Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  Mei 2015

Neladan Petara ke Besemaya Deka Meri Pengidup Belama Iya

Neladan Petara ke Besemaya Deka Meri Pengidup Belama Iya

‘Tunda teladan Petara, laban kita tu anak ke dikesayauka Iya.’ —EPS. 5:1.

1. Nama pengelandik ke ulih nulung kitai neladan Jehovah?

KITAI digaga Jehovah enggau pengelandik ke ulih nemu baka ni asai ati orang bukai, taja pan kitai enda kala napi utai ke nyadi ba sida. (Bacha Epesus 5:1, 2.) Baka ni pengelandik tu nulung kitai neladan Jehovah? Lalu nama kebuah kitai patut bejimat ngena pengelandik tu?

2. Baka ni asai ati Jehovah maya kitai merinsa?

2 Jehovah udah besemaya ke utai ti amat manah jemah ila. Maya nya nadai agi pemerinsa. Orang ke diiri ngena roh kudus ulih nganti pengidup belama iya ba serega, lalu “bedus ti bukai” ulih nganti pengidup belama iya ba dunya. (Jhn. 10:16; 17:3; 1 Kor. 15:53) Tang Jehovah nemu pemedis ke diasaika kitai, maya utai jai nyadi ba kitai kemaya hari tu. Kelia menya, Jehovah tusah ati maya nembiak Iya merinsa ba menua Ejip. “Tu ngenusahka ati Iya.” (Isa. 63:9, NW) Udah nya, lebuh nembiak Iya nirika baru rumah sembiang Iya, sereta maya sida takutka munsuh, Jehovah mega nemu baka ni asai ati sida. Iya  madahka sida: “Barang sapa nyerang kita, nyerang orang ke pemadu dikesayauka Aku.” (Sek. 2:8) Baka indai ke rinduka anak iya ke agi mit, Jehovah rinduka nembiak Iya sereta deka nulung sida. (Isa. 49:15) Kitai neladan pengerindu Jehovah, enti kitai nguji deka nemu baka ni asai ati orang bukai enggau ngambarka diri napi utai ke nyadi ba sida.—Mas. 103:13, 14.

JESUS NELADAN JEHOVAH SERETA RINDUKA ORANG

3. Baka ni asai ati Jesus ngagai orang bukai?

3 Jesus nemu asai ati orang maya sida merinsa, taja pan iya enda kala napi utai ke nyadi ba sida. Chunto, iya nemu mayuh orang bisi penusah ba pengidup. Tuai pengarap bula ke sida sereta ngaga atur ke ukai ari Petara. Orang takutka tuai pengarap tu. (Mat. 23:4; Mrk. 7:1-5; Jhn. 7:13) Taja pan Jesus enda kala takut ke sida, sereta enda kala pechayaka pemula sida, iya ulih nemu baka ni asai ati orang. Jesus balat tusah ati maya iya meda orang enda dikeibuhka. Sida enda ditulung, “baka bedus ti nadai orang ngibun.” (Mat. 9:36) Jesus belajar rinduka orang ari Apai iya, lalu bisi ‘pengasih sereta pengerindu.’—Mas. 103:8.

4. Nama digaga Jesus lebuh iya meda orang merinsa?

4 Lebuh Jesus meda orang merinsa, iya nulung sida laban iya rinduka sida. Iya baka Apai iya. Chunto, bisi sekali bala rasul Jesus udah jauh bejalai meritaka injil. Sida berasai lelak, lalu patut ngetu ba endur ti sunyi. Tang, Jesus meda mayuh orang nganti iya. Iya nemu sida begunaka tulung ari iya. Nya alai, iya “belabuh ngajar sida mayuh macham utai.”—Mrk. 6:30, 31, 34.

BISI PENGERINDU BAKA JEHOVAH

5, 6. Enti kitai deka bisi pengerindu baka Jehovah, nama patut digaga kitai? Beri siti chunto. (Peda gambar ba pun pelajar.)

