Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  Mac 2015

Enggau Taluk Nyukung Menyadi Kristus

Enggau Taluk Nyukung Menyadi Kristus

‘Lebuh kita ngereja utai tu ngagai siku ari menyadi aku ti pemadu mit tu, kita ngereja nya ngagai aku!’—MAT. 25:40.

1, 2. (a) Nama sempama ti dipadah Jesus ngagai kaling rapat iya? (Peda gambar ba pun pelajar.) (b) Nama patut ditemu kitai pasal sempama bedus enggau kambin?

JESUS benung bejaku ngagai kaling rapat iya Peter, Andrew, James enggau John pasal utai ti ngerinduka ati. Pengudah madahka sida sempama pasal ulun ke tetap ati sereta bepenemu-dalam, sepuluh iku indu dara, enggau duit emas, Jesus madahka siti da agi sempama. Ba sempama nya, iya bejaku pasal maya “Anak Mensia” deka ngakim “semua bansa.” Iya madah “Anak Mensia” deka nyerara orang nyadi dua raban, seraban dikumbai bedus lalu seraban da agi dikumbai kambin. Iya mega madahka pasal raban ketiga, iya nya “menyadi” Raja.—Bacha Matthew 25:31-46.

2 Baka bala rasul, nembiak Jehovah kemaya hari tu mega beminat enggau sempama tu, laban iya bekaul enggau pengidup orang. Jesus madahka sekeda orang deka bulih pengidup belama iya, tang iya ke bukai deka dipunaska. Nya kebuah, endang beguna kitai nemu reti sempama nya enggau nemu utai ti patut digaga kitai ngambika bulih  pengidup belama iya. Ba pelajar tu, kitai deka nyaut tanya tu: Baka ni Jehovah nulung kitai meretika sempama tu? Baka ni kitai nemu sempama tu beberatka pengawa nginjil? Sapa patut nginjil? Lalu nama kebuah orang patut taluk ngagai “Raja” sereta “menyadi” iya diatu?

BAKA NI JEHOVAH NULUNG KITAI MERETIKA SEMPAMA NYA?

3, 4. (a) Nama patut ditemu kitai kena meretika sempama tu? (b) Ba taun 1881, baka ni Menara Jaga nerangka sempama tu?

3 Kena meretika sempama pasal bedus enggau kambin, kitai patut nemu (1) sapa “Anak Mensia,” tauka “Raja,” sapa bedus enggau kambin, lalu sapa “menyadi” Raja? (2) kemaya “Anak Mensia” nyerara tauka ngakim bedus enggau kambin? lalu (3) nama kebuah sekeda orang dikumbai bedus enggau sekeda agi dikumbai kambin?

4 Ba taun 1881, Menara Jaga madahka “Anak Mensia,” tauka “Raja,” nya Jesus. Lalu iya nerangka “menyadi” Raja ukai semina orang ke deka merintah ba serega enggau Jesus. Tang mega, semua orang ke deka diau ba dunya lebuh sida nyadi sempurna. Menara Jaga madah orang deka diserara maya Seribu Taun Kristus Merintah, lalu sida ke neladan pengerindu Petara dalam semua pekara deka dikumbai bedus.

5. Ba taun 1923, baka ni nembiak Petara meretika sempama nya?

5 Udah nya, Jehovah nulung nembiak Iya meretika sempama tu enggau terang agi. Ba taun 1923, Menara Jaga kena 15 Oktober, madahka “Anak Mensia” nya Jesus. Tang udah nya, iya ngena ayat Bup Kudus nerangka “menyadi” ba sempama nya semina nunjukka orang ke deka merintah enggau Jesus. Lalu semua sida ba serega maya Perintah Seribu Taun. Iya mega madahka bedus nya nunjukka sida ke deka diau ba dunya. Sida diperintah Jesus enggau menyadi iya. Ketegal sempama nya madahka sida nulung menyadi Raja, nya alai pengawa nyerara tauka ngakim, deka nyadi maya bala menyadi Kristus ke diiri ngena roh kudus agi ba dunya. Tu nyadi sebedau Perintah Seribu Taun berengkah. Pelajar nya mega madahka, bedus nya orang ke arapka Jesus sereta pechaya Perintah Petara deka mai pengidup ti manah agi.

6. Ba taun 1995, baka ni chara kitai meretika sempama nya berubah?

6 Betaun-taun kitai ngumbai orang deka diakim ari pengawa nginjil ba hari ti penudi. Enti sida nerima berita kitai, sida dikumbai bedus, lalu enti enda, sida dikumbai kambin. Tang ba taun 1995, chara kitai meretika sempama nya berubah. Menara Jaga mandingka Matthew 24:29-31 (bacha) enggau Matthew 25:31, 32 (bacha), lalu nerangka Jesus deka ngakim orang maya penusah ti besai, lebuh Anak Mensia ‘datai dalam mulia iya.’ *—Peda nota kaki.

