Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  Mei 2015

Nuan Ulih Ngelaban Sitan—Lalu Menang!

Nuan Ulih Ngelaban Sitan—Lalu Menang!

“Laban meh Sitan, bediri tegap dalam pengarap.” —1 PET. 5:9.

1. (a) Kemaya hari tu, nama kebuah kitai patut bebendar ngelaban Sitan? (b) Baka ni kitai nemu kitai ulih menang ngelaban Sitan?

SITAN ngelaban orang ke diiri ngena roh kudus ke agi diau ba dunya. Iya mega ngelaban “bedus ti bukai.” (Jhn. 10:16) Laban nemu timpuh diri nyau deka abis, Sitan enggau naka ulih deka ngerusak pengarap nembiak Jehovah. (Bacha Pemandang 12:9, 12.) Tang, kitai ulih menang ngelaban Sitan. Bup Kudus madahka: “Laban meh Sitan, lalu iya deka rari ari kita.”—Jas. 4:7.

2, 3. (a) Nama kebuah Sitan deka orang pechaya iya nadai? (b) Baka ni nuan nemu Sitan nya amat bisi?

2 Mayuh orang enda pechaya Sitan nya amat bisi. Sida ngumbai Sitan enggau bala antu semina bisi dipadah ba bup, wayang, enggau video game. Sida ngumbai enti nuan nya orang ke bepenemu, nuan enda patut pechayaka roh ti jai tu bisi. Kati Sitan beduli enti orang enda pechaya iya enggau bala antu iya bisi? Enda. Tu ngasuh Sitan senang agi nipu sida. (2 Kor. 4:4) Iya ke amat, Sitan ngena chara tu ngambika iya ulih nesatka orang.

3 Ketegal kitai nembiak Jehovah, kitai enda ditesatka. Kitai nemu Sitan endang bisi. Baka ni kitai nemu? Bup  Kudus madahka kitai, Sitan bejaku enggau Hawa ngena ular. (P-kal. 3:1-5) Iya bejaku enggau Jehovah, nanyaka tuju ati Jop. (Jop 1:9-12) Sitan nguji Jesus. (Mat. 4:1-10) Lalu pengudah Jesus nyadi Raja ba taun 1914, Sitan berengkah “nyerang” orang ke diiri ngena roh kudus ke agi diau ba dunya. (Pem. 12:17) Sitan agi nyerang nyentukka diatu. Iya deka ngerusak pengarap orang ke diiri ngena roh kudus enggau bala bedus ti bukai. Ngambika menang ba perang tu, kitai patut ngelaban Sitan, lalu negapka pengarap kitai. Ba pelajar tu, kitai deka berandauka tiga iti chara dikena ngelaban Sitan.

NULAK PENYUMBUNG

4. Baka ni Sitan tebilang enggau penyumbung?

4 Sitan balat sumbung. Melikat ti jai tu berani ngelaban kuasa merintah Petara, lalu iya deka orang nyembah iya, ukai nyembah Jehovah. Nya kebuah iya tebilang enggau penyumbung. Siti chara kitai ulih ngelaban Sitan iya nya nulak penyumbung, lalu baruh ati. (Bacha 1 Peter 5:5.) Tang, nama reti penyumbung? Kati penyumbung selalu enda manah?

5, 6. (a) Kati penyumbung selalu enda manah? Terangka. (b) Penyumbung ke baka ni ulih ngenusah, lalu nama sekeda chunto ari Bup Kudus?

5 Nitihka siti kamus, penyumbung nya asai ati ke andal sereta bebasaka diri empu. Iya mega “asai ati ti puas laban nuan tauka orang ke rapat enggau nuan udah ngereja tauka ngembuan utai ti manah.” Enda salah ngembuan asai ati ke baka nya. Rasul Paul madahka bala menyadi Kristian ba Tesalonika: ‘Kami empu temegahka kita di mua semua eklisia Petara, ketegal kita tan ati, enggau ketegal pengarap kita, taja pen kita natka semua macham pemerinsa enggau penusah.’ (2 Tes. 1:4) Nyadi, berasai puas enggau pengawa orang bukai sereta temegahka diri empu ulih nguntungka kitai. Kitai enda ibuh maluka diri sebilik, chara pengidup tauka menua asal kitai.—SKR. 21:39.

