Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  Jun 2015

 TOPIK RANDAU | KATI SAINS UDAH NGANTI BUP KUDUS?

Sains Bisi Pengurang

Sains Bisi Pengurang

Baru-baru tu, sekeda bup ke nerangka penemu baru ari orang ke enda arapka Petara bisi dikeluarka. Tu narit ati mayuh orang, lalu ngasuh mayuh orang berandau sereta bejuraika penemu dalam bup nya. Pasal tu, seiku saintis ke landik pasal urat pengasai, David Eagleman, nulis: “Sekeda pemacha ngumbai bala saintis nemu semua utai.” Iya mega nulis: “Tang sains ke manah selalu ulih nerima semua penemu, lalu pengawa sida nyengkaum pansik ke baru sereta ke enda disadang.”

Kenyau ari kelia, bala saintis ke landik endang bisi mujur ngaga pansik pasal utai ba dunya. Taja pia, sekeda saintis mega bisi ngaga penyalah ti besai ba pansik sida. Isaac Newton seiku ari saintis ti pemadu tebilang. Iya nunjukka baka ni kuasa graviti ngempungka planet, bintang, enggau galaksi nyadi siti dunya raya. Iya mega ngepunka calculus, siti chara ngitung ke dikena ba fizik nuklear, ba pengawa ngaga komputer, sereta ngitung pejalai siti-siti utai ba langit luar. Taja pia, Newton mega belajarka alchemy, penemu ke enda entu bekaul enggau sains. Penemu tu ngena astrologi enggau formula majik kena nukar besi nyadi emas.

Lebih ari 1,500 taun sebedau Newton, seiku astronomi bansa Gerika ke benama Ptolemy, meratika langit ngena mata iya aja. Iya mansik planet maya malam hari sereta landik ngaga peta. Tang, iya pechaya bumi ba tengah-tengah semua utai. Seiku saintis astrofizik ke benama Carl Sagan, nulis pasal Ptolemy: “Penemu iya ke madahka bumi ba tengah-tengah dunya raya, ke udah diterima kira-kira 1,500 taun, nunjukka orang ke pintar pan ulih salah.”

Bala saintis kemaya hari tu napi penanggul ti sama. Kati sida ulih tetemuka penerang ti silik pasal dunya raya? Taja pan sains amat udah ngaga mayuh pemansang, sereta mai mayuh penguntung ke kitai, tang kitai mega patut ingat iya bisi pengurang. Saintis fizik, Paul Davies beratika: “Sigi enda ulih bulih penerang ke ulih diterima sereta sejalai, pasal semua utai ba dunya raya tu.” Jaku tu nyukung pemendar: Mensia enda ulih nemu semua utai ba dunya. Nyema bisi jaku ke ngumbai sains ulih meri penerang ngagai semua utai ke bisi ba dunya, manah agi anang guai pechayaka jaku nya.

Bup Kudus nyediaka utai ti diguna kitai, tang sains enda ulih

Bup Kudus madah pasal pemanah utai ke bisi ba dunya: “Tang tu semina nunjukka mimit aja pemesai kuasa Iya, semina jaku telai ti udah didinga kitai.” (Jop 26:14) Agi mayuh utai ke enda ulih ditemu mensia. Endang amat, jaku Paul ke ditulis kira-kira 2,000 taun ti udah, agi betul: ‘Naka meh pemesai pengaya Petara! Naka meh pemintar enggau penalam penemu Iya! Nadai orang tetemuka atur enggau jalai Iya!’—Rome 11:33.