Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga—Edisyen Dikena Belajar  |  September 2016

Apai Indai, Tulung Meh Bala Anak Kita Ngemansangka Pengarap

Apai Indai, Tulung Meh Bala Anak Kita Ngemansangka Pengarap

‘Indu ke biak, enggau orang bujang . . . Awakka semua sida muji nama Jehovah.’—MAS. 148:12, 13.

LAGU: 88, 115

1, 2. (a) Nama kebuah apai indai enda senang ngajar bala anak sida ngembuan pengarap ngagai Jehovah, lalu nama chara ke ulih dikena apai indai ngereja tu? (b) Nama empat chara ke deka dikerandauka kitai diatu?

SEPASANG apai indai ari menua Perancis madahka: “Kami pechayaka Jehovah, tang tu ukai reti nya bala anak kami deka pechayaka Iya. Pengarap ukai utai ti datai ari peturun. Bala anak kami patut ngulihka iya mimit-mimit.” Seiku menyadi Kristian lelaki ari menua Australia nulis: “Nulung ngemansangka pengarap dalam ati anak kitai engka penanggul ti pemadu besai ke kala ditapi kitai.” Ku iya nambahka: “Nuan engka ngasaika diri udah ngemuaska ati iya enggau nyaut tanya ari iya. Udah nya iya nanya nuan utai ti sama baru! Saut ti ngemuaska runding anak ke deka nemu sehari tu engka enda ngemuaska iya pagila.” Seraya bala anak mansang besai, mayuh apai indai ngasaika diri patut nerangka topik ti sama enggau silik agi. Lalu sida ngasaika diri patut ngena mayuh macham chara kena ngajar bala anak sida rinduka Jehovah.

2 Enti nuan nya apai tauka indai, kati nuan kekadang bisi berunding sekalika nuan amat ulih ngajar bala anak nuan rinduka Jehovah sereta terus nyembah Iya taja pan sida udah besai? Iya ke amat, nadai seiku ari kitai ulih ngereja tu kediri empu. (Jer. 10:23) Nya kebuah kitai patut bepanggai ba Jehovah ngambika nulung kitai. Iya udah meri apai indai mayuh iring. Baka ni kita ulih nulung bala anak kita? (1) Ngelala sida enggau manah. (2) Ngajar sida utai pasal Jehovah ke bisi dalam ati kita.  (3) Ngena sempama. (4) Besampi minta roh kudus sereta sabar enggau bala anak kita.

NGELALA BALA ANAK KITA ENGGAU MANAH

3. Baka ni apai indai ulih nunda chara Jesus ngajar bala murid iya?

3 Jesus suah nanya bala murid iya pasal utai ti dipechaya sida. (Mat. 16:13-15) Kita ulih nunda chunto iya. Lebuh kita berandau tauka ngereja siti-siti utai enggau bala anak kita, tanya sida pasal utai ti dirunding sida, lalu asuh sida madahka utai ti amat diasaika sida. Kati sida bisi kakang ati? Seiku menyadi Kristian lelaki ke beumur 15 taun ari menua Australia madahka: “Apai suah berandau enggau aku pasal pengarap aku sereta nulung aku nerangka iya. Iya nanya aku: ‘Nama dipadah Bup Kudus?’ ‘Kati nuan pechayaka utai ti dipadah Bup Kudus?’ ‘Nama kebuah nuan pechayaka Bup Kudus?’ Iya deka aku nyaut ngena leka jaku diri empu, lalu ukai semina nandu jaku iya tauka jaku indai aku. Seraya aku mansang besai, aku patut ngemanahka agi saut aku.”

