Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  Julai 2015

 TOPIK RANDAU | BAKA NI MUTARKA PENGIRAU

Pengirau Ba Sebarang Endur!

Pengirau Ba Sebarang Endur!

“Aku meli pemakai, tang semina bisi biskut ke berega 10,000 kali lipat ari rega asal! Hari siti, nadai agi pemakai dijual ba kedai.”—Paul, Zimbabwe.

“Laki aku madahka diri deka ninggalka kami menyanak. Baka ni aku tan enggau ulah iya ke enda tetap ati nya? Nama deka nyadi ngagai bala anak aku?”—Janet, Amerika Serikat.

“Lebuh sirin bemunyi, aku ngiga endur belalai sereta ningkap ba lantai maya rukit meletup. Bejam-jam udah nya, jari aku agi gegetak.”—Alona, Israel.

Kitai mayuh pengirau laban diau ba maya ti “mayuh macham penusah.” (2 Timoti 3:1) Mayuh orang ditinggang penusah penatai pemisi, ruang bilik pechah, perang, penyakit ke ulih munuh, sereta penusah ngenyit ke datai ari alam tauka digaga mensia. Kelimpah ari pengirau tu, bisi mega pengirau bukai ba diri empu baka: ‘Kati utai ke tumbuh ba dalam tubuh aku nya kanser?’ ‘Baka ni gaya dunya endur alai uchu ichit aku diau dudi hari ila?’

Pengirau endang suah nyadi ba pengidup. Kitai irau sebedau ngambi peresa, ngereja siti-siti pengawa tauka interbiu kereja. Lalu ngembuan pengirau ulih nulung kitai nyeliahka utai ti tau ngemedis. Tang, kelalu balat irau ulih ngenusah. Nitihka sekeda pansik baru-baru tu, lebih ari 68,000 iku orang besai tuai nunjukka indah pengirau ke enda balat ulih ngemandakka umur. Nya alai Jesus nanya: “Kati kita ulih nginsur umur diri panjai agi ngena pengirau kita?” Pengirau enda ulih ngemanjaika umur kitai. Nya kebuah Jesus meri jaku lalau: ‘Anang irau.’ (Matthew 6:25, 27) Tang, baka ni kitai ulih ngereja tu?

Saut iya bekaul enggau nitihka penemu ke ulih dikena, ngemansangka pengarap ba Petara sereta negapka peluang ti ulih dikearapka ke jemah ila. Taja pan kitai diatu enda napi penusah ti balat, tang kitai engka napi iya dudi hari ila. Nya alai, aram kitai meda baka ni chara tu udah nulung Paul, Janet enggau Alona mutarka pengirau.