Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  Jun 2015

Kristus—Kuasa Petara

Kristus—Kuasa Petara

‘Kristus nya kuasa . . . Petara.’—1 KOR. 1:24.

1. Nama kebuah Paul nyebut Kristus nya kuasa Petara?

JEHOVAH ngayanka kuasa Iya nengah Jesus Kristus ngena chara ti ngalitka ati. Lebuh Jesus ba dunya, iya ngaga kereja ajih. Kitai ulih macha sekeda ari kereja ajih iya ba Bup Kudus, lalu tu ulih neguhka pengarap kitai. (Mat. 9:35; Luk. 9:11) Amat, Jehovah meri Jesus kuasa ti besai, nya alai rasul Paul ulih nyebut: ‘Kristus nya kuasa . . . Petara.’ (1 Kor. 1:24) Tang, baka ni kereja ajih Jesus bekaul enggau kitai?

2. Nama ulih dipelajarka kitai ari kereja ajih Jesus?

2 Rasul Peter madahka Jesus ngaga “kereja ajih.” (SKR. 2:22) Nama dipelajarka kitai ari kereja ajih tu? Kereja ajih tu ngajar kitai pasal utai ke deka digaga Jesus, lebuh iya Merintah Seribu Taun. Maya nya, iya deka ngaga kereja ajih ke besai agi ngambika meri penguntung ngagai semua mensia ba dunya. Kereja ajih iya mega nulung kitai nemu mayuh agi pasal pemanah iya enggau Apai iya. Ba pelajar tu, kitai deka belajarka tiga iti kereja ajih ti digaga Jesus. Kitai mega deka belajarka baka ni kereja ajih nya bekaul enggau kitai kemaya hari tu sereta ke jemah ila.

 KEREJA AJIH KE NGAJAR PASAL GERAH JARI

3. (a) Nama kebuah Jesus ngaga kereja ajih iya ti keterubah? (b) Baka ni Jesus ngayanka diri gerah jari ba menua Kana?

3 Jesus ngaga kereja ajih iya ti keterubah maya pengerami kawin ba menua Kana. Kitai enda nemu kebuah iya, tang maya nya enda chukup wain ke bala orang ke datai. Tu ulih ngemaluka orang ke baru kawin, laban sida betanggungjawap ke orang ke datai. Maria, indai Jesus, nya seiku ari bala ke datai. Kati iya ngasuh Jesus nulung laban iya pechaya Jesus bisi kuasa kena ngaga kereja ajih? Pia mega, Maria tentu udah beratika semua utai ke dipadah bala nabi pasal anak iya, lalu iya nemu anak iya deka dikumbai ‘Anak Petara ti Pemadu Tinggi.’ (Luk. 1:30-32; 2:52) Iya ke bendar, Maria enggau Jesus sama deka nulung orang ke baru kawin nya. Nya alai, Jesus ngubah kira-kira 380 liter (100 gilin) ai nyadi “wain ti nyamai.” (Bacha John 2:3, 6-11.) Kati Jesus semadi deka ngaga kereja ajih tu? Enda. Iya ngereja nya laban iya ibuhka orang, sereta neladan Apai iya ke gerah jari.

4, 5. (a) Nama ulih dipelajarka kitai ari kereja ajih Jesus ti keterubah? (b) Nama ulih dipelajarka kitai pasal jemah ila ari kereja ajih ba menua Kana?

4 Jesus nyediaka mayuh wain ti nyamai ngena kereja ajih. Wain nya chukup ke bala mayuh. Nama ulih dipelajarka kitai ari kereja ajih nya? Jehovah enggau Jesus enda ngenyadi, tang sama bela gerah jari. Kereja ajih tu ngasuh kitai nemu seduai iya balat ibuhka asai ati orang. Tu mega nunjukka Jehovah deka ngena kuasa Iya nyediaka mayuh pemakai, enda ngira dini alai kitai diau ba dunya baru jemah ila.—Bacha Isaiah 25:6.

