Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga—Edisyen Dikena Belajar  |  September 2016

 TOPIK RANDAU | DINI NUAN ULIH TETEMUKA PENGELANTANG?

Pengelantang ba Maya ti Tusah

Pengelantang ba Maya ti Tusah

Penusah bisi mayuh macham. Kitai tentu enda ulih nyebut tiap iti penusah nya ditu. Tang, aram kitai beratika empat iti penanggul ke udah disebut kitai tadi. Peratika baka ni orang ke napi penanggul ti bebida udah tetemuka pengelantang ti bendar ari Petara.

LEBUH LENYAU KEREJA

Ku Seth * ngenang: “Aku enggau bini aku lenyau kereja ba maya ti sama. Dua taun kami duai idup enggau belanja ke diberi diri sebilik ke bukai sereta ngereja sebarang pengawa ke bisi. Ketegal tu, bini aku, Priscilla, balat tusut runding, lalu aku ngasaika diri enda beguna.”

“Baka ni kami duai mutarka iya? Priscilla seruran ingatka jaku Jesus ba Matthew 6:34. Jesus madahka, kitai enda patut irau pasal pagila, laban pengirau ke sehari tu chukup ke sehari tu. Lalu sampi iya ke ari ati meri iya pengering kena neruska pengidup. Tang jaku ba Masmur 55:22 ngelantangka aku. Baka pemasmur, aku nyerahka penusah diri ngagai Jehovah, lalu aku nemu Iya endang nyaga aku. Taja pan aku diatu udah bisi kereja, tang gaya pengidup kami duai mengkang penumbas iya, laban nitihka ajar Jesus ba Matthew 6:20-22. Kelebih agi, kami duai udah semak agi ngagai Petara sereta ngagai pangan diri.”

Ku Jonathan ngaku: “Aku takut enggau utai ke deka nyadi jemah ila, laban pengawa dagang kami sebilik ke mit udah tengkerap. Ketegal penusah ba ekonomi, pengawa ke dikereja enggau bebendar pengelama 20 taun nadai reti agi. Aku enggau bini aku berengkah bekelikuh pasal duit. Kami duai indah enda ulih meli utai ngena kad kredit, laban takut enggaika kad nya enda diterima.”

“Tang Bup Kudus enggau roh kudus ari Petara udah nulung kami duai ngaga pemutus ti manah. Aku belajar nerima sebarang kereja, lalu kami duai kurang agi meli semua utai ke enda entu beguna. Ketegal nyadi Saksi-Saksi Jehovah, kami duai mega bulih sukung ari bala menyadi Kristian. Sida nulung kami duai andalka diri empu sereta nulung kami duai ba maya ke balat tusah.”

LEBUH RUMAH TANGGA PECHAH

Ku Raquel ngenang: “Lebuh laki aku ngenyit ninggalka aku, ati aku balat tusah sereta pedis. Lalu asai ati ti tusah tu balat ngachau aku. Tang aku semak ngagai Petara, lalu Iya ngelantangka aku. Pemaik ari Petara nyaga ati aku lebuh aku bepanggai ba Iya dalam sampi ninting hari. Ba aku, Iya baka ke ngeraika ati aku ti balat tusah.”

“Lalu terima kasih ke Bup Kudus, laban aku ulih ngalahka asai ati ti pedis sereta ringat. Aku beratika jaku rasul Paul ba Rome 12:21: ‘Anang alah laban penyai, tang alahka penyai ngena pemadas.’”

“Seiku kawan ti rapat nulung aku nemu kebuah aku patut neruska pengidup. Iya nunjukka ayat ba Pengajar 3:6, lalu enggau manah madahka ngagai aku, bisi maya kitai patut “ngelenyauka utai.” Tu jaku ajar ke tusah diterima, tang nya meh utai ti diguna aku. Aku diatu bisi juluk ati ti baru ba pengidup.”

Ku Elizabeth madahka: “Lebuh rumah tangga kitai pechah, kitai begunaka sukung. Aku bisi seiku kawan ti manah ke meri aku sukung ninting hari. Iya sama nyabak enggau aku, ngelantangka aku sereta ngasuh aku berasai dikesayauka. Aku pechaya, Jehovah udah ngena iya ngeraika asai ati aku ti telih.”

LEBUH ENDA BEPENGERAI TAUKA UDAH TUAI

Luis ke disebut ba pun artikel tu tadi, bisi penanggul ti balat ba jantung, lalu iya dua kali nyau deka mati. Diatu iya patut enseput ngena tangki oksigen pengelama 16 jam sehari. Ku iya madahka: “Aku seruran besampi ngagai Jehovah. Lalu pengudah besampi ngagai Iya, aku ngasaika roh kudus Iya ngeringka aku. Sampi meri aku pemerani kena neruska pengidup laban aku bisi pengarap ngagai Iya, lalu nemu Iya ngibun aku.”

