Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  Julai 2015

Tu Endur Alai Kitai Nyembah Petara

Tu Endur Alai Kitai Nyembah Petara

‘Pengangkun aku ke rumah Nuan, deka mau baka api dalam ati aku.’—JHN. 2:17.

LAGU: 127, 118

1, 2. (a) Kelia, dini endur nembiak Jehovah nyembah Iya? (b) Baka ni asai ati Jesus pasal Rumah Sembiang Jehovah ke ba Jerusalem? (c) Nama deka dikerandauka kitai ba pelajar tu?

NEMBIAK Petara kelia enggau kemaya hari tu, bisi endur alai sida nyembah Petara. Chunto, lebuh Abel meri pemeri ngagai Jehovah, iya engka bisi ngaga siti alta. (P-kal. 4:3, 4) Noah, Abraham, Isak, Jakop enggau Moses mega ngaga alta. (P-kal. 8:20; 12:7; 26:25; 35:1; P-sut. 17:15) Jehovah ngasuh orang Israel ngaga Langkau Kain. (P-sut. 25:8) Udah nya, Iya ngasuh sida nirika Rumah Sembiang. (1 Raj. 8:27, 29) Pengudah nembiak Petara pansut ari menua Babilon, sida begempuru enggau tetap ba balai gempuru. (Mrk. 6:2; Jhn. 18:20; SKR. 15:21) Lalu, orang Kristian keterubah begempuru ba rumah. (SKR. 12:12; 1 Kor. 16:19) Kemaya hari tu, nembiak Jehovah ba serata dunya begempuru ba lebih ari seratus ribu Palan Gempuru, endur alai sida belajar pasal Jehovah sereta nyembah Iya.

2 Jesus balat bebasaka Rumah Sembiang Jehovah ke ba Jerusalem. Pengerindu Jesus ke Rumah Sembiang nya ngingatka bala murid iya pasal jaku pemasmur: “Pengangkun aku ke Rumah  Nuan mau baka api.” (Mas. 69:9; Jhn. 2:17) Palan Gempuru enda sebaka enggau “Rumah Sembiang” ke bisi ba Jerusalem. (2 Ban. 5:13; 33:4) Tang, kitai patut bebasaka endur alai kitai nyembah Petara. Ba pelajar tu, kitai deka berandauka ajar Bup Kudus pasal baka ni gaya ulah kitai lebuh kitai ba Palan Gempuru, baka ni kitai patut nyaga sereta meri pemeri kena ngintu Palan Gempuru. *—Peda nota kaki.

KITAI NGAYANKA BASA NGAGAI GEMPURU KITAI

3-5. Nama reti Palan Gempuru, lalu baka ni asai ati kitai pasal gempuru?

3 Palan Gempuru nya endur alai orang begempuru nyembah Jehovah. Gempuru nya pemeri ari Petara. Gempuru nulung kitai ngeringka kaul enggau Iya. Ba gempuru, gerempung Iya meri kitai peransang enggau iring ke diguna kitai. Endang basa ti besai dibai Jehovah enggau Anak Iya makai ba ‘mija Jehovah’ ninting minggu. (1 Kor. 10:21) Kitai patut ingat, tu utai ti amat manah.

4 Jehovah enggau terang madahka kitai, Iya deka kitai datai gempuru nyembah Iya sereta meransang pangan diri. (Bacha Hebrew 10:24, 25.) Ketegal kitai bebasaka Jehovah, kitai deka tetap datai gempuru enti nadai penanggul besai ngachau. Kitai ngayanka diri beterima kasih ke gempuru kitai, lebuh kitai besedia sereta deka ngambi begian ba gempuru nya.—Mas. 22:22.

5 Ulah kitai ba gempuru enggau chara kitai nyaga Palan Gempuru nunjukka pemesai basa kitai ngagai Jehovah. Kitai deka ulah kitai meri puji ngagai nama Jehovah, ke selalu ayan ba papan tanda Palan Gempuru.—Banding 1 Raja 8:17.

6. Nama dipadah orang pasal Palan Gempuru kitai enggau orang ke ba gempuru? (Peda gambar ba pun pelajar.)

6 Orang bukai beratika kitai, enti kitai ngayanka basa ngagai Palan Gempuru. Chunto, seiku lelaki ari menua Turki madahka: “Pemeresi enggau atur ti manah ke dipeda aku ba Palan Gempuru ngerinduka ati aku. Orang ke dia begari manah, selalu tuchum sereta nerima aku enggau manah. Tu balat ngerinduka ati aku.” Lelaki nya berengkah datai semua gempuru, lalu enda lama udah nya dibaptisa. Ba siti nengeri di menua Indonesia, bala menyadi Kristian mai orang ke diau berimbai enggau sida, datuk bandar, enggau bala pegawai ke bukai datai meda Palan Gempuru baru sida. Datuk bandar nya rindu ati meda pemanah begunan, pelan enggau taman. Ku iya: “Pemeresi palan nya nunjukka kita bisi pengarap ba Petara.”

