Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  September 2016

“Anang Lembut Tulang”

“Anang Lembut Tulang”

“Anang lembut tulang!—SEP. 3:16.

LAGU: 81, 32

1, 2. (a) Nama bansa penusah ke ditapi mayuh orang kemaya hari tu, lalu nama nyadi? (b) Nama pengadang manah ke bisi dipadah ba Isaiah 41:10, 13?

SEIKU menyadi Kristian indu ke nyadi pengerintis biasa sereta udah jadi enggau seiku tuai gempuru madahka: “Taja pan aku bisi jadual rohani ti manah, tang betaun aku belaban enggau pengirau. Tu ngasuh aku enda ulih tinduk, ngachau pengerai aku, ngachau chara aku begulai enggau orang, lalu kekadang ngasuh aku nguji deka badu mutarka pengirau.”

2 Ulih nuan meretika asai ati menyadi Kristian indu nya? Sayau amat, laban kitai diau ba dunya Sitan ti jai, kitai ngasaika diri balat ditekan. Lalu baka sauh ke ngasuh perau enda anyut, pengirau ulih ngasuh kitai berasai enda lantang tauka enda diperansang. (J-lam. 12:25) Nama kebuah nuan berasai irau? Nuan engka tusah ati enggau pemati orang ke dikesayauka, napi penyakit ti balat tauka napi pemerinsa. Nuan mega engka tusah deka melanja ruang bilik ketegal bisi penanggul ba penatai pemisi. Nyau kelama, asai ati ke balat tusah ulih ngasuh nuan lemi, lalu indah ngasuh nuan lenyau pengaga ati. Taja pia nuan ulih pechaya, Petara sedia deka nulung nuan.—Bacha Isaiah 41:10, 13.

3, 4. (a) Baka ni Bup Kudus ngena leka jaku “jari”? (b) Nama engka ngasuh jari kitai lelak?

3 Bup Kudus suah ngena perengka tubuh ngambarka kualiti tauka pengawa bebida ba seiku-seiku orang. Ngambika chunto, “jari” bisi disebut beratus kali dalam bansa jaku ti asal. Lebuh Bup Kudus madahka, jari orang dikeringka, reti iya orang nya udah diperansang, nyadi kering  agi sereta sedia deka ngereja pengawa. (1 Sam. 23:16) Reti iya mega, orang nya ngembuan runding ti manah sereta bisi pengadang ke jemah ila.

4 Ba maya ti bukai, Bup Kudus engka nyebut pasal jari orang ke lelak. Tu nunjukka orang nya enda diperansang tauka putus pengarap. (2 Ban. 15:7; Heb. 12:12) Lebuh nuan berasai ditekan tauka lelak, tauka ngasaika kaul nuan enggau Jehovah nyau lemi, nuan engka ngasaika diri enda diperansang. Dini nuan tau bulih peransang? Baka ni nuan ulih diperansang sereta dikeringka ngambika ulih tan sereta lantang ati?

‘ANANG NGUMBAI JEHOVAH LEMI LALU ENDA ULIH NGELEPASKA KITA’

5. (a) Baka ni asai ati kitai lebuh napi penusah, tang nama patut dikingatka kitai? (b) Nama deka dikerandauka kitai?

5 Bacha Sepaniah 3:16, 17. Kitai enda patut takut sereta enda diperansang tauka nejuka jari kitai lelak, lebuh kitai napi penusah. Apai kitai ti bepengerindu, Jehovah, ngasuh kitai nyerahka semua pengirau kitai ngagai Iya. (1 Pet. 5:7) Jehovah ibuhka kitai sama baka Iya ke ibuhka bansa Israel. Iya madahka ngagai sida, jari Iya “ulih ngelepaska” sida. Iya seruran sedia deka nyelamatka nembiak Iya ke tetap ati. (Isa. 59:1) Ba artikel tu, kitai deka berandauka tiga iti chunto ari Bup Kudus ti manah, ke ngayanka pengeran sereta kuasa Jehovah kena ngeringka nembiak Iya ngambika ngereja peneka Iya, taja pan sida napi penanggul ti besai. Aram kitai beratika baka ni chunto tu ulih ngeringka nuan.

