Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga  |  Mac 2015

 Topik Randau | Jesus Nyelamatka—Ari Nama?

Pemati Enggau Pengangkat Jesus Ari Mati—Nama Reti Tu Ba Nuan

Pemati Enggau Pengangkat Jesus Ari Mati—Nama Reti Tu Ba Nuan

‘Arapka Tuan Jesus, lalu nuan deka diselamatka.’—Kereja Rasul 16:31.

Jaku tu disebut rasul Paul enggau Silas ngagai jejaga rumah jil ba kuta Masedonia di menua Pilipi. Nama reti jaku nya? Kena nemu baka ni pengarap ba Jesus nyelamatka kitai ari pemati, kitai patut belajar dulu kebuah kitai mati. Peratika nama diajar Bup Kudus.

Mensia ukai digaga ngambika mati

‘Petara Jehovah ngengkahka orang nya ba kebun Eden, ngambika iya gawa dia lalu nyaga kebun nya. Ku Petara Jehovah bejaku ngagai orang nya, “Nuan tau makai buah ari semua kayu dalam kebun tu, tang nuan enda tau makai buah ari kayu penemu ti tau ngasuh nuan nemu semua utai, laban lebuh nuan makai buah nya, nuan deka mati.”’—Pemungkal 2:15-17.

Petara ngengkahka mensia keterubah, Adam, ba kebun Eden, ba dunya paradais ti penuh enggau jelu babas sereta utai tumbuh ti manah. Ba dia, bisi pun kayu ti mansutka buah ke ulih diempa Adam enggau bibas. Tang, Petara Jehovah enggau terang madahka pasal siti pun kayu, lalu nagang Adam makai buah ari pun kayu nya. Enti Adam makai buah nya, iya deka mati.

Kati Adam nemu reti jaku tagang nya? Iya nemu nama reti pemati; iya udah meda jelu mati. Enti Adam digaga ngambika mati, jaku tangkan Petara nadai reti. Tang, Adam nemu enti iya ngasika Petara sereta enda makai buah ari pun kayu nya, iya idup belama iya—iya enda nemu mati.

Sekeda pechaya pun kayu nya ngambarka pengawa setubuh, tang nya enda betul. Agi mega, Jehovah deka Adam enggau bini iya Hawa, “beranak betelesak lalu ngemenuhka dunya” sereta “bekuasa atas iya.” (Pemungkal 1:28) Tagang nya bekaul enggau pun kayu ke amat. Jehovah ngumbai iya “kayu penemu ti tau ngasuh . . . nemu semua utai,” laban iya ngambarka hak Jehovah nentuka utai ti manah tauka jai ke mensia. Enggau enda makai buah ari pun kayu nya, Adam nunjukka iya ukai semina taluk, tang mega beterima kasih ngagai Jehovah ke ngaga iya sereta merekat iya enggau limpah.

 Adam mati ketegal enda ngasika Petara

‘Petara Jehovah lalu bejaku ngagai lelaki nya, “Laban nuan . . . udah makai buah ti enda disagi Aku, . . . Nuan deka bepeluh tusur ngulihka asil ari tanah, nyentuk ngagai maya nuan pulai baru ngagai tanah, laban nuan endang ditempa ari tanah. Nuan endang digaga ari amau, nya alai ngagai amau meh nuan pulai.”’—Pemungkal 3:17, 19.

Adam makai buah ari pun kayu ti ditagang. Pengawa ti enda ngasi nya ukai utai ti mit. Nya pengawa ngelaban, sengaja enda ibuhka semua pemanah ke udah digaga Jehovah ke iya. Enggau makai buah nya, Adam nulak Jehovah, milih jalai pengidup kediri empu, ti ngujungka penusah balat amat.

Baka ke dipadah Jehovah, Adam amat mati. Petara ngaga Adam “ari amau tanah” sereta madahka iya deka “pulai baru ngagai tanah.” Adam enda idup ngena tubuh bukai tauka ba endur bukai. Lebuh mati iya enda idup, baka amau ke dikena ngaga iya.—Pemungkal 2:7; Pengajar 9:5, 10.

Kitai mati ketegal kitai peturun Adam

“Baka dosa ti datai ngagai dunya nengah orang siku, lalu pemati datai laban dosa, nya alai pemati ngelekai ngagai semua mensia, laban semua bela udah bedosa.”—Rome 5:12.

Adam ke enda ngasi—tauka bedosa—balat ngenusahka semua mensia. Ketegal bedosa, Adam ukai ngelenyauka pengidup 70 tauka 80 taun, tang peluang idup belama iya. Agi mega, maya Adam bedosa, iya lenyau pengidup ti sempurna lalu nurunka pengidup ti enda sempurna ngagai peturun iya.

Kitai semua peturun Adam. Ketegal dosa iya, kitai nadai peluang milih agi, lalu nerima tubuh ti enda sempurna ke suah bedosa sereta ngujungka pemati. Paul enggau terang madahka penusah kitai. Iya nulis: “Asal aku ari mensia ke dijual nyadika ulun dosa. Naka meh penusah aku tu! Sapa deka ngelepaska aku ari tubuh tu ti mai aku ngagai pemati?” Lalu Paul nyaut tanya iya empu: ‘Terima kasih ngagai Petara ulih Jesus Kristus Tuan kitai!’—Rome 7:14, 24, 25.