4. Nama kebuah nya beguna sabar sereta nyaut tanya ari bala anak kita? Padahka siti chunto.

4 Enti bala anak kita enda tekala nya pechayaka siti-siti utai ti diajar Bup Kudus, sabar meh. Tulung sida ngiga saut ngagai utai ti ditanya sida. Seiku apai madahka: “Beberatka utai ti ditanya anak kita. Anang ngumbai utai ti ditanya sida enda entu beguna, lalu anang nyeliahka siti-siti topik ketegal topik nya ngasuh kita berasai malu.” Iya ke amat, endang manah enti bala anak betanya, laban tu reti iya sida deka meretika siti-siti utai. Indah Jesus betanya lebuh iya agi mit. (Bacha Luke 2:46.) Seiku nembiak ari menua Denmark madahka: “Lebuh aku madahka diri kakang ati sekalika kami sebilik bisi jalai pengarap ti bendar, apai indai aku enggau sabar nerangka utai nya—taja pan seduai iya engka irauka aku. Seduai iya nyaut semua tanya aku ngena Bup Kudus.”

5. Taja pan bala anak baka ke bisi pengarap ngagai Jehovah, nama patut digaga apai indai?

5 Kelala bala anak kita enggau manah. Anang ngumbai sida bisi pengarap ngagai Jehovah ketegal sida bisi enggau nginjil sereta datai begempuru. Baka ni asai ati sida pasal Jehovah, lalu nama runding sida pasal Bup Kudus? Enggau naka ulih nguji nemu sebarang utai ke ngasuh sida tusah deka mengkang tetap ati ngagai Jehovah. Bejaku pasal Jehovah ninting hari lebuh kita ngereja pengawa enggau bala anak kita. Besampi ke bala anak kita, lebuh kita enggau sida tauka lebuh kita kediri empu.

AJAR SIDA UTAI PASAL JEHOVAH KE BISI DALAM ATI KITA

6. Lebuh apai indai terus belajar pasal Jehovah sereta Bup Kudus, baka ni tu nulung sida ngajar bala anak sida?

6 Orang rindu mendingka Jesus laban iya rinduka Jehovah sereta ngelala Bup Kudus enggau manah. Sida mega ngasaika Jesus rinduka sida. Nya alai, sida mendingka iya enggau bejimat. (Luk. 24:32; Jhn. 7:46) Pia mega, lebuh bala anak beratika kita rinduka Jehovah, tu mega nulung sida rinduka Iya. (Bacha Ulang Adat 6:5-8; Luke 6:45.) Nya alai, terus belajarka Bup Kudus enggau bejimat sereta macha litaricha kitai enggau tetap. Nguji nemu mayuh agi pasal utai ti udah ditempa Jehovah. (Mat. 6:26, 28) Mayuh agi utai ke ditemu kita pasal Jehovah, mayuh agi utai ke ulih diajar kita ngagai bala anak pasal Iya.—Luk. 6:40.

7, 8. Tiap kali kita belajar pasal Jehovah, nama ulih digaga kita? Baka ni sekeda apai indai udah ngereja tu?

7 Lebuh kita belajar siti-siti utai pasal Jehovah, padah ngagai bala anak kita pasal utai nya. Kereja tu ba sebarang maya lebuh kita bisi enggau sida, ukai semina lebuh nyediaka utai dikena begempuru tauka lebuh belajarka Bup Kudus ba diri sebilik. Tu meh utai ti dikereja  sepasang apai indai ari menua Amerika Serikat. Seduai iya bejaku pasal Jehovah enggau bala anak seduai iya lebuh sida meda utai idup ti manah ba dunya tu tauka lebuh sida benung makai utai ti nyamai. Ku seduai iya madahka: “Kami duai ngingatka bala anak kami pasal pengerindu enggau pengibuh Jehovah ke udah nyediaka semua utai ke kitai.” Sepasang laki bini ari menua Afrika Selatan rindu bejaku pasal utai ti ditempa ba dunya lebuh gawa ba kebun enggau dua iku anak indu seduai iya. Ngambika chunto, seduai iya nyebut pasal utai ti ngalitka ati baka leka benih ke ulih nyadi utai tumbuh. Ku apai indai nya madahka: “Kami duai nguji ngasuh anak indu kami bebasaka pengidup sereta utai ditempa ti kompleks ke ngerinduka ati.”

