Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  Mac 2015

Belajar Ari Sempama Pasal Duit Emas

Belajar Ari Sempama Pasal Duit Emas

“Ngagai siku iya nyerahka lima ribu singkap duit emas, ngagai siku ti bukai dua ribu singkap, lalu ngagai siku, seribu singkap.”—MAT. 25:15.

1, 2. Nama kebuah Jesus madahka sempama pasal duit emas?

JESUS madahka sempama pasal duit emas kena nerangka tanggungjawap bala murid iya ke diiri ngena roh kudus. Tang, sempama tu ngaul semua murid Jesus. Nyadi, sekalika kitai bisi peluang ke serega tauka diau ba dunya, kitai patut nemu reti sempama tu.

2 Kemaya Jesus madahka pasal sempama nya? Lebuh iya ke madahka bala murid iya tanda ti nunjukka iya udah nyadi Raja sereta maya pengujung dunya deka berengkah. (Mat. 24:3) Nya alai, sempama pasal duit emas nya benung nyadi diatu.

3. Nama dipelajarka kitai ari sempama ba Matthew bab 24 enggau 25?

3 Lebuh Jesus madahka sempama pasal duit emas, iya mega madahka tiga iti da agi sempama ke nyadi tanda pengujung dunya. Semua sempama nya ngambarka pemanah ke patut dikembuan bala murid iya. Kitai ulih macha pasal sempama tu ba Matthew 24:45 ngagai 25:46. Sempama keterubah pasal ulun ke tetap ati, raban ke mimit ari orang ti diiri ngena roh kudus, ke betanggungjawap ngajar nembiak  Jehovah. Sida patut tetap ati sereta bepenemu-dalam. (Peda nota kaki.) Kedua, sempama pasal sepuluh iku indu dara. Ba sempama nya, Jesus nangkan semua orang ke diiri ngena roh kudus patut besedia sereta bejaga laban sida enda nemu hari tauka jam iya deka datai. (Peda nota kaki.) Ketiga, Jesus madahka sempama pasal duit emas kena ngajar semua orang ke diiri ngena roh kudus patut gawa bebendar kena bejalaika tanggungjawap Kristian sida. Keempat, Jesus madahka sempama pasal bedus enggau kambin, iya ke beberatka sida ti bisi peluang idup ba dunya. Iya ngasuh sida taluk sereta enggau naka ulih nulung bala menyadi iya ke diiri ngena roh kudus. (Peda nota kaki.) Pelajar tu deka nerangka reti sempama pasal duit emas.

SEIKU LELAKI MERI ORANG GAJI IYA MAYUH DUIT

4, 5. Sapa lelaki ke digambarka ba sempama nya, lalu nama reti duit emas nya?

4 Bacha Matthew 25:14-30. Ba sempama pasal duit emas, Jesus bejaku pasal seiku lelaki ke bejalai ngagai menua bukai. Jesus mega ngena sempama ti sama lebuh nyebut pasal seiku lelaki ke bejalai ngagai menua bukai nyadi raja. (Peda nota kaki.) (Luk. 19:12) Betaun litaricha kitai udah nerangka lelaki ba dua iti sempama tu ngambarka Jesus, ke pulai ke serega ba taun 33. Tang, Jesus enda terus nyadi Raja lebuh iya ke serega. Iya nganti datai ke taun 1914, lebuh munsuh iya nyadi ‘pelasar kaki iya.’—Heb. 10:12, 13.

5 Jesus madahka lelaki ke ba sempama nya bisi lapan ribu singkap duit emas, penyampau duit ti mayuh maya nya. (Peda nota kaki.) Sebedau iya mupuk, iya nyerahka duit emas ngagai orang gaji iya, lalu ngasuh sida nambahka penyampau duit nya. Duit nya amat berega ba lelaki nya. Pia mega, Jesus ngembuan utai ti berega sebedau iya pulai ke serega. Nama utai nya? Iya nya pengawa ti udah digaga iya ba dunya.

