Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

Baka Ni Kaul Nuan Enggau Jehovah?

Baka Ni Kaul Nuan Enggau Jehovah?

‘Datai semak ngagai Petara, lalu Iya deka datai semak ngagai kita.’—JAS. 4:8.

1. Nama kebuah kitai patut nyaga kaul enggau Jehovah?

ENTI nuan nya Saksi Jehovah ke udah dibaptisa, nuan bisi utai ti amat berega. Nuan bisi kaul enggau Jehovah. Tang, kaul nya diserang dunya Sitan, lalu kaul nya ulih lemi ketegal kitai enda sempurna. Nya alai, semua kitai patut enggau naka ulih nyaga kaul enggau Jehovah.

2. (a) Nama reti kaul? (Peda nota kaki.) (b) Baka ni kitai ulih neguhka kaul enggau Jehovah?

2 Kati nuan arapka Jehovah? Kati nuan ngasaika Iya, Pangan nuan? Kati nuan deka kaul nuan enggau Iya teguh agi? James 4:8 madahka nama patut dikereja nuan: ‘Datai semak ngagai Petara, lalu Iya deka datai semak ngagai kita.’ Nuan enggau Jehovah sama bisi begian ba kaul tu. * (Peda nota  kaki.) Enti nuan deka semak ngagai Jehovah, Iya pan deka semak ngagai nuan. Bendar agi nuan ngereja tu, arap agi nuan ke Iya, lalu kaul nuan pan semak agi nyentukka nuan deka ngasaika utai ti diasaika Jesus maya iya nyebut: ‘Iya ke ngirumka aku endang tau dikarapka’ lalu, ‘aku ngelala Iya.’ (Jhn. 7:28, 29) Tang, nama utai ti ulih digaga nuan ngambika semak agi ngagai Jehovah?

Baka ni nuan ulih bejaku enggau Petara? (Peda genteran 3)

3. Baka ni kitai ulih bejaku enggau Jehovah?

3 Enti nuan deka semak ngagai Jehovah, nuan patut selalu bejaku enggau Iya. Tang, baka ni? Pikirka baka ni nuan ulih bejaku enggau kawan nuan ke diau jauh. Nuan ulih selalu betulis surat tauka bejaku ngena telefon. Nuan bejaku enggau Jehovah, enti nuan selalu besampi ngagai Iya. (Bacha Masmur 142:2.) Tang, baka ni nuan ulih ngawakka Jehovah bejaku enggau nuan? Enggau selalu macha jaku Iya, Bup Kudus, lalu belematika ayat nya. (Bacha Isaiah 30:20, 21.) Aram kitai meda baka ni jaku entara nuan enggau Jehovah ulih neguhka kaul nuan enggau Iya sereta nyadika Iya, Pangan nuan ti bendar.

AWAKKA JEHOVAH BEJAKU ENGGAU NUAN MAYA NUAN BELAJARKA BUP KUDUS

4, 5. Baka ni Jehovah bejaku enggau nuan lebuh nuan belajarka Bup Kudus? Beri chunto.

4 Kitai nemu Bup Kudus nya pesan Petara ke semua orang. Tang, ulih Bup Kudus nulung nuan semak agi ngagai Jehovah? Ulih! Lebuh nuan selalu macha enggau belajarka Bup Kudus, peratika nama asai ati nuan pasal utai ti dibacha. Lalu pikirka baka ni nuan ulih nitihka utai ti dipelajar. Lebuh nuan ngereja tu, nuan ngawakka Jehovah bejaku enggau nuan. Iya nyadi Pangan rapat ke nulung nuan, lalu nuan semak agi ngagai Iya.—Heb. 4:12; Jas. 1:23-25.

5 Chunto, baka ni asai ati nuan maya macha jaku Jesus: “Anang nyimpan pengaya ke diri empu di dunya”? Enti nuan enggau naka ulih ngenuluka Jehovah ba pengidup, nuan deka ngasaika Iya rinduka nuan. Maya nuan macha jaku Jesus nya, nuan nemu nuan patut puas enggau utai ti dikemisi diri, lalu beberatka agi sembah ngagai Jehovah. Jehovah ulih nulung nuan nemu utai ti patut digaga nuan ngambika semak agi ngagai Iya.—Mat. 6:19, 20.

6, 7. (a) Lebuh kitai belajarka Bup Kudus, nama penyadi enggau pengerindu kitai ke Jehovah sereta pengerindu Iya ke kitai? (b) Nama juluk ati ke patut dikembuan kitai maya belajarka Bup Kudus?

