ngelakka kitai mutuska diri empu sapa ke patut disukung kitai. Tang baka ni enggau nuan? Kati nuan ngasika Jehovah laban nuan pechaya chara Iya ngereja pengawa manah agi ari enggi  nuan? Kati nuan arapka semina Perintah Iya aja ke ulih mutarka penusah kitai? Tauka nuan ngumbai mensia ulih merintah diri empu enggau mujur?—P-kal. 3:4, 5.

8 Chunto, enti orang nanya nama runding nuan pasal siti-siti parti politik, raban tauka gerempung ke bukai, baka ni nuan nyaut? Sekeda ari raban tu engka amat deka nulung orang. Tang kitai nemu, semina Perintah Jehovah aja ke ulih mutarka semua penusah mensia sereta muai semua pengawa ke enda lurus. Kitai mega nitihka iring ari Jehovah ba gempuru, ukai ngereja utai nitihka runding diri empu. Nya kebuah kitai ulih beserakup.

9. Ba kurun keterubah, nama penanggul ke bisi ba sekeda orang Kristian, lalu nama patut digaga sida?

9 Ba kurun keterubah, sekeda orang Kristian ba Korint bekelikuh enggau pangan diri, lalu nyebut: “‘Aku nitihka Paul,’ siku nyebut, ‘Aku nitihka Apollos,’ siku nyebut, ‘Aku nitihka Peter’, lalu siku nyebut, ‘Aku nitihka Kristus.’” Lebuh Paul nemu pasal pekara tu, iya tekenyit. Tu penganggul ti berat, laban ulih ngerusak pemaik ba gempuru. Nya alai iya nanya bala menyadi Kristian, “Kati Kristus udah dibagi?” Paul ngelalau sida: ‘Dalam nama Jesus Kristus Tuan kitai aku minta kita, menyadi, sama besetuju enggau pangan diri, enda beserekang, tang begempung enggau pangan diri, sama seati, sama sepenemu, sama juluk ati enggau pangan diri.’ Pia mega kemaya hari tu. Pengawa bebagi enda tau nyadi ba gempuru.—1 Kor. 1:10-13; bacha Rome 16:17, 18.

10. Paul ngingatka orang Kristian pasal nama, lalu nama ulih dipelajarka kitai ari nya?

10 Paul ngingatka orang Kristian ke diiri ngena roh kudus, sida rayat ti di serega, lalu sida enda patut beberatka “utai dunya.” (Plp. 3:17-20) * (Peda nota kaki.) Sida ke diiri ngena roh kudus nya pengari Petara enggau Kristus. Lebuh pengari gawa ba menua bukai, iya enda enggau penanggul sereta politik ba menua nya. Pia mega, sida ke diiri ngena roh kudus enda patut bisi kaul enggau penanggul sereta politik ba dunya tu. (2 Kor. 5:20) Sida ke bisi peluang idup belama iya ba dunya mega taluk ngagai Perintah Petara, lalu enda enggau laya ba dunya.

NGELATIH DIRI TALUK NGAGAI PERINTAH JEHOVAH

11, 12. (a) Nama ulah ke patut diseliahka kitai enti kitai deka mengkang taluk ngagai Perintah Petara? (b) Baka ni asai ati seiku menyadi Kristian indu pasal sekeda orang, lalu nama nulung iya berubah?

11 Ba mayuh endur di dunya tu, orang ngasaika diri semak agi ngagai sida ke sama penatai, chara pengidup sereta bansa jaku enggau sida. Sida selalu temegahka menua asal diri empu. Tang, kitai enda patut ngelakka ulah tu nyadi ba kitai. Kitai patut ngubah chara kitai berunding, lalu kitai patut ngelatih ati kitai ngambika mengkang neutral ba semua utai. Baka ni kitai ulih ngereja tu?

12 Chunto, seiku indu ke benama, Mirjeta * (peda nota kaki) ada ba menua ke dikumbai Yugoslavia. Orang ba menua nya begedika bansa Serbia. Lebuh iya belajar pasal Jehovah, iya nemu Jehovah enda ngeninggika siti-siti bansa ari bansa bukai. Lalu iya mega nemu Sitan ke dekaka orang begedika pangan diri. Nya alai, iya naka ulih nguji ngubah asai ati diri. Tang, lebuh perang entara mayuh macham bansa nyadi ba endur iya diau, Mirjeta berengkah  ngembuan asai ati ke enda manah baru ngagai bansa Serbia. Iya mega enggai nginjil ngagai bansa Serbia. Iya nemu tu salah, nya alai iya minta Jehovah nulung iya muai asai ati ke baka nya. Iya mega minta Jehovah nulung iya berengkah nyadi pengerintis. Ku Mirjeta: “Aku ngasaika beberatka pengawa nginjil nya bantu ti pemadu manah. Ba pengawa nginjil, aku nguji neladan pengerindu Jehovah, lalu aku ulih ngasaika diri nadai agi ngembuan asai ati ke enda manah.”

13. (a) Nama nyadi ba Zoila, lalu nama digaga iya? (b) Nama ulih dipelajarka kitai ari utai ke nyadi ba Zoila?