6, 7. Duit emas nunjukka nama?

6 Pengawa nginjil nya beguna bendar ba Jesus. Ketegal tu, mayuh orang nyadi murid iya. (Bacha Luke 4:43.) Tang, iya nemu mayuh pengawa deka digaga, lalu mayuh mega orang deka nerima berita manah. Nya alai, iya madah ngagai bala murid iya: “Perening kiba kanan ngelingi kita. Nya baru kita meda umai nyau mansau, sedia deka diketau.” (Jhn. 4:35-38) Orang ke nemu bumai enda ninggalka umai ti sedia deka diketau. Jesus pan baka nya. Sebedau pulai ke serega, iya ngasuh bala murid iya: ‘Nya alai, bejalai kita ngagai semua bansa lalu gaga sida nyadi murid aku.’ (Mat. 28:18-20) Enggau tu, Jesus meri sida reta ti berega, iya nya tanggungjawap nginjil.—2 Kor. 4:7.

7 Baka lelaki ke nyerahka duit ngagai orang gaji iya, Jesus mega nyerahka pengawa ngaga murid ngagai murid iya ke diiri ngena roh kudus. (Mat. 25:14) Nyadi, duit emas nya nunjukka tanggungjawap nginjil enggau ngaga murid.

8. Taja pan genap iku orang gaji nerima penyampau duit ti bebida, tang nama dikearapka tuan ari sida?

 8 Jesus madahka tuan nyerahka lima ribu singkap duit emas ngagai orang gaji ti keterubah, dua ribu singkap ngagai orang gaji ti kedua, lalu seribu singkap ngagai orang gaji ti ketiga. (Mat. 25:15) Tuan nyerahka genap iku orang gaji penyampau duit ti bebida, tang iya ngarapka semua sida gawa enggau naka ulih nambahka penyampau duit ke diberi iya. Pia mega, Jesus ngarapka murid iya ke diiri ngena roh kudus enggau naka ulih bejalaika pengawa nginjil. (Mat. 22:37; Kol. 3:23) Ba Pentikos taun 33, bala murid Jesus berengkah ngaga murid ari semua bansa mensia. Lalu lebuh kitai macha bup Kereja Rasul ba Bup Kudus, kitai meda enggau terang agi baka ni pemendar sida gawa. (Peda nota kaki.)—SKR. 6:7; 12:24; 19:20.

ORANG GAJI NGENA DUIT EMAS BA PENGUJUNG DUNYA

9. (a) Nama digaga dua iku orang gaji ke tetap ati enggau duit sida, lalu nama dipelajarka kitai ari sida? (b) Nama patut digaga orang ke bisi peluang idup ba dunya?

9 Dua iku orang gaji ti keterubah, iya ke ngena duit tuan sida enggau manah  ngambarka bala menyadi Kristian ti diiri ngena roh kudus ke tetap ati maya pengujung dunya. Kelebih agi kenyau ari taun 1919, sida udah enggau naka ulih ngereja pengawa nginjil. Ba sempama nya, dua iku orang gaji nerima penyampau duit ti bebida, tang tu ukai reti iya bisi dua iti gerempung orang ti diiri ngena roh kudus ke tetap ati. Dua iku orang gaji nya sama bebendar, lalu ngasilka dua kali lipat penyampau duit nya. Kati semina orang ke diiri ngena roh kudus patut bebendar nginjil enggau ngajar? Enda. Sempama Jesus pasal bedus enggau kambin, ngajar kitai pasal orang ke bisi peluang idup belama iya ba dunya. Sida patut nulung bala menyadi iya ke diiri ngena roh kudus ba pengawa nginjil sereta taluk ke sida. Tu endang basa ti besai! Amat, nembiak Jehovah endang “siti raban,” lalu sida bebendar nginjil sereta ngaga murid.—Jhn. 10:16.

