Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  Mei 2015

Bejaga—Sitan Deka Ngemunaska Nuan!

Bejaga—Sitan Deka Ngemunaska Nuan!

“Bejaga! Sitan ti munsuh kita bejalai segau-segau baka singa ti negung, begigaka orang ke deka diempa iya.”—1 PET. 5:8.

1. Terangka baka ni seiku melikat nyadi Sitan.

KETERUBAH, iya bisi kaul ti manah enggau Jehovah. Tang udah nya, melikat tu deka mensia nyembah iya. Ari ke nulak pengingin ti salah nya, iya nejuka pengingin tu tumbuh, lalu ngasuh iya bedosa. (Jas. 1:14, 15) Kitai enda nemu sapa nama iya, tang diatu kitai ngumbai iya Sitan. Iya “endang nadai kaul enggau pemendar.” Iya ngelaban Jehovah, lalu nyadi “apai pemula.”—Jhn. 8:44.

2, 3. Baka ni reti leka jaku “Sitan,” “Antu,” “ular ti tuai,” enggau “naga ti besai” nerangka pasal munsuh Jehovah ti pemadu besai?

2 Kenyau ari iya ke ngelaban, Sitan nyadi munsuh Jehovah ti pemadu besai. Iya mega nyadi munsuh semua mensia. Kitai ulih meda penyai Sitan ari chara Bup Kudus nerangka iya. Sitan reti iya “Penyakal.” Tu nunjukka melikat ti jai tu begedika chara Petara merintah, lalu ngena semua kuasa iya ngelaban chara merintah nya. Utai ti dikedeka Sitan iya nya meda kuasa merintah Jehovah nadai agi.

3 Ba Pemandang 12:9, Sitan dikumbai Antu. Reti iya “Pemula.” Sitan enda bebasaka Petara laban ngumbai Petara bula. Leka jaku “ular ti tuai” ngingatka kitai Sitan  udah ngena ular nipu Hawa. Leka jaku “naga ti besai” mega chara bukai kena nerangka sapa Sitan nya. Iya nadai penyinu sereta jai. Iya deka nagang tuju Jehovah ari dikeamatka, lalu deka ngemunaska nembiak Petara.

4. Nama deka dikerandauka kitai ba pelajar tu?

4 Endang amat, Sitan nya munsuh ti pemadu besai ke deka ngerusak penetap ati kitai ngagai Jehovah. Nya kebuah Bup Kudus nangkan kitai: “Disiplin diri empu sereta bejaga! Sitan ti munsuh kita bejalai segau-segau baka singa ti negung, begigaka orang ke deka diempa iya.” (1 Pet. 5:8) Nya alai, pelajar tu deka berandauka tiga ulah Sitan ke nunjukka kebuah kitai patut nyaga diri ari munsuh Jehovah enggau munsuh nembiak Iya ke jai tu.

SITAN BISI KUASA

5, 6. (a) Beri chunto ke nunjukka bala melikat nya “kering sereta bekuasa.” (b) Baka ni Sitan nya “megai kuasa pemati”?

5 Bala melikat nya “kering sereta bekuasa.” (Mas. 103:20) Sida pintar sereta kering agi ari mensia. Endang amat, bala melikat ke tetap ati ngena kuasa sida enggau manah. Chunto, seiku ari melikat Jehovah ulih munuh 185,000 iku soldadu Asiria. Tang, tu enda ulih dikereja seiku mensia tauka tusah dikereja seraban soldadu. (2 Raj. 19:35) Bisi sekali, seiku melikat ngena pengelandik enggau kuasa iya ngelepaska bala rasul Jesus ari rumah jil. Taja pan bala jejaga bisi semak dia, sida enda meda melikat nya muka pintu, ngelepaska bala rasul nya, lalu ngunchi pintu nya baru!—SKR. 5:18-23.

