Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  September 2016

 TOPIK RANDAU | DINI NUAN ULIH TETEMUKA PENGELANTANG?

Chara Petara Meri Pengelantang

Chara Petara Meri Pengelantang

Rasul Paul ngambarka Jehovah nya ‘Petara ti pun semua pengelantang, ke merindang kami lebuh kami dituntung semua macham penusah.’ (2 Korint 1:3, 4) Nya alai Bup Kudus deka kitai pechaya, semua kitai tau bulih tulung ari Petara, lalu nadai penanggul besai ke ulih nagang Apai kitai ti di serega ngelantangka kitai.

Endang amat, bisi utai ke enda tau enda dikereja kitai enti deka bulih pengelantang ari Petara. Baka ni lutur ulih nulung kitai enti kitai nadai ngaga semaya deka betemu enggau iya? Nabi Amos nanya: “Kati dua iku orang ulih begulai bejalai enti seduai iya enda besemaya dulu?” (Amos 3:3) Nya alai, Bup Kudus ngansak kitai: ‘Datai semak ngagai Petara, lalu Iya deka datai semak ngagai kita.’—James 4:8.

 Baka ni kitai ulih pechaya, Petara deka semak ngagai kitai? Kesatu, laban Iya suah madahka Diri deka nulung kitai. (Peda  kutak.) Lalu kedua, laban kitai bisi saksi ari bala orang ke udah bulih pengelantang ari Petara—maya jeman kitai enggau jeman kelia.

Baka mayuh orang kemaya hari tu ke ngiga tulung ari Petara, Raja David mega suah napi penanggul ti besai. Ku iya besampi: “Dingaka aku lebuh aku nyabak ngagai Nuan minta tulung.” Kati Petara nyaut sampi iya? Au. Ku David nambah: “Iya nulung aku, lalu ngasuh ati aku gaga.”—Masmur 28:2, 7.

CHARA JESUS NGELANTANGKA SEMUA ORANG KE TUSAH ATI

Petara mutuska, Jesus bisi tanggung pengawa meri pengelantang. Sekeda pengawa ke diberi Petara ngagai Jesus, iya nya “nyumanka ati orang ke tusah” sereta “merindang semua orang ke ngulit [tusah ati].” (Isaiah 61:1, 2) Baka ke dipadah, Jesus balat ibuhka orang ke “lelak ngema utai ti berat.”—Matthew 11:28-30.

Jesus ngelantangka orang enggau meri sida jaku ajar ti badas, ngintu sida enggau manah, lalu kekadang iya ngeraika penyakit sida. Bisi sekali, seiku orang ke kena penyakit lan minta Jesus: ‘Enti nuan deka, nuan ulih ngasuh aku tuchi.’ Ketegal sinu, ku Jesus nyaut: “Aku deka. Tuchi meh nuan!” (Mark 1:40, 41) Lalu orang ke sakit lan nya gerai.

Taja pan Anak Petara nadai agi ba dunya tu ngelantangka seiku-seiku kitai, tang Apai iya, Jehovah, ‘Petara ti pun semua pengelantang,’ terus nulung orang ke begunaka tulung. (2 Korint 1:3) Peratika empat iti chara ke dikena Jehovah ngelantangka orang.

  • Bup Kudus. “Laban semua utai ti udah ditulis dulu kelia endang ditulis kena ngajar kitai, ngambika ulih pengeliat ati kitai enggau ulih peransang ari Bup Kudus, kitai bisi pengadang.”—Rome 15:4.

  • Roh Kudus Petara. Pengudah Jesus mati, gempuru Kristian balat begunaka pengelantang. Bup Kudus nunjukka, Petara meri pengelantang nya nengah roh kudus Iya. (Kereja Rasul 9:31) Roh kudus, iya nya kuasa aktif Petara, endang amat bekuasa. Petara ulih ngena roh kudus Iya ngelantangka semua orang ke bisi penanggul.

  • Besampi. Bup Kudus ngasuh kitai: “Anang irauka utai.” Tang iya madahka, ‘bantaika semua peminta kita ngagai Petara ngena sampi, sampi peminta, enggau sampi terima kasih. Lalu pemaik Petara, ti ngelui peragam mensia, deka nyaga ati enggau runding kita.’—Pilipi 4:6, 7.

  • Bala Menyadi Kristian mega ulih meri pengelantang ngagai pangan diri. Rasul Paul madahka, bala kawan iya “udah ngelantangka ati” iya ba maya ti bisi “penusah enggau pemerinsa.”—Kolosi 4:11; 1 Tesalonika 3:7.

Tang nuan engka berunding, baka ni ulih ngena semua chara tu. Aram kitai beratika peneleba orang ke udah napi penanggul baka ke disebut ba atas tadi. Sama baka sida, nuan ulih nemu, Petara agi ngamatka semaya ti ngerinduka ati tu: “Aku deka merindang kita . . . baka indai ke merindang anak diri.”—Isaiah 66:13.