Ku Petra ke beumur ngelui 80 taun, madahka:  “Aku deka ngereja mayuh utai, tang enda ulih. Beratika pengering diri majak kurang amat ngenusahka ati. Aku berasai lelak lalu patut bepanggai ba ubat. Aku suah berundingka chara Jesus minta Apai iya muai siti-siti penusah, enti ulih. Tang Jehovah meri Jesus pengering, lalu Iya ngeringka aku. Sampi nya ubat aku ninting hari. Aku berasai lantang agi ati pengudah besampi ngagai Jehovah.”—Matthew 26:39.

Julian, ke belaban enggau penyakit sclerosis nyau deka 30 taun, ngasaika utai ti sama. Ku iya madahka: “Suba aku duduk ba kerusi ke dikena ba opis, tang diatu aku duduk ba kerusi ruda. Tang pengidup aku bisi reti laban aku ngena iya gawa ke orang bukai. Pengawa meri ulih ngurangka pemerinsa, lalu Jehovah endang ngamatka semaya ke deka ngeringka kitai, lebuh kitai begunaka tulung. Baka rasul Paul, aku ulih nyebut: ‘Aku ulih ngereja semua utai ulih Iya ke meri aku pengering.’”—Pilipi 4:13.

LEBUH LENYAU ORANG TI DIKESAYAUKA

Ku Antonio ngenang: “Lebuh apai aku mati belantak ba jalai raya, terubah iya aku enda pechaya. Tu amat enda patut—iya semina pejalai kaki ke enda salah. Tang, nadai utai ulih digaga aku. Iya koma pengelama lima hari sebedau iya mati. Taja pia aku nagang diri ari nyabak ba mua indai aku, tang aku nyabak lebuh aku kediri. ‘Nama kebuah? Nama kebuah?’ Ku aku majak nanya diri empu.”

“Ba maya ti balat tusah nya, aku majak minta Jehovah nulung aku nagang asai ati diri sereta meri aku pemaik. Lalu aku belubah-lubah berasai lantang ati. Aku agi ingat, Bup Kudus madahka “utai ti jai” tau nyadi ba genap iku orang. Ketegal Petara enda bula, aku pechaya, aku ulih betemu enggau apai aku baru pengudah iya diangkatka idup baru.”—Pengajar 9:11; John 11:25; Titus 1:2.

“Taja pan bilun ke labuh nya nabanka nyawa anak lelaki kami duai, kami duai agi bisi mayuh kenang ke ngelantangka ati ke ulih dikunsi kami duai.”—Robert

Robert ke disebut ba pun artikel tu, bisi runding ti sama. Ku iya madahka: “Aku enggau bini aku ngasaika pengelantang ba runding baka ke dipadah ba Pilipi 4:6, 7. Pengelantang nya datai ngagai kami duai nengah sampi ngagai Jehovah. Pengelantang ba runding tu ngasuh kami duai ulih bejaku pasal pengadang diangkatka idup baru enggau pemberita. Taja pan bilun ke labuh nya nabanka nyawa anak lelaki kami duai, kami duai agi bisi mayuh kenang ke ngelantangka ati ke ulih dikunsi kami duai. Kami duai nguji beratika semua utai nya.”

“Lebuh bala menyadi Kristian madahka ngagai kami duai pasal sida ke udah meda kami duai nerangka utai ti dipechaya diri ba TV, kami duai madahka ngagai sida, iya ke amat terima kasih ke semua sampi kita ke kami duai. Aku amat pechaya, Jehovah nyukung kami duai ngena pesan sida ti ngelantangka kami duai.”

Semua chunto nya nunjukka, Petara ulih meri pengelantang ngagai orang ke napi mayuh macham penanggul enggau penusah. Baka ni enggau nuan? Enda ngira nama penusah ke engka ditapi nuan ba pengidup, nuan ulih tetemuka pengelantang kena napi maya ti tusah nya. * Nya alai, nama kebuah enda ngiga tulung ari Jehovah? Iya endang ‘Petara ti pun semua pengelantang.’—2 Korint 1:3.

^ per. 5 Sekeda nama dalam artikel tu udah ditukar.

^ per. 23 Enti nuan deka bulih tulung ngambika semak ngagai Petara sereta bulih pengelantang ari Iya, giga meh Saksi-Saksi Jehovah ba kandang endur nuan diau, tauka nulis surat ngagai pampang opis ke semak nuan.