Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  Jun 2015

Idup Sejalai Enggau Chunto Sampi—Begian I

Idup Sejalai Enggau Chunto Sampi—Begian I

“Kudus meh nama Nuan.”—MAT. 6:9.

1. Lebuh kitai nginjil, baka ni kitai ngena sampi Jesus ke bisi ba Matthew 6:9-13?

MAYUH orang nemu leka sampi ke bisi ba Matthew 6:9-13. Lebuh kitai nginjil, kitai ngena leka sampi tu ngajar orang pasal Perintah Petara. Perintah tu nyata, lalu deka ngubah dunya nyadi paradais. Kitai mega ngena leka jaku “kudus meh nama Nuan” ke nunjukka Petara bisi nama, lalu kitai patut nguduska nama nya.—Mat. 6:9.

2. Baka ni kitai nemu Jesus enda ngasuh kitai ngulang leka jaku ti sama tiap kali kitai besampi?

2 Kati Jesus deka kitai ngulang leka jaku ke dikena iya tiap kali kitai besampi, baka ke digaga mayuh orang? Enda. Jesus kala madah: “Lebuh kita besampi, anang besebutka mayuh macham leka jaku ti nadai reti.” (Mat. 6:7) Ba maya bukai, lebuh iya ngajar bala murid besampi, iya nyebut sampi ti sama tang enda ngena leka jaku ke sama. (Luk. 11:1-4) Nya alai, Jesus meri kitai chunto sampi ke  ngajar kitai pasal utai ti patut disampika kitai.

3. Nama tanya ke patut ditanya nuan lebuh nuan belajarka chunto sampi nya?

3 Ba pelajar tu enggau pelajar ke pengudah tu, kitai deka belajarka pasal chunto sampi nya. Lebuh kitai belajar, tanya diri empu, ‘Baka ni sampi nya ulih nulung aku besampi enggau manah agi?’ Lalu keberat agi, ‘Kati aku idup sejalai enggau chunto sampi nya?’

“APAI KAMI TI DI SEREGA”

4. Nama dipelajarka kitai ari leka jaku “Apai kami,” lalu nama kebuah Jehovah nya Apai kitai?

4 Jesus ngepunka sampi enggau nyebut, “Apai Kami.” Tu ngingatka kitai Jehovah nya Apai ke semua bala menyadi Kristian kitai di serata dunya. (1 Pet. 2:17) Sida ke dipilih Jehovah diau ba serega udah diambu Iya nyadika anak, lalu Iya nyadi Apai sida enggau chara ti istimewa. (Rom. 8:15-17) Orang ke diau belama iya ba dunya mega ngumbai Iya “Apai.” Jehovah meri sida pengidup sereta nyediaka utai ti diguna sida enggau pengerindu. Sida deka dikumbai ‘bala anak Petara’ pengudah sida nyadi sempurna sereta meruan tetap ati ngagai Jehovah ba penguji ti penudi.—Rom. 8:21; Pem. 20:7, 8.

5, 6. Nama hadiah ti pemadu manah ke ulih diberi apai indai ngagai anak sida, lalu nama patut digaga tiap iku anak enggau hadiah tu? (Peda gambar ba pun pelajar.)

5 Apai indai meri anak sida hadiah enti sida nulung bala anak nemu Jehovah nya Apai sida ti di serega. Pia mega, enti sida ngajar bala anak sida besampi ngagai Jehovah. Seiku tuai ti ngabas ba menua Afrika Selatan madahka: “Kenyau ari anak kami ada, aku besampi enggau sida ninting malam. Aku semina enda ulih besampi enggau sida maya aku nadai ba rumah. Anak indu kami suah madahka sida enda entu ingatka leka sampi ke disebut aku. Tang, sida ulih ingatka gaya enggau pengudus besampi ngagai Apai kitai, Jehovah, sereta asai ati ke lantang enggau likun. Pengudah sida ulih besampi kediri, aku ngasuh sida besampi enggau inggar ngambika aku ulih ninga sida madahka runding enggau asai ati sida ngagai Jehovah. Tu peluang endur aku nemu utai ti bisi ba ati sida. Udah nya, aku ulih ngajar sida enggau manah ngambika sida nyengkaum utai ti beguna dalam chunto sampi, awakka sampi sida bisi reti.”

6 Anak indu iya terus semak ngagai Jehovah nyentuk ke sida besai. Diatu sida udah belaki sereta bekereja ke Jehovah aja enggau laki sida. Hadiah ti pemadu manah ke ulih diberi apai indai ngagai anak, iya nya ngajar anak sida Jehovah nya Petara ti nyata, lalu sida ulih nyadi kawan rapat Iya. Tang, tiap iku anak patut ngetanka kaul ti rapat enggau Jehovah.—Mas. 5:11, 12; 91:14.