5 Pikirka! Enda lama da agi Jehovah deka meri kitai semua utai ke patut diguna kitai. Tiap iku orang deka bisi rumah enggau pemakai ke manah. Kitai beterima kasih ke Jehovah lebuh kitai berundingka semua utai manah ke deka diberi Iya ngagai kitai ba dunya Paradais.

Kitai neladan Jesus ke gerah jari enti kitai meri awak (Peda genteran 6)

6. Baka ni Jesus selalu ngena kuasa iya, lalu baka ni kitai ulih neladan iya?

6 Jesus enda kala ngena kuasa iya ke penguntung diri empu. Pikirka nama nyadi lebuh Sitan ngasuh Jesus ngubah batu nyadi roti. Jesus enggai ngena kuasa iya ke penguntung diri empu. (Mat. 4:2-4) Tang, Jesus deka ngena kuasa iya nulung orang bukai. Baka ni kitai ulih neladan ulah iya ke enda ngira diri empu? Jesus madahka kitai patut ‘meri.’ (Luk. 6:38) Kitai ulih ngereja tu enggau mai orang makai ba rumah kitai. Kitai mega ulih meri awak nulung orang, baka ningaka menyadi Kristian lelaki belatih meri ceramah pengudah gempuru. Tauka kitai engka ulih meri  tulung sereta matih orang bukai ba pengawa nginjil. Kitai neladan Jesus ke gerah jari maya kitai keran deka nulung orang bukai enti kitai ulih.

“SEMUA ORANG BELA MAKAI LALU KENYANG MAGANG”

7. Nama penusah ke seruran bisi ba dunya Sitan?

7 Penyuntuk ukai utai ti baru. Jehovah madahka orang Israel, “orang ke suntuk endang seruran bisi di dunya tu.” (U-dat. 15:11) Beratus taun udah nya, Jesus madahka: “Kita deka seruran bisi orang ke seranta begulai enggau kita.” (Mat. 26:11) Kati Jesus ngumbai orang ke seranta seruran deka bisi ba dunya tu? Enda, iya madahka penyuntuk seruran bisi seagi-agi kitai diau ba dunya Sitan. Tang, ba dunya baru semua tu deka berubah. Maya nya, nadai agi penyuntuk. Semua orang deka bisi mayuh pemakai, lalu dipuaska!

8, 9. (a) Nama kebuah Jesus meri pemakai ngagai beribu iku orang? (b) Baka ni asai ati nuan pasal kereja ajih tu?

8 Pemasmur madah pasal Jehovah: “Nuan meri sida chukup utai datai ke semua utai ti idup nadai suntuk utai.” (Mas. 145:16) Lebuh Jesus ba dunya, iya neladan Apai iya enggau manah sereta suah ibuhka utai ti diguna orang bukai. Iya enda ngereja tu ketegal deka nunjukka diri bisi kuasa. Jesus endang amat ibuhka orang. Aram kitai berandauka Matthew 14:14-21. (Bacha.) Orang mayuh udah bedarat nitihka Jesus ari nengeri sida empu. (Mat. 14:13) Lebuh hari nyau lemai, bala murid Jesus irau ati enggai ke orang lemi sereta lapar. Nya alai, sida minta Jesus ngasuh orang nya meli pemakai ke sida empu. Nama deka digaga Jesus?

9 Ngena lima iti tuku roti enggau dua iku ikan, Jesus meri pemakai ngagai kira-kira 5,000 iku lelaki, enda nyengkaum sida ke indu enggau anak mit. Nama kebuah Jesus ngaga kereja ajih tu? Laban iya amat rindu sereta ibuhka orang. Lalu Jesus tentu udah nyediaka mayuh pemakai, laban orang mayuh “bela makai lalu kenyang magang.” Pemakai ke diempa sida deka meri sida pengering kena mulaika diri ngagai rumah sida ke jauh. (Luk. 9:10-17) Lalu, pengudah semua orang kenyang, bala murid ngumpul 12 bakul penuh teda pemakai nya!