8 Seiku apai ari menua Australia mai anak lelaki iya ke beumur kira-kira sepuluh taun, ngagai muzium. Iya deka ngena awak nya nulung anak iya negapka pengarap sereta meda bukti ke nunjukka Jehovah endang Penempa. Ku iya madahka: “Kami duai meda utai ti bekaul enggau jelu ke kala idup ba tasik kelia, ke dikumbai ammonoids enggau trilobites. Tu ngalitka ati kami duai, laban jelu ke udah nadai agi tu ngerinduka ati, kompleks sereta nadai penimpang—sama baka ke dipeda kitai kemaya hari tu. Nya alai, enti utai idup ke enda kompleks berubah nyadi utai ke kompleks agi, nama kebuah jelu ke kala idup ba tasik kelia udah balat kompleks? Tu utai ti ngasuh aku enggau anak lelaki aku balat alit ati.”

NGENA SEMPAMA

9. Nama kebuah nya manah ngena sempama? Nama sempama ke dikena seiku indai?

9 Jesus suah ngena sempama. Iya ngajar utai ti beguna enggau nusui cherita tauka ngena chunto. (Mat. 13:34, 35) Lebuh kita ngena sempama, kita ngawakka bala anak kita ngambarka utai. Tu deka nulung sida berundingka utai ti diajar kita ngagai sida, meretika utai nya enggau terang sereta ngingatka utai nya. Sida mega deka rindu belajar. Ngambika chunto, seiku indai ari menua Jepun deka dua iku anak lelaki iya belajar pasal chara Jehovah ngaga dunya tu, ke nunjukka pengibuh Iya ngagai kitai. Seiku anak lelaki iya beumur lapan taun, lalu seiku agi beumur sepuluh taun. Nya alai, iya ngena sempama ke ulih dimeretika seduai iya. Iya meri seduai iya gula, kopi enggau tusu. Udah nya, iya ngasuh seduai iya ngaga sekap seiku ai kopi ke iya. Ku iya madahka: “Seduai iya ngaga kopi nya enggau bejimat. Lebuh aku nanya kebuah seduai iya bejimat, seduai iya madahka diri dekaka kopi ti digaga nya sama baka iya ti dikedekaka aku. Aku nerangka, Petara mega nyampur sekeda gas ke bisi ba atmosfera enggau bejimat—endang pengumbas iya ke kitai.” Seduai iya rindu belajarka utai nya, lalu mengkang ingatka utai nya!

Kita ulih ngena sempama ke senang kena nunjukka Penempa endang bisi ngagai bala anak kita(Peda genteran 10)

10, 11. (a) Nama sempama ke ulih dikena kita nunjukka Penempa endang bisi ngagai bala anak? (Peda gambar ba pun artikel.) (b) Nama sempama ke udah dikena kita?

10 Nama sempama ke ulih dikena kita nunjukka Penempa endang bisi ngagai bala anak kita? Kita ulih ngaga kek enggau anak kita ngena siti resipi. Terangka kebuah nya beguna  nunda utai ti dipadah dalam resipi nya. Udah nya beri anak kita sigi buah ipul tauka sekeda buah ke bukai, lalu tanya iya: “Kati nuan nemu buah ipul tu mega bisi resipi?” Udah nya, belah dua ipul nya, lalu beri leka ipul ngagai iya. Terangka, leka ipul nya baka siti resipi. Leka nya ngembuan chara ke madahka baka ni ngasilka buah ipul. Tang chara tu kompleks agi ari chara ngaga kek. Kita tau nanya: “Bisi orang nulis resipi kek nya. Nya alai, sapa ke nulis resipi buah ipul nya?” Enti bala anak udah besai agi, kita ulih nerangka, indah chara ngasuh pun ipul nya ulih ngasilka mayuh agi buah ipul ulih ditemu ba DNA ke bisi dalam leka ipul nya. Kita mega ulih nunjukka ngagai sida sekeda gambar enggau chunto ba lambar 10 ngagai 20 ari brosur Asal Mula Kehidupan—Lima Pertanyaan yang Patut Direnungkan-IN.

