Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  September 2016

Kati Stail Gari Nuan Ngemuliaka Petara?

Kati Stail Gari Nuan Ngemuliaka Petara?

‘Kereja semua utai nya ke mulia Petara.’—1 KOR. 10:31..

LAGU: 34, 61

1, 2. Nama kebuah Saksi-Saksi Jehovah patut bisi standard ti manah pasal begari? (Peda gambar ba pun artikel.)

SITI surat kabar ari menua Belanda madahka baka ni bala tuai pengarap ari gerija begari ba siti ari gempuru sida. Surat kabar nya madahka: “Nuan deka meda gari ke dikena besehari-hari, kelebih agi maya hari nya angat.” Taja pia, surat kabar ti sama madahka, tu ukai chara Saksi-Saksi Jehovah begari ba gempuru besai pelilih menua sida. Surat kabar nya madahka, bala anak mit ke lelaki enggau orang besai tuai ke lelaki ngena kot enggau nektai, lalu bala anak mit ke indu enggau orang besai tuai ke indu ngena skirt ke umbas iya pemanjai, tang moden. Saksi-Saksi Jehovah suah dipuji ketegal chara sida begari. Rasul Paul madahka, gari ke dikena orang Kristian ke nyadi nembiak Petara patut “penumbas iya sereta menyana.” (1 Tim. 2:9, 10) Taja pan Paul nyebut pasal orang ke indu, tang standard tu sama dikena ba orang Kristian ke lelaki.

2 Standard begari ti manah beguna ngagai kitai ke nyadi nembiak Jehovah, lalu standard nya beguna ngagai Petara ke disembah kitai. (P-kal. 3:21) Bup Kudus enggau terang madahka, Jehovah, ti Pemadu Tinggi di dunya raya, bisi standard ba chara Iya dekaka nembiak Iya begari. Nya alai, gari ke dipilih kitai ukai semina ngelantangka ati kitai, tang keberat agi, Jehovah, Petara kitai ti Pemadu Tinggi.

3. Nama ulih dipelajarka kitai pasal gari ari Adat Moses ke diberi Petara ngagai orang Israel?

 3 Dalam Adat Moses, bisi atur ke nyaga orang Israel ari gaya pengidup orang bansa bukai ti balat kamah ke ngelingi sida. Adat nya nunjukka, Jehovah balat begedika gari ke nadai nunjukka bida ti terang entara lelaki enggau indu. Kemaya hari tu, orang mega begari baka nya. (Bacha Ulang Adat 22:5.) Ari Adat nya, kitai nemu Jehovah enda lantang ati enggau gari ke ngasuh orang ke lelaki baka orang ke indu, lalu ngasuh orang ke indu baka orang ke lelaki, tauka gari ke ngasuh tusah deka nemu bida entara lelaki enggau indu.

4. Nama ulih nulung orang Kristian ngaga pemutus ti manah pasal chara begari?

4 Prinsip Bup Kudus ulih nulung kitai ngaga pemutus ti manah pasal chara begari. Prinsip tu ulih dikena enda ngira dini menua kitai, baka ni gaya hari ba sesebengkah menua ke alai kitai diau, tauka chara pengidup kitai. Kitai enda ibuh begunaka lis ti panjai pasal bansa gari ke ulih dikena tauka enda. Kitai semina nitihka aja prinsip Bup Kudus, ke agi ngemendarka kitai ngena gari ke dikerindu kitai. Aram kitai berandauka sekeda prinsip Bup Kudus ke ulih nulung kitai nemu “peneka Iya—iya nya utai ti badas, ti ngerinduka ati Iya, ti pemadu menyana” lebuh kitai mutuska bagi gari ke deka dikena.—Rom. 12:1, 2.

‘KAMI UDAH NGAYANKA DIRI AMAT ULUN PETARA.’

5, 6. Baka ni chara kitai begari ulih ngubah runding orang bukai?

