Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  September 2016

 TOPIK RANDAU | DINI NUAN ULIH TETEMUKA PENGELANTANG?

Semua Kitai Begunaka Pengelantang

Semua Kitai Begunaka Pengelantang

Kati nuan agi ingat maya nuan teterap lebuh agi mit? Jari tauka patung nuan engka bakal. Kati nuan agi ingatka chara indai nuan ngelantangka nuan? Iya engka meresi, lalu malut abi telih nya. Nuan nyabak, tang jaku iya ti meransang ati sereta merap nuan ngasuh nuan berasai lantang. Maya nya, nuan senang ngulihka pengelantang.

Tang pengidup majak tusah seraya kitai mansang besai. Penanggul majak besai, lalu pengelantang majak tusah diulih. Sayau amat, penanggul orang ke besai tuai jarang ulih diputarka enggau kain balut tauka berap ari indai. Peratika sekeda chunto.

  • Kala nuan balat tusah ati ketegal lenyau kereja? Julian madahka, lebuh iya dibuai ari kereja, iya balat tusah ati. Ku iya berunding, ‘Baka ni aku deka melanja ruang bilik aku? Pengudah aku betaun gawa bebendar, nama kebuah kompeni ngumbai aku enda beguna?’

  • Nuan engka balat tusah ati ketegal rumah tangga nuan enda mujur. Ku Raquel madahka: “Lebuh laki aku ngenyit ninggalka aku 18 bulan ti udah, aku ngasaika diri balat tusah ati. Ati aku balat anchur. Pemedis nya ukai semina ba ati aja, tang ba tubuh aku mega. Tu ngenakutka aku.”

  • Nuan engka bisi penanggul besai ba pengerai. Kekadang nuan ngasaika utai ti diasaika Jop ke mutap: “Aku enggai agi idup. Aku nyau lelak idup.” (Jop 7:16) Nuan engka ngasaika utai ke diasaika Luis, seiku lelaki ke beumur ngelui 80 taun, ke madahka, “Kekadang aku ngasaika diri semina deka mati aja.”

  • Tauka pemati orang ti dikesayauka engka ngasuh nuan keran deka ngulihka pengelantang. Ku Robert madahka, “Lebuh anak lelaki aku mati dibai bilun labuh, terubah iya aku berasai enda pechaya. Udah nya aku ngasaika ati diri balat merinsa. Bup Kudus mandingka pemerinsa nya baka pedang ke ngerejang ati.”—Luke 2:35.

Robert, Luis, Raquel, enggau Julian udah tetemuka pengelantang, taja pan napi penanggul ke ngasuh sida balat tusah ati. Sida tetemuka orang ti pemadu manah ke meri pengelantang—iya nya Petara ti Pemadu Bekuasa. Baka ni chara Iya meri pengelantang? Kati Iya deka meri pengelantang ke diguna nuan?