Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 TOPIK RANDAU | BAKA NI MUTARKA PENGIRAU

Pengirau Pasal Pengelikun

Pengirau Pasal Pengelikun

“Lebuh aku ninga sirin bemunyi, ati aku balat keketap. Aku ngiga endur belalai,” ku Alona. “Taja pan aku udah belalai, aku agi irau. Aku balat agi irau enti ba luar laban nadai endur belalai. Bisi sekali maya aku benung ba jalai, aku nyabak sereta enda ulih enseput. Bejam-jam endur aku nenangka diri. Udah nya sirin bemunyi baru.”

Alona

Ukai semina perang aja ulih ngenusahka kitai. Chunto, enti nuan tauka orang ti dikesayauka nuan ditemu bisi kena penyakit ke ulih munuh, tu ulih ngasuh nuan balat irau. Bisi mega orang irau pasal utai ti deka nyadi jemah ila. Sida irau, ‘Kati bala anak kitai, tauka bala anak sida patut diau ba dunya ke bisi perang, penyai, kamah, gaya hari ke berubah sereta penyakit berampit?’ Baka ni kitai ulih mutarka pengirau tu?

Laban nemu utai jai nyadi, “orang ke mereti deka meda penusah datai, lalu nyeliahka penusah nya.” (Jaku Dalam 27:12) Lalu baka kitai ke deka nyaga pengerai diri, kitai patut ngiga chara kena nyaga runding enggau asai ati. Pemerindang ke jai sereta berita ke ngayanka gambar ti ngenakutka ulih nambahka pengirau kitai enggau anak kitai. Nyeliahka utai ke jai tu, ukai reti utai tu nadai nyadi. Runding kitai ukai digaga Petara ngambika mikirka utai ti jai. Tang, kitai patut ngisi runding kitai enggau “utai ti bendar, . . . ti lurus, ti tuchi, ti badas.” Enti kitai ngereja tu, ‘Petara ti meri pemaik’  deka meri kitai pemaik ba runding enggau ati.—Pilipi 4:8, 9.

KEBUAH SAMPI BEGUNA

Pengarap ti teguh nulung kitai mutarka pengirau. Bup Kudus meransang kitai “besampi.” (1 Peter 4:7) Kitai ulih minta tulung, penemu sereta pemerani ari Petara kena mutarka pengirau enggau chara ti pemadu manah. Kitai pechaya “Iya ningaka kitai genap kali kitai minta sebarang utai ari Iya.”—1 John 5:15.

Enggau laki iya, Avi

Bup Kudus madahka, Sitan ke “merintah dunya tu” lalu “semua dunya di baruh kuasa Sitan.” (John 12:31; 1 John 5:19) Nya alai, Jesus ukai semina bejaku aja lebuh iya ngajar kitai besampi: “Lepaska kami ari penyai.” (Matthew 6:13) “Tiap kali sirin bemunyi, aku minta Jehovah nulung aku nyaga ati,” ku Alona. “Pia mega, laki aku telefon ngagai aku, lalu besampi enggau aku. Sampi amat ulih nulung.” Baka ke dipadah Bup Kudus: “Iya [Jehovah] diau semak sida ke ngangauka Iya, ke ngangauka Iya enggau ati ti bendar.”—Masmur 145:18.

PELUANG KITAI KE JEMAH ILA

Ari jaku Ajar ba Atas Bukit, Jesus ngajar bala murid iya besampi: “Datai meh Perintah Nuan.” (Matthew 6:10) Perintah Petara deka muai semua pengirau ke ngemediska kitai belama iya. Ngena Jesus, “Raja Pemaik,” Petara deka ngasuh “perang badu agi nyadi di serata dunya.” (Isaiah 9:6; Masmur 46:9) “Iya [Petara] deka ngatur laya entara semua bansa, . . . Semua bansa enda agi beperang, lalu nadai agi nyendiaka diri beperang. . . . Nadai agi orang deka ngemba sida.” (Mikah 4:3, 4) Diri sebilik ke lantang “ngaga rumah lalu diau dia. Rumah nya enda diuan orang bukai. Sida deka bekebun anggur lalu ngelantangka diri ngirup wain.” (Isaiah 65:21) “Nadai orang ke diau dalam menua kitai deka mutap madahka diri sakit.”—Isaiah 33:24.

Kemaya hari tu, taja pan bejimat kekadang “utai ti jai endang tau nyadi” tauka enda ulih diseliahka, laban kitai ba endur enggau jam ti salah. (Pengajar 9:11) Beratus taun perang, penyai enggau penyakit agi mengkang munuh orang ke manah. Nama peluang ngagai orang ke nyadi mansa tu?

Bejuta-juta iku orang ke udah mati nya deka diidupka Petara baru. Ke diatu sida agi dalam kubur, lalu mengkang dalam pengingat Petara, nganti maya endur ‘semua orang ke udah mati deka . . . pansut ari kubur.’ (John 5:28, 29) Pasal pengangkat ari mati, Bup Kudus madahka kitai: “Pengadang kitai nya nyadika sauh ti tegap ke semengat kitai.” (Hebrew 6:19) Lalu Petara “udah ngasuh semua mensia nemu utai nya deka nyadi, lebuh Iya ngangkatka [Jesus] ari mati!”—Kereja Rasul 17:31.

Ke diatu, orang ke ngerinduka ati Petara mega agi ngasaika pengirau. Paul, Janet, enggau Alona ulih mujur mutarka pengirau ketegal sida nitihka chara ke ulih dikena, semak ngagai Petara nengah sampi, sereta bisi pengarap ba peluang ke jemah ila ari Bup Kudus. Sama baka sida tiga, ‘awakka Petara, ti pun pengadang, ngemenuhka kita enggau semua pengaga enggau pemaik ketegal pengarap kita.’—Rome 15:13.