7. Nama reti sempama nya?

7 Kemaya hari tu, kitai meretika sempama pasal bedus enggau kambin terang agi. Kitai nemu “Anak Mensia” tauka “Raja,” nya Jesus. “Menyadi”  Raja nya sida ke diiri ngena roh kudus lalu sida deka merintah ba serega enggau Jesus. (Rom. 8:16, 17) “Bedus” enggau “kambin” nya orang ari semua bansa. Sida deka diakim semak pengujung penusah ti besai. Penusah ti besai tu deka berengkah enda lama da agi. Lalu kitai nemu Jesus deka ngakim orang nitihka chara sida ngintu orang ke diiri ngena roh kudus ke agi ba dunya. Kitai beterima kasih ngagai Jehovah ke udah betaun nulung kitai meretika sempama tu enggau sempama ti bukai ba Matthew bab 24 enggau 25!

SEMPAMA NYA NGAJAR KITAI PENGAWA NGINJIL BEGUNA BENDAR

8, 9. Nama kebuah Jesus ngumbai bedus nya “lurus”?

8 Jesus enda ngena leka jaku “nginjil” tauka “pengawa nginjil” ba sempama pasal bedus enggau kambin. Nyadi, baka ni kitai nemu sempama nya ngajar kitai pengawa nginjil beguna bendar?

9 Kena nemu saut iya, keterubah kitai patut ingat Jesus ngajar ngena sempama. Iya ukai bejaku pasal bedus enggau kambin ti amat. Nya alai, iya enda madahka genap iku orang ke diakim nyadi bedus patut meri pemakai enggau gari ngagai orang ke diiri ngena roh kudus, ngintu sida lebuh sida sakit tauka ngelawa sida ba rumah jil. Tang, Jesus madahka sida ke baka bedus nya “lurus” laban sida ngumbai orang ke diiri ngena roh kudus nya menyadi iya, sereta taluk ke sida ba hari ti penudi tu.—Mat. 10:40-42; 25:40, 46; 2 Tim. 3:1-5.

10. Baka ni bedus ulih nulung menyadi Kristus?

10 Lebuh Jesus madahka sempama pasal bedus enggau kambin, iya bejaku pasal utai ti deka nyadi ba hari ti penudi. (Mat. 24:3) Chunto, ku iya: ‘Berita Manah pasal Perintah Petara deka ditusui di serata dunya.’ (Mat. 24:14) Udah nya, sebedau iya bejaku pasal bedus enggau kambin, iya madahka sempama pasal duit emas. Jesus madahka sempama nya kena ngajar orang ke diiri ngena roh kudus patut bebendar nginjil. Tang, semina mimit aja ari sida ke agi idup ba dunya tu, lalu mayuh pengawa deka digaga! Orang ke diiri ngena roh kudus udah diasuh nginjil ngagai “semua bansa” sebedau pengujung dunya datai. Baka ke dipelajar kitai ba sempama pasal bedus enggau kambin, “bedus” nulung menyadi Jesus. Lalu siti ari chara ke ulih digaga sida, iya nya nulung menyadi Jesus nginjil. Tang, kati nya chukup semina nulung sida ngena duit tauka meransang sida ngereja pengawa nginjil?

SAPA PATUT NGINJIL?

11. Nama engka ditanya sekeda orang, lalu nama kebuah?

11 Kemaya hari tu, murid Jesus lapan juta iku. Lalu, kemayuh agi ari sida ukai orang ke diiri ngena roh kudus. Jesus enda meri sida duit emas. Iya meri duit emas ngagai menyadi iya ke diiri ngena roh kudus. (Mat. 25:14-18) Nyadi sekeda orang engka nanya, ‘Enti Jesus enda meri sida duit emas, kati sida patut nginjil?’ Ya. Aram kitai meda kebuah iya.

12. Nama dipelajarka kitai ari jaku Jesus ba Matthew 28:19, 20?

 12 Jesus ngasuh semua murid iya nginjil. Pengudah Jesus diangkat idup baru, iya ngasuh murid iya ngaga orang “nyadi murid,” lalu ngajar sida “semua pesan” ke udah diberi iya. Nyadi sida mega patut ngasika pesan Jesus ke ngasuh nginjil. (Bacha Matthew 28:19, 20.) Endang amat, semua kitai patut nginjil, enda ngira kitai bisi peluang ke serega tauka diau ba dunya.—SKR. 10:42.

13. Nama dipelajarka kitai ari genera ke dipeda John?

13 Ari bup Pemandang, kitai nemu pengawa nginjil deka digaga orang ke diiri ngena roh kudus enggau sida ti bukai. Jesus meri rasul John genera pasal “indu ke ditikah” ti deka ngaluka orang datai, lalu ngaluka orang ngirup ai ke meri pengidup. Indu ke ditikah ngambarka 144,000 iku orang ke diiri ngena roh kudus ti deka merintah enggau Jesus ba serega. (Pem. 14:1, 3; 22:17) Ai ngambarka genselan nyawa Jesus ti deka nulung orang bulih pengidup, ke nadai dosa enggau pemati. (Mat. 20:28; Jhn. 3:16; 1 Jhn. 4:9, 10) Orang ke diiri ngena roh kudus bebendar ngajar orang pasal tebus sereta baka ni sida bulih berekat ari tebus nya. (1 Kor. 1:23) Genera nya mega madah pasal seraban orang ke enda diiri ngena roh kudus, tang sida bisi peluang idup ba dunya. Sida mega diasuh madahka orang: “Datai kitu!” Lalu sida ngasika pesan nya enggau ngajar orang bukai pasal berita manah. Nyadi, genera tu nunjukka semua orang ke nerima berita manah patut nginjil ngagai orang bukai.