6 Bala melikat ke tetap ati ngena kuasa sida enggau manah, tang Sitan ngena kuasa iya ngereja penyai. Sitan endang amat bisi kuasa ti besai. Bup Kudus ngumbai iya “merintah dunya tu” sereta “petara dunya.” (Jhn. 12:31; 2 Kor. 4:4) Sitan mega “megai kuasa pemati.” (Heb. 2:14) Tu ukai reti iya nyengala munuh semua orang. Nyadi, nama reti tu? Kesatu, dunya tu penuh enggau pemenchi sereta ulah ti kasar baka Sitan. Kedua, ketegal Hawa pechayaka pemula Sitan, sereta Adam enda ngasika Petara, semua mensia bedosa sereta mati. (Rom. 5:12) Munyi ku Jesus, Sitan nya “pemunuh.” (Jhn. 8:44) Iya endang munsuh ti bisi kuasa.

7. Baka ni bala antu nunjukka sida bisi kuasa?

7 Enti kitai ngelaban Sitan, kitai mega ngelaban semua ke nyukung iya enggau semua ke ngelaban chara Petara merintah. Sida tu nyengkaum mayuh melikat bukai ke dikumbai bala antu. (Pem. 12:3, 4) Sida suah nunjukka diri kering agi ari mensia, lalu ulih ngasuh mensia balat merinsa. (Mat. 8:28-32; Mrk. 5:1-5) Kingatka, bala antu enggau raja sida bisi kuasa. (Mat. 9:34) Kitai enda ulih menang ngelaban Sitan enti nadai tulung ari Jehovah.

SITAN JAI

8. (a) Nama dikedekaka Sitan? (Peda gambar ba pun pelajar.) (b) Ari utai ke dipeda nuan, baka ni dunya tu ngambarka penyai Sitan?

8 Rasul Peter ngumbai Sitan baka “singa ti negung.” Siti bup nerangka leka jaku Gerika ke dikena nyalin “negung” reti iya “tegung jelu mangah ke lapar.” Tu endang ngambarka ulah Sitan ke jai! Iya udah merintah serata dunya, tang tu enda chukup ba iya.  Sitan baka singa lapar ke dekaka mayuh agi mansa. (1 Jhn. 5:19) Orang ke amat deka diserang iya, iya nya orang ke diiri ngena roh kudus ke agi diau ba dunya sereta bala “bedus ti bukai.” (Jhn. 10:16; Pem. 12:17) Sitan deka ngemunaska nembiak Jehovah. Orang Kristian ti bendar ke diperinsa ari kurun keterubah nyentuk ke diatu nunjukka Sitan nya amat jai.

9, 10. (a) Baka ni Sitan nyerang bansa Israel? (Beri chunto.) (b) Nama kebuah Sitan nyerang bansa Israel menya? (c) Ba penemu nuan, baka ni asai ati Sitan enti seiku ari nembiak Jehovah ngereja dosa ti besai kemaya hari tu?

9 Sitan mega nunjukka penyai iya ngena chara bukai. Singa ke lapar enda sinuka mansa iya. Iya enda sinu sebedau munuh, lalu iya mega enda berasai salah pengudah munuh. Baka nya mega enggau Sitan. Iya enda sinuka orang ke diserang iya. Chunto, ba runding nuan, baka ni asai ati Sitan tiap kali iya meda orang Israel nyerahka diri ngagai dosa, baka ngereja ulah seks ti kamah tauka pengamu? Ulih nuan ngambarka pengaga ati Sitan, maya iya meda penusah ke nyadi ketegal Sisa Imri ke ngereja ulah ti kamah enggau ketegal Gehasi ke amu?—P-pau. 25:6-8, 14, 15; 2 Raj. 5:20-27.

Sitan balat gaga ati meda nembiak Petara ngereja dosa (Peda genteran 10)

10 Sitan bisi kebuah nyerang bansa Israel menya. Kingatka, Messiah deka datai ari bansa nya, lalu iya meh ti deka ngerusak Sitan sereta nunjukka Jehovah bisi hak merintah. (P-kal. 3:15) Sitan enggai orang Israel diterima Jehovah, nya alai iya enggau naka ulih ngasuh sida bedosa. Anang ngumbai Sitan berasai sinu ke David lebuh iya ngereja pengawa butang. Anang mega ngumbai iya bisi penyinu ke Moses, lebuh Moses lenyau peluang tama ngagai Menua ti Udah Disemaya. Iya ke bendar, Sitan balat gaga ati meda nembiak Petara ngereja dosa ti besai, lalu iya ngena pemenang nya ngeleseka Jehovah.—J-lam. 27:11.

