Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  Mac 2015

“Nya Endang Peneka Nuan”

“Nya Endang Peneka Nuan”

“Nuan udah ngelalaika utai nya ari orang ke bepenemu-dalam sereta bepelajar, lalu udah mandangka utai nya ngagai bala anak mit.”—LUK. 10:21.

1. Nama kebuah Jesus “gaga ati dalam roh”? (Peda gambar ba pun pelajar.)

UJI pikirka baka ni gamal mua Jesus lebuh iya “gaga ati dalam roh.” Iya engka balat tuchum sereta mata iya penuh laban pengaga. Nama kebuah? Iya baru nganjung 70 iku murid iya ngerembaika berita manah pasal Perintah Petara. Jesus keran deka nemu baka ni sida bejalaika pengawa ke diberi iya, laban berita manah bisi mayuh munsuh. Bala munsuh tu nyengkaum sida pengajar Adat enggau orang Parisi, ke bepelajar sereta pandai. Sida deka orang ngumbai Jesus nya semina tukang kayu, lalu ngumbai murid iya “ukai orang ke bepelajar, tang orang ke sengapa-dia.” (SKR. 4:13; Mrk. 6:3) Taja pia, lebuh bala murid pulai nginjil, sida balat gaga ati. Sida ulih nginjil taja pan disakal orang enggau bala antu! Nama kebuah sida ulih mengkang gaga ati sereta berani?—Bacha Luke 10:1, 17-21.

2. (a) Baka ni bala murid Jesus baka anak mit? (b) Nama nulung bala murid Jesus meretika pemendar Bup Kudus ti dalam?

2 Jesus madahka Jehovah: “Aku meri terima kasih ngagai Nuan Apai, Tuhan ke bekuasa di serega enggau di dunya,  laban Nuan udah ngelalaika utai nya ari orang ke bepenemu-dalam sereta pandai, lalu udah mandangka sida ngagai bala anak mit. Sigi amat Apai, laban nya endang peneka Nuan.” (Mat. 11:25, 26) Nama kebuah Jesus ngumbai bala murid iya anak mit? Laban sida sanggup diajar baka anak mit, enda baka sida pengajar Adat enggau orang Parisi ke bepelajar tinggi sereta ngumbai diri bepenemu. Sida belajar ngemaruhka diri, ukai sumbung. (Mat. 18:1-4) Ketegal sida baruh ati, Jehovah ngena roh kudus Iya nulung sida meretika pemendar Bup Kudus ti dalam. Tang, tuai pengarap Judah mengkang dibutaka Sitan enggau penyumbung sida.

3. Nama deka dikerandauka kitai ba pelajar tu?

3 Nya meh kebuah Jesus balat gaga ati! Iya gaga meda chara Jehovah madahka pemendar Bup Kudus ti dalam ngagai orang ke baruh ati, enda ngira ni pemandai sida. Chara ngajar tu dikedekaka Petara, lalu Iya enda berubah. Baka ni Iya nunjukka Iya agi dekaka chara ngajar tu? Ba pelajar tu, kitai deka belajar baka ni Jehovah madahka pemendar Bup Kudus ti dalam ngagai orang ke baruh ati kemaya hari tu.

NERANGKA PEMENDAR TI DALAM NGAGAI SEMUA

4. Baka ni edisi Menara Jaga ke mudah nyadi pemeri?

4 Apin lama ti udah, gerempung Petara udah beberatka pengawa ngajar ngena chara ti mudah sereta terang. Aram kitai berandauka tiga iti chunto. Kesatu, kitai bisi edisi Menara Jaga ke mudah. * (Peda nota kaki.) Tu pemeri ti udah nulung mayuh orang, nyengkaum orang ke tusah macha tauka ngena bansa jaku bukai. Apai indai ngasaika bala anak meretika pelajar ba Menara Jaga enggau manah agi. Mayuh orang udah nulis surat terima kasih. Seiku menyadi Kristian indu madahka suba iya takut deka meri komen lebuh belajarka Menara Jaga. Tang diatu enda agi! Pengudah ngena edisi ke mudah, iya nulis: “Diatu aku meri komen lebih ari sekali, lalu enda takut agi! Aku beterima kasih ngagai Jehovah enggau nuan.”

