Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  Mei 2015

 TOPIK RANDAU | KATI PENGUJUNG UDAH SEMAK?

“Pengujung”—Nama Reti Iya?

“Pengujung”—Nama Reti Iya?

Lebuh nuan ninga, “Pengujung udah semak!” nama dipikirka nuan? Kati nuan ngambarka asteroid labuh ari langit, lalu ngemunaska semua mensia ba dunya? Kati nuan ngambarka penusah besai tauka perang besai ke nyadi di serata dunya? Ngambarka utai tu engka ngasuh sekeda orang berasai irau ati, sekeda engka kakang ati tauka geli ati.

Bup Kudus madahka: “Udah nya baru pengujung datai.” (Matthew 24:14) Utai ke deka nyadi tu mega dikumbai ‘Hari Besai Petara’ tauka “Armagedon.” (Pemandang 16:14, 16) Endang amat, mayuh bengkah pengarap nyarutka runding orang, ngena ajar ti nyelai, sereta enda ngelantangka ati orang pasal pekara tu. Taja pia, Bup Kudus madahka enggau terang pasal pengujung—reti iya enggau ukai reti iya. Jaku Petara mega nulung kitai meda enggau terang sekalika pengujung nya udah semak. Kelebih agi, iya ngajar kitai baka ni kitai ulih selamat! Keterubah, aram kitai ngemetulka penemu ti salah, lalu madahka reti iya ti bendar. Nama reti “pengujung” nitihka Bup Kudus?

 PENGUJUNG UKAI RETI IYA

  1. PENGUJUNG UKAI RETI IYA DUNYA DEKA ANCHUR ANGUS LABAN API.

    Bup Kudus madahka: “[Petara] udah ngengkahka dunya tegap ba pugu iya, lalu iya enda dikinsitka.” (Masmur 104:5) Ayat tu enggau iya ke bukai ngasuh kitai pechaya, Petara enda ngerusakka dunya tauka ngelakka iya dirusakka—belama iya!—Pengajar 1:4; Isaiah 45:18.

  2. PENGUJUNG UKAI RETI IYA ENDA DITETAPKA.

    Bup Kudus madahka pengujung nya udah ditetapka—Petara udah netapka jam iya. Kitai macha: “Tang nadai orang nemu hari tauka jam. Melikat ke di serega enda nemu, lalu Anak Mensia pen enda mega nemu. Semina Apai aja nemu. Bejaga, besedia, laban kita enda nemu kemaya hari nya deka datai.” (Mark 13:32, 33) Endang amat, Petara (“Apai”) udah netapka “kemaya hari nya” deka nyadi.

  3. PENGUJUNG UKAI KETEGAL MENSIA TAUKA UTAI KE LABUH ARI LANGIT.

    Nama nyadi ba pengujung? Pemandang 19:11 madahka: “Aku meda serega tebuka. Siku kuda ti burak lalu pegari. Orang ke nepan iya nya benama Tetap Ati Sereta Bendar.” Ba ayat 19 madahka: ‘Udah nya aku tepedaka jelu nya enggau bala raja dunya, enggau bala soldadu sida begempuru deka beperang ngelaban iya ke nepan kuda nya, enggau ngelaban bala soldadu iya.’ (Pemandang 19:11-21) Taja pan ayat tu mayuh ngena leka jaku sempama, kitai ulih nemu reti iya: Petara deka nganjung bala melikat kena ngemunaska munsuh Iya.

Pesan Bup Kudus pasal pengujung nya berita manah, ukai berita jai

NAMA RETI PENGUJUNG

  1. PENGUJUNG NGAGAI PERINTAH MENSIA KE ENDA MUJUR.

    Bup Kudus nerangka: ‘Petara ti di serega deka numbuhka siti perintah ti enda nemu abis.  Perintah nya ila enda ulih dialahka, tang iya deka ngerusak semua perintah bukai, lalu udah nya iya deka meruan belama iya.’ (Daniel 2:44) Baka ke udah dipadah, “bala raja dunya, enggau bala soldadu sida” ke ‘begempuru deka beperang ngelaban iya ke nepan kuda nya, enggau ngelaban bala soldadu iya’ deka dipunaska.—Pemandang 19:19.

  2. PENGUJUNG NGAGAI PERANG, PENYAI ENGGAU ATUR TI ENDA LURUS.

    “[Petara] ngasuh perang badu agi nyadi di serata dunya.” (Masmur 46:9) ‘Orang ke lurus, orang ke rentang ati, deka diau di menua kitai. Tang Petara deka muai orang ke jai ari menua tu, lalu nyabut orang ke bedosa ari menua tu baka ke nyabut rumput ari tanah.’ (Jaku Dalam 2:21, 22) “Peda nuan, diatu Aku ngaga semua utai nyadi baru magang!”—Pemandang 21:4, 5.

  3. PENGUJUNG NGAGAI PENGARAP KE ENDA DITERIMA PETARA SERETA KE ENDA ULIH NULUNG MENSIA.

    “Sida nabi benabi ngena jaku ti bula, lalu sida imam merintah nitihka asuh sida nabi . . . tang nama utai ti deka dikereja sida lebuh pengujung dunya ila?” (Jeremiah 5:31) ‘Lebuh Hari nya ila mayuh orang deka nyebut ngagai aku “Tuan, Tuan! Kati kami nadai udah nusui pesan Petara dalam nama nuan, lalu muru antu dalam nama nuan, lalu ngereja mayuh kereja ajih dalam nama nuan?” Udah nya aku deka bejaku ngagai sida, “Aku enda ngelala kita. Rari ari aku, kita ke ngereja penyai.”’—Matthew 7:21-23.

  4. PENGUJUNG NGAGAI ORANG KE NGETANKA SERETA NYUKUNG UTAI BA DUNYA TU.

    Jesus Kristus madahka: “Baka tu ku ukum dipejalaika: penampak udah datai ngagai dunya, tang mensia rinduka pemetang lalu enda rinduka penampak laban pengawa sida jai.” (John 3:19) Bup Kudus nerangka pasal pengerusak dunya keterubah iya maya jeman Noah. ‘Dunya nya udah mega diampuhka ulih ai lalu dirusak. Tang ulih jaku nya mega langit enggau dunya ti diatu mengkang digalau ngambika sida dirusak ngena api, digalau nyentuk ngagai Hari Pechara lebuh orang ke enda nangika Petara diakim lalu dirusak.’—2 Peter 3:5-7.

Peratika, penatai “Hari Pechara” enggau pengerusak nya disamaka enggau pengerusak “dunya” maya jeman Noah. Dunya nama ke udah dirusak? Bumi kitai mengkang bisi, tang ‘orang ke enda nangika Petara’—munsuh Petara—ke “dirusak.” Lebuh “Hari Pechara” nya datai, orang ke nyadi munsuh Petara deka dirusakka. Tang, kawan rapat Petara deka diselamatka, baka Noah enggau sida sebilik.—Matthew 24:37-42.

Pikirka pemanah dunya tu pengudah Petara muai semua penyai! Endang amat, pesan Bup Kudus pasal pengujung nya berita manah, ukai berita jai. Tang, nuan engka berunding: ‘Kati Bup Kudus bisi madahka kitai kemaya pengujung deka datai? Kati iya udah semak? Baka ni aku ulih selamat?’