Ulah kitai ulih nunjukka kitai enda bebasaka Petara (Peda genteran 7, 8)

7, 8. Baka ni kitai ngayanka diri bebasaka Jehovah lebuh kitai ba Palan Gempuru?

7 Jehovah ke mai kitai datai gempuru, lalu Iya beberatka ulah sereta chara kitai begari. Nya alai, ulah sereta chara kitai begari enda tau kelalu. Kitai enda tau kelalu terit tauka formal. Lalu kitai mega enda tau kelalu enda nyaga ulah tauka chara begari. Endang amat, Jehovah deka kitai enggau orang ke dibai kitai ngagai Palan Gempuru berasai lantang ba dia. Kitai patut ngayanka diri bebasaka gempuru. Nya kebuah kitai ngena gari ti kemas tauka betempat. Kitai enda bemesej, berandau, tauka makai enggau ngirup maya begempuru. Lalu apai indai patut ngajar anak sida ngambika enda belanda tauka bemain dalam Palan Gempuru.—P-jar. 3:1.

8 Lebuh Jesus meda orang bejual dalam  Rumah Sembiang Petara, iya ringat lalu muru semua sida. (Jhn. 2:13-17) Ba Palan Gempuru, kitai nyembah sereta belajar pasal Jehovah. Nya alai, kitai enda patut bedagang lebuh kitai dia.—Banding Nehemiah 13:7, 8.

KITAI NULUNG NIRIKA PALAN GEMPURU

9, 10. (a) Baka ni nembiak Jehovah nirika Palan Gempuru, lalu nama asil iya? (b) Baka ni gerempung Jehovah nulung gempuru ke enda chukup duit kena nirika Palan Gempuru sida empu?

9 Ba serata dunya, nembiak Jehovah bebendar gawa nirika Palan Gempuru. Sida ngaga pelan, nirika sereta ngaduka baru Palan Gempuru enggau sukarela. Asil iya, dalam 15 taun ti udah, kitai udah nirika lebih ari 28,000 buah Palan Gempuru ti manah ba serata dunya, tauka kira-kira 5 buah Palan Gempuru ninting hari.

10 Gerempung Jehovah ngatur bala sukarela sereta ngena duit pemeri kena nirika Palan Gempuru ba endur ti begunaka iya. Kitai nitihka ajar Bup Kudus ke madahka orang ke bisi mayuh agi utai patut nulung orang ke kurang agi utai. (Bacha 2 Korint 8:13-15.) Nama asil iya? Mayuh Palan Gempuru udah didirika ke gempuru ti enda chukup duit kena nirika Palan Gempuru.

11. Nama dipadahka sekeda bala menyadi Kristian pasal Palan Gempuru sida ke baru, lalu baka ni asai ati nuan?

11 Bala menyadi Kristian ari siti gempuru ba menua Costa Rica nulis: “Lebuh kami bediri ba mua Palan Gempuru, kami asaika bemimpi! Tusah deka pechaya. Palan Gempuru kami ti manah udah tembu digaga dalam timpuh lapan hari aja! Tu ulih nyadi ketegal berekat ari Jehovah, atur ke digaga gerempung Iya, sereta sukung ari bala menyadi Kristian. Palan Gempuru tu pemeri ti berega ari Jehovah ke kami. Kami balat gaga ati.” Endang amat, kitai gaga ati ninga bala menyadi Kristian beterima kasih ngagai Jehovah pasal utai ti udah diberi Iya ke sida. Lalu kitai gaga ati laban bala menyadi Kristian ba serata dunya bisi Palan Gempuru kediri empu. Kitai nemu pengawa nirika Palan Gempuru tu endang berekat ari Jehovah, laban pengudah iya didirika, mayuh agi orang berengkah datai gempuru ngambika belajar pasal Jehovah.—Mas. 127:1.

12. Baka ni nuan ulih nulung nirika Palan Gempuru?

12 Baka ni nuan ulih nulung nirika Palan Gempuru? Nuan engka ulih enggau pengawa sukarela tu. Lalu semua kitai ulih meri duit pemeri kena nirika Palan Gempuru. Enti kitai nyukung pengawa tu enggau naka ulih, kitai ngasaika pengaga ati lebuh meri, lalu kelebih agi, kitai meri puji ngagai Jehovah. Kitai nitihka teladan nembiak Petara maya jeman Bup Kudus ke keran deka nulung nirika endur alai sida nyembah Petara.—P-sut. 25:2; 2 Kor. 9:7.

 KITAI NYAGA PEMERESI PALAN GEMPURU

13, 14. Nama dipelajarka kitai ari Bup Kudus ke nunjukka kitai patut nyaga Palan Gempuru beresi sereta kemas?