5. Nama sekeda penguntung ke diulih ari edisi baru New World Translation of the Holy Scriptures?

5 Kedua, kitai bisi edisi baru New World Translation of the Holy Scriptures, ke dikeluarka dalam jaku English ba aum ti diatur ninting taun kena 5 Oktober, 2013. * (Peda nota kaki.) Mayuh ayat Bup Kudus udah dipandakka, tang reti iya tetap sama sereta senang agi dimeretika. Chunto, leka jaku ba Jop 10:1 dikurangka ari 27 ngagai 19, lalu leka jaku ba Jaku Dalam 8:6 dikurangka ari 20 ngagai 13. Reti kedua iti ayat tu terang agi ba edisi baru. Seiku menyadi lelaki ke diiri ngena roh kudus ke udah betaun nyembah Jehovah enggau tetap ati madahka, “Aku baru abis macha bup Jop dalam edisi baru, lalu aku ngasaika diri baru nemu utai dipadah dalam bup nya!” Mayuh orang nyebut utai ti sama.

6. Baka ni asai ati nuan pasal penemu ti terang agi ba Matthew 24:45-47?

 6 Ketiga, pikirka sekeda chara meretika ayat Bup Kudus enggau terang agi. Chunto, penemu ti terang agi pasal “ulun ke tetap ati sereta bepenemu-dalam” udah dikeluarka Menara Jaga kena 15 Julai, 2013. (Mat. 24:45-47) Pelajar nya nerangka ulun ke tetap ati nya, Orang ti Megai. Lalu “semua ulun ti bukai” nya bala orang ke diiri ngena roh kudus. Kelimpah ari sida, bisi mega “bedus ti bukai.” Semua sida diintu ulun ke tetap ati nya. (Jhn. 10:16) Kitai gaga ati belajar sereta ngajar orang bukai pasal pemendar tu! Nama agi chara bukai nunjukka Jehovah dekaka chara ngajar ti mudah sereta terang?

PENERANG JERITA BUP KUDUS TI MUDAH AGI

7, 8. Nama sekeda chunto jerita Bup Kudus ke ngambarka utai besai ke deka nyadi?

7 Enti nuan udah betaun nyembah Jehovah, nuan tentu ulih beratika baka ni chara litaricha nerangka sekeda jerita Bup Kudus udah berubah. Suba, kitai selalu ngumbai sekeda jerita ngambarka utai besai ke deka nyadi. Jerita tu dikumbai gambar tauka ayuk. Utai ti digambarka jerita dikumbai nyengala. Kati bisi kebuah ti manah nerangka jerita Bup Kudus ngena chara tu? Bisi. Ngambika chunto, Jesus nunjukka “tanda nabi Jonah.” (Bacha Matthew 12:39, 40.) Jesus nerangka pengelama Jonah dalam perut ikan, ngambarka pengelama iya deka mati dalam kubur.

8 Bisi mega jerita Bup Kudus bukai ke ngambarka utai besai ke deka nyadi. Rasul Paul nerangka sekeda ari jerita tu. Chunto, kaul entara Abraham enggau Hagar seduai Sarah ngambarka kaul entara Jehovah enggau bansa Israel sereta enggau sida ke bisi begian ba Gerempung Petara ti di serega. (Gal. 4:22-26) Pia mega, langkau sembiang, rumah sembiang, Hari Pengampun Dosa, imam besai, sereta utai bukai ba Adat nya, “ayuk utai ti badas ti deka datai.” (Heb. 9: 23-25; 10:1) Pengarap kitai dikeringka lebuh belajarka jerita Bup Kudus tu enggau utai ti digambarka iya. Tang, kati tu nunjukka tiap iku orang, penyadi, sereta utai ti dipadahka ba Bup Kudus ngambarka orang tauka utai?