 6 Endang amat, lebuh kitai belajarka Bup Kudus, kitai belajar pasal utai ti patut digaga kena nyembah Jehovah enggau manah agi. Kitai mega belajar pasal pemanah enggau utai manah ke dikereja Iya, ke ngasuh kitai rindu agi ke Iya. Lalu lebuh pengerindu kitai ke Iya mansang, pengerindu Iya ke kitai mega mansang, lalu kaul kitai enggau Iya majak teguh agi.—Bacha 1 Korint 8:3.

7 Enti kitai deka semak ngagai Jehovah, kitai patut belajarka Bup Kudus enggau tuju ti betul. Ku Jesus: ‘Tu pengidup ti meruan belama iya, ngambika sida ngelala Nuan, Petara ti bendar, enggau Jesus Kristus, ke dikirumka Nuan.’ (Jhn. 17:3) Kitai ulih belajarka mayuh utai ti baru sereta ngerinduka ati maya kitai macha Bup Kudus, tang juluk ati ke patut dikembuan kitai iya nya deka ngelala Jehovah enggau dalam agi.—Bacha Pemansut 33:13; Mas. 25:4.

8. (a) Nama dipikirka sekeda orang pasal chara Jehovah ngukum Raja Usiah? (b) Enti nuan ngelala Jehovah, baka ni asai ati nuan pasal pekara ti digaga Iya?

8 Enti kitai ngumbai Jehovah nya Pangan rapat, kitai enda irau enti Bup Kudus enda selalu nerangka kebuah Iya ngereja siti-siti pekara. Chunto, lebuh Usiah nyadi raja orang Judah, rayat iya nyembah petara pelesu. Usiah enda enggau sida. ‘Raja Usiah ngereja utai ti ngerinduka ati Jehovah.’ (2 Raj. 15:1-5) Tang, Jehovah ngukum Usiah ngena penyakit kulit. Nama kebuah? Jerita tu nadai madahka kitai. Nyadi, baka ni asai ati nuan pasal pekara ti digaga Jehovah? Kati tu ngirauka ati nuan, lalu nuan ngasaika Jehovah nya enda lurus, laban ngukum Usiah enggau nadai kebuah? Enda. Enti nuan ngelala Jehovah enggau manah agi, nuan nemu ukum Iya seruran ngena. Iya seruran ngukum “enggau ati ti lurus.” (Jer. 30:11) Nya alai, taja pan nuan engka enda nemu kebuah Jehovah ngukum Usiah, nuan tau pechaya Jehovah endang ngereja utai ti ngena.

9. Nama penerang ti nulung kitai nemu kebuah Jehovah ngukum Usiah ngena penyakit kulit?

9 Bup Kudus bisi meri kitai mayuh agi penerang pasal Raja Usiah. (2 Raj. 15:7, 32) Jerita ba 2 Bansa Israel 26:3-5, 16-21 madahka iya ngereja ‘utai ti ngerinduka ati Jehovah.’ Tang, udah nya Bup Kudus madahka “penyumbung iya ngujungka iya dibuai.” Raja tu ngereja pengawa ke semina ulih digaga bala imam. Lapan puluh satu iku imam madahka pengawa iya salah, lalu sida nagang iya. Nama digaga iya? Iya udah kelalu sumbung, nyentukka iya ringat ngagai sida! Penerang tu nulung kitai nemu kebuah Jehovah ngukum raja nya ngena penyakit kulit.

10. Nama kebuah kitai tau enda ibuh nemu kebuah Jehovah ngereja siti-siti pekara? Baka ni kitai tau arap Jehovah seruran ngereja utai ti ngena?

10 Nama ulih dipelajarka kitai? Ari jerita Raja Usiah, kitai bisi penerang ti chukup kena nulung kitai nemu kebuah Jehovah ngukum iya. Tang lebuh Bup Kudus enda meri semua penerang, nama deka digaga nuan? Kati nuan amat pechaya Jehovah ngereja utai ti ngena? Kati nuan ngasaika Bup Kudus bisi penerang ti chukup ke ngasuh nuan arapka Petara seruran ngereja utai ti ngena? (U-dat. 32:4) Enti  nuan ngelala Jehovah enggau manah agi, nuan deka rindu sereta arap agi ke Iya. Lalu nuan tau enda ibuh nemu kebuah Iya ngereja siti-siti pekara. Lebuh nuan belajarka Bup Kudus, nuan deka arap sereta semak agi ngagai Jehovah.—Mas. 77:12, 13.

NUAN BEJAKU ENGGAU JEHOVAH ENTI NUAN BESAMPI

11-13. Baka ni nuan nemu Jehovah ningaka sampi? (Peda gambar ba pun pelajar.)

