Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  April 2015

Seruran Arapka Jehovah!

Seruran Arapka Jehovah!

‘Panggaika pengarap kita berari ba Petara, kita ke nembiak aku.’—MAS. 62:8.

1-3. Nama kebuah Paul pechaya iya ulih arapka Jehovah? (Peda gambar ba pun pelajar.)

ENTI nuan nyadi orang Kristian ba Rome maya kurun keterubah, nuan idup ba maya ti balat tusah. Orang Kristian maya nya balat diperinsa orang Rome. Orang Rome ngumbai sida nunu menua Rome, lalu nuduh sida begedika orang. Mayuh ari bala menyadi Kristian ditangkap. Sekeda ari sida dipecharikka jelu. Iya ke bukai dipantang ba tiang, lalu ditunu idup-idup kena meri penampak maya malam hari. Ninting hari nuan engka ngumbai siti ari utai tu deka nyadi ba nuan.

2 Lebuh maya nya, rasul Paul dijil. Iya engka berunding sekalika menyadi Kristian iya deka nulung iya laban dulu agi ari nya nadai orang nulung iya. Tang, Paul udah bulih tulung ari Jehovah nengah Tuan Jesus. Iya nulis: ‘Tuan mengkang bediri ngimbai aku, lalu meri aku pengering.’ Jesus meri Paul pengering ke diguna iya. Paul mega nulis, iya udah “dilepaska  ari nyawa singa.”—2 Tim. 4:16, 17. * (Peda nota kaki.)

3 Paul agi ingat baka ni Jehovah kala nulung iya. Nya alai, iya pechaya Jehovah deka meri iya pengering kena betan ari penusah ke ditapi iya maya nya enggau ke dudi hari. Iya arap bendar ke tu, nyentukka iya nulis: ‘Tuan deka ngelepaska aku ari semua penyai.’ (2 Tim. 4:18) Paul nemu, taja pan bala menyadi Kristian enda ulih nulung iya, iya ulih seruran arapka Jehovah enggau Jesus deka nulung. Iya endang pechayaka utai tu.

PELUANG ENDUR KITAI ARAPKA JEHOVAH

4, 5. (a) Sapa seruran ulih nulung nuan? (b) Baka ni nuan ulih neguhka agi kaul nuan enggau Jehovah?

4 Kala nuan napi penusah besai lalu berasai enda dikibuhka sereta nadai orang nulung? Nuan engka nadai kereja tauka ditekan ba sekula. Nuan engka sakit raya tauka napi penguji besai ke bukai. Nuan engka minta tulung ari orang bukai, tang berasai asa ati laban sida enda ulih meri tulung nitihka dikedeka nuan. Endang amat, sekeda penusah enda ulih diputarka mensia. Enti pia, nama deka digaga nuan? Bup Kudus madahka kitai, ‘panggaika diri ba Jehovah.’ (J-lam 3:5, 6) Kati nuan ulih pechaya Iya deka nulung nuan? Ulih! Kitai ulih macha mayuh chunto ari Bup Kudus ke ngasuh kitai pechaya Jehovah endang amat nulung nembiak Iya.

5 Anang enda nyamai ati enti orang enda ulih nulung nitihka dikedeka nuan. Tang baka Paul, nyadika penguji nya peluang endur arapka Jehovah enggau pengabis ati. Nya mega peluang endur nuan meda baka ni Iya nyaga nuan. Enggau tu, pengarap nuan ba Jehovah sereta kaul nuan enggau Iya deka teguh agi.

KITAI PATUT ARAPKA JEHOVAH

6. Nama kebuah enda senang arapka Jehovah maya kitai bisi penusah besai?

6 Nuan engka bisi penusah besai ti ngenusahka ati nuan. Nuan udah enggau naka ulih mutarka penusah nya. Nuan mega udah besampi ngagai Jehovah minta tulung. Ulih nuan berasai lantang ati laban nuan arapka Iya deka nulung nuan? Ulih! (Bacha Masmur 62:8; 1 Peter 5:7.) Enti nuan deka bisi kaul ti manah enggau Jehovah, nuan patut belajar arapka Iya. Tang, tu enda selalu senang. Nama kebuah? Siti kebuah iya, Jehovah engka enda nyaut sampi nuan tekala nya.—Mas. 13:1, 2; 74:10; 89:46; 90:13; Hab. 1:2.

7. Nama kebuah Jehovah enda selalu nyaut sampi kitai tekala nya?

7 Nama kebuah Jehovah enda selalu nyaut sampi kitai tekala nya? Bup Kudus madahka Jehovah nya Apai kitai, lalu kitai tu anak Iya. (Mas. 103:13) Orang ke nyadi apai enda meri semua utai ti dipinta anak iya, tauka meri iya tekala nya. Iya nemu anak engka dekaka siti-siti utai tekala nya, tang udah nya enggai begunaka utai nya agi. Iya mega nemu utai ti pemadu manah ke anak iya, lalu iya nemu baka ni utai ti dipinta anak tau ngenusahka orang bukai. Iya nemu utai ti diguna anak, lalu iya nemu kemaya patut meri utai nya. Enti apai meri semua utai ti dipinta anak tekala nya, apai deka nyadi ulun anak. Jehovah, Apai kitai ti di serega, sayauka kitai. Ketegal Iya Penempa kitai, Iya nemu utai ti diguna kitai, lalu deka meri utai ti dipinta kitai ba maya  ti pemadu manah. Nya alai kitai patut nganti, lalu meda baka ni Jehovah nyaut sampi kitai.—Banding Isaiah 29:16; 45:9.