13 Zoila nya seiku menyadi Kristian indu ari menua Mexico. Iya udah pindah ke Eropah. Ba gempuru iya bisi bala menyadi Kristian ari begian bukai menua Amerika Latin. Zoila madahka sekeda ari sida ngeleseka menua asal iya, adat enggau musik ari menua iya. Iya tusah ati, nya alai iya besampi ngagai Jehovah ngambika iya enda ringat. Nama patut digaga kitai enti kitai napi penanggul ti sama baka iya? Sekeda ari bala menyadi Kristian kitai agi tusah nagang asai ati sida maya sida ninga utai ke enda manah pasal menua sida. Nya alai, kitai anang nyebut tauka ngereja sebarang utai ke ulih ngasuh siti-siti bansa manah agi ari bansa bukai. Kitai enggai mechah-belah bala menyadi Kristian kitai tauka orang bukai.—Rom. 14:19; 2 Kor. 6:3.

14. Nama ulih nulung nuan ngembuan runding ti sama baka Jehovah ngagai orang bukai?

14 Kitai semua nemu, nembiak Jehovah beserakup enggau pangan diri. Nya alai, kitai enda ngumbai siti-siti endur tauka menua manah agi ari ke bukai. Tang, orang ke sebilik tauka orang ke begulai enggau nuan engka ngasuh nuan rinduka menua asal nuan. Nyadi, kekadang nuan engka agi bisi runding ke enda manah pasal menua, bansa, chara pengidup tauka bansa jaku orang bukai. Nama ulih nulung nuan berubah? Perundingka enggau dalam baka ni asai ati Jehovah ngagai orang ke temegahka menua diri tauka ngumbai diri manah agi ari bansa bukai. Giga mayuh agi pansik pasal pekara tu lebuh nuan belajarka Bup  Kudus kediri empu tauka enggau diri sebilik. Udah nya, minta Jehovah nulung nuan ngembuan asai ati ti sama baka Iya ngagai orang bukai.—Bacha Rome 12:2.

Ngambika taluk ngagai Jehovah, kitai patut ngasika Iya enda ngira nama deka digaga orang ba kitai (Peda genteran 15, 16)

15, 16. (a) Baka ni asai ati sekeda orang ketegal kitai bebida ari sida? (b) Baka ni apai indai ulih nulung anak sida mengkang taluk ngagai Jehovah?

15 Kitai deka nyembah Jehovah enggau ati ti beresi. Nya alai, kekadang kitai patut bebida ari orang ke sama enggau bekereja, orang ke sekelas enggau kitai, orang ke diau berimbai enggau kitai tauka kaban belayan. (1 Pet. 2:19) Jesus madahka orang bukai deka begedika kitai laban kitai bebida. Kingatka, mayuh orang ke nyakal kitai enda nemu pasal Perintah Petara. Nya alai, sida enda nemu kebuah kitai patut taluk ngagai Perintah Petara, ukai taluk ngagai perintah mensia.

16 Ngambika taluk ngagai Jehovah, kitai patut ngasika Iya enda ngira jaku orang tauka utai ti deka digaga orang ba kitai. (Dan. 3:16-18) Kelebih agi orang ke agi biak engka tusah deka bebida ari orang bukai. Apai indai, tulung meh anak kita ngambika berani ba sekula. Anak kita engka takut deka nulak nabi bendira tauka takut deka nulak enggau pengerami ke bekaul enggau menua. Lebuh belajarka Bup Kudus ba diri sebilik, kita ulih belajar pasal asai ati Jehovah bekaul enggau pekara tu. Ajar sida nerangka utai ti dipechaya sida enggau terang sereta bebasa. (Rom. 1:16) Pia mega, enti ulih, kita tau nulung anak nerangka utai ti dipechaya kitai ngagai pengajar sida.

GAGA ATI KE SEMUA UTAI TI DIGAGA JEHOVAH

17. Runding ke baka ni patut diseliahka kitai, lalu nama kebuah?

17 Kitai selalu gaga ati enggau pemakai, bansa jaku, rampa menua sereta adat ke bisi ba menua asal kitai. Kati kitai bisi ngasaika utai ti dikerinduka kitai selalu manah agi ari utai ti dikerinduka orang bukai? Jehovah deka kitai gaga ati ke bemacham utai ti udah digaga Iya. (Mas. 104:24; Pem. 4:11) Nya alai, anang majak ngumbai siti-siti chara ngereja pengawa manah agi ari chara ke bukai.

18. Nama kebuah nya manah kitai ngembuan runding ti sama baka Jehovah ngagai orang bukai?

18 Jehovah dekaka semua bansa mensia belajar pasal Iya, nyembah Iya, sereta idup belama iya. (Jhn. 3:16; 1 Tim. 2:3, 4) Nya alai, lebuh bala menyadi Kristian kitai bisi penemu ke enda sebaka enggau enggi kitai, kitai deka ningaka penemu sida, seagi-agi penemu sida sejalai enggau peneka Jehovah. Enggau tu, pengidup kitai deka ngerinduka ati, ngagaka ati, lalu kitai ulih mengkang beserakup enggau bala menyadi Kristian. Baka ke udah dipelajarka kitai, laban kitai taluk ngagai Jehovah enggau Perintah Iya, kitai enda enggau laya ba dunya. Kitai begedika ulah ti temegah enggau bepekit ke bisi ba dunya Sitan. Kitai beterima kasih ngagai Jehovah ke udah ngajar kitai baruh ati sereta rinduka pemaik! Kitai ngasaika utai ti diasaika pemasmur: ‘Naka meh pemanah, naka meh penyamai lebuh nembiak Petara diau seati enggau pangan diri!’—Mas. 133:1.

^ per. 10 Sekeda orang ba gempuru Pilipi engka nyadi rayat Rome, lalu bisi mayuh agi hak ari bala menyadi Kristian ke ukai nyadi rayat Rome.

^ per. 12 Sekeda nama udah ditukar.