Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  Mei 2015

 TOPIK RANDAU

Kati Pengujung Udah Semak?

Kati Pengujung Udah Semak?

Kati Petara deka terus ngelakka mensia bekuasa atas pangan diri sereta ngerusak pengidup mensia ke jemah ila? Enda, laban Iya deka ngujungka pemerinsa enggau penusah ke udah lama ninggang mensia. Penempa mensia enggau dunya deka nuan nemu maya Iya ngujungka semua tu udah semak. Baka ni Iya madah pasal pekara tu?

Peratika sempama tu: Lebuh nuan bejalai jauh ngena kerita, keterubah iya nuan engka mansik penerang ari internet, peta, tauka penerang betulis. Udah nya lebuh nuan meda papan tanda tauka nama jalai ke sebaka enggau endur ke dituju nuan, nuan pechaya nuan udah semak enggau endur ke dituju nuan. Pia mega, Petara udah meri kitai Jaku Iya, iya nya Bup Kudus, ke nerangka utai ti nyadi ba serata dunya. Lebuh kitai meda tanda nya nyadi, kitai pechaya kitai diau ba maya ke udah semak enggau pengujung.

Bup Kudus nerangka dunya deka datai ba maya ti pemadu tusah, ke nunjukka pengujung deka datai. Maya nya utai ke nyadi ba serata dunya enda sebaka enggau iya ke kala nyadi sepemanjai sejarah mensia. Peratika sekeda tanda ke dipadah ba Jaku Petara.

1. MAYUH PENUSAH BA SERATA DUNYA Matthew bab 24 madahka utai ke deka nyadi ba dunya. Utai tu nyadi tanda “pengujung dunya,” lalu deka terus nyadi nyentuk ke “pengujung datai.” (Ayat 3, 14) Tanda tu nyengkaum perang besai, lapar pungkang, tanah berenyang ke nyadi ba mayuh bengkah endur, penyai nambah-menambah, nadai pengerindu, sereta tuai pengarap ke majak nesatka orang. (Ayat 6-26) Endang amat, utai tu udah lama nyadi. Tang, ketegal pengujung udah majak semak, utai tu deka nyadi ba timpuh ti sama. Utai tu mega deka nyengkaum tiga iti da agi tanda.

2. ULAH ORANG Bup Kudus madahka “hari ti penudi”—maya ke udah semak enggau pengujung—ulih dipeda ari ulah orang ke majak jai. Kitai macha: ‘Orang deka semina berundingka diri empu aja, angkunka duit, temegah, sumbung, bejai orang, enda ngasika apai indai, enda nemu meri terima kasih, enda kudus, kasar enggau orang, nadai nemu siruka orang, bejakuka orang, enda nemu nagang diri, mangah, begedika utai ti badas, aum-juak, enda berunding ngereja utai, ngerigangka diri laban sumbung, semina deka ngelantangka diri lalu enda rinduka Petara.’ (2 Timoti 3:1-4) Amat, ulah ti enda bebasaka orang bukai semampai nyadi. Tang, ba “hari ti penudi” ulah tu majak balat nyentukka jeman kitai dikumbai maya ti “mayuh macham penusah.” Bisi nuan meda ulah orang ke jai baka tu?

3. DUNYA BENUNG DIRUSAK Bup Kudus madahka Petara deka “ngerusak sida ke nyadi pengerusak dunya!” (Pemandang 11:18) Baka ni orang ngerusak dunya? Tu ulih dipeda maya jeman Noah: ‘Semua orang bukai jai magang di mua Petara, lalu penyai udah ngelekai ngagai semua endur. Petara merening lalu meda penyai dunya.’ Ku Petara madahka pasal orang ke jai tu: “Aku deka ngerusak sida abis lengis.” (Pemungkal 6:11-13) Bisi nuan beratika dunya penuh enggau penyai? Nambahka nya, mensia nunjukka diri jai agi ari ke udah dalam sejarah mensia: Sida ulih ngerusak dunya enggau ngemunaska semua mensia ke idup ba dunya. Sida bisi senyata. Kelimpah ari nya, dunya mega benung dirusak ngena siti da agi chara. Utai ke nyukung pengidup ba dunya baka oksigen, jelu,  utai tumbuh, enggau tasik, majak rusak ketegal enda diatur mensia enggau manah.