5 Enti kitai deka bisi pengerindu baka Jehovah, nama patut digaga kitai? Pikirka utai ti nyadi tu. Seiku menyadi Kristian lelaki ke agi biak ke benama Alan, berunding pasal seiku menyadi Kristian lelaki ke udah tuai, ke enda entu ulih bejalai sereta enda lansik meda. Alan berundingka jaku Jesus: “Kereja ngagai orang baka ke dikedekaka kita kereja sida ngagai kita.” (Luk. 6:31) Nya alai, Alan nanya diri empu, ‘Nama dikedekaka aku ari orang bukai?’ Ku iya, ‘Aku ka orang main bol enggau aku!’ Tang, menyadi Kristian lelaki ke udah tuai tu enda ulih belanda sereta main bol. Nyadi, utai ti patut ditanya Alan ngagai diri empu, ‘Enti aku menyadi Kristian lelaki nya, nama dikedekaka aku ari orang bukai?’

6 Taja pan Alan agi biak, iya nguji ngambarka baka ni asai ati iya enti iya udah tuai. Iya meri awak begulai enggau menyadi Kristian lelaki ke udah tuai nya, lalu mendingka enggau manah lebuh iya bejaku. Udah nya, iya nemu menyadi Kristian nya tusah deka macha Bup Kudus tauka bejalai ari rumah ke rumah maya nginjil. Alan nemu baka ni iya ulih nulung, lalu deka nulung enggau naka ulih. Enti kitai nemu asai ati orang bukai, lalu ngayanka pengerindu kitai ngagai sida, kitai baka Jehovah.—1 Kor. 12:26.

Manah ati baka Jehovah (Peda genteran 7)

7. Baka ni kitai ulih nemu utai ti diasaika bala menyadi Kristian kitai?

7 Kekadang enda senang deka nemu utai ti diasaika orang bukai, kelebih agi enti kitai enda kala napi penusah nya. Chunto, mayuh bala menyadi kitai merinsa ketegal sida sakit, bakal tauka ketegal sida majak tuai. Sekeda balat merinsa  ketegal balat tusah ati, balat irau tauka ketegal sida kala diperinsa. Sekeda ngemesaika anak kediri aja tauka bisi diri sebilik ke enda nyembah Jehovah. Tiap iku orang bisi penusah, lalu kemayuh agi penusah tu enda sebaka enggau enggi kitai. Tang, kitai deka ngayanka pengerindu ngagai orang bukai sereta nulung sida. Nyadi, nama ulih digaga kitai? Tiap iku orang engka begunaka utai ti enda sebaka. Nya alai, enti kitai mendingka enggau manah sereta nguji deka nemu asai ati iya, kitai nemu chara ti pemadu manah kena nulung iya. Kitai engka ulih madahka iya baka ni asai ati Jehovah pasal penusah iya. Tauka kitai ulih nulung iya ngena chara bukai. Enggau tu, kitai neladan Jehovah. —Bacha Rome 12:15; 1 Peter 3:8.

MANAH ATI BAKA JEHOVAH

8. Nama ngasuh Jesus manah ati?

8 Jehovah manah ati enggau semua orang. (Luk. 6:35) Jesus mega baka Apai iya. Nama ngasuh Jesus manah ati enggau orang lebuh iya ba dunya? Iya ngambarka baka ni asai ati orang bukai pasal utai ke disebut tauka dikereja iya. Chunto, seiku indu ke udah ngereja mayuh utai ti jai datai ngagai Jesus. Iya balat nyabak, nyentukka ai mata iya labuh ba kaki Jesus. Jesus ulih meda iya balat nesal ati ke utai jai ti udah dikereja iya. Jesus nemu enti iya enda manah enggau indu nya, indu nya tentu balat agi merinsa. Nya alai, iya muji utai manah ke dikereja indu nya, lalu ngampunka iya. Jesus mega bejaku manah ngagai seiku orang Parisi ke enda setuju enggau utai ti digaga iya ngagai indu nya.—Luk. 7:36-48.

9. Nama ulih nulung kitai manah ati baka Jehovah? Beri siti chunto.

9 Baka ni kitai ulih manah ati baka Jehovah? Kitai patut berunding dulu sebedau bejaku tauka ngereja siti-siti pengawa. Nya alai, kitai patut nelap ati enggau orang bukai sereta enda ngemediska ati sida. Paul nulis, orang Kristian “enda tau belaya, tang patut nelap enggau semua orang.” (2 Tim. 2:24) Chunto, pikirka baka ni nuan ulih manah ati: Enti tuke nuan enda ngereja tanggungjawap iya enggau manah, nama deka digaga nuan? Enti seiku menyadi Kristian lelaki ke bebulan enda datai gempuru ba Palan Gempuru, nama deka disebut nuan ngagai iya? Enti nuan nginjil, lalu orang madahka diri nadai hari bejaku enggau nuan, baka ni nuan ulih manah enggau iya? Enti bini nuan nanya kebuah nuan enda madahka iya pasal sekeda pengawa ke deka digaga nuan, ulih nuan madahka iya enggau manah? Kitai patut ngambarka baka ni asai ati orang bukai, lalu baka ni gaya sida maya ninga jaku kitai. Udah nya, kitai nemu nama patut disebut sereta digaga ngambika manah ati baka Jehovah.—Bacha Jaku Dalam 15:28.