8. Nama disemaya Jehovah pasal naka ni kitai ulih betan?

8 Kingatka mega, Jehovah nemu naka ni kitai ulih betan. (Mas. 103:14) Nyadi, Iya meri kitai pengering kena betan. Endang amat, kekadang kitai engka ngasaika diri enda ulih betan. Tang Jehovah besemaya, enti penguji nya lebih ari ke ulih ditatka kitai, Iya deka meri kitai jalai kena “ngelepaska diri.” (Bacha 1 Korint 10:13.) Kitai ulih lantang ati laban kitai pechaya Jehovah nemu naka ni kitai ulih betan.

9. Nama patut digaga kitai enti kitai besampi minta tulung ari Jehovah, tang Iya enda nyaut kitai tekala nya?

9 Enti kitai besampi minta tulung ari Jehovah, tang Iya enda nyaut kitai tekala nya, besabar meh. Kingatka Jehovah keran nulung kitai, tang Iya nganti ba maya ti pemadu manah meri utai ti dipinta kitai. Bup Kudus madahka: ‘Jehovah nganti maya Iya deka kasihka kita. Iya sedia deka kasihka kita, laban Iya endang seruran ngereja utai ti ngena. Beberekat meh orang ke manggaika pengarap sida ba Jehovah.’—Isa. 30:18.

“NYAWA SINGA”

10-12. (a) Nama ngasuh nuan engka tusah nyaga diri sebilik ke sakit? (b) Lebuh nuan arapka Jehovah maya bisi penusah, baka ni tu deka ngubah kaul nuan enggau Iya? Beri chunto.

10 Penusah besai ke ditapi nuan engka ngasuh nuan ngasaika utai ti diasaika Paul, ke patut diselamatka ari “nyawa singa.” (2 Tim. 4:17) Lebuh maya nya, nuan patut bebendar agi arapka Jehovah. Chunto, nuan engka nyaga diri sebilik ke sakit. Nuan udah besampi ngagai Jehovah ngambika nulung nuan ngaga pemutus ti manah sereta ulih betan. * (Peda nota kaki.) Diatu nuan ulih ngasaika pengelantang laban nuan nemu Jehovah ulih meda, nemu asai ati sereta penusah nuan. Iya deka nulung nuan betan sereta tetap ati ngagai Iya.—Mas. 32:8.

11 Kekadang, Jehovah baka ke enda nulung nuan. Lutur engka enda setuju enggau chara berubat ke dipinta nuan. Tauka nuan ngarapka kaban belayan ngelantangka ati nuan, tang sida ngenusahka nuan agi. Selalu bepanggai ba Jehovah ngambika Iya meri nuan pengering. Mengkang semak ngagai Iya. (Bacha 1 Samuel 30:3, 6.) Udah nya, lebuh nuan nemu baka ni Jehovah nulung nuan, kaul nuan enggau Iya deka teguh agi.

12 Tu meh ti diasaika Linda. * (Peda nota kaki.) Iya udah lama nyaga apai indai iya ke sakit sebedau sida mati. Ku iya: “Lebuh maya nya, laki aku, menyadi lelaki aku enggau aku empu, selalu enda nemu nama utai ti patut digaga. Kekadang, kami berasai nadai daya agi. Tang lebuh ngenang utai ti udah nyadi, kami meda enggau terang baka ni Jehovah endang enggau kami. Iya ngeringka kami sereta nyediaka utai ti diguna kami, taja pan maya kami baka ke nadai runding agi.”

13. Baka ni pengarap ba Jehovah nulung Rhonda betan napi siti-siti penusah besai?

13 Arapka Jehovah enggau pengabis ati mega ulih nulung kitai betan ngelaban penusah ti besai. Tu meh utai ti diasaika Rhonda. Laki iya, ke ukai seiku ari  Saksi-Saksi Jehovah, udah nyarak iya. Lebuh maya nya, menyadi lelaki iya kena penyakit raya ti dikumbai lupus. Beberapa bulan udah nya, bini menyadi lelaki iya nya mati. Lebuh Rhonda baru lepas ari semua penusah nya, iya berengkah nyadi pengerintis biasa. Tang udah nya, indai iya ga mati. Baka ni Rhonda ulih betan ari semua penusah besai tu? Ku iya: “Aku bejaku enggau Jehovah ninting hari, indah pasal pemutus ti mit. Tu ngasuh aku arapka Jehovah. Tu ngajar aku bepanggai ba Iya ari ke bepanggai ba diri empu tauka ba orang bukai. Lalu tulung ke diberi Iya endang amat—semua utai ti diguna aku diberi Iya. Asil iya, aku ngasaika diri semak agi ngagai Jehovah.”