5 Petara ngasuh rasul Paul madahka siti prinsip beguna ke bisi ba 2 Korint 6:4. (Bacha.) Chara kitai begari nunjukka sapa kitai ke bendar ngagai orang bukai, lalu iya mega nentuka runding orang pasal kitai. (1 Sam. 16:7) Laban kitai nembiak Petara, kitai ukai semina deka ngena gari ke nyamai dikena tauka dikerinduka kitai. Lebuh kitai nitihka prinsip Bup Kudus, tu patut nulung kitai nyeliahka diri ari ngena gari ke sendat, ngayanka tubuh, tauka seksi. Reti nya, kitai patut nyeliahka gari ke ngayanka perengka tubuh ke enda patut diayan. Anang ngasuh orang enda nyamai ati tauka ngasuh orang malik ke bukai lebuh sida meda chara kitai begari.

Enti kitai kemas, beresi, begari enggau manah lalu gari kitai penumbas iya, orang deka agi bebasaka kitai

6 Enti kitai kemas, beresi, ngintu diri enggau manah, lalu gari kitai penumbas iya, orang deka agi bebasaka kitai. Lalu sida deka agi beminat enggau Petara ke disembah kitai, bebasa agi ke gerempung kitai, sereta deka agi mendingka pesan kitai ti nyelamatka nyawa.

7, 8. Ni maya kitai patut begari enggau menyana?

7 Chara kitai begari amat bekaul enggau Petara kitai ti kudus, bala menyadi Kristian kitai, sereta orang ba kandang endur kitai. Kitai patut begari enggau chara ti ngemuliaka Jehovah sereta pesan ke ditusui kitai. (Rom. 13:8-10) Kelebih agi, iya nya gari ke dikena kitai lebuh begempuru tauka nginjil. Kitai patut begari enggau chara ti patut ke orang ti nyembah Petara. (1 Tim. 2:10) Endang amat, sekeda gari ke patut dikena ba  siti-siti endur engka enda patut dikena ba endur bukai. Nya alai, enda ngira dini alai kitai diau, kitai ke nyadi Saksi-Saksi Jehovah enda patut ngasuh orang bukai enda nyamai ati enggau chara kitai begari.

Kati gari nuan ngasuh orang bukai bebasaka Petara ti diarika nuan? (Peda genteran 7, 8)

8 Bacha 1 Korint 10:31. Lebuh kitai ngagai gempuru besai sehari sereta gempuru besai pelilih menua, gari kitai patut menyana sereta penumbas iya. Kitai enda patut nunda stail begari ti kelalu, ke bisi ba dunya tu. Indah sebedau tauka pengudah program gempuru besai pelilih menua sereta lebuh kitai check-in tauka check-out ba hotel, kitai patut nentuka gari kitai enda kelalu biasa tauka enda kemas. Enggau chara tu, kitai ulih temegah ati madahka diri Saksi-Saksi Jehovah, lalu kitai sedia deka meri saksi ba sebarang maya.

9, 10. Nama kebuah Pilipi 2:4 patut ngubah chara kitai begari?

9 Bacha Pilipi 2:4. Nama kebuah kitai patut mikirka baka ni gari kitai ulih ngachau bala menyadi Kristian kitai? Siti kebuah nya laban nembiak Petara bebendar nitihka jaku ajar: “Nya alai bunuh semua pengingin dunya ti dalam kita, baka: pengawa bambai, ulah ti kamah, runding ti kamah.” (Kol. 3:2, 5) Sekeda bala menyadi Kristian  kitai udah ninggalka gaya pengidup ti kamah, tang sida engka agi belaban enggau pengingin ti salah. Enti kitai enda bejimat, chara kitai begari ulih ngasuh sida tusah agi deka nitihka jaku lalau ari Bup Kudus sereta ngelaban pengingin ti salah nya. (1 Kor. 6:9, 10) Kitai tentu enggai ngasuh sida tusah agi ngelaban pengingin ti salah, enda pia?

10 Lebuh kitai begulai enggau bala menyadi Kristian kitai, kitai selamat ari orang ke rinduka ulah ti kamah. Chara kitai begari patut ngemansangka ulah ti manah sekalika kitai ba endur begempuru tauka ba endur bukai. Taja pan kitai ulih milih bagi gari ke deka dikena, kitai mega betanggungjawap ngena gari ke ulih ngasuh orang bukai senang agi ngetanka runding, jaku sereta ulah sida ti beresi ba mata Petara. (1 Pet. 1:15, 16) Pengerindu ti bendar ukai “[perangai ti jai, NW] enggau orang. Pengerindu enda berundingka diri empu.”—1 Kor. 13:4, 5.