9. Suba, baka ni jerita Bup Kudus pasal Nabot diterangka?

9 Suba, litaricha kitai suah nerangka orang, penyadi, tauka utai dalam sekeda jerita, ngambarka orang tauka utai. Chunto, Kuin Jesebel munuh Nabot awakka laki iya, Ahap, ulih ngambi kebun anggur Nabot. (1 Raj. 21:1-16) Ba taun 1932, Menara Jaga nerangka Ahap seduai Jesebel ngambarka Sitan enggau gerempung iya. Nabot ngambarka Jesus, lalu pemati Nabot ngambarka Jesus mati dibunuh. Tang, ba taun 1961, bup “Let Your Name Be Sanctified” madahka Nabot ngambarka orang ke diiri ngena roh kudus, lalu Jesebel ngambarka Gerempung Gerija. Pia mega, Jesebel ke munuh Nabot ngambarka orang ke diiri ngena roh kudus ke dibunuh ba hari ti penudi. Penerang tu udah ngeringka pengarap nembiak Petara betaun-taun. Tang diatu, nama kebuah kitai nerangka penemu tu ngena chara bukai?

10. (a) Baka ni ulun ke tetap ati bejimat agi lebuh nerangka sekeda jerita Bup Kudus? (b) Kemaya hari tu, litaricha kitai beberatka nama?

 10 Betaun-taun Jehovah udah nulung “ulun ke tetap ati sereta bepenemu-dalam” bejimat agi. Baka ni? Diatu, ulun ke tetap ati bejimat madahka jerita Bup Kudus ke ngambarka utai besai ke deka nyadi. Sida semina ngereja nya enti bisi kebuah ti terang ari Bup Kudus. Sekeda penerang lama pasal gambar tauka nyengala tusah dimeretika, dikingat, tauka dikena ba pengidup. Kelebih agi, enti kelalu beratika reti jerita Bup Kudus, ajar ke ulih dikena ba pengidup tau lenyau. Nya alai, litaricha kitai kemaya hari tu beberatka ajar ti mudah pasal pengarap, pengeliat ati, pengudus, sereta pemanah bukai ti berega ke ulih dipelajarka ari jerita Bup Kudus. *—Peda nota kaki.

Teladan Nabot ngajar kitai pekara ti beguna (Peda genteran 11)

11. (a) Baka ni kitai diatu meretika jerita pasal Nabot, lalu baka ni teladan iya ulih nulung kitai? (b) Baru-baru tu, nama kebuah litaricha kitai jarang nyebut pasal gambar tauka nyengala?

11 Diatu, penemu kitai pasal jerita Nabot terang sereta mudah agi. Nabot ukai mati ketegal iya ngambarka Jesus tauka orang ke diiri ngena roh kudus. Tang, iya mati laban iya keran deka tetap ati ngagai Petara. Iya mengkang ngasika Adat Jehovah, taja pan balat diperinsa pemerintah ti bekuasa. (P-pau. 36:7; 1 Raj. 21:3) Tu teladan ti manah ke semua nembiak Petara ke natka pemerinsa ti sama kemaya hari tu. (Bacha 2 Timoti 3:12.) Semua orang Kristian ulih meretika, ingatka, lalu ngena ajar nya sereta ngeringka pengarap sida.

12. (a) Nama penemu ti enda patut disimpul kitai pasal jerita Bup Kudus? (b) Nama kebuah kitai tau bulih penerang ti terang pasal utai ti dalam ba Bup Kudus? (Peda nota kaki.)

12 Patut kitai nyimpulka jerita Bup Kudus semina ngembuan ajar ke ulih dikena ba pengidup? Enda. Tang, ari ke nerangka sekeda jerita Bup Kudus nya baka gambar enggau nyengala, litaricha kitai beberatka baka ni jerita  Bup Kudus bekaul enggau pangan diri. Chunto, penaluk Nabot ke diperinsa nyentuk ke iya mati, ngingatka kitai pasal penaluk Kristus enggau orang ke diiri ngena roh kudus. Pia mega, tu ngingatka kitai pasal penaluk mayuh “bedus ti bukai.” Kitai ulih meda enggau terang baka ni Jehovah ngajar kitai ngena chara ti mudah. *—Peda nota kaki.