Indah utai ti nyadi ba ruang bilik nuan ulih nguji kaul nuan enggau Jehovah (Peda genteran 14-16)

14. Baka ni Jehovah ulih nulung nuan enti seiku ari kita sebilik dibuai ari gerempung?

14 Pikirka penanggul ti bukai. Enti sema seiku ari kita sebilik dibuai ari gerempung. Nuan nemu nama dipadah Bup Kudus pasal chara kitai nyaga kaul enggau orang ke dibuai ari gerempung. (1 Kor. 5:11; 2 Jhn. 10) Tang, ketegal nuan sayauka iya, nuan engka tusah tauka enda ulih nitihka perintah Bup Kudus. Kati nuan arapka Apai ti di serega deka meri nuan pengering kena ngasika Iya enggau tetap ati? Deka nuan ngena peluang tu endur nuan semak agi ngagai Jehovah?

15. Nama kebuah Adam enda ngasika Jehovah?

15 Baka ni penanggul tu sama enggau iya ke nyadi ba mensia keterubah, Adam? Kati iya pechaya iya agi ulih terus idup enti iya enda ngasika Jehovah? Enda, laban Adam ukai “kena tipu.” (1 Tim. 2:14) Nyadi, nama kebuah  iya enda ngasika Jehovah? Adam makai buah ke diberi bini iya, laban iya sayauka bini iya lebih agi ari Jehovah. Iya ningaka bini iya ari ke ningaka perintah Jehovah.—P-kal. 3:6, 17.

16. Sapa ti patut dikerinduka kitai lebih agi ari orang bukai, lalu nama kebuah?

16 Pemutus Adam ngajar kitai patut rinduka Jehovah lebih agi ari orang bukai. (Bacha Matthew 22:37, 38.) Lalu enti pengerindu kitai ngagai Jehovah teguh, kitai ulih nulung kaban belayan enggau chara ti pemadu manah, sekalika sida nyembah Jehovah tauka enda. Nya alai, teguhka meh pengerindu enggau pengarap nuan ngagai Jehovah. Enti nuan irauka diri sebilik ke dibuai ari gerempung, besampi meh ngagai Jehovah lalu padahka Iya semua utai ti diasaika nuan. * (Peda nota kaki.) (Rome 12:12; Plp. 4:6, 7) Taja pan nuan balat merinsa, kena meh peluang tu endur nuan neguhka agi kaul enggau Jehovah. Enggau tu, nuan deka arapka Iya, lalu nemu enggau ngasika Iya, deka meri asil ti pemadu manah.

SERAYA KITAI NGANTI

Ayanka ngagai Jehovah nuan arapka Iya enggau mengkang kisuk ba pengawa nginjil (Peda genteran 17)

17. Enti kitai mengkang kisuk enggau pengawa nginjil, nama utai ti ulih dikearapka kitai ari Jehovah?

17 Nama kebuah Jehovah nyelamatka Paul ari “nyawa singa”? Ku Paul: “Aku madahka semua pesan, ngambika semua orang bansa bukai ninga pesan nya.” (2 Tim. 4:17) Jehovah udah meri kitai pengawa ngerembaika “Berita Manah,” lalu Iya ngumbai kitai “sama bekereja” enggau Iya. (1 Tes. 2:4; 1 Kor. 3:9) Enti kitai mengkang kisuk enggau pengawa tu, kitai ulih arapka Jehovah deka meri semua utai ke diguna kitai. (Mat. 6:33) Lalu kitai deka senang agi nganti Jehovah nyaut sampi kitai.

18. Baka ni nuan ulih arap agi ke Jehovah, lalu neguhka agi kaul nuan enggau Iya?

18 Nya alai, teguhka meh kaul nuan enggau Jehovah ninting hari. Lebuh penguji datai, lalu nuan berasai irau ati, kena meh peluang tu endur nuan semak agi ngagai Jehovah. Bacha, belajar sereta belematika Jaku Petara, Bup Kudus. Terus besampi ngagai Jehovah sereta mengkang kisuk nyembah Iya. Enggau tu, nuan ulih arapka Jehovah deka nulung nuan betan ngelaban penguji nuan ke diatu enggau ke dudi hari.

^ per. 2 Paul engka diselamatka ari singa ke amat tauka ari penusah bukai.

^ per. 10 Pelajar ke nulung orang Kristian betan ngelaban penyakit enggau nulung orang ke nyaga sida bisi dikeluarka. Peda Awake! kena 8 Februari 1994; 8 Februari 1997; 22 Mei 2000; enggau 22 Januari 2001.

^ per. 12 Nama udah ditukar.

^ per. 16 Pelajar ke ulih nulung enti diri sebilik bisi ninggalka Jehovah udah dikeluarka. Peda Menara Jaga kena 1 September 2006, lambar 17-21, enggau 15 Januari 2007, lambar 17-20.