Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  Julai 2015

Pengawa Kena Ngemanahka Paradais Rohani

Pengawa Kena Ngemanahka Paradais Rohani

“Kena ngemuliaka nengeri Aku.”—ISA. 60:13.

LAGU: 102, 75

1, 2. Nama reti “pelasar kaki” baka ke dikena ba Sempekat Lama?

PETARA JEHOVAH madahka: “Serega nya kerusi diraja Aku, lalu dunya nyadika pelasar kaki Aku.” (Isa. 66:1) Petara mega nyebut pasal “pelasar kaki” Iya lebuh Iya madahka: “Kena ngemuliaka nengeri Aku.” (Isa. 60:13) Baka ni Iya ngemuliaka tauka ngemanahka pelasar kaki Iya? Lalu, nama reti tu ngagai orang ke diau ba pelasar kaki Iya tauka dunya?

2 Ba Sempekat Lama, leka jaku “pelasar kaki” mega dikena ngambarka Rumah Sembiang ba menua Israel menya. (1 Ban. 28:2; Mas. 132:7) Rumah Sembiang tu manah ba Jehovah laban iya palan endur sembah ti bendar. Lalu iya dikena ngemuliaka Jehovah ba dunya tu.

3. Ni bagi palan endur sembah ti bendar kemaya hari tu, lalu kemaya iya berengkah?

3 Ni bagi palan endur sembah ti bendar kemaya hari tu? Iya ukai begunan baka Rumah Sembiang. Iya Rumah Sembiang rohani, lalu iya ngemuliaka Jehovah lebih agi ari begunan ke udah digaga. Nama reti Rumah Sembiang rohani? Nya atur  ari Petara ngambika mensia ulih nyadi kawan Iya sereta nyembah Iya. Atur tu semina ulih nyadi ketegal tebus Jesus. Atur tu berengkah ba taun 29 lebuh Jesus dibaptisa sereta dipilih nyadi Imam Besai ba Rumah Sembiang rohani Jehovah.Heb 9:11, 12.

4, 5. (a) Nitihka Masmur 99, nama deka digaga penyembah Jehovah? (b) Nama tanya ti patut diperundingka kitai?

4 Kitai beterima kasih ngagai Petara laban udah ngaga atur ba sembah ti bendar. Kitai nunjukka diri beterima kasih lebuh madahka orang bukai pasal nama Jehovah enggau tebus ti disediaka Iya. Kitai gaga ati laban bisi lebih ari lapan juta iku orang Kristian ti bendar muji Jehovah ninting hari! Mayuh orang ke bisi pengarap pechaya sida deka muji Petara di serega pengudah sida mati, tang nembiak Jehovah nemu sida patut muji Iya ditu enggau diatu.

5 Lebuh kitai muji Jehovah, kitai neladan nembiak Jehovah ke tetap ati baka ke dipadahka ba Masmur 99:1-3, 5. (Bacha.) Moses, Aron enggau Samuel nyukung atur Petara ba sembah ti bendar enggau pengabis ati kelia menya. (Mas. 99:6, 7) Kemaya hari tu, sebedau orang ke diiri ngena roh kudus berengkah nyadi imam enggau Jesus ba serega, sida nyembah Jehovah enggau tetap ati ba Rumah Sembiang rohani di dunya tu. Bejuta iku “bedus ti bukai” nyukung sida enggau tetap ati. (Jhn. 10:16) Kedua-dua raban tu beserakup nyembah Jehovah. Tang, kitai patut nanya diri empu, ‘Kati aku nyukung atur Jehovah ba sembah ti bendar enggau pengabis ati?’

NGELALA SIDA KE NYEMBAH PETARA BA RUMAH SEMBIANG ROHANI

6, 7. Nama utai nyadi ba gempuru Kristian ti keterubah, lalu nama nyadi ba taun 1919?

6 Kurang ari 100 taun pengudah gempuru Kristian didirika, orang ke limpang ari pengarap ti bendar majak mayuh baka ke udah dipadah. (SKR. 20:28-30; 2 Tes. 2:3, 4) Pengudah nya, penyembah Petara ti bendar majak tusah deka dikelala. Pengudah kira-kira 1,800 taun, nya baru Jehovah ngena Jesus ngiga orang ke amat nyembah Jehovah ba Rumah Sembiang rohani Iya.