14. Baka ni kitai ngasika “adat Kristus”?

 14 Semua ke ngasika “adat Kristus” patut nginjil. (Gal. 6:2) Jehovah ngarapka semua orang ke nyembah Iya ngasika adat ti sama. Suba, Iya ngarapka orang Israel enggau bansa bukai ke diau enggau sida ngasika adat Iya. (P-sut. 12:49; Lew. 24:22) Endang amat, kitai enda ibuh ngasika semua adat ke diberi ngagai orang Israel. Tang, sekalika kitai diiri ngena roh kudus tauka enda, kitai patut ngasika “adat Kristus.” Siti utai ti pemadu manah diajar Jesus ke kitai iya nya pengerindu. (Jhn. 13:35; Jas. 2:8) Kitai patut rinduka Jehovah, Jesus, enggau orang bukai. Lalu chara ti pemadu manah kitai ngayanka pengerindu iya nya madahka orang bukai berita manah pasal Perintah Petara.—Jhn. 15:10; SKR. 1:8.

15. Nama kebuah kitai madah Jesus ngasuh semua murid iya nginjil?

15 Kekadang, utai ti dipadah Jesus ngagai sekeda murid iya tau mega ditujuka ngagai mayuh murid. Chunto, Jesus semina ngaga sempekat enggau 11 iku murid iya, lalu besemaya sida deka merintah ba Perintah iya. Tang bisi 144,000 iku orang ke deka merintah enggau iya. (Luk. 22:29, 30; Pem. 5:10; 7:4-8) Pia mega, pengudah Jesus diangkat idup baru, semina mimit aja murid ke ninga iya bepesan ngasuh nginjil. (SKR. 10:40-42; 1 Kor. 15:6) Tang ba kurun ti keterubah, semua murid Jesus ngasika pesan nya. (SKR. 8:4; 1 Pet. 1:8) Kemaya hari tu mega, kitai nemu kitai patut nginjil taja pan kitai nadai ninga Jesus ngasuh kitai nginjil. Iya ke amat, lapan juta iku ari kitai nginjil. Kitai nemu, enggau nginjil kitai nunjukka diri amat bisi pengarap ba Jesus.—Jas. 2:18.

DIATU MEH MAYA KITAI PATUT TALUK

16-18. Baka ni kitai ulih enggau taluk nulung menyadi Kristus, lalu nama kebuah kitai patut nulung sida diatu?

16 Sitan bebendar agi ngelaban menyadi Kristus ti diiri ngena roh kudus ke agi idup ba dunya, lalu iya nemu “timpuh diri nyau deka abis.” (Pem. 12: 9, 12, 17) Taja pan diserang Sitan, sida terus ngulu ba pengawa nginjil, lalu majak mayuh orang ningaka berita manah. Endang amat, Jesus begulai enggau orang ke diiri ngena roh kudus, lalu iya ngiring sida.—Mat. 28:20.

17 Endang basa ti besai ulih nulung menyadi Kristus nginjil. Kitai mega nulung ngena duit sereta gawa bebendar kena nirika Palan Gempuru, Palan Gempuru Besai sereta pampang opis. Enti kitai ngasika tuai gempuru enggau bala menyadi Kristian lelaki ke bukai ti dipilih “ulun ke tetap ati sereta bepenemu-dalam,” kitai nunjukka diri deka nulung bala menyadi Kristus.—Mat. 24:45-47; Heb. 13:17.

Kitai nulung menyadi Kristus ngena bemacham chara (Peda genteran 17)

18 Enda lama da agi orang ke diiri ngena roh kudus ke agi diau ba dunya deka nerima chop ti penudi. Udah nya bala melikat deka ngelepaska “empat bengkah ribut,” lalu penusah ti besai deka berengkah. (Pem. 7:1-3) Sebedau Armagedon berengkah, Jesus deka mai orang ke diiri ngena roh kudus ke serega. (Mat. 13:41-43) Nyadi enti kitai deka diakim nyadi bedus lebuh Jesus datai, diatu meh maya taluk ngagai bala menyadi Kristus ke diiri ngena roh kudus.

^ per. 6 Ke penerang mayuh agi pasal sempama tu, peda pelajar “How Will You Stand Before the Judgment Seat?” enggau “What Future for the Sheep and the Goats?” ba Menara Jaga kena 15 Oktober, 1995.