11. Nama kebuah Sarah engka diserang Sitan?

 11 Sitan balat begedika peturun ke ngadaka Messiah. Chunto, pikirka utai ke nyadi pengudah Jehovah madahka Abraham iya deka nyadi “bansa ti besai.” (P-kal. 12:1-3) Lebuh Abraham seduai Sarah ba Ejip, Raja Ejip mai Sarah ngagai rumah iya ngambika nyadi bini iya. Taja pia, Jehovah nyaga Sarah sereta nyelamatka iya ari penusah nya. (Bacha Pemungkal 12:14-20.) Pia mega maya ba menua Gerar sebedau Isak ada. (P-kal. 20:1-7) Kati nya Sitan ke ba belakang utai tu? Kingatka, Sarah udah ninggalka menua Ur ti kaya, lalu diau ba langkau kain. Kati Sitan deka narit ati iya ngena pemanah istana Raja Ejip enggau Raja Abimelek? Kati Sitan ngumbai iya deka ninggalka laki iya enggau Petara Jehovah, lalu jadi enggau seiku ari raja nya? Bup Kudus nadai madah, tang Sitan tentu gaga ati enti Sarah lenyau peluang nyadi peturun ke ngadaka Messiah. Sitan nadai berasai salah enti ruang bilik, nama manah, sereta kaul indu nya enggau Jehovah rusak. Naka meh penyai Sitan!

12, 13. (a) Baka ni Sitan nunjukka penyai iya pengudah Jesus ada? (b) Ba runding nuan, baka ni asai ati Sitan pasal orang biak ke rinduka Jehovah sereta deka nyembah Iya kemaya hari tu?

12 Jesus ada beratus taun pengudah Abraham. Anang ngumbai Sitan meda anak ke agi mit nya manah dipeda tauka ngerinduka ati. Sitan nemu anak nya deka mansang besai, lalu nyadi Messiah ti disemayaka. Jesus nya meh peturun Abraham ke deka “ngerusak pengawa Sitan.” (1 Jhn. 3:8) Kati Sitan ngumbai munuh anak mit nya utai ti jai? Enda. Iya enda beduli pasal utai ti betul tauka salah. Lalu iya berumban deka munuh Jesus ke agi mit. Baka ni?

13 Lebuh Raja Herod ninga orang ke pandai pasal bintang madahka “raja orang Judah” udah ada, iya balat pedis ati, lalu deka munuh anak nya. (Mat. 2:1-3, 13) Nya alai, iya ngasuh munuh semua anak mit lelaki ke beumur dua taun ke baruh ba Betlehem enggau ba menua ti ngelingi nengeri nya. (Bacha Matthew 2:13-18.) Jesus selamat ari dibunuh. Tang, nama ulih ditemu kitai pasal Sitan ari utai tu? Sitan enda ngumbai nyawa mensia berega. Iya mega enda bedulika anak mit. Sitan endang “singa ti negung.” Kingatka, iya amat jai!

SITAN PEMULA

14, 15. Baka ni Sitan udah “mampul runding orang ke enda arap”?

14 Siti chara ke semina ulih dikena Sitan ngelimpangka orang ari Petara Jehovah, iya nya enggau nipu sida. (1 Jhn. 4:8) Sitan nipu orang ngambika enda beminat deka nemu pemendar, iya nya pemendar pasal orang begunaka kaul enggau Petara. (Mat. 5:3) Sitan udah “mampul runding orang ke enda arap” ngambika sida enda ulih meda pemendar pasal Jehovah.—2 Kor. 4:4.