10. Nama siti ari tanda nunjukka kitai diau ba pengujung dunya?

10 Jesus ngarapka semua murid iya bebendar ngereja pengawa nambahka murid. Nya meh pengawa ti digaga murid iya ba kurun keterubah. Ba pengujung dunya tu, kemaya sempama Jesus pasal duit emas benung nyadi? Kati murid iya benung ngereja pengawa tu? Ya, enda kala ngemayuh tu orang ningaka berita manah, lalu nyadi murid! Ketegal bala murid Jesus bebendar gawa, beratus ribu iku mensia dibaptisa ninting taun. Lalu sida mega sama enggau nginjil. Semua pengawa enggau asil ti manah tu, nunjukka pengawa nginjil nya endang siti ari tanda ke diberi Jesus pasal pengujung dunya. Nya alai, Jesus balat gaga ati ke sida!

Jesus meri bala murid iya siti reta ti berega, iya nya tanggungjawap nginjil (Peda genteran 10)

KEMAYA TUAN DEKA DATAI?

11. Baka ni kitai nemu Jesus deka datai maya penusah ti besai?

11 Ku Jesus: “Nyau kelama udah bekau nya, tuan sida datai, lalu ngira akaun enggau sida.” (Mat. 25:19) Tuan, iya nya Jesus, deka ngereja tu semak pengujung penusah ti besai. Baka ni kitai nemu? Ba Matthew bab 24 enggau 25, Jesus suah madahka iya deka datai. Chunto, iya madah orang “deka meda Anak Mensia datai ba atas remang ari serega.” Tu nyadi maya penusah ti besai lebuh Jesus deka ngakim orang. Iya  mega nangkan bala murid iya ke idup ba pengujung dunya ngambika bejaga. Ku iya: ‘Laban kita enda nemu hari Tuan kita deka datai,’ lalu “Anak Mensia deka datai ba jam ti enda disangka kita.” (Mat. 24:30, 42, 44) Nyadi ba sempama pasal duit emas, Jesus mega madahka maya iya deka datai ngakim orang sereta nganchurka dunya Sitan.—Peda nota kaki.

12, 13. (a) Nama dipadah tuan ngagai dua iku orang gaji, lalu nama kebuah? (b) Kemaya orang ke diiri ngena roh kudus nerima chop ti penudi? (Peda mega kutak “ Sida Diterima Pengudah Mati.”) (c) Nama berekat ti deka diterima sida ke nyukung orang ke diiri ngena roh kudus?

12 Lebuh tuan pulai ari bejalai, iya meda orang gaji ke bisi lima ribu singkap duit emas udah ngasilka lima ribu da agi duit emas, lalu orang gaji ke bisi dua ribu singkap duit emas udah ngasilka dua ribu da agi. Tuan madahka seduai iya: “Manah pengawa nuan! Nuan tu orang gaji ke manah sereta tetap ati. Nuan tau dikarapka ngemataka utai ti mimit, nya alai aku deka ngasuh nuan ngemataka utai ti mayuh.” (Mat. 25:21, 23) Nama deka digaga Tuan, iya nya Jesus, lebuh iya datai jemah ila?

13 Sebedau penusah ti besai datai, Petara deka nerima orang ke diiri ngena roh kudus, iya ke bebendar gawa sereta agi idup ba dunya maya nya. Tu chop sida ti penudi. (Pem. 7:1-3) Udah nya, sebedau Armagedon, Jesus deka merekat sida ke serega. Tang, baka ni enggau sida ke bisi peluang idup ba dunya, iya ke nyukung orang ke diiri ngena roh kudus ba pengawa nginjil? Sida deka diakim nyadi bedus. Lalu sida deka idup ba dunya ti dipegai Perintah Petara.—Mat. 25:34.

ORANG GAJI KE JAI SERETA NGELUSU

14, 15. Kati Jesus bisi ngumbai mayuh orang ke diiri ngena roh kudus deka nyadi jai sereta ngelusu? Terangka.