GARI TI NGENA BA MAYA SERETA ENDUR TI PATUT

11, 12. Baka ni Pengajar 3:1, 17 nulung kitai milih bagi gari ke ulih dikena?

11 Lebuh nembiak Petara patut mutuska bagi gari ke deka dikena, sida nemu ‘semua utai, semua pengawa, deka nyadi magang ba maya ti endang udah diletak Petara ke siti-siti utai.’ (P-jar. 3:1, 17) Gaya hari ba sesebengkah menua, musin, penatai pemisi, tauka gaya siti-siti endur, ulih ngubah chara kitai begari. Tang standard Jehovah seruran sama.—Mal. 3:6.

12 Maya hari ke angat agi, endang tusah deka nentuka gari ke dikena kitai nya patut sereta penumbas iya. Bala menyadi Kristian kitai tentu lantang ati enti kitai enda ngena gari ti kelalu sendat tauka kelalu gerah nyentukka gari nya ngayanka tubuh. (Jop. 31:1) Pia mega, lebuh kitai ba pantai tauka kulam penyemerai, baju mandi kitai patut penumbas iya. (J-lam. 11:2, 20) Taja pan mayuh orang ba dunya ngena baju mandi ke ngayanka tubuh, kitai patut nentuka baju mandi ke dipilih kitai ngenataika mulia ngagai Jehovah, Petara kitai ti kudus.

13. Baka ni jaku lalau ke bisi ba 1 Korint 10:32, 33 bekaul enggau gari ke dipilih kitai?

13 Bisi siti agi prinsip ke beguna ti bekaul enggau gari ke dipilih kitai. Kitai patut bejimat ngambika kitai enda ngenusahka ati orang bukai. (Bacha 1 Korint 10:32, 33.) Kitai betanggungjawap nyeliahka gari ke ulih ngasuh bala menyadi Kristian kitai sereta orang ke enda nyembah Jehovah berasai enda nyamai ati. Rasul Paul nulis: “Genap iku kitai patut ngelantangka ati pangan kitai, kena nulung sida mansang.” Paul madahka kebuah tu: ‘Laban Kristus ukai datai ngelantangka diri.’ (Rom. 15:2, 3) Baka Jesus, kitai patut ngumbai ngereja peneka Petara sereta nulung orang bukai nya beguna agi ari utai ti dikerinduka kitai. Nya alai, kitai enda ngena gari ke bisi stail ti dikerinduka kitai enti iya ulih ngasuh orang enggai mendingka pesan ke dibai kitai.

14. Baka ni apai indai ulih ngelatih bala anak sida ngemuliaka Petara ari chara sida begari?

14 Apai indai ke Kristian bisi tanggung pengawa ngajar bala anak sida nitihka prinsip Bup Kudus. Tu nyengkaum nentuka sida enggau bala anak sida ngelantangka ati Petara enggau stail gari sereta chara ngintu diri ti penumbas iya. (J-lam. 22:6; 27:11) Baka ni apai indai ulih ngelatih bala anak sida bebasaka Petara kitai ti kudus sereta standard Iya? Apai indai patut netapka teladan ti manah ngagai bala anak sida. Lalu sida patut enggau pengerindu ngajar bala anak sida pasal dini alai sereta chara ngiga gari ke patut. Bala anak enda patut milih gari ketegal sida rinduka gari nya, tang keberat agi, sida patut milih gari ke ngemuliaka Jehovah, Petara ti diarika sida.

 NGENA PELUANG BIBAS MILIH ENGGAU MANAH

15. Nama ulih nulung kitai milih bagi gari ke manah?

15 Bup Kudus bisi iring ke ulih nulung kitai milih bagi gari ke ulih ngemuliaka Petara. Taja pia, gari ke dikena kitai ngambarka utai ke dikerindu kitai seiku-seiku. Stail ke dikerindu kitai sereta gari ke ulih dibeli kitai engka enda sebaka enggau sida ke bukai. Tang gari kitai patut seruran kemas, beresi, penumbas iya, betempat sereta diterima semua orang.