PENERANG TI MUDAH PASAL SEMPAMA JESUS

13. Nama chunto nunjukka kitai diatu nerangka sekeda sempama Jesus ngena chara ti mudah sereta terang agi?

13 Jesus Kristus nya Pengajar ti pemadu tebilang ke kala idup. Iya rindu ngena sempama tauka chunto kena ngajar. (Mat. 13:34) Sempama endang manah laban iya nerangka penemu ti dalam ngena chara ti mudah, ke ulih ngasuh kitai berunding sereta negu ati. Betaun-taun litaricha kitai udah nerangka sempama Jesus ngena chara ti mudah sereta terang agi. Chunto, Menara Jaga kena 15 Julai, 2008, nulung kitai meretika sempama Jesus enggau terang agi pasal ragi, igi ensabi, sereta pukat. Diatu, kitai ulih meda sempama tu ngambarka Perintah Petara, ke udah nulung mayuh orang nulak dunya ti jai, lalu nyadi murid Kristus.

14. (a) Baka ni kitai nerangka sempama pasal orang Samaria ke manah ati? (b) Baka ni kitai meretika sempama Jesus nya diatu?

14 Baka ni kitai ulih meretika jerita tauka sempama Jesus enggau terang agi? Sekeda ari jerita tu semina lambang tauka jaku bala nabi. Sekeda ngajar penemu ke ulih dikena ba pengidup. Tang, baka ni kitai ulih nemu sekalika jerita nya lambang tauka ukai? Saut iya majak terang ari taun ke taun. Chunto, pikirka chara kitai ngena penerang pasal sempama Jesus senentang orang Samaria ke manah ati. (Luk. 10:30-37) Ba taun 1924, Menara Jaga madahka orang Samaria nya ngambarka Jesus, lalu jalai nurun ari Jerusalem nuju ke Jeriko, ngambarka pendiau mensia ke majak tusah kenyau ari pengawa ngelaban Petara ba kebun Eden. Pia mega, bala penyamun ba jalai ngambarka gerempung pengawa dagang enggau orang dagang ke amu, lalu imam enggau orang Lewi ngambarka Gerempung Gerija. Tang kemaya hari tu, litaricha kitai ngena sempama nya kena ngingatka semua orang Kristian enda tau berat sepiak. Kitai patut nulung semua orang ke begunaka bantu, kelebih agi nulung sida belajarka pemendar pasal Petara. Tu mai pengaga lebuh kitai meda Jehovah ngasuh pemendar nya terang agi.

15. Nama deka dikerandauka kitai ba pelajar ti deka datai?

15 Ba pelajar ti deka datai, kitai deka berandauka sempama Jesus pasal sepuluh iku indu dara. (Mat. 25:1-13) Baka ni Jesus deka bala murid iya ba hari ti penudi meretika sempama nya? Kati tiap iku orang, utai, tauka penyadi dalam sempama tu ngambarka orang tauka utai besai ke deka nyadi? Tauka iya deka kitai belajarka utai ti ulih dikena ba pengidup, ke ulih nulung kitai ba hari ti penudi? Aram kitai beratika iya.

^ per. 4 Edisi ke mudah terubah iya digaga dalam jaku English kena Julai 2011. Kenyau ari nya, edisi ke mudah udah digaga dalam sekeda bansa jaku bukai.

^ per. 5 Edisi baru deka digaga dalam bansa jaku bukai.

^ per. 10 Chunto, bup Imitate Their Faith berandau pasal 14 pengidup orang ba Bup Kudus. Bup tu beberatka ajar ke ulih dikena ba pengidup, ukai beberatka gambar tauka nyengala.

^ per. 12 Jaku Petara mega ngembuan utai ti baka ke “tusah dimeretika,” nyengkaum sekeda ari utai ke ditulis Paul. Tang, semua penulis Bup Kudus diiring roh kudus. Roh kudus Petara nulung orang Kristian ti bendar kemaya hari tu meretika Bup Kudus, nyengkaum ‘utai ti dalam . . . runding Petara.’—2 Pet.3:16, 17; 1 Kor. 2:10.