6, 7. Nama ulih dipelajarka kitai ari orang Israel ke menang dalam perang ngelaban orang Amalek?

6 Enda lama pengudah orang Israel dilepaska ari nyadi ulun ba menua Ejip, orang Amalek nyerang sida. Moses ngasuh Josua, seiku lelaki ti berani, nguluka orang Israel beperang. Udah nya Moses mai Aron enggau Hur ngagai sigi bukit. Ari bukit nya, sida ulih meda endur alai beperang. Kati sida tiga ngerarika diri ari perang laban sida takut? Tentu enda!

7 Moses nitihka pelan ke nulung orang Israel menang ba perang ngelaban orang Amalek. Iya megai tungkat ti diasuh Petara bai iya, lalu ngangkatka kedua-dua jari iya. Lebuh Moses ngereja nya, Jehovah meri orang Israel kuasa dikena ngelaban orang Amalek. Taja pia, lebuh lengan Moses nyau lelak lalu iya nurunka lengan iya, orang Amalek belabuh menang. Aron enggau Hur berumban nulung Moses. “Aron seduai Hur lalu mai sigi batu alai Moses duduk, lalu seduai iya bediri ngimbai iya, lalu nuatka lengan iya enda engkebut nyentuk ngagai padam mata panas.” Amat, ketegal kuasa Petara ti besai, orang Israel menang ba perang nya.—P-sut. 17:8-13.

8. (a) Nama digaga Asa lebuh orang Etiopia ngemba orang Judah? (b) Baka ni kitai ulih neladan Asa?

8 Jehovah mega sedia deka ngena kuasa Iya ti besai nulung nembiak Iya maya jeman Raja Asa. Mayuh bala soldadu bisi disebut dalam Bup Kudus, tang bala soldadu ke pemadu mayuh nya enggi Serah orang Etiopia. Iya bisi 1,000,000 iku soldadu ke udah dilatih. Bala soldadu orang Etiopia nya nyau deka dua kali lipat ari penyampau bala soldadu Asa. Kati Asa irau, takut tauka lemi semengat? Kati iya nejuka jari iya lelak? Enda! Asa lalu tekala nya minta tulung ari Jehovah. Ari segi perang, bala soldadu Asa baka ke enda ulih menang ngelaban orang Etiopia. ‘Tang ba Petara semua utai ulih magang.’ (Mat. 19:26) Petara ngena kuasa Iya ti besai, lalu “ngalahka bala soldadu orang Etiopia” ba mua Asa, ke ‘mengkang tetap  ati ngagai Jehovah sepemanjai umur iya.’—2 Ban. 14:8-13; 1 Raj. 15:14.

9. (a) Nama utai ke enda ulih nagang Nehemiah ari ngaga baru dinding kuta Jerusalem? (b) Baka ni Petara nyaut sampi Nehemiah?

9 Lebuh Nehemiah datai ba Jerusalem, nama dipeda iya? Iya meda munsuh ari menua bukai ngemba orang Judah, nya alai sida ngetu ngaga dinding kuta Jerusalem. Nengeri nya enda selamat, lalu orang Judah lemi semengat. Baka ni asai ati Nehemiah? Kati iya mega lemi semengat sereta nejuka jari iya lelak? Enda! Baka Moses, Asa, sereta nembiak Jehovah ke bukai ti tetap ati, Nehemiah seruran bepanggai ba Jehovah. Maya napi pekara tu, Nehemiah besampi minta tulung ari Jehovah, lalu Jehovah nyaut iya. Petara ngena “kuasa” enggau “pengering” Iya ti besai ngeringka orang Judah. (Bacha Nehemiah 1:10; 2:17-20; 6:9.) Kati nuan pechaya, Jehovah ngena “kuasa” enggau “pengering” Iya ti besai ngeringka nembiak Iya kemaya hari tu?

JEHOVAH DEKA NGERINGKA JARI NUAN

10, 11. (a) Baka ni Sitan nguji ngasuh jari kitai lelak? (b) Nama dikena Jehovah ngeringka kitai? (c) Baka ni nuan bulih penguntung ari utai ti diajar Jehovah?