13 Jehovah nya Petara ti beresi sereta kudus. Iya Petara ti teratur. Nya alai, Palan Gempuru kitai patut beresi sereta kemas. (Bacha 1 Korint 14:33, 40.) Lalu, ngambika beresi sereta kudus baka Jehovah, kitai ukai semina nyaga pemeresi sembah, runding sereta ulah kitai, tang mega pemeresi tubuh kitai.—Pem. 19:8.

14 Enti kitai nyaga Palan Gempuru kitai beresi sereta kemas, kitai temegah mai orang datai gempuru. Lalu, orang ulih meda kitai idup sejalai enggau utai ti dipadah kitai pasal dunya baru ti beresi. Sida ulih meda kitai nyembah Petara ti beresi sereta kudus, ke deka ngubah dunya nyadi paradais ti manah.—Isa. 6:1-3; Pem. 11:18.

15, 16. (a) Nama kebuah enda senang nyaga pemeresi Palan Gempuru? Nama kebuah kitai patut nyaga pemeresi iya? (b) Baka ni pengawa meresi Palan Gempuru kitai diatur, lalu nama ulih digaga tiap iku kitai?

15 Orang bisi runding ti bebida pasal chara nyaga pemeresi. Nama kebuah? Laban tiap iku orang dibesaika enggau chara ti enda sama. Bisi mega diau ba endur ti bedebu tauka ba endur jalai ke kamah sereta luchak. Sida ke bukai enda chukup ai tauka utai kena nuchi. Tang, enda ngira dini endur kitai diau tauka baka ni gaya runding orang pasal pemeresi, kitai patut nyaga Palan Gempuru kitai ngambika beresi sereta kemas. Nya endur alai kitai nyembah Jehovah.—U-dat. 23:14.

16 Enti kitai deka Palan Gempuru kitai beresi enggau naka ulih, kitai patut teratur. Tuai gempuru ngaga jadual kena meresi Palan Gempuru, lalu nentuka utai enggau perengka kena nuchi semampai  bisi. Tuai gempuru mega ngatur pengawa ngambika pengawa meresi dikereja. Sekeda utai patut diberesi pengudah tiap kali gempuru, tang iya ke bukai enda suah diberesi. Semua kitai ulih enggau meresi Palan Gempuru kitai.

KITAI NGINTU PALAN GEMPURU

17, 18. (a) Nama ulih dipelajarka kitai ari chara nembiak Jehovah kelia ngintu Rumah Sembiang? (b) Nama kebuah kitai patut ngintu Palan Gempuru?

17 Kitai mega nentuka Palan Gempuru kitai diintu manah. Enti bisi jai kitai ngaduka iya. Nembiak Jehovah kelia mega ngereja pengawa ti sama. Chunto, maya Raja Joas ari menua Judah merintah, rayat meri duit ngagai Rumah Sembiang. Raja nya ngasuh bala imam ngena duit nya ngaduka utai ti patut diadu ba Rumah Sembiang. (2 Raj. 12:4, 5) Lebih 200 taun udah nya, Raja Josiah mega ngena duit pemeri ba Rumah Sembiang kena ngaduka rumah nya.—Bacha 2 Bansa Israel 34:9-11.

18 Sekeda Komiti Pampang Opis beratika orang ba menua sida enda teleba ngintu begunan tauka perengka enggau manah. Tu engka ketegal mimit aja orang ba menua sida ke nemu ngintu utai tu. Tauka sida engka enda chukup duit kena ngaduka utai tu. Tang enti kitai enda ngaduka Palan Gempuru ba maya ti patut, Palan Gempuru enda manah dipeda. Tu ngasuh orang ke beratika iya bisi runding ti enda manah pasal kitai. Tang, enti semua kitai enggau naka ulih ngintu Palan Gempuru, kitai meri puji ngagai Jehovah sereta enda masau duit pemeri ke diberi bala menyadi Kristian kitai.

Kitai patut nyaga pemeresi sereta ngintu Palan Gempuru kitai enggau manah (Peda genteran 16, 18)

19. Nama deka digaga nuan kena ngayanka basa ngagai endur alai nuan nyembah Jehovah?

19 Palan Gempuru diserahka ngagai Jehovah. Iya ukai diempu sapa-sapa tauka gempuru. Baka ke dikerandauka kitai ba pelajar tu, ajar Bup Kudus deka nulung kitai bisi runding ti betul ngagai endur alai kitai nyembah Petara. Laban kitai bebasaka Jehovah, kitai ngayanka basa ngagai gempuru kitai sereta Palan Gempuru. Kitai gaga ati ulih meri duit pemeri dikena nirika Palan Gempuru, lalu kitai bebendar nyaga pemeresi sereta ngintu Palan Gempuru. Baka Jesus, kitai ngayanka pengeransing sereta basa ngagai endur alai kitai nyembah Jehovah.—Jhn. 2:17.

^ per. 2 Pelajar tu pasal Palan Gempuru. Tang, utai ti dikerandauka kitai tu mega ulih dikena ba Palan Gempuru Besai sereta endur bukai ke dikena nyembah Jehovah.