BEPENEMU BAKA JEHOVAH

10, 11. Baka ni kitai ulih belajar ari Jehovah sereta nemu berunding? Beri siti chunto.

10 Jehovah bepenemu-dalam, lalu Iya ulih milih deka meda utai ti deka nyadi jemah ila. Taja pan kitai enda nemu pasal jemah ila, kitai mega ulih bepenemu. Baka ni? Sebedau ngaga pemutus, kitai ulih ngambarka baka ni pemutus nya bekaul enggau kitai tauka orang bukai. Kitai enda patut baka orang Israel. Sida enda berundingka nama deka nyadi ngagai sida enti enda ngasika Jehovah. Lalu sida enda berundingka kaul sida enggau Jehovah, sereta semua utai ti udah digaga Iya ke sida. Moses nemu pasal pekara tu, nya alai iya nemu orang Israel deka ngereja utai ti jai. Ku iya: “Israel nya bansa ti enda nemu berunding. Sida enda  mereti. Enti sida nya orang ke bepenemu-dalam, sida ulih meretika tu; sida tentu nemu namaka penyadi sida.”—U-dat. 31:29, 30; 32:28, 29.

11 Chunto, lebuh nuan pansut dating, anang enda ingat enti nuan bisi ati ke orang nya, nuan tentu tusah deka nagang asai ati enggau pengingin seks. Nya alai, anang ngereja sebarang utai ke ulih ngerusak kaul nuan ti berega enggau Jehovah! Tang, nuan patut nemu berunding sereta nyeliahka utai ti tau ngenusah. Dingaka jaku ajar Jehovah: “Orang ke nemu berunding deka meda penusah datai, lalu belalai; tang orang ke enda berunding deka terus bejalai lalu tetempuhka penusah nya, lalu merinsa ketegal nya.”—J-lam. 22:3.

NYAGA RUNDING NUAN

12. Baka ni utai ti diperundingka kitai ulih ngenusahka kitai?

12 Orang ke bepenemu nyaga utai ti diperundingka iya. Runding kitai ulih nulung tauka ngenusahka kitai, baka api ke ulih nulung tauka ngenusahka kitai. Enti kitai bejimat ngena api, kitai ulih ngena iya manduk pemakai. Tang enti kitai enda bejimat, api ulih nganguska rumah kitai sereta ulih munuh kitai. Tu mega sama enggau runding kitai. Endang manah enti kitai berundingka utai ti dipelajarka kitai ari Jehovah. Tang, enti kitai terus berundingka ulah seks ti kamah sereta ngambarka diri ngereja utai ti jai, kitai deka bisi pengingin ti balat ke utai tu nyentukka kitai engka ngereja iya. Tu ulih mutus ke kaul kitai enggau Jehovah.—Bacha James 1:14, 15.

13. Nama digambarka Hawa pasal pengidup iya?

13 Kitai ulih belajar ari chunto indu keterubah, iya nya Hawa. Jehovah udah nagang Adam seduai Hawa makai buah ari “kayu penemu ti tau ngasuh . . . nemu semua utai.” (P-kal. 2:16, 17) Tang Sitan madahka Hawa: ‘Enda seduai mati, laban Petara nemu, lebuh seduai makai buah nya, seduai deka nyadi sebaka enggau Petara, nemu ngelala bida entara utai ti manah enggau utai ti jai.’ Hawa ngambarka pengidup iya manah agi enti iya ulih mutuska diri empu utai ti manah enggau utai ti jai. Iya terus berundingka utai tu, lalu “meda buah kayu nya manah ke pemakai sereta manah dipeda.” Nama nyadi udah nya? “Iya lalu makai buah nya. Iya mega meri sekeda buah nya ngagai laki iya, ke bisi enggau iya, lalu laki iya mega makai buah nya.” (P-kal. 3:1-6) Ketegal tu, dosa datai ngagai dunya, lalu “pemati datai laban dosa.” (Rom. 5:12) Hawa enda patut terus berundingka utai ti salah!

