Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  April 2015

 TOPIK RANDAU | KATI NUAN DEKA BELAJARKA BUP KUDUS?

Program Belajarka Bup Kudus Ke Semua Orang

Program Belajarka Bup Kudus Ke Semua Orang

Saksi-Saksi Jehovah tebilang enggau pengawa nginjil. Kati nuan nemu, kami mega ngatur program belajarka Bup Kudus ba serata dunya?

Ba taun 2014, lebih ari 8,000,000 iku bala Saksi ba 240 iti menua ngatur program belajarka Bup Kudus enggau kira-kira 9,500,000 iku orang ninting bulan. * Endang amat, penyampau orang ke belajarka Bup Kudus enggau kami ngelui ari penyampau orang ke diau ba 140 iti menua!

Kena bejalaika pengawa ngajar tu, ninting taun Saksi-Saksi Jehovah ngeluarka kira-kira satu setengah biliun iti Bup Kudus, bup, majalah, tauka utai bukai ke dikena belajarka Bup Kudus—dalam kira-kira 700 bansa jaku! Pengawa ke nadai banding tu nulung orang belajarka Bup Kudus ngena bansa jaku ke dipilih sida empu.

 SAUT NGAGAI UTAI KESUAH DITANYA PASAL PROGRAM BELAJARKA BUP KUDUS KAMI

Baka ni chara belajar diatur?

Kami ngena bemacham topik ari Bup Kudus, lalu meresa ayat Bup Kudus ke bekaul enggau topik nya. Chunto, Bup Kudus nyaut tanya ke baka tu: Sapa Petara? Nama pemanah Iya? Sapa nama Iya? Dini endur Iya diau? Ulih kitai semak ngagai Iya? Tang iya ke tusah iya nya, dini saut iya ba Bup Kudus.

Kena nulung orang ngiga saut, kami ngena bup Nama Utai ti Bendar Diajar Bup Kudus? * Bup tu endang digaga kena nulung orang nemu batang ajar Bup Kudus. Tu nyengkaum pelajar pasal Petara, Jesus Kristus, pemerinsa mensia, pengangkat ari mati, sampi, enggau mayuh agi topik ke bukai.

 Kemaya enggau dini alai endur belajar?

Pengawa tu ulih diatur ba maya enggau endur ti dikedekaka nuan.

Ni pengelama sekali belajar?

Mayuh orang ngeletak sejam tauka lebih ninting minggu kena belajarka Bup Kudus. Tang, pengelama belajar tu tepulai ngagai nuan empu. Kami ulih nitihka jadual nuan. Sekeda orang belajar 10 tauka 15 minit aja ninting minggu.

Berapa ungkus belajar tu?

Pengawa belajar enggau utai ke dikena belajar nya pechuma. Tu sejalai enggau utai ke diasuh Jesus ngagai murid iya: “Kita udah nerima ngena chara pechuma, nya alai beri ngena chara pechuma.”—Matthew 10:8.

Ni pengelama program belajar?

Pengelama belajar nitihka peneka ati nuan. Bup Nama Utai ti Bendar Diajar Bup Kudus? bisi 19 iti Pelajar. Nuan ulih milih Pelajar ke dikedekaka nuan tauka belajarka semua Pelajar nya nitihka penyampat nuan empu.

Kati aku patut nyadi Saksi-Saksi Jehovah?

Enda. Kami nemu genap iku orang bisi hak milih nama utai ti deka dikearapka sida. Taja pia, orang ke bulih penemu pasal batang ajar Bup Kudus, ulih milih sekalika deka nyadi Saksi tauka enggai.

 Dini alai aku tau bulih mayuh agi penerang?

Laman Web jw.org nyediaka penerang ti betul pasal utai ti dipechaya enggau pengawa Saksi-Saksi Jehovah.

Baka ni aku ulih minta belajarka Bup Kudus?

^ per. 4 Program belajarka Bup Kudus kesuah agi diatur enggau seiku-seiku orang tauka dalam raban ti mit.

^ per. 9 Dikeluarka Saksi-Saksi Jehovah. Lebih ari 230 juta iti bup tu udah dichelak dalam lebih ari 260 bansa jaku.