15 Siti ari chara ke pemadu mujur dikena Sitan nipu orang, iya nya ngena pengarap pelesu. Sitan nemu Jehovah deka mensia nyembah Iya aja. (P-sut. 20:5) Nyadi, pikirka pengaga ati Sitan lebuh iya meda orang nyembah bala peturun sida ke udah mati, jelu enggau utai bukai ke ba dunya, tang ukai nyembah Jehovah. Sayau amat, mayuh  orang ngumbai sembah sida diterima Petara. Tang iya ke bendar, sida dipegai pengarap pelesu enggau adat mensia ke nadai guna. Orang Israel maya jeman Isaiah mega napi utai ti sama. Jehovah nanya sida: “Nama kebuah bebelika utai ti enda ngasuh kita kenyang? Nama kebuah ngena duit ari gaji kita, tang agi lapar? Pendingka Aku, lalu kereja utai ti diasuh Aku, nya baru kita deka makai pemakai ti pemadu manah.”—Isa. 55:2.

16, 17. (a) Nama kebuah Jesus bejaku ngagai Peter: ‘Rari ari aku, Sitan’? (b) Baka ni Sitan nipu kitai ngambika kitai ngetu ari bejaga?

16 Sitan mega ulih ngemelika nembiak Jehovah ke ransing ati nyembah Iya. Chunto, pikirka nama nyadi lebuh Jesus madahka murid iya enda lama da agi iya deka dibunuh. Ku rasul Peter ke rinduka Jesus: ‘Petara enda nyagi utai nya nyadi, Tuan! Utai nya enda tau sekali-kali nyadi ba nuan!’ Jesus bejaku ngagai Peter: ‘Rari ari aku, Sitan!’ (Mat. 16:22, 23) Nama kebuah Jesus ngumbai Peter “Sitan”? Laban Jesus nemu utai ke deka nyadi. Enda lama da agi, Jesus deka mati nyadika tebus, lalu nunjukka Sitan nya pemula. Tu maya ti pemadu berat dalam sejarah mensia, lalu nya ukai maya endur Jesus ngira diri empu. Sitan tentu gaga ati enti Jesus ngetu ari bejaga.

17 Pengujung dunya udah semak, nya alai kitai diau ba maya ti balat tusah. Sitan deka kitai ngira diri enggau beberatka pemujur ba dunya tu. Iya deka kitai enda ingatka diri benung diau ba hari ti penudi, lalu ngetu ari bejaga. Anang ngelakka utai tu nyadi ba nuan! Tang, terus “bejaga.” (Mat. 24:42) Anang sekali-kali pechayaka pemula Sitan ke ngumbai pengujung dunya agi jauh tauka enda datai.

18, 19. (a) Baka ni Sitan nguji nipu kitai, lalu ngasuh kitai bepikir kitai enda ulih nerima pengerindu ari Jehovah? (b) Baka ni Jehovah nulung kitai mengkang bejaga?

18 Sitan mega nguji nipu kitai ngena chara bukai. Sitan deka kitai pechaya kitai enda ulih nerima pengerindu ari Jehovah sereta Iya enggai ngampunka dosa kitai. Tang tu pemula ari Sitan. Uji pikirka tu, sapa ke endang enda ulih nerima pengerindu ari Jehovah? Tentu nya Sitan. Petara enda ngampunka sapa? Tentu nya Sitan. Tang pasal kitai, Bup Kudus madahka: ‘Petara ukai enda lurus. Iya deka mengkang ingatka pengawa ti udah dikereja kita, enggau pengerindu ti dipandangka kita.’ (Heb. 6:10) Jehovah ingatka semua pengawa ke udah digaga kitai kena ngerinduka ati Iya, lalu pengawa kitai ke Iya enda kala lebu. (Bacha 1 Korint 15:58.) Nya alai, anang alah dikemelika pemula Sitan.

19 Baka ke udah dipelajarka kitai, Sitan bisi kuasa, jai, sereta pemula. Baka ni kitai ulih menang ngelaban munsuh ke baka tu? Jehovah nulung kitai. Jaku Iya ngajar kitai pasal chara ke dikena Sitan ngambika kitai “nemu pelan iya.” (2 Kor. 2:11) Enti kitai nemu chara ke dikena Sitan nyerang kitai, kitai deka senang agi mengkang bejaga. Tang, semina nemu chara Sitan aja enda chukup. Bup Kudus madahka: “Laban meh Sitan, lalu iya deka rari ari kita.” (Jas. 4:7) Pelajar ke nangkanka tu deka berandauka tiga chara kitai ulih menang ngelaban Sitan.