16. Nama penguntung enti kitai bebendar deka begari enggau manah?

16 Endang enda seruran senang ulih tetemuka gari ke patut sereta penumbas iya. Mayuh kedai semina nyual pisin ke tebilang. Nya alai, engka begunaka mayuh jam sereta bebendar agi ngiga skirt, gaun enggau blaus ke penumbas iya, tauka milih kot sereta tanchut ke enda kelalu sendat. Tang bala menyadi Kristian kitai deka meda sereta lantang ati enggau pengawa kitai ke bebendar ngena gari ti ngerinduka ati sereta betempat. Lalu kitai deka puas agi ati laban ngemuliaka Apai kitai ti di serega ke bepengerindu taja pan kitai patut ngelengkaka sekeda utai, laban kitai ulih begari enggau chara ti ngemuliaka Iya.

17. Nama sekeda pekara ke ngasuh sekalika seiku-seiku menyadi Kristian lelaki tau beragum?

17 Kati bala menyadi Kristian ke lelaki tau beragum? Adat Moses dekaka orang ke lelaki beragum. Taja pia, orang Kristian enda di baruh Adat Moses tauka patut nitihka Adat nya. (Lew. 19:27; 21:5; Gal. 3:24, 25) Ba sekeda menua, ragum ke diintu enggau manah engka diterima sereta dikemendarka, lalu iya enda ngelimpangka orang ari mendingka pesan ke dibai kitai. Amat, sekeda menyadi Kristian lelaki ke megai tanggung pengawa ba gempuru bisi beragum. Taja pia, sekeda menyadi Kristian lelaki engka mutuska enggai beragum. (1 Kor. 8:9, 13; 10:32) Ba sekeda menua bukai tauka chara pengidup, beragum ukai pekara biasa, lalu enda patut bisi ba nembiak Kristian. Amat, beragum ulih ngasuh seiku-seiku menyadi Kristian lelaki enda ngenataika mulia ngagai Petara sereta ngasuh orang bisi “jalai mantah” iya.—1 Tim. 3: 2, 7; Rom. 15:1-3.

18, 19. Baka ni Mikah 6:8 ulih nulung kitai?

18 Kitai lantang ati laban Jehovah enda meri kitai lis ti panjai pasal bansa gari enggau chara ngintu diri ke diterima tauka enda. Tang, Iya udah meri kitai peluang bibas milih kena ngaga pemutus ti manah kediri empu nitihka prinsip Bup Kudus. Nya alai, lebuh kitai ngaga pemutus pasal gari enggau chara ngintu diri, kitai ulih nunjukka diri deka begari enggau penumbas iya seraya kitai nyembah Petara kitai.—Mik. 6:8.

19 Kitai nemu, Jehovah endang tuchi sereta kudus, lalu nemu standard Iya endang iring ti pemadu manah ke kitai. Enti kitai deka penumbas iya sereta baruh ati, kitai deka nitihka standard Iya ba pengidup kitai. Ati ti baruh mega deka nulung kitai bebasaka asai ati sereta runding orang bukai.

20. Nama asil ari chara kitai begari enggau ngintu diri ba orang bukai?

20 Gari kitai patut enggau terang nunjukka kitai nembiak Jehovah. Jehovah bisi standard ti tinggi, lalu kitai lantang ati nitihka standard nya. Bala menyadi Kristian kitai patut dipuji ketegal chara sida begari sereta ulah sida ti manah, laban tu narit orang ke ngembuan ati ti lurus ngagai pesan Bup Kudus ti nyelamatka nyawa sereta ngenataika mulia enggau pengaga ati ngagai Jehovah. Lebuh kitai ngaga pemutus ti manah pasal gari ke deka dikena, kitai deka terus ngenataika mulia ngagai Petara ke ngerasukka Diri Empu ngena “mulia raja.”—Mas. 104:1, 2.