Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  Julai 2015

 TANYA ARI PEMACHA . . .

Nama Kebuah Petara Ngelakka Penguasa Nekan Orang ke di Baruh Sida Iya?

Nama Kebuah Petara Ngelakka Penguasa Nekan Orang ke di Baruh Sida Iya?

Bup Kudus bisi sekeda cherita pasal penguasa nekan orang ke di baruh sida iya. Tu ngingatka kitai pasal cherita Nabot. * Ahap, raja bansa Israel maya kurun kesepuluh S.M., ngelakka bini iya Jesebel, munuh Nabot enggau bala anak lelaki iya ngambika Raja Ahap ulih ngempu kebun anggur Nabot. (1 Raja 21:1-16; 2 Raja 9:26) Nama kebuah Petara ngelakka pengawa salah guna kuasa nyadi?

“Petara enda kala bula.”—Titus 1:2

Aram kitai beratika siti kebuah iya: Petara enda kala bula. (Titus 1:2) Nama kaul tu enggau pengawa nekan? Keterubah iya, Petara madahka mensia pengawa ngelaban Iya ulih ngujungka penusah ti balat, iya nya pemati. Baka ke dipadah Petara, pengudah pengawa ngelaban ba Kebun Eden, pemati amat nyadi ba mensia. Pia mega, pemati mensia keterubah iya nyadi ketegal pengawa nekan, maya Kain munuh menyadi iya Abel.—Pemungkal 2:16, 17; 4:8.

Kenyau ari nya, Jaku Petara madahka, sepemanjai sejarah mensia: “Orang bukai ke natka diri merinsa dipegai sida.” (Pengajar 8:9) Kati jaku tu amat nyadi? Jehovah nangkan bansa Israel ke nyadi nembiak Iya, raja sida deka nekan sida, lalu tu ngasuh sida minta tulung ngagai Iya. (1 Samuel 8:11-18) Indah Raja Solomon ke bepenemu minta chukai lebih ari ke patut ari rayat iya. (1 Raja 11:43; 12:3, 4) Raja ke jai baka Ahap balat agi nekan orang. Uji perundingka: Enti Petara nagang semua pengawa nekan ari nyadi, enda ke tu nunjukka jaku Petara nya bula?

“Orang bukai ke natka diri merinsa dipegai sida.”—Pengajar 8:9

Kingatka mega, Sitan ngumbai mensia nyembah Petara semina ke penguntung diri empu aja. (Jop 1:9, 10; 2:4) Enti Petara nyaga semua nembiak Iya ari pengawa nekan, enda ke tu nunjukka jaku Sitan nya amat? Lalu enti Petara nagang pengawa nekan nyadi ba semua orang, enda ke tu nunjukka Petara balat bula? Enti Petara nagang semua pengawa nekan, mayuh orang engka ngumbai mensia ulih merintah diri empu. Tang Jaku Petara madahka, mensia nadai kuasa merintah diri empu. (Jeremiah 10:23) Kitai deka Perintah Petara datai ngambika semua pengawa ke enda lurus ulih dibuai.

Kati tu nunjukka Petara nadai ngereja nama-nama utai kena nagang pengawa nekan tu? Enda. Uji peratika dua iti utai ke digaga Iya: Kesatu, Iya madahka pengawa jai penguasa. Chunto, Jaku Iya madahka tiap iti pelan ke dikena Jesebel ngelaban Nabot. Bup Kudus mega nerangka pengawa jai nya datai ari pemerintah ke bisi kuasa, ke deka ngelalaika sapa iya ke bendar. (John 14:30; 2 Korint 11:14) Bup Kudus madahka pemerintah nya Antu Sitan. Enggau madahka penyai, pengawa nekan sereta pun penatai ulah ke enda manah tu, Petara nulung kitai ngelepaska diri ari penyai. Enggau tu, Iya nyaga peluang kitai idup belama iya ke jemah ila.

Kedua, Petara nunjukka Iya deka muai pengawa nekan. Ari chara Iya madahka pengawa jai, ngakim sereta ngukum Ahap seduai Jesebel, nyengkaum mayuh agi sida ke bukai baka seduai iya, kitai ulih pechayaka semaya Iya ke deka munaska semua orang ke jai ila. (Masmur 52:1-5) Petara mega meri kitai peluang ke ulih dikearapka, iya nya enda lama da agi Iya deka mutarka semua penusah orang ke rinduka Iya. * Nya alai, Nabot ke tetap ati deka ngasaika berekat, lebuh iya enggau bala anak iya ulih diau ba dunya paradais ke bibas ari pengawa ke enda lurus belama iya.—Masmur 37:34.

^ per. 3 Peda artikel “Imitate Their Faith” ba Watchtower kena 1 Februari 2014.

^ per. 8 Peda Pelajar 11 ba bup Nama Utai ti Bendar Diajar Bup Kudus? ke dikeluarka Saksi-Saksi Jehovah.