10. Jemah ila, nama deka nyadi ngagai penyuntuk?

10 Ketegal bala pemerintah ke amu sereta enda lurus, beratus juta iku orang idup suntuk. Indah sekeda bala menyadi Kristian kitai pan enda chukup pemakai. Tang enda lama da agi, orang ke ngasika Jehovah deka idup ba dunya ti penuh enggau pengelurus sereta nadai agi penyuntuk. Jehovah nya Petara ti Pemadu Tinggi, lalu Iya bisi kuasa sereta pengeran deka meri utai ti patut diguna semua orang. Iya besemaya deka muai pemerinsa enda lama da agi!—Bacha Masmur 72:16.

11. Nama kebuah kitai tau arap enda lama da agi Kristus deka ngena kuasa iya ba serata dunya, lalu nama deka digaga kitai?

11 Lebuh Jesus ba dunya, iya ngaga kereja ajih ba kandang endur ke mit aja pengelama tiga taun setengah. (Mat. 15:24) Tang lebuh nyadi Raja, Jesus deka nulung semua mensia maya iya Merintah Seribu Taun. (Mas. 72:8) Kereja ajih Jesus ngasuh kitai arap iya deka ngena kuasa iya ke penguntung  kitai. Kitai nadai kuasa kena ngaga kereja ajih. Tang, nama ulih digaga kitai? Kitai ulih ngena awak enggau pengering kitai madahka orang bukai pasal semaya ti amat manah ke jemah ila ari Bup Kudus. Tu endang tanggungjawap kitai ke nyadi Saksi-Saksi Jehovah. (Rom. 1:14, 15) Lebuh kitai berundingka enggau dalam utai ke deka dikereja Kristus enda lama da agi, kitai deka keran agi madahka orang bukai pasal semaya nya.—Mas. 45:1; 49:3.

JEHOVAH ENGGAU JESUS ULIH NAGANG KUASA ALAM

12. Nama kebuah kitai tau arap Jesus nemu pasal gaya dunya tu enggau silik?

12 Lebuh Petara ngaga dunya enggau semua utai ke ba dunya, Jesus bisi ngimbai Iya nyadi tukang ke landik. (J-lam. 8:22, 30, 31; Kol. 1:15-17) Nya alai, Jesus nemu enggau silik pasal gaya dunya tu. Iya nemu baka ni ngena sereta nagang semua kuasa alam.

Nama ngasuh nuan rindu ati pasal chara Jesus ke ngena kuasa iya ngaga kereja ajih? (Peda genteran 13, 14)

13, 14. Beri siti chunto baka ni Kristus ulih nagang kuasa alam.

13 Lebuh Jesus ba dunya, iya nunjukka iya bisi kuasa ari Petara lebuh iya ulih nagang kuasa alam. Chunto, pikirka baka ni Jesus neduhka kabut. (Bacha Mark 4:37-39.) Seiku orang ke landik pasal Bup Kudus nerangka leka jaku “kabut” dalam jaku Gerika ke bisi ba bup Mark dikena nerangka kabut besai tauka ribut puting beliung. Tu nerangka kabut ke disereta enggau mua hari ti petang, ribut ti balat, guntur, enggau ujan ti bangat. Pengudah kabut teduh, semua utai balat ngachir. Rasul Matthew ngumbai kabut tu “kabut besai.”—Mat. 8:24, NW.

14 Uji gambarka utai ke nyadi tu: Gelumbang mangka ngagai perau, lalu ai enda ngetu-ngetu tama perau. Taja pan kabut nya inggar sereta perau enda ngetu lingguk-lingguk, tang Jesus tinduk laban iya kelalu lelak. Bala murid iya takut. Nya alai sida ngerak Jesus. Ku sida: “Mati kitai tu!” (Mat. 8:25) Nama digaga Jesus? Iya angkat lalu ngerara ribut, lalu bejaku ngagai gelumbang: “Teduh! Diau jenuh!” (Mrk. 4:39) Kabut besai nya teduh, lalu “ai nadai agi beumbak.” Naka meh pemesai kuasa Jesus ke ulih nagang kuasa alam!

