Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 Topik Randau | Jesus Nyelamatka—Ari Nama?

Kebuah Kitai Patut Diselamatka

Kebuah Kitai Patut Diselamatka

“Semua kitai tu endang ada lemi sereta nadai daya magang. Semua kitai endang enda panjai umur sereta ditinggang penusah seumur idup. Kitai mansang besai tuai lalu jampat layu baka bungai. Kitai lesap baka ayuk.”—Jop 14:1, 2.

Ari kelia menya, orang endang keran deka idup biak sereta gerai belama iya. Tang sayau amat, iya ke bendar: Kitai ulih mati. Jaku Jop ba atas, ke udah disebut lebih ari tiga ribu taun, tetap nyadi nyentuk ke diatu.

Semua orang keran deka idup belama iya. Bup Kudus madahka, Petara udah ngengkahka ba ati kitai pengeran deka idup belama iya nyengkaum pengeran deka nemu reti idup belama iya. (Pengajar 3:11) Kati patut Petara ti pengasih ngengkahka pengeran ke enda ulih nyadi ba kitai? Nuan tentu ngumbai enda patut. Jaku Petara ngumbai pemati nya munsuh, lalu besemaya pemati deka “dirusak.”—1 Korint 15:26.

Endang amat, pemati nya munsuh. Nadai orang deka mati. Lebuh utai ti tau nganu nyawa datai, kitai nyeliah, belalai, tauka rari. Lebuh kitai sakit, kitai ngiga chara ngambika suman. Kitai enggau naka ulih nyeliahka utai ti ulih ngasuh kitai mati.

Kati bisi kebuah arapka munsuh lama tu deka dirusak? Au, bisi. Penempa, iya nya Petara Jehovah, enda ngaga mensia semina idup beberapa taun aja lalu mati. Pemati mensia ukai asal tuju Iya. Iya dekaka mensia idup belama iya ba dunya, lalu nama utai ti dikedeka Iya, deka dikeamatka.—Isaiah 55:11.

Baka ni pemati deka dirusak? Sepemanjai sejarah, mensia bebendar mutarka penusah pasal pemati, tang enda mujur. Kemaya hari tu, mensia agi terus mutarka penusah tu. Bala saintis udah ngaga vaksin enggau ubat kena ngelaban sekeda penyakit. Sida mansik gaya utai idup enggau dalam agi. Ba mayuh endur, rata-rata mensia kemaya hari tu idup lama agi ari kurun ke suba. Tang, pemati bedau ulih dialahka. Ku Bup Kudus, “sida sama deka pulai ngagai utai nya [amau].”—Pengajar 3:20.

Tang, bisi berita manah! Kitai enda ibuh bepanggai ba pengelandik mensia mutarka penusah lama tu. Petara Jehovah udah nyediaka atur kena nyelamatka kitai ari pemati, lalu orang ti pemadu beguna ba atur tu, iya nya Jesus Kristus.