“KUDUS MEH NAMA NUAN”

7. Nama basa ti dikembuan kitai, tang nama patut digaga kitai?

7 Kitai bulih basa ketegal nemu nama Petara sereta nyadi “nembiak Iya.” (SKR. 15:14; Isa. 43:10) Kitai  besampi, “Kudus meh nama Nuan,” ngambika nama Petara kudus. Kitai mega minta Jehovah nulung kitai nyeliahka pengawa tauka jaku ke enda bebasaka Iya. Kitai enda patut baka sekeda orang ba kurun keterubah ke enda ngereja utai ti diajar sida ngagai orang bukai. Paul nulis ngagai sida: ‘Nama Petara dikeleseka orang bansa bukai laban kita.’—Rom. 2:21-24.

8, 9. Beri siti chunto pasal chara Jehovah nulung orang ke deka nguduska nama Iya.

8 Kitai enggau naka ulih bebasaka nama Jehovah. Pengudah laki iya mati, seiku menyadi Kristian ke indu ba menua Norway idup kediri enggau seiku anak lelaki iya ke beumur dua taun. Iya madahka: “Nya maya ti balat tusah ba pengidup aku. Aku besampi nyauka ninting jam, tiap hari kena nulung aku berunding enggau betul ngambika aku enda meri peluang ngagai Sitan ngeleseka Jehovah, ketegal ngaga pemutus ti salah tauka enda tetap ati. Aku deka nguduska nama Jehovah, lalu aku mega deka anak aku betemu enggau apai iya baru ba Paradais.”—J-lam 27:11.

9 Kati Jehovah nyaut sampi iya? Ya. Ketegal selalu begulai enggau bala menyadi Kristian, iya bulih peransang. Lima taun udah nya, iya kawin enggau seiku tuai gempuru. Diatu, anak lelaki iya udah beumur 20 taun, lalu udah dibaptisa. Ku iya: “Aku balat gaga ati laban laki aku besaup enggau aku ngemesaika iya.”

10. Baka ni Petara deka nguduska nama Iya?

10 Jehovah deka nguduska nama Iya lebuh Iya muai semua orang ke enda bebasaka Iya sereta nulak Iya nyadi Pemerintah. (Bacha Esekiel 38:22, 23.) Maya nya, mensia deka nyadi sempurna, lalu semua orang ke ba serega enggau ke ba dunya deka nyembah Jehovah sereta bebasaka nama Iya ti kudus. Pengujung iya, Apai kitai ke bisi pengerindu deka “nyadi semua dalam semua.”—1 Kor. 15:28.

“DATAI MEH PERINTAH NUAN”

11, 12. Ba taun 1876, Jehovah nulung nembiak Iya nemu pasal nama?

11 Sebedau Jesus pulai ke serega, bala murid iya nanya: ‘Tuan, kati tu maya nuan deka mulaika Perintah ngagai orang Israel?’ Jesus nyaut nya ukai maya sida patut nemu kemaya Perintah Petara deka berengkah merintah. Iya ngasuh bala murid iya beberatka pengawa nginjil. (Bacha Kereja Rasul 1:6-8) Iya mega ngajar sida besampi minta Perintah Petara datai, lalu nganti maya Perintah nya datai. Nya kebuah kitai agi besampi minta Perintah Petara datai.

12 Lebuh maya Jesus deka merintah ba serega nyau semak, Jehovah nulung nembiak Iya nemu kemaya utai nya deka nyadi. Ba taun 1876, Charles Taze Russell nulis siti artikel “Gentile Times: When Do They End?” Iya nerangka “tujuh taun” ke bisi dipadah dalam bup Daniel sama enggau “timpuh orang bansa bukai” ke udah dipadah Jesus. Artikel tu nerangka timpuh nya deka abis ba taun 1914. * (Peda nota kaki.)—Dan. 4:16; Luk. 21:24.

13. Nama nyadi ba taun 1914, lalu nama ditunjukka utai ti nyadi ba dunya kenyau ari taun 1914?

 13 Ba taun 1914, perang berengkah ba Eropah, lalu enda lama udah nya nyadi di serata dunya. Ketegal perang tu, lapar pungkang balat nyadi. Lalu ba pengujung perang nya, kena taun 1918, penyakit renga ti raya udah munuh mayuh orang di serata dunya, mayuh agi ari orang ke mati ba perang. Semua utai tu siti ari “tanda” ke diberi Jesus. Tanda tu nunjukka Jesus nyadi Raja ba serega kena taun 1914. (Mat. 24:3-8; Luk. 21:10, 11) Ba taun nya, iya “pansut ari serega ngagai dunya, iya ke menang ke ingin deka menang suah agi.” (Pem. 6:2) Jesus muai Sitan enggau bala antu ari serega ke dunya. Udah nya, ayat tu deka dikeamatka: “Naka meh penusah tanah enggau tasik, laban Sitan udah nurun ngagai kita, balat pedis ati, laban iya nemu timpuh diri nyau deka abis.”—Pem. 12:7-12.