6 Tang, bisi sebengkah penyumbung ke ulih ngerusak kaul, kelebih agi kaul kitai enggau Jehovah. Penyumbung tu ulih ngasuh kitai pedis ati enti kitai dirara. Iya mega ulih ngasuh kitai nulak jaku lalau, ari ke nerima jaku lalau nya enggau baruh ati. (Mas. 141:5) Penyumbung tu dikumbai kelalu berundingka diri empu tauka baka “ulah ti sumbung ke diayanka orang ke ngumbai diri manah agi ari orang bukai enggau nadai kebuah ti patut.” Jehovah begedika penyumbung tu. (Esk. 33:28; Amo. 6:8) Tang, Sitan gaga ati enti mensia neladan penyumbung iya enggau muji diri empu. Uji gambarka pengaga ati Sitan maya Nimrot, Raja Ejip, sereta Absalom ke ngayanka penyumbung lebuh sida muji diri! (P-kal. 10:8, 9; P-sut. 5:1, 2; 2 Sam. 15:4-6) Ketegal penyumbung mega, Kain lenyau kaul enggau Petara. Jehovah ngerara Kain, tang Kain enggai ninga laban kelalu sumbung. Iya kieh, enda bedulika jaku tangkan Petara, sereta enda nangi ngereja dosa ngelaban Jehovah.—P-kal. 4:6-8.

7, 8. (a) Nama reti temegahka bansa diri, lalu baka ni iya bekaul enggau penyumbung? (b) Terangka baka ni penyumbung ulih ngerusak pemaik ba gempuru.

7 Kemaya hari tu, orang ngayanka penyumbung ngena chara ti ulih ngenusah. Kekadang penyumbung bekaul enggau temegahka bansa diri. Nitihka siti kamus, temegahka bansa diri reti iya begedika bansa bukai. Iya mega “ngumbai siti-siti bansa bisi kualiti  enggau pengelandik ti enda sama, lalu sekeda bansa tinggi agi tauka baruh agi ari bansa bukai.” Temegahka bansa diri ngasuh belaya, beperang sereta bebunuh.

8 Endang amat, penyumbung tu enda patut bisi ba bala menyadi Kristian. Taja pia, bala menyadi Kristian engka besakal penemu ketegal penyumbung ke enda ulih ditagang. Tu nyadi ba sekeda orang Kristian keterubah menya, nyentukka James nanya sida: “Nama utai ti ngasuh kita beperang ngelaban pangan diri? Nama utai ti ngasuh kita belaya?” (Jas. 4:1) Enti kitai begedika orang bukai sereta ngumbai diri manah agi ari orang bukai, kitai engka nyebut tauka ngereja utai ti ngemediska ati orang bukai. (J-lam. 12:18) Endang amat, penyumbung ulih ngerusak pemaik ba gempuru.

9. Baka ni Bup Kudus nulung kitai ngelaban pengingin temegahka bansa diri sereta penyumbung ti enda patut ke bukai? (Peda gambar ba pun pelajar.)

9 Enti kitai bisi ati ngumbai diri manah agi ari orang bukai, kitai patut ingat Jehovah begedika “semua orang ke sumbung.” (J-lam. 16:5) Kitai mega patut meresa ati diri, lalu nanya diri empu, ‘Kati aku ngumbai bansa diri, menua diri, tauka chara pengidup diri manah agi ari enggi orang bukai?’ Enti pia, kitai enda ingatka Petara udah “ngaga semua bansa ari siku orang.” (SKR. 17:26) Iya ke amat, semua kitai siti bansa laban semua kitai datai ari Adam. Endang penemu ti salah ngumbai Petara ngaga sekeda bansa manah agi ari bansa bukai. Enti kitai bisi runding ke baka tu, kitai ngelakka Sitan ngerusak pengerindu enggau penyerakup kitai. (Jhn. 13:35) Ngambika menang ngelaban Sitan, kitai enda tau enda nyeliahka semua penyumbung ti enda patut.—J-lam. 16:18.

SELIAHKA PENGANGKUN KE PENGAYA ENGGAU PENGANGKUN KE DUNYA

10, 11. (a) Nama engka ngasuh orang jampat angkunka dunya? (b) Nama penyadi ngagai Demas ketegal angkunka dunya?