11 Enti kitai besampi, kitai semak ngagai Jehovah. Kitai muji Iya, beterima kasih ke Iya sereta minta tulung ari Iya. (Mas. 32:8) Tang enti nuan deka bisi kaul ti rapat enggau Jehovah, nuan patut arapka Iya ningaka sampi.

12 Sekeda orang madahka Petara enda ningaka sampi, lalu ngumbai sampi nya semina dikena ngenyamaika ati sida empu. Sida pechaya sampi nya semina chara kena nulung berundingka penanggul diri sereta chara kena mutarka penanggul nya kediri empu. Tu engka amat. Tang, lebuh nuan bejaku enggau Jehovah ngena sampi, Iya endang ningaka nuan. Baka ni nuan tau arapka Iya ningaka sampi nuan?

13 Pikirka tu: Sebedau Jesus datai ke dunya, iya meda Jehovah nyaut sampi nembiak Iya ke ba dunya. Lebuh ba dunya, Jesus besampi ngagai Apai iya ke ba serega, madahka runding enggau asai ati iya. Bisi sekali, iya besampi semalam-malam. (Luk. 6:12; 22:40-46) Deka Jesus ngereja tu enti iya nemu Jehovah enda ninga? Jesus mega ngajar murid iya chara besampi ngagai Jehovah. Deka Jesus ngajar sida besampi enti iya nemu Jehovah enda ningaka sampi? Jesus enggau terang nemu Jehovah endang ningaka sampi. Indah iya madahka: ‘Apai, aku meri terima kasih ngagai Nuan, laban Nuan udah ninga aku. Aku nemu Nuan endang seruran ninga aku.’ Kitai mega tau arapka Jehovah ningaka sampi kitai.—Jhn. 11:41, 42; Mas. 65:2.

14, 15. (a) Baka ni kitai bulih penguntung enti kitai madahka semua utai ba sampi kitai? (b) Baka ni sampi Kathy nulung iya semak agi ngagai Jehovah?

14 Kekadang kitai enda nemu baka ni  sampi kitai deka disaut. Tang enti nuan madahka semua utai ba sampi nuan, nuan ulih meda Jehovah nyaut sampi nuan enggau terang, lalu nuan deka arap agi ke Iya. Enti nuan madahka Jehovah semua utai ti ngirauka ati nuan, Iya deka semak agi ngagai nuan.

15 Chunto, Kathy suah enggau nginjil, tang iya enda rinduka pengawa nya. * (Peda nota kaki.) Ku iya: “Aku endang enda rindu nginjil.” Pengudah iya pinchin, seiku tuai gempuru meransang iya nyadi pengerintis biasa. Ku iya: “Indah tuai gempuru nya nyuaka aku pom pengerintis. Aku mutuska diri deka nyadi pengerintis, tang aku mega berengkah besampi ngagai Jehovah ninting hari ngambika nulung aku rinduka pengawa nginjil.” Kati Jehovah nyaut sampi iya? Pengudah tiga taun nyadi pengerintis, diatu iya madahka: “Ketegal ngena mayuh jam ba pengawa nginjil sereta belajar ari menyadi Kristian indu ke bukai, aku belubah-lubah landik ba pengawa nginjil. Diatu, aku ukai semina deka nginjil—aku rindu nginjil. Kelebih agi, kaul aku enggau Jehovah semak agi ari ke udah.” Sampi Kathy amat nulung iya semak agi ngagai Jehovah.

Majak semak ngagai Jehovah (Peda genteran 16, 17)

GAGA BEGIAN NUAN

16, 17. (a) Nama patut digaga kitai kena neguhka kaul enggau Jehovah? (b) Nama deka dikerandauka kitai ba pelajar ke nangkanka tu?

16 Kitai ulih majak semak ngagai Jehovah belama iya. Nya alai, terus ningaka Iya enggau selalu belajarka Bup Kudus sereta terus bejaku enggau Iya ngena sampi. Enggau tu, kaul kitai enggau Jehovah majak teguh agi, lalu enggau tulung ari Iya kitai ulih betan ngelaban penguji.

17 Taja pan kitai suah besampi ngagai Jehovah, tang kekadang kitai agi ngasaika penusah nya. Maya tu kitai engka berengkah enda arapka Jehovah. Kitai engka ngasaika Jehovah enda ningaka sampi kitai, lalu berunding sekalika kitai tu amat pangan Iya tauka ukai. Enti pia, nama patut digaga nuan? Pelajar ke nangkanka tu deka nulung nuan.

^ per. 2 Kaul reti iya chara dua iku orang ngayanka pengasai ati sereta chara seduai iya begulai enggau diri sama diri. Seduai iya patut sama-sama neguhka kaul tu.

^ per. 15 Nama udah ditukar.