 Jesus nyerahka nyawa iya ngambika kitai ulih idup belama iya

“Apai udah ngirumka Anak Iya nyadika Juruselamat dunya.”—1 John 4:14.

Petara Jehovah ngaga siti atur kena mutarka pemai ari dosa sereta ngelepaska kitai ari ukum pemati belama iya. Baka ni? Iya ngirumka Anak ti dikesayau Iya ari serega ngambika ada nyadi mensia sempurna baka Adam. Tang, enda baka Adam, Jesus “nadai kala bedosa.” (1 Peter 2:22) Ketegal iya sempurna, iya enda idup di baruh ukum pemati, lalu iya ulih idup belama iya nyadi mensia ke sempurna.

Taja pia, Jehovah nejuka Jesus dibunuh munsuh iya. Tiga hari udah nya, Jehovah ngangkatka iya nyadi roh ngambika iya ulih pulai ke serega. Di serega, Jesus nyerahka Petara rega tubuh mensia iya ti sempurna kena nebus utai ti udah dilenyauka Adam ari iya empu, enggau peturun iya. Jehovah nerima genselan nya, lalu ngasuh orang ke manggaika pengarap ba Jesus ulih nerima pengidup belama iya.—Rome 3:23, 24; 1 John 2:2.

Nya alai, Jesus nebus pulai utai ti dilenyauka Adam. Iya mati merinsa ke kitai ngambika kitai ulih idup belama iya. Bup Kudus madah: ‘Jesus . . . merinsa natka pemati, ngambika, ulih pengasih Petara, iya mati ke semua mensia.’—Hebrew 2:9.

Pemeri tu nerangka pasal Jehovah. Pengelurus Iya ti tinggi ngasuh mensia ke enda sempurna enda ulih nebus diri empu. Tang, pengerindu enggau penyinu Iya ngasuh Iya nyediaka rega ti besai—nyerahka Anak Iya nyadika tebus.—Rome 5:6-8.

Jesus udah diangkatka ari mati, lalu sida ke bukai mega deka diangkatka

“Kristus udah diangkatka ari mati, nyadi orang ke terubah diangkatka idup baru ari bala orang ke udah mati. Laban enti pemati datai ulih siku mensia, pengangkat ari mati mega datai ulih siku mensia, laban semua mensia mati dibai Adam, nya alai semua mensia deka idup dibai Kristus.”—1 Korint 15:20-22.

Endang amat, Jesus kala idup sereta mati. Tang, nama nunjukka iya udah diangkatka ari mati? Jesus udah ngayanka diri ngagai mayuh orang ba pengawa enggau endur ti enda sama. Bisi sekali, iya ngayanka diri ngagai lebih ari 500 iku orang. Rasul Paul nulis nya ba surat iya ngagai bala menyadi Kristian ba Korint, madahka sekeda ari saksi nya agi idup. Reti iya, sida nya ulih meri saksi pasal utai ti udah dipeda enggau didinga sida.—1 Korint 15:3-8.

Kelebih agi, lebuh Paul nulis pasal Kristus “nyadi orang ke terubah” ari sida ke diangkatka idup baru, iya nunjukka sida ke bukai mega deka diangkatka idup baru. Jesus empu madahka maya deka datai alai “semua orang ke udah mati” deka “pansut ari kubur.”—John 5:28, 29.

 Kena idup belama iya, kitai patut manggaika pengarap ba Jesus

‘Petara balat rinduka dunya, nya alai Iya meri Anak Tunggal Iya, ngambika genap iku orang ke arapka iya enda mati tang bulih pengidup ti meruan belama iya.’—John 3:16.

Beberapa lambar keterubah ba Bup Kudus madahka maya pemati berengkah sereta maya Paradais lenyau. Beberapa lambar ti penudi madahka maya pemati deka dirusak sereta maya Petara deka ngaga dunya nyadi Paradais. Maya nya, orang deka gaga ati idup belama iya. Pemandang 21:4 madah: “Pemati nadai agi.” Kena ngemendarka semaya nya, ayat 5 madahka “leka jaku tu bendar sereta tau dikarapka.” Semaya Jehovah endang deka dikeamatka Iya.

Kati nuan pechaya “leka jaku tu bendar sereta tau dikarapka”? Enti pechaya, belajar meh mayuh agi pasal Jesus Kristus, lalu panggaika pengarap ba iya. Enti nuan ngereja tu, nuan deka diterima Jehovah. Nuan ukai semina deka ngasaika berekat nya diatu, tang nuan mega deka bulih pengidup ti meruan belama iya ba Paradais. Maya nya, nadai agi pemati, “nadai agi ngulit, nadai agi nyabak, nadai agi pedis.”

Belajar Lebih Agi

Nama Utai ti Bendar Diajar Bup Kudus?

Tebus—Pemeri ti Pemadu Besai Ari Petara

Nama reti tebus? Baka ni nuan tau bulih berekat ari tebus nya?