Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  Mei 2015

Baka Ni Nuan Patut Disiplin Anak Nuan?

Baka Ni Nuan Patut Disiplin Anak Nuan?

“Aku nganti sereta mendingka bunyi kerita ke mansa ba luar. Tu kali ketiga Jordan enda pulai nitihka jam ti udah disemaya iya. Aku berunding, ‘Dini endur iya? Kati iya bisi penusah? Kati iya bisi berundingka kami benung irauka iya?’ Lebuh iya pulai, aku asai ke ka terus nganu iya.”GEORGE.

“Anak indu aku nyerauh enggau inggar. Tu ngasuh aku irau. Aku malik ke belakang, lalu meda iya nyabak bepegaika pala. Menyadi lelaki iya ke beumur empat taun baru badu malu iya.”—NICOLE.

“‘Nadai aku ngenchuri tinchin nya. Temu aku nya!’ ku Natalie, anak indu kami ke beumur enam taun. Mua iya baka ke enda ngereja penyalah. Iya ke majak enggai ngaku ngasuh kami tusah ati nyentukka kami nyabak. Kami nemu iya bula.”—STEPHEN.

ENTI nuan nya apai indai, ulih nuan ngasaika asai ati sida ke dipadah ba atas nya? Enti nuan napi utai ti sama, kala nuan berunding baka ni nuan patut disiplin anak nuan? Kati nya salah disiplin anak?

NAMA RETI DISIPLIN?

Ba Bup Kudus, leka jaku disiplin enda sama reti enggau leka jaku ngukum. Disiplin bekaul enggau ngiring, ngajar sereta ngemetul. Disiplin nadai bekaul enggau ngemedis tauka merinsaka.—Jaku Dalam 4:1, 2.

Disiplin ari apai indai ulih disamaka baka betanam. Seiku pekebun ngaduka tanah, nyiram enggau maja utai tanam, lalu nyaga iya ari indu utai sereta rumput. Lebuh utai tanam tumbuh, pekebun engka nyarau utai tanam ngambika iya ulih tumbuh manah. Pekebun nemu chara ngintu utai tanam enggau manah ulih nulung iya ngasilka utai tanam ti galak. Pia mega, apai indai ngintu anak sida ngena mayuh chara. Baka utai tanam ke patut dijarau, anak mega patut didisiplin. Tu ulih ngemetulka utai ti salah ari pun, ngambika anak sida menyana. Taja pia, pengawa nyarau patut digaga enggau bejimat, enti enda utai tanam deka rusak. Pia mega, disiplin ari apai indai patut digaga enggau pengerindu.

Petara Jehovah ke dipadah ba Bup Kudus, nyadi teladan ti manah ngagai apai indai. Disiplin ke diberi Iya ngagai nembiak Iya selalu mujur sereta dikinginka nyentukka sida “rinduka” disiplin. (Jaku Dalam 12:1) Sida ‘seruran ngingatka utai ti udah dipelajarka’ sida, lalu ‘nyaga iya enggau manah.’ (Jaku Dalam 4:13) Nuan ulih nulung anak nuan nerima disiplin enti nuan nitihka tiga chara disiplin ari Petara: Iya nya (1) pengerindu, (2) pengumbas iya, sereta (3) tetap.

 DISIPLIN ENGGAU PENGERINDU

Petara meri disiplin ketegal pengerindu. Bup Kudus madahka: ‘Petara madahka penyalah orang ke dikerinduka Iya, baka apai indai ke madahka penyalah anak ke dikemegahka sida.’ (Jaku Dalam 3:12) Pia mega, Jehovah nya “kasih sereta siru, lubah ringat.” (Pemansut 34:6) Ketegal tu, Jehovah enda kala ngemediska tauka merinsaka orang. Iya mega enda kala ngena jaku kasar, jaku jai tauka ngemediska ati, ke ulih “ngasuh ati balat telih.”—Jaku Dalam 12:18.

DINGAKA

Endang amat, apai indai enda ulih neladan Petara enggau sempurna. Kekadang apai indai enda entu ulih sabar. Tang anang enda ingat, disiplin ke diberi lebuh nuan benung ringat kesuah agi udu nekan, enda tetagang sereta nadai asil. Pia mega, ukum ke diberi ketegal pengeringat ukai disiplin. Nya nunjukka kitai enda tetagangka diri.

Tang, lebuh nuan meri disiplin enggau pengerindu sereta ulih nagang diri, nuan deka bulih asil ti manah agi. Peratika baka ni George enggau Nicole ke udah disebut tadi mutarka penanggul anak sida.