10 Sitan “merintah dunya tu,” lalu dunya tu di baruh kuasa iya. (Jhn. 12:31; 1 Jhn. 5:19) Mayuh utai ba dunya tu enda sejalai enggau ajar Bup Kudus. Endang amat, ukai semua utai ba dunya tu jai. Taja pia, kitai nemu Sitan deka ngena dunya tu ngambi ulih ari pengingin kitai, lalu ngasuh kitai bedosa. Tauka iya ngasuh kitai angkunka dunya, lalu enda entu beberatka sembah ngagai Jehovah.—Bacha 1 John 2:15, 16.

11 Sekeda orang Kristian keterubah menya angkunka dunya. Chunto, Paul nulis: “Demas, ke angkunka dunya, udah ninggalka aku.” (2 Tim. 4:10) Bup Kudus nadai madah enggau terang bansa pengangkun ke dunya ti dikinginka Demas, ke ngasuh iya ninggalka Paul. Demas engka berengkah angkunka pengaya lebih agi ari pengawa ke dikereja iya ke Jehovah. Enti tu amat, Demas lenyau peluang ti manah ba ngereja pengawa ke Jehovah. Kati pemutus tu nguntungka iya? Enda. Demas ulih mengkang nyadi penulung Paul enti iya enda angkunka pengaya. Dunya enda ulih meri iya utai ti manah agi ari utai ke diberi Jehovah!—J-lam. 10:22.

12. Baka ni Sitan deka ngambi ulih ari pengingin kitai ngena “pengaya”?

12 Pia mega enggau kitai kemaya hari tu. Nyadi orang Kristian reti iya kitai patut nyediaka utai ti diguna diri empu enggau diri sebilik. (1 Tim. 5:8) Jehovah deka kitai gaga ati. Kitai nemu tu laban Iya meri Adam seduai Hawa menua paradais ti manah endur diau. (P-kal. 2:9) Tang Sitan deka ngambi ulih ari  pengingin kitai ngena “pengaya.” (Mat. 13:22) Mayuh orang ngumbai duit enggau pengaya ulih mai pengelantang tauka pemujur. Enti kitai bisi runding ke baka tu, nya ulih ngasuh kitai lenyau utai ti pemadu berega, iya nya kaul ti manah enggau Jehovah. Jesus nangkan: ‘Nadai orang ulih betuaika dua iku tuan, laban iya deka begedika siku, lalu rinduka siku, tauka angkunka siku, lalu mechat siku. Kita enda ulih betuaika Petara enggau duit.’ (Mat. 6:24) Enti kitai semina betuaika pengaya, kitai badu nyembah Jehovah. Tu meh utai ti dikedekaka Sitan. Arapka kitai enda ngelakka duit tauka utai ti ulih dibeli ngena duit, beguna agi ari kaul kitai enggau Jehovah. Ngambika menang ngelaban Sitan, kitai patut ngembuan runding ti betul pasal pengaya.—Bacha 1 Timoti 6:6-10.

NULAK ULAH SEKS TI KAMAH

13. Baka ni dunya tu ngayanka penemu ti salah pasal adat melaki-bini enggau pasal seks?

13 Siti da agi panjuk ke dikena Sitan, iya nya ulah seks ti kamah. Mayuh orang ngumbai, tetap ati ngagai laki tauka bini, enda ulih diterima agi kemaya hari tu sereta ngasuh sida enda bibas. Chunto, seiku pelakun indu madahka enda ulih tetap ati ngagai seiku orang. Ku iya agi, “Aku nadai kala tetemuka orang ke tetap ati tauka deka tetap ati.” Seiku pelakun lelaki mega madahka, “Aku enda nemu sekalika kitai patut begulai enggau seiku aja orang nyentuk ke kitai mati.” Sitan tentu balat gaga ati maya orang ke tebilang ngutuk adat melaki-bini ke diberi Petara. Sitan enda nyukung adat melaki-bini, lalu iya enggai ruang bilik mujur. Nyadi ngambika menang ngelaban Sitan, kitai patut ngembuan penemu Petara pasal adat melaki-bini.

14, 15. Nama patut digaga kitai enti kitai bisi pengingin deka ngereja ulah seks ti kamah?