14. Nama jaku tangkan Bup Kudus ngagai kitai pasal ulah seks ti kamah?

 14 Endang amat, dosa Hawa ukai bekaul enggau ulah seks ti kamah. Tang Bup Kudus enggau terang nangkan kitai anang terus ngambarka diri ngereja sebarang ulah seks ti kamah. Ku Jesus: “Barang sapa merening ngagai indu enggau ati ti kamah, udah butang enggau indu nya dalam ati iya.” (Mat. 5:28) Paul mega nangkan: “Anang berundingka jalai ngemuaska pengingin dosa.”—Rom. 13:14.

15. Nama pengaya ti patut dikenuluka kitai, lalu nama kebuah?

15 Bup Kudus mega madahka kitai patut ngerinduka ati Jehovah, lalu anang terus berundingka pasal pengaya. Taja pan orang nya kaya, duit iya bedau tentu ulih nyaga iya. (J-lam. 18:11) Jesus madahka orang nya beli enti iya nugungka pengaya ke diri empu, tang enda ngenuluka Jehovah ba pengidup iya. Iya ‘enda kaya di mua Petara.’ (Luk. 12:16-21) Lebuh kitai nyimpan “pengaya ke diri empu di serega” enggau ngereja utai ti ngerinduka ati Jehovah, kitai ngagaka ati Iya enggau ati kitai empu. (Mat. 6:20; J-lam. 27:11) Kaul ti manah enggau Jehovah berega agi ari semua utai.

ANANG MAJAK IRAU

16. Nama ulih nulung kitai lebuh kitai irau ati?

16 Enti kitai keran deka kaya ba dunya tu, kitai deka dituntung mayuh pengirau. (Mat. 6:19) Jesus madahka orang ke semampai irau pasal duit deka tusah ngenuluka Perintah Petara ba pengidup sida. (Mat. 13:18, 19, 22) Pia mega, sekeda orang semampai irau pasal utai jai ke engka nyadi ba sida. Enti kitai majak irau, tu ulih ngasuh kitai sakit tauka lenyau pengarap ba Jehovah. Tang, kitai patut arapka Jehovah deka nulung kitai. Bup Kudus madahka “pengirau ati nuan ulih muai pengelantang, tang jaku ti siru deka ngelantangka ati nuan.” (J-lam. 12:25) Nya alai, enti nuan irau pasal siti-siti utai, berandau meh pasal utai nya enggau orang ke nyembah Jehovah sereta orang ke rapat enggau nuan. Apai indai, laki tauka bini nuan, tauka kawan rapat nuan ulih meransang nuan arapka Jehovah sereta nulung nuan enda kelalu irau ati.

17. Baka ni Jehovah ulih nulung kitai maya kitai bisi pengirau?

17 Jehovah nemu asai ati kitai manah agi ari orang bukai, lalu ulih nulung kitai berasai lantang agi maya kitai bisi pengirau. Paul nulis: ‘Anang irauka utai, tang dalam semua utai, bantaika semua peminta kita ngagai Petara ngena sampi, sampi peminta, enggau sampi terima kasih. Lalu pemaik Petara, ti ngelui peragam mensia, deka nyaga ati enggau runding kita dalam Jesus Kristus.’ (Plp. 4:6, 7) Nya alai, lebuh nuan irau, pikirka tulung ti diberi Jehovah ke nuan kena neguhka kaul nuan enggau Iya, baka tulung ari bala menyadi Kristian, bala tuai gempuru, ulun ke tetap ati, bala melikat enggau Jesus.

18. Baka ni pengelandik kitai ke ulih ngambarka utai nulung kitai?

18 Baka ke udah dipelajar, kitai neladan Jehovah enti kitai ngena pengelandik ke ulih nemu baka ni asai ati orang bukai. (1 Tim. 1:11; 1 Jhn. 4:8) Kitai deka gaga ati enti kitai ngayanka pengerindu enggau pemanah ngagai orang bukai, enti kitai berundingka penyadi ari utai ti deka digaga kitai, pia mega enti kitai nyeliahka diri ari majak irau. Aram kitai ngambarka gaya pengidup ba baruh Perintah Petara sereta enggau naka ulih neladan Jehovah.—Rom. 12:12.