11 Mayuh apai indai macha artikel ba “Apakah Ini Dirancang?”-IN dalam Sedarlah! enggau bala anak. Enti bala anak agi mit, apai indai ulih madahka penerang nya enggau chara ti senang. Ngambika chunto, sepasang laki bini ari menua Denmark mandingka bilun enggau burung. Ku seduai iya madahka: “Gamal bilun baka burung. Tang ulih bilun betelu lalu telu iya mechah nyadi anak bilun? Kati burung begunaka alai terengkah baka enggi bilun? Lalu baka ni nuan ulih mandingka bunyi bilun enggau bunyi burung? Nya alai, sapa ke pintar agi—orang ke ngaga bilun tauka orang ke nempa burung?” Lebuh kita nerangka ngagai bala anak kita lalu nanya sida, kita nulung sida ngena “pemintar runding” sereta negapka pengarap sida ngagai Jehovah.—J-lam. 2:10-12.

12. Baka ni kita ulih ngena sempama ngajar bala anak kita kena nunjukka utai ti dipadah Bup Kudus endang betul?

12 Kita ulih ngena sempama ngajar bala anak kita kena nunjukka utai ti dipadah Bup Kudus endang betul. Ngambika chunto, kita ulih macha Jop 26:7. (Bacha.) Anang semina madahka ngagai bala anak kita, penerang dalam ayat nya endang datai ari Jehovah. Tang, tulung meh sida ngambarka utai nya. Kita ulih madahka, orang maya jeman Jop engka enda pechayaka dunya tu lepung-lepung kediri ba dunya luar. Sida nemu, siti-siti utai, baka bol tauka batu, endang bepanggai ba utai bukai. Maya nya, nadai seiku orang udah nunjukka dunya tu lepung-lepung kediri ba dunya luar, laban maya nya nadai teleskop tauka bilun angkasa. Utai ti ulih dipelajarka iya nya, taja pan Bup Kudus udah lama ditulis, tang iya seruran betul laban iya endang ari Jehovah.—Neh. 9:6.

AJAR SIDA KEBUAH NYA MANAH ENTI SIDA DIIRING BUP KUDUS

13, 14. Baka ni apai indai ulih ngajar bala anak sida ngasika utai ti dipadah Bup Kudus?

13 Endang beguna mega ngajar bala anak kita ngasika utai ti dipadah Bup Kudus ngambika sida ulih diau lantang. (Bacha Masmur 1:1-3.) Ngambika chunto, kita ulih ngasuh bala anak kita ngambarka diri deka diau ba siti pulau. Sida patut milih sekeda orang ke deka dibai sida diau dia. Udah nya kita ulih nanya, “Orang ke baka ni ti deka dibai nuan enti nuan deka semua orang ulih begulai manah enggau pangan diri? Penudi iya, kita tau macha Galatia 5:19-23 kena nemu bansa orang ke dikedekaka Jehovah ba dunya baru.

14 Enggau chara tu, kita ulih ngajar bala anak kita dua iti utai ti beguna. Kesatu, Jehovah ngajar kitai chara idup lantang diatu sereta bisi pemaik enggau orang bukai. Kedua, Iya ngajar kitai chara idup ba dunya baru. (Isa. 54:13; Jhn. 17:3) Kita mega ulih nunjukka ngagai bala anak kita baka ni Bup Kudus udah nulung bala menyadi Kristian kitai. Ngambika chunto, giga cherita pengidup ke bisi dalam siti ari litaricha kitai, engka ba “Bible Mengubah Hidup”-ML dalam majalah Menara Pengawal. Tauka nanya orang ari gempuru kita  ngambika nusui ngagai kita sereta bala anak kita pasal baka ni Bup Kudus udah nulung iya ngaga ubah ti besai kena ngelantangka ati Jehovah.—Heb. 4:12.