14 Sekalika kitai udah kawin tauka bedau, kitai patut bebendar ngelaban semua ulah seks ti kamah. Kati tu senang? Enda! Chunto, enti nuan nya orang ke biak, nuan engka ninga orang ke sama sekula madahka diri ngereja pengawa seks enggau sebarang orang ke dikedekaka sida. Sida mega engka madahka pasal sexting, iya nya nganjung mesej tauka gambar ti bekaul enggau seks ngena telefon binching sida. Ba sekeda menua, sexting nya sama baka nganjung gambar pornografi anak mit. Ku Bup Kudus: “Orang ke ngereja ulah ti kamah, bedosa ngelaban tubuh diri empu.” (1 Kor. 6:18) Mayuh pemerinsa enggau pemati nyadi ketegal penyakit ke datai ari ngereja pengawa seks. Lalu mayuh orang biak ke ngereja pengawa seks sebedau kawin madahka sida nesal ati ke utai ti udah dikereja sida. Dunya pemerindang deka kitai pechaya nadai nama-nama enti ngelaban ukum Petara. Enti kitai pechayaka pemula tu, kitai ulih “ditipu dosa.”—Heb. 3:13.

15 Enti kitai bisi pengingin deka ngereja ulah seks ti kamah, nama patut digaga kitai? Kingatka, kitai bisi pengelemi diri. (Rom. 7:22, 23) Besampi ngagai Petara minta pengering. (Plp. 4:6, 7, 13) Seliahka semua utai ti ngasuh kitai deka ngereja ulah ti kamah. (J-lam. 22:3) Lalu enti bisi pengingin ti salah tu, tulak iya enggau jampat.—P-kal. 39:12.

16. Nama saut Jesus maya Sitan nguji iya, lalu nama ulih dipelajarka kitai ari teladan Jesus?

16 Jesus nyadi teladan ti pemadu manah ke kitai. Iya enda dikemelika  semaya Sitan. Indah iya enda berunding pasal utai nya. Tang iya enggau jampat nyaut Sitan: “Endang udah ditulis.” (Bacha Matthew 4:4-10.) Jesus nemu Jaku Petara, nya alai iya ulih tekala nya ngena ayat Bup Kudus maya Sitan nguji iya. Ngambika menang ngelaban Sitan, kitai enda patut ngelakka diri dialahka pengingin deka ngereja ulah seks ti kamah.—1 Kor. 6:9, 10.

MENANG NGELABAN ENTI ULIH BETAN

17, 18. (a) Nama agi panjuk bukai ke dikena Sitan, lalu baka ni kitai nemu? (b) Nama deka nyadi ngagai Sitan, lalu baka ni tu meransang kitai betan?

17 Sitan bisi mayuh panjuk. Penyumbung, angkunka pengaya sereta ulah seks ti kamah semina tiga iti ari panjuk iya. Chunto, sekeda menyadi Kristian disakal diri sebilik. Bisi mega dikemelika orang ke sama sekula enggau sida. Ba sekeda menua perintah nagang sida nginjil. Kitai nemu penusah ke baka tu ulih nyadi ba kitai. Jesus empu nangkan kitai: ‘Semua orang deka begedika kita ketegal nama aku. Tang orang ke tan datai ke ujung, deka diselamatka.’—Mat. 10:22.

Sitan deka dipunaska (Peda genteran 18)

18 Baka ni kitai ulih menang ngelaban Sitan? Ku Jesus: “Ulih ati ti tan kita deka diselamatka.” (Luk. 21:19) Nadai utai digaga mensia ulih ngemediska kitai belama iya. Nadai orang ulih ngerusak kaul kitai enggau Petara enti kitai empu enda ngelakka utai tu nyadi. (Rom. 8:38, 39) Taja pan sekeda nembiak Jehovah ke tetap ati mati, tu ukai reti iya Sitan udah menang. Jehovah deka ngidupka sida baru. (Jhn. 5:28, 29) Tang Sitan nadai peluang agi. Pengudah dunya ke dipegai Sitan tu nadai agi, Sitan deka dibuai ke lubang ti pemadu dalam pengelama 1,000 taun. (Pem. 20:1-3) Ba pengujung seribu taun Kristus merintah, Sitan deka “dilepaska ari rumah jil,” lalu iya deka nesatka mensia ti sempurna sekali da agi. Pengudah nya, iya deka dipunaska. (Pem. 20:7-10) Taja pan Sitan nadai peluang agi, tang nuan bisi! Terus meh ngelaban Sitan sereta tegapka pengarap nuan. Nuan ulih menang ngelaban Sitan!