10 Kitai ulih pechaya, Sitan enda nejuka jari iya lelak. Iya deka terus nyerang kitai, nguji ngetuka pengawa Kristian kitai. Iya ngena pemula sereta emba ari perintah, bala tuai pengarap sereta orang ke enda nangika Petara. Nama tuju iya? Iya dekaka kitai badu nusui berita manah pasal Perintah Petara. Tang Jehovah ulih sereta deka nulung kitai, lalu deka meri kitai roh kudus Iya kena ngeringka kitai. (1 Ban. 29:12) Endang beguna bendar kitai minta roh kudus ari Petara ngambika kitai ulih ngelaban Sitan enggau dunya iya ti jai. (Mas. 18:39; 1 Kor. 10:13) Kitai mega beterima kasih ke tulung ti diulih kitai ari Jaku Petara. Uji pikirka mega pasal pemayuh utai ti dipelajarka kitai ari litaricha kitai tiap-tiap bulan. Rambai jaku ba Sekariah 8:9, 13 (bacha) disebut lebuh Rumah Sembiang ba Jerusalem benung didirika baru, taja pia rambai jaku tu agi ulih dikena kitai kemaya hari tu.

11 Jehovah mega ngeringka kitai nengah utai ti diajar ke diterima kitai ba gempuru Kristian, gempuru besai sehari, gempuru besai pelilih menua sereta ba sekula teokratik kitai. Utai ti diajar nya ulih nulung kitai gawa ke Petara enggau tuju ti betul, netapka juluk ati sereta bejalaika mayuh tanggung pengawa Kristian kitai. (Mas. 119:33) Kati nuan keran deka ngulihka pengering ari utai ti diajar Jehovah?

12. Nama enda tau enda digaga kitai ngambika mengkang kering?

12 Jehovah nulung nembiak Iya ngalahka orang Amalek enggau orang Etiopia, lalu Iya meri Nehemiah enggau orang Judah pengering kena nembuka dinding kuta Jerusalem. Baka nya mega, Petara deka meri kitai pengering kena neruska pengawa nginjil kitai, taja pan kitai bisi pengirau, diperinsa tauka orang enda entu beminat enggau pesan ke dibai kitai. (1 Pet. 5:10) Jehovah enda ngena kereja ajih muai penanggul kitai. Tang kitai enda tau enda ngereja ungkup diri. Baka ni? Kitai patut macha Bup Kudus ninting hari, nyediaka utai ke dikena begempuru sereta datai begempuru ninting minggu, terus belajarka Bup Kudus kediri empu sereta belajarka Bup Kudus ba diri sebilik, lalu bepanggai ba Jehovah dalam sampi. Kitai anang nejuka sebarang utai ngelimpangka kitai ari utai ke udah disediaka Jehovah kena ngering sereta meransang kitai. Enti nuan ngasaika jari diri udah lelak ba siti-siti pekara tu, pinta meh tulung ari Petara. Udah  nya, peratika baka ni roh kudus Petara “bekereja dalam kita ti ngasuh kita deka sereta ulih ngereja utai ti ngerinduka ati Iya.” (Plp. 2:13) Kati nuan ulih ngeringka jari orang bukai?

NGERINGKA JARI KE LELAK

13, 14. (a) Baka ni seiku menyadi Kristian lelaki dikeringka pengudah bini iya mati? (b) Baka ni kitai ulih ngeringka orang bukai?

13 Jehovah meri kitai bala menyadi Kristian ke ngembuan pengibuh di serata dunya. Sida ulih meransang kitai. Rasul Paul madahka: “Kedarka jari kita ti lelak, lalu keringka patung kita ti lemi, lalu gaga jalai kita rurus.” (Heb. 12:12, 13) Mayuh orang Kristian keterubah bulih tulung ke baka nya ari bala menyadi Kristian sida. Sama mega kemaya hari tu. Peratika siti chunto. Pengudah seiku menyadi Kristian lelaki mati bini, lalu natka pemedis bukai, ku iya madahka: “Aku belajar, kitai enda ulih milih penguji kitai, tu nyengkaum kemaya sereta ni penyuah utai nya nyadi. Sampi sereta belajarka Bup Kudus kediri empu udah nyadi jikit penyelamat ke ngasuh pala aku mengkang ba atas ai. Lalu sukung ari bala menyadi Kristian udah mai mayuh pengelantang ngagai aku. Udah nya aku nemu, ngemansangka kaul ti manah enggau Jehovah sebedau penusah nyadi nya utai ti beguna.”