15. Baka ni Jehovah udah nunjukka Iya ulih nagang kuasa alam?

15 Kuasa Kristus datai ari Jehovah. Nya alai, kitai nemu Petara ti Pemadu Tinggi ulih nagang kuasa alam. Chunto, sebedau Bah Besai, ku Jehovah: “Tujuh hari da agi, Aku deka ngasuh hari ujan 40 hari, 40 malam.” (P-kal. 7:4) Pia mega ba Pemansut 14:21, kitai macha: ‘Jehovah muputka ai tasik nya ngena ribut ti deras ari timur.’ Lalu ba Jonah 1:4, kitai macha: ‘Jehovah ngasuh biaubalai mangka ba tasik nya, lalu kabut balat amat nyadi datai ke kapal nya nyau deka pechah.’ Tang ba dunya baru, Jehovah seruran deka nagang kuasa alam.

16. Nama kebuah kitai ulih lantang ati laban nemu Jehovah enggau Jesus bisi kuasa kena nagang kuasa alam?

16 Kitai ulih lantang ati laban nemu Jehovah enggau Jesus bisi kuasa kena nagang kuasa alam. Lebuh Kristus Merintah Seribu Taun, semua orang ke diau ba dunya deka diau likun. Nadai seiku pan orang deka bakal tauka bebadi ketegal penusah ngenyit baka ribut taufan, tsunami, gunung berapi, tauka tanah berenyang. Kitai enda takut penusah ngenyit tu deka nyadi laban ‘Petara deka diau’ enggau mensia! (Pem. 21:3, 4) Kitai ulih pechaya Jehovah deka  meri Jesus kuasa kena nagang kuasa alam lebuh iya Merintah Seribu Taun.

NELADAN PETARA ENGGAU KRISTUS DIATU

17. Nama siti ari chara kitai ulih neladan Petara enggau Kristus diatu?

17 Endang amat, kitai enda ulih nagang penusah ngenyit ke datai ari kuasa alam. Semina Jehovah enggau Jesus ulih ngereja tu. Taja pia, bisi utai bukai ke ulih dikereja kitai. Kitai ulih nitihka jaku lalau ba Jaku Dalam 3:27. (Bacha.) Lebuh bala menyadi Kristian kitai merinsa, kitai ulih nyediaka utai ti diguna sida besehari-hari, ngeringka semangat sida, sereta meri sida jaku peransang. (J-lam. 17:17) Chunto, kitai engka ulih nulung sida pengudah penusah ngenyit ke datai ari kuasa alam. Seiku indu balu ke udah rusak rumah pengudah ribut puting beliung madahka: “Aku ngasaika diri amat beruntung laban udah enggau gerempung Jehovah. Aku ukai semina bulih tulung ba utai ti diguna besehari-hari, tang mega ba pengarap.” Seiku da agi menyadi Kristian indu ke bedau belaki ngasaika diri nadai daya lebuh kabut ngerusakka rumah iya. Pengudah bala menyadi Kristian nulung iya ngaduka rumah, iya madahka: “Tu enda ulih disebut ngena jaku! Aku enda ulih madahka baka ni asai ati diri.” Ku iya agi: “Terima kasih, Jehovah!” Kitai beterima kasih laban bala menyadi Kristian kitai amat ibuhka utai ti diguna pangan diri. Kelebih agi, kitai beterima kasih ngagai Jehovah enggau Jesus Kristus ke amat ibuhka kitai.

18. Nama ngasuh nuan rindu ati pasal kebuah Jesus ngaga kereja ajih?

18 Lebuh maya Jesus ngereja pengawa nginjil, iya nunjukka iya nya ‘kuasa . . . Petara.’ Taja pia, iya enda kala ngena kuasa iya kena minta diperatika orang bukai tauka ke penguntung diri empu. Tang, Jesus ngena kuasa ngaga kereja ajih laban iya amat rinduka orang. Kitai deka belajarka mayuh agi pasal utai tu, pengudah pelajar tu.