Tanya diri empu, ‘Lebih ari seratus taun ti udah, ulih mensia ngemunaska diri empu?’ Tang diatu mensia ulih ngereja nya, ngena senyata moden enggau ngena pengerusak kandang menua. Pemansang ba teknologi baka ke ulih nyaga tauka ulih nagang pengerusak ke deka nyadi. Taja pia, nama penyadi enggau dunya ukai ditentuka mensia. Sebedau semua utai idup ba dunya tu abis lengis, Petara deka ngerusak orang ke ngerusak dunya. Tu semaya Iya!

4. PENGAWA NGINJIL BA SERATA DUNYA Siti da agi tanda pengujung, iya nya pengawa ke benung digaga: ‘Berita Manah pasal Perintah Petara deka ditusui di serata dunya, nyadika saksi ngagai semua bansa. Udah nya baru pengujung datai.’ (Matthew 24:14) Pengawa nginjil ke udah digaga lebih ari seratus taun tu enda sebaka enggau pengawa nginjil ke digaga mayuh pengarap bukai. Ba hari ti penudi, pesan ‘Berita Manah pasal Perintah Petara,’ deka dikemeratka. Kati nuan nemu ni bagi raban pengarap ke beberatka pesan tu? Lalu enti bisi, kati sida semina madahka pesan nya ba siti-siti endur aja, tauka ngerembaika berita manah nya “di serata dunya, nyadika saksi ngagai semua bansa”?

Perintah Petara benung dikerembaika ba serata dunya dalam beratus iti bansa jaku

Nya alai, laman Web www.jw.org beberatka ‘Berita Manah pasal Perintah Petara.’ Laman Web nya ngembuan litaricha ti nerangka pesan nya dalam lebih ari 700 iti bansa jaku. Kati nuan nemu sekalika bisi chara bukai ke dikena madahka berita manah pasal Perintah Petara baka tu? Lama sebedau bisi Internet, Saksi-Saksi Jehovah udah tebilang enggau pengawa ngerembaika berita manah pasal Perintah Petara. Kenyau ari taun 1939, kulit majalah The Watchtower ngayanka leka jaku “Madahka Perintah Jehovah.” Siti bup pasal pengarap madahka pengawa nginjil Saksi-Saksi Jehovah “nyau ka enda ulih dilaban ari segi pengeran enggau chara pengawa nginjil nya dipejalaika.” Pengawa nginjil nya beberatka berita manah ke madahka enda lama da agi “pengujung datai” ketegal pengawa Perintah Petara.

MAYA TI PEMADU TUSAH DALAM SEJARAH MENSIA

Bisi nuan beratika kesemua empat iti tanda ari Bup Kudus ke dipadah dalam pelajar tu nyadi diatu? Lebih ari seratus taun, majalah tu udah nyediaka penerang pasal utai ke nyadi ba dunya. Tu nulung pemacha nemu kitai  udah semak pengujung. Endang amat, sekeda orang ke kakang ati agi enda setuju. Sida ngumbai penerang nya datai ari runding mensia, lalu ulih diputarka. Sida mega ngumbai ketegal kaul mensia ba dunya majak ngerembai, utai ke nyadi ba dunya tu semina enda manah aja. Taja pia, utai ke majak nyadi ba dunya nunjukka kitai udah semak pengujung.

Sekeda orang ke bepenemu ngasaika kitai udah semak enggau ubah besai ke deka nyadi ba dunya. Chunto, ba taun 2014, Science and Security Board ari Bulletin of the Atomic Scientists nangkan United Nations Security Council pasal penusah besai ke ulih ngemunaska mensia. Bala saintis tu madahka: “Pansik pasal utai ke ulih ngerusak, ngasuh kami nyimpulka penusah ti ulih ngemunaska mensia ke bekaul enggau teknologi agi mayuh.” Mayuh orang majak pechaya kitai idup ba maya ti pemadu tusah ba sejarah mensia. Pengeluar majalah tu enggau mayuh bala pemacha pechaya kitai diatu amat idup ba hari ti penudi, lalu pengujung udah semak. Tang, ari ke irauka pasal jemah ila, nuan ulih gaga ati pasal pemanah ke deka datai. Nama kebuah? Laban nuan ulih selamat ba pengujung nya!