Tiap iku orang ba gempuru ulih meransang orang bukai (Peda genteran 14)

14 Aron seduai Hur nulung ngeringka lengan Moses enggau chara nuat kedua-dua lengan Moses lebuh sida beperang ngelaban orang Amalek. Kemaya hari tu, kitai mega ulih ngiga chara kena nyukung sereta nulung orang bukai. Sekeda bala menyadi Kristian kitai merinsa ketegal tuai umur, penanggul ba pengerai, napi pemerinsa ari diri sebilik, berasai sunyi, tauka lenyau orang  ti dikesayauka. Kitai mega ulih ngeringka orang ke biak, ngambika sida enda ngereja utai ti salah tauka ngiga pemujur ba dunya tu. (1 Tes. 3:1-3; 5:11, 14) Giga chara kena ngayanka pengibuh ti bendar ngagai orang bukai ba Palan Gempuru, ba pengawa nginjil, lebuh begulai makai tauka lebuh nuan bejaku ngena telefon.

15. Baka ni jaku ti manah ulih nulung bala menyadi Kristian kitai?

15 Pengudah Asa menang besai ngelaban raban soldadu Etiopia ke besai, ku nabi Asariah meransang iya sereta rayat iya: “Tang kita enda tau enda kering, lalu anang lemi semengat. Kita deka nerima upah ke pengawa ti dikereja kita.” (2 Ban. 15:7) Tu meransang Asa ngaga mayuh ubah kena mulaika sembah ti bendar. Baka nya mega, jaku nuan ke manah ulih meransang sereta nulung orang bukai ngambika terus gawa ke Jehovah. (J-lam. 15:23) Lalu anang enda ingat, bala menyadi Kristian ulih dikeringka lebuh nuan meri komen ti meransang maya begempuru.

16. (a) Baka ni bala tuai gempuru ulih neladan Nehemiah? (b) Baka ni bala menyadi Kristian udah nulung nuan?

16 Enggau tulung ari Jehovah, jari Nehemiah enggau orang Judah dikeringka. Sida ulih nembuka dinding kuta Jerusalem dalam kandang 52 hari aja! (Neh. 2:18; 6:15, 16) Nehemiah ukai semina ngemataka orang ngereja pengawa nya. Tang iya empu sama nulung ngaga dinding kuta Jerusalem. (Neh. 5:16) Pia mega, mayuh bala tuai gempuru neladan Nehemiah lebuh sida sama nulung ba projek nirika bengunan tauka meresi sereta ngintu Palan Gempuru. Bala lelaki ke bepengerindu tu mega ngeringka bala menyadi Kristian ke “lemi semengat” enggau chara ngabas sida sereta gawa enggau sida ba pengawa nginjil.—Bacha Isaiah 35:3, 4.

“ANANG LEMBUT TULANG!”

17, 18. Lebuh kitai napi penusah tauka pengirau, kitai ulih pechayaka nama?

17 Lebuh kitai sama bekereja enggau bala menyadi Kristian, tu negapka penyerakup kitai. Tu mega nulung kitai ngemansangka kaul ti meruan sereta ngeringka pengarap kitai ba berekat ari Perintah Petara ke deka datai enda lama da agi. Lebuh kitai ngeringka jari orang bukai, kitai nulung sida tan natka penanggul sereta mengkang ngembuan pengadang ti manah ke jemah ila. Nambahka nya, ngeringka orang bukai nulung kitai ngasaika utai ti disemaya Petara ke kitai jemah ila nya nyata.

18 Lebuh kitai berundingka pasal chara Jehovah udah nulung sereta nyaga bala nembiak Iya ke tetap ati kelia, pengarap enggau pengandal kitai ba Iya dikeringka. Nya alai, lebuh nuan napi penusah sereta berasai irau, “anang lembut tulang!” Nuan ulih pechaya, enti nuan besampi minta tulung ngagai Jehovah, kuasa Iya ti besai deka ngeringka sereta ngiring nuan ngagai berekat ari Perintah Petara ke deka datai jemah ila.—Mas. 73:23, 24.