15. Nama ulih nulung kita ngajar bala anak kita?

15 Ngambika utai ti diajar kita ngerinduka ati sereta ngagitka ati bala anak kita, kita patut nemu ngambarka utai nya. Perundingka chara ti bebida kena nulung sida rindu belajar pasal Jehovah sereta semak agi ngagai Iya. Lalu terus ngereja nya seraya sida mansang besai. “Anang enggai nguji chara baru kena ngajar topik ke lama,” ku seiku apai.

BESAMPI MINTA ROH KUDUS JEHOVAH SERETA SABAR

16. Lebuh ngajar bala anak, nama kebuah sabar nya beguna? Baka ni sekeda apai indai nunjukka diri sabar?

16 Enggau tulung ari roh kudus Jehovah, bala anak kita ulih ngembuan pengarap ti tegap. (Gal. 5:22, 23) Tang begunaka awak ngambika pengarap sida ulih tegap. Nya alai sabar meh enggau bala anak, lalu terus ngajar sida. Seiku apai ari menua Jepun ke bisi seiku anak lelaki enggau seiku anak indu madahka: “Aku enggau bini aku ngena mayuh jam enggau anak kami duai. Kenyau ari seduai iya agi mit, aku belajar enggau seduai iya pengelama 15 minit ninting hari, tang enda belajar maya kami bisi begempuru. Semua kami nadai penanggul belajar pengelama lima belas minit.” Seiku tuai ti ngabas nulis: “Lebuh aku agi nembiak, utai ti deka ditanya tauka utai ti ngasuh aku kakang ati kelalu mayuh. Nyau kelama, mayuh ari tanya tu dikerandauka maya begempuru tauka lebuh belajarka Bup Kudus ba diri sebilik tauka kediri empu. Nya kebuah endang beguna apai indai terus ngajar.”

Ngambika nyadi pengajar ti manah, kita enda tau enda rinduka Bup Kudus (Peda genteran 17)

17. Nama kebuah nya beguna apai indai negapka pengarap diri? Baka ni sepasang apai indai ari menua Bermuda nulung anak indu seduai iya bisi pengarap ngagai Jehovah?

17 Endang amat, bala anak kita ulih belajar mayuh utai enti sida meda kita bisi pengarap ti tegap ngagai Jehovah. Sida deka beratika utai ti dikereja kita. Nya alai terus tegapka pengarap kita. Awakka bala anak kita meda, Jehovah endang nyata ba kita. Ngambika chunto, lebuh sepasang apai indai ari menua Bermuda irau pasal siti-siti utai, seduai iya besampi enggau bala anak indu seduai iya, lalu minta Jehovah ngiring sida. Seduai iya mega meransang anak seduai iya besampi kediri empu. “Kami duai mega ngasuh anak indu kami duai ke tuai agi, ‘Pechayaka Jehovah enggau pengabis ati, mengkang kisuk ba pengawa nginjil sereta enda kelalu irau.’ Lebuh iya meda asil nya, iya nemu Jehovah udah nulung kami. Tu pulaika pemanah ke pengarap iya ngagai Petara sereta Bup Kudus.

18. Nama patut dikingatka apai indai?

18 Apai indai, anang enda ingat, kita enda tau mejal bala anak ngembuan pengarap. Kita nanam sereta manjah, tang semina Jehovah ke ulih ngasuh pengarap sida tumbuh. (1 Kor. 3:6) Nya alai, bebendar meh ngajar bala anak kita pasal Iya, lalu besampi minta roh kudus ari Iya kena nulung sida ngembuan pengarap. Kita ulih pechaya, Jehovah deka merekatka semua pengawa kita ke bebendar.—Eps. 6:4.