 7 Ba taun 1919, orang ke diterima Petara sereta nyembah Iya ba Rumah Sembiang rohani udah dikelala. Sida udah ngaga ubah ngambika sembah sida diterima Jehovah. (Isa. 4:2, 3; Mal. 3:1-4) Nya alai, genera ke dipeda Paul kira-kira 1,800 taun menya berengkah dikeamatka.

8, 9. Nama reti “serega” ke dipeda Paul dalam genera?

8 Genera Paul dipadahka ba 2 Korint 12:1-4. (Bacha.) Dalam genera nya, Jehovah ngayanka Paul utai ke deka nyadi jemah ila. Nama reti “serega” ke dipeda Paul? Paul madahka tiga iti utai ti bebida. Kesatu, Paradais nyata ke deka nyadi ba dunya. (Luk. 23:43) Kedua, paradais rohani ke deka diasaika kitai enggau pengabis iya ba dunya baru. Lalu ketiga, utai ti amat manah di serega ‘ba Kebun Petara.’Pem. 2:7.

9 Tang, nama kebuah Paul madahka iya udah “ninga utai ti pemadu manah, ti enda ulih ditelah ngena jaku mensia”? Laban nya ukai maya iya nerangka enggau silik utai manah ke udah dipeda iya dalam genera. Tang kemaya hari tu, Jehovah udah ngemendarka kitai madah ngagai orang bukai pasal berekat ke diasaika nembiak Iya diatu!

10. Nama kebuah paradais rohani enggau Rumah Sembiang rohani enda sama?

10 Kitai suah bejaku pasal paradais rohani. Tang nama reti iya? Tu pemaik enggau penyerakup ke diberi Petara ngagai nembiak Iya. Nya alai, paradais rohani enggau Rumah Sembiang rohani enda sama. Rumah Sembiang rohani nya atur sembah ti bendar ari Petara. Paradais rohani enggau terang madahka sapa orang ke diterima Petara sereta nyembah Iya ba Rumah Sembiang rohani Iya.Mal. 3:18.

11. Nama peluang ke dikemisi kitai kemaya hari tu?

11 Kitai gaga ati laban nemu berengkah ari taun 1919, Jehovah udah ngemendarka mensia ke enda sempurna ngemansangka, neguhka sereta ngemanahka paradais rohani. Kati nuan enggau ba pengawa tu? Kati nuan temegah nerima peluang bekereja enggau Jehovah kena ngemuliaka Iya ba dunya?

JEHOVAH NGEMANAHKA AGI GEREMPUNG IYA

12. Baka ni kitai nemu Isaiah 60:17 udah dikeamatka? (Peda gambar ba pun pelajar.)

12 Nabi Isaiah madahka mayuh ubah ti manah deka nyadi ba gerempung Petara di dunya tu. (Bacha Isaiah 60:17.) Menyadi Kristian ke biak tauka baru, semina macha tauka ninga pasal ubah tu. Tang, mayuh menyadi Kristian bisi peluang ngasaika ubah tu! Sida ke tetap ati tu pechaya Petara ngena Raja kitai, Jesus, kena nyaga enggau ngiring gerempung Iya! Lebuh kitai ninga pengalaman ari menyadi Kristian ke dikerindu tu, pengarap kitai ba Jehovah diteguhka.

13. Nitihka Masmur 48:12-14, nama patut digaga kitai?

13 Semua orang Kristian ti bendar patut madahka orang bukai pasal gerempung Jehovah. Taja pan kitai diau ba dunya ti penuh enggau penyai, tang kitai bisi pemaik enggau penyerakup entara bala menyadi Kristian. Tu utai ti ngalitka ati! Kitai patut gaga ati madah ngagai “serak ti nangkanka” kitai pasal gerempung Jehovah enggau pasal paradais rohani!Bacha Masmur 48:12-14.

14, 15. Nama ubah ke digaga pengudah taun 1970, lalu baka ni gerempung bulih penguntung?