14 Sempama nya mega madahka pasal orang gaji ke nerima seribu singkap duit emas. Iya enda ngena duit nya nambahka duit tuan iya tauka nyimpan duit nya ba bank ngambika bulih bungai. Tang, iya ngelalaika duit nya dalam tanah. Tuan madahka orang gaji nya jai sereta ngelusu. Iya ngambi duit nya ari orang gaji ke jai, lalu meri duit nya ngagai orang gaji ti keterubah. Udah nya, iya muai orang gaji ke jai “ngagai endur ti petang,” lalu orang gaji nya nyabak begerit ngeli.—Mat. 25:24-30; Luk. 19:22, 23.

15 Lebuh Jesus madah seiku ari tiga orang gaji nya jai sereta ngelusu, ukai reti iya satu petiga ari orang ke diiri  ngena roh kudus deka nyadi baka orang gaji nya. Kitai nemu tu ari mandingka sempama tu enggau dua iti sempama ti bukai. Ba sempama pasal ulun ke tetap ati sereta bepenemu-dalam, Jesus madahka pasal ulun ke jai ti merinsaka ulun ti bukai. Jesus ukai madahka sida ke nyadi ulun ke tetap ati sereta bepenemu-dalam deka nyadi jai. Tang, iya nangkan sida ke diiri ngena roh kudus enda patut nyadi ulun ke jai. Udah nya, ba sempama pasal sepuluh iku indu dara, Jesus nyebut pasal lima iku indu dara ke beli. Iya nadai madah setengah ari sida ke diiri ngena roh kudus nya beli. Tang, Jesus nangkan nama deka nyadi enti sida enda besedia enggau bejaga. (Peda nota kaki.) Pia mega, ba sempama pasal duit emas, Jesus enda ngumbai mayuh ari orang ke diiri ngena roh kudus deka nyadi jai sereta ngelusu ba hari ti penudi. Tang, iya nangkan sida anang nyadi orang gaji ke jai, tang terus bebendar nginjil.—Mat. 25:16.

16. (a) Nama dua iti pekara ti dipelajarka kitai ari sempama pasal duit emas? (b) Baka ni pelajar tu nulung kitai nemu reti sempama pasal duit emas? (Peda kutak “ Baka Ni Kitai Patut Meretika Sempama Pasal Duit Emas?”.”)

16 Nama dua iti pekara ti dipelajarka kitai ari sempama pasal duit emas? Kesatu, Jesus meri bala murid ke diiri ngena roh kudus siti reta ti berega, iya nya tanggungjawap nginjil sereta ngaga murid. Kedua, Jesus ngarapka semua kitai bebendar ba pengawa nginjil. Enti kitai tetap ati betan ba pengawa tu, lalu mengkang ngasi sereta taluk ke Jesus, kitai pechaya iya deka merekat kitai.—Mat. 25:21, 23, 34.

Menara Jaga, 15 Julai, 2013, lambar 21-22, genteran 8-10, nerangka sapa ulun ke tetap ati sereta bepenemu-dalam. Ba pelajar ke dulu ari tu, nerangka sapa indu dara. Sempama pasal bedus enggau kambin diterangka baMenara Jaga, 15 Oktober, 1995, lambar 23-28, enggau ba pelajar ti deka datai ba majalah tu.

Peda kutak “ Baka Ni Sempama Pasal Duit Emas ba Matthew Sebaka Enggau Sempama Pasal Duit Emas ba Luke?.”

Ba jeman Jesus, seiku pekereja begunaka 20 taun kena ngulihka seribu singkap duit emas.

Enda lama pengudah pemati bala rasul, ajar ti salah ngerembai ngagai semua gerempung. Dalam beratus taun, mimit aja pengawa nginjil udah digaga. Tang, ba maya “ngetau” tauka pengujung dunya, pengawa nginjil deka berengkah baru. (Mat. 13:24-30, 36-43) Peda Menara Jaga, 15 Julai, 2013, lambar 9-12.

Peda Menara Jaga, 15 Julai, 2013, lambar 7-8, genteran 14-18.

Peda genteran 13 pelajar “Deka Nuan Terus ‘Bejaga’?” ba majalah tu.