BESAMPI

“Lebuh Jordan datai, aku enggau bini aku balat pedis ati, tang kami ulih nagang diri lebuh kami ningaka utai ti dipadah iya. Laban nyau udah laun malam, kami mutuska deka berandau pasal pekara nya pagi siti. Sebedau tinduk, kami menyanak besampi dulu. Hari siti, kami ngasaika diri nyamai agi sereta ulih berandau enggau nelap. Anak kami deka ninga, lalu nitihka disiplin ke diberi kami. Kami nemu disiplin ke diberi enggau pengeringat enda ulih meri asil ti manah. Enti kami mendingka dulu utai ke dipadah anak, asil iya manah agi.”—George.

BEJAKU

“Aku kelalu pedis ati meda anak lelaki aku malu menyadi indu iya. Tang aku enda terus nganu iya. Aku semina ngasuh iya pulai ke bilik iya, laban maya nya aku kelalu pedis ati sereta enda ulih berunding enggau betul. Maya ati aku udah chelap, aku madahka iya enda tau kasar. Aku mega madahka iya pemedis menyadi indu iya ketegal pengawa iya. Chara tu ulih ngajar iya. Iya minta ampun ngagai menyadi indu iya, lalu merap menyadi indu iya nya.”Nicole.

Amat, disiplin enggau ukum ti betul, patut seruran diberi enggau pengerindu.

 DISIPLIN ENGGAU PENGUMBAS IYA

Disiplin ari Jehovah seruran diberi enggau “atur ti lurus.” (Jeremiah 30:11; 46:28) Iya mikirka semua pekara nyengkaum pekara ti mit. Baka ni apai indai ulih neladan Iya? Stephen, ke disebut tadi, nerangka: “Taja pan kami balat tusah ati sereta enda nemu kebuah iya majak enggai ngaku ngenchuri tinchin nya, kami mikirka umur enggau penemu iya.”

Robert, laki Nicole, mega berundingka semua pekara dulu. Lebuh anak ngereja penyalah, iya selalu nanya diri empu: ‘Kati pekara tu nyadi sekali aja tauka suah? Kati anak aku lelak tauka sakit? Kati ulah iya nya nunjukka iya bisi penanggul bukai?

Apai indai ke nemu berunding mega nemu bala anak enda baka orang besai tuai. Rasul Paul nemu pasal pekara tu. Iya nulis: “Lebuh aku agi mit, aku bejaku baka anak mit, aku berunding baka anak mit.” (1 Korint 13:11) Ku Robert: “Siti utai ke nulung aku tetagangka diri, iya nya aku selalu berundingka utai ke digaga aku lebuh aku agi mit.”

Endang manah enti nuan enda ngarapka utai lebih ari ke patut. Taja pia, nuan enda patut ngelakka sida terus ngereja penyalah. Enggau ngira utai ti ulih digaga anak, pengurang anak, enggau utai bukai, nuan ulih nentuka disiplin ke diberi nuan nya patut sereta pengumbas iya.

ATUR DISIPLIN TI TETAP

‘Aku tu Jehovah, lalu Aku enda berubah,’ ku Malaki 3:6. Nembiak Petara arapka jaku tu, lalu ngasaika pengelikun ketegal jaku tu. Bala anak enda patut kakang ati enggau disiplin ke diberi. Enti disiplin ke diberi nuan enda tetap, anak engka tusah tauka enggai nitihka disiplin ke diberi nuan.

Kingatka jaku Jesus: ‘Semina sebut aja “Au” tauka “Enggai”.’ Apai indai patut ngereja utai ti disebut sida. (Matthew 5:37) Nya alai, berunding dulu. Anang semina nyebut utai, tang enda ngereja iya. Enti nuan madahka deka ngukum anak maya iya ngereja penyalah, anang enda ngereja nya.

Apai indai patut berandau enggau manah enti deka meri disiplin ti tetap. Robert nerangka: “Enti bala anak kami bulih pemendar ari aku ngereja siti-siti utai, tang utai nya udah ditagang bini aku, aku deka ngubah pemutus aku ngambika ulih nyukung pemutus bini aku.” Enti apai indai enda setuju enggau chara mutarka siti-siti penanggul, seduai iya patut berandauka pekara nya kediri sereta sama besetuju enggau pemutus ke udah digaga.

DISIPLIN ENDANG BEGUNA

Enti nuan neladan Jehovah iya nya meri disiplin enggau pengerindu, pengumbas iya, enggau atur disiplin ti tetap, nuan ulih pechaya anak nuan deka bulih penguntung. Iring ti pengerindu ari nuan ulih nulung anak nuan nyadi orang ke menyana, nemu berunding sereta betanggungjawap. Baka ke dipadah Bup Kudus: “Ajar anak mit jalai idup, nya baru sida deka ingatka ajar nya seumur idup.”—Jaku Dalam 22:6.