Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 TOPIK RANDAU | KATI NUAN DEKA BELAJARKA BUP KUDUS?

Nama Kebuah Belajarka Bup Kudus?

Nama Kebuah Belajarka Bup Kudus?
  • Nama tuju pengidup?

  • Nama kebuah orang merinsa sereta mati?

  • Nama peluang ke jemah ila?

  • Kati Petara ibuhka aku?

Kala nuan berundingka tanya baka tu? Enti kala, nuan sama enggau orang bukai. Orang ba serata dunya berundingka tanya ti beguna pasal pengidup. Ulih nuan tegigaka saut iya?

Bejuta iku orang nyaut, “Ulih!” Nama kebuah? Laban sida udah tetemuka saut ti ngemuaska ati ari Bup Kudus. Deka nuan nemu nama saut ari Bup Kudus? Enti deka, nuan tau bulih penguntung ari program belajarka Bup Kudus ke diatur Saksi-Saksi Jehovah enggau pechuma. *

Endang amat, lebuh diasuh beratika Bup Kudus, sekeda orang madahka: “Aku nadai hari.” “Tusah amat nya.” “Aku enda ulih ngereja nya.” Tang, bisi ga sekeda orang enda berunding baka nya. Sida gaga ati nerima peluang belajarka Bup Kudus. Peratika sekeda chunto tu:

  • “Aku kala datai ke gerija Katolik enggau Protestant, ke rumah sembiang orang bansa Sikh enggau Buddha, lalu aku mega kala belajar pasal pengarap ba universiti. Tang, mayuh tanya aku pasal pengarap enda ulih disaut. Udah nya seiku ari Saksi-Saksi Jehovah datai ke rumah aku. Aku puas ati enggau saut ari Bup Kudus ke dipadah iya, nya alai aku setuju belajarka Bup Kudus.”—Gill, England.

  • “Aku bisi mayuh tanya pasal pengidup, tang saut ari paderi enda ngemuaska ati aku. Taja pia, seiku ari Saksi-Saksi Jehovah nyaut tanya aku semina ngena Bup Kudus. Lebuh iya nanya aku sekalika aku deka belajar mayuh agi, aku nerima enggau gaga ati.”—Koffi, Benin.

  • “Aku keran deka nemu nama penyadi ngagai orang ke udah mati. Aku ngumbai orang ke udah mati ulih ngachau orang ke agi idup, tang aku deka nemu nama dipadah Bup Kudus. Nya alai, aku berengkah belajarka Bup Kudus enggau kawan aku ke seiku ari Saksi.”—José, Brasil.

  • “Aku macha Bup Kudus, tang aku enda nemu utai ti dipadah dalam nya. Udah nya Saksi-Saksi Jehovah datai, lalu nerangka enggau terang sekeda utai ti dipadahka ba Bup Kudus. Aku deka nemu nama agi utai bukai ke ulih dipelajarka aku.”—Dennize, Mexico.

“Aku berunding sekalika Petara amat ibuhka aku tauka enda. Nya alai, aku besampi ngagai Petara ke dipadah ba Bup Kudus. Hari siti Saksi-Saksi ngetuk pintu rumah aku, lalu aku ka belajarka Bup Kudus.”—Anju, Nepal.

Semua chunto tu ngingatka kitai pasal jaku Jesus: “Beberekat meh orang ke seranta dalam roh.” (Matthew 5:3) Amat, mensia patut nemu pasal Petara. Semina Petara ulih ngemuaska utai ke diguna ba pengarap, lalu Iya nyediaka tu ngena Jaku Iya, Bup Kudus.

Nyadi, baka ni program belajarka Bup Kudus diatur? Baka ni iya nguntungka nuan? Tanya tu deka disaut ba artikel ke nangkanka tu.

^ per. 8 Jehovah nya nama Petara ke bisi ayan ba Bup Kudus.