14 Mayuh orang ke tuai ba gempuru  udah ngasaika ubah kena ngemanahka agi gerempung Jehovah ba dunya tu. Sida agi ingat lebuh gempuru dipegai seiku tuai gempuru, tang udah nya dipegai seraban tuai gempuru. Pampang opis dipegai seiku tuai pampang opis, tang udah nya dipegai Komiti Pampang Opis. Suba presiden Watch Tower Society meri iring, tang diatu Orang ti Megai Saksi-Saksi Jehovah meri iring. Taja pan tiap iku tuai tu suba bisi penulung ke tetap ati, tang semina iya aja ke betanggungjawap ngaga pemutus ba gempuru, ba pampang opis, tauka ba indu opis. Pengudah taun 1970, ubah udah digaga ngambika seraban tuai gempuru betanggungjawap ngaga pemutus.

15 Nama kebuah ubah tu nguntungka gerempung? Laban ubah tu nitihka penemu ke betul agi ari Bup Kudus. Ari ke ngena seiku aja ngaga semua pemutus, gerempung bulih penguntung ari semua tuai gempuru ke ngembuan kualiti ti manah, tauka “pemeri ngagai mensia” ke disediaka Jehovah.Eps. 4:8; J-lam. 24:6.

Jehovah meri iring ba pengidup ngagai semua orang ba serata dunya (Peda genteran 16, 17)

16, 17. Nama ubah baru ti ngerinduka ati nuan, lalu nama kebuah?

16 Pikirka sekeda ubah ke udah digaga ba litaricha kitai. Kitai gaga ati nyadung litaricha ti ulih nulung sereta ngerinduka ati maya nginjil. Pikirka mega pasal baka ni kitai ngena teknologi baru ngerembaika berita manah. Chunto, laman web jw.org ulih ngenataika berita manah ngagai mayuh agi orang ngambika sida bulih penguntung. Ari semua ubah tu, kitai nemu Jehovah balat rindu sereta ibuhka orang.

17 Kitai mega gaga ati enggau ubah ke digaga ba gempuru kitai. Enggau tu, kitai bisi awak kena belajarka Bup Kudus ba diri sebilik tauka kediri empu. Kelimpah ari nya, kitai gaga ati enggau ubah ke udah  digaga ba program gempuru besai. Program nya majak manah-semanah ari taun ke taun! Kitai mega beterima kasih ke latih ti udah diterima kitai ari mayuh sekula Bup Kudus. Ari semua ubah tu, kitai nemu Jehovah ngiring gerempung Iya, lalu Iya deka terus ngemanahka agi paradais rohani!

BAKA NI KITAI NULUNG NGEMANAHKA AGI PARADAIS ROHANI

18, 19. Baka ni kitai ulih nulung ngemanahka agi paradais rohani?

18 Jehovah udah meri kitai peluang enggau nulung ngemanahka agi paradais rohani. Baka ni kitai ngereja iya? Enggau ransing ngerembaika berita manah pasal Perintah Petara sereta ngaga mayuh agi orang nyadi murid. Tiap kali kitai nulung orang nyadi nembiak Petara, kitai nulung ngemansangka agi paradais rohani.Isa. 26:15; 54:2.

19 Kitai mega nulung ngemanahka paradais rohani enti kitai bebendar ngemanahka ulah Kristian kitai. Tu ngasuh paradais rohani narit ati orang bukai. Kesuah agi ukai semina penemu pasal Bup Kudus, tang ulah manah kitai ke dulu agi narit ati orang ngagai gerempung, udah nya ngagai Jehovah enggau Jesus.

Nuan ulih nulung ngemansangka paradais rohani (Peda genteran 18, 19)

20 Jehovah enggau Jesus tentu gaga ati meda paradais rohani kitai ke manah kemaya hari tu. Pengaga ati ke diasaika kitai diatu semina mimit aja enti dibandingka enggau pengaga ati ke deka diasaika kitai maya kitai gawa ngaga dunya tu nyadi dunya paradais. Kitai patut selalu ingat ayat ba Jaku Dalam 14:35, ke madahka: “Raja gaga ati ke bala pemesai ti landik gawa.” Aram meh kitai gawa bebendar ngemanahka paradais rohani!