14. (a) Nama kebuah kitai agi besampi minta Perintah Petara datai? (b) Nama pengawa ti patut digaga kitai diatu?

14 Utai ti dipadah ba Pemandang bab 12, nulung kitai nemu kebuah utai jai berengkah balat nyadi ba dunya, lebuh Jesus berengkah nyadi Raja ba Perintah Petara. Jesus udah merintah di serega, tang Sitan agi merintah di dunya. Taja pia enda lama da agi, Jesus deka “menang suah agi”  enggau muai semua penyai ari dunya. Sebedau tu nyadi, kitai patut terus besampi minta Perintah Petara datai sereta terus kisuk enggau pengawa nginjil pasal Perintah nya. Pengawa kitai ngamatka utai ti dipadah Jesus: ‘Berita Manah pasal Perintah Petara deka ditusui di serata dunya, nyadika saksi ngagai semua bansa. Udah nya baru pengujung datai.’—Mat. 24:14.

“NYADI MEH PENEKA NUAN DI DUNYA”

15, 16. Kati nya chukup semina besampi ngambika peneka Petara nyadi ba dunya? Terangka.

15 Kira-kira 6,000 taun kelia, peneka Petara nyadi ba dunya. Nya kebuah Jehovah madahka semua utai “manah magang.” (P-kal. 1:31) Tang udah nya, Sitan ngelaban Petara. Kenyau ari nya, mayuh orang enda ngereja peneka Petara. Tang kemaya hari tu, kira-kira lapan juta iku orang nyembah Jehovah. Sida besampi ngambika peneka Petara nyadi ba dunya, lalu sida mega ngereja peneka Petara. Sida idup enggau chara ti ngerinduka ati Petara, lalu enggau ransing ngajar orang bukai pasal Perintah Iya.

Kati nuan ngajar anak nuan ngereja peneka Petara? (Peda genteran 16)

16 Chunto, seiku pengerintis seberai tasik ba Afrika, ke beumur 80 taun, sereta udah dibaptisa ba taun 1948 madahka: “Aku selalu besampi ngambika orang ke baka bedus ulih ditemu sereta ditulung ngambika ngelala Jehovah sebedau kelalu laun. Pia mega, sebedau aku nginjil ngagai orang, aku besampi minta penemu ngambika ulih narit ati orang. Lalu pasal orang ke baka bedus ke udah ditemu, aku besampi ngambika Jehovah merekat pengawa kitai ke nyaga sida.” Menyadi Kristian indu ke tuai tu udah nulung mayuh orang belajar pasal Jehovah. Kati nuan bisi nemu sapa agi orang tuai ke ransing ngereja peneka Jehovah?—Bacha Pilipi 2:17.

17. Baka ni asai ati nuan pasal utai ti deka digaga Jehovah ke mensia enggau dunya jemah ila?

17 Seagi-agi Jehovah bedau muai munsuh Iya ari dunya , kitai deka terus besampi ngambika peneka Iya nyadi. Udah nya dunya deka nyadi paradais, lalu bebiliun orang deka diangkatka ari mati. Jesus madahka ‘maya deka datai alai semua orang ke udah mati deka ninga nyawa iya, lalu deka pansut ari kubur.’ (Jhn. 5:28, 29) Uji gambarka pengaga ati kitai maya kitai betemu baru enggau orang ke dikesayauka kitai! Petara “deka ngendas semua ai mata” ari mata kitai. (Pem. 21:4) Mayuh ari orang ke diangkatka ari mati nya “enda lurus.” Sida enda kala belajar pemendar pasal Jehovah enggau Jesus. Kitai deka gaga ati ngajar sida pasal peneka Petara ngambika sida tau bulih “pengidup ti meruan belama iya.”—SKR. 24:15; Jhn. 17:3.

18. Nama utai ti patut diguna mensia?

18 Lebuh Perintah Petara datai, perintah nya deka nguduska nama Petara, lalu semua orang deka beserakup nyembah Iya. Amat, Petara deka meri mensia semua utai ke patut diguna sida, lebuh Iya nyaut tiga iti peminta ti keterubah ba chunto sampi Jesus. Ba pelajar pengudah tu, kitai deka berandauka utai bukai ke patut disampika kitai, baka ke diajar Jesus.

^ per. 12 Kena nemu baka ni utai ti dipadah nya dikeamatka ba taun 1914, peda bup Nama Utai ti Bendar